Mere Apne

Us din bahut tez barish ho rahi thi. Maa mujhe baar baar office jane ke lie mana karti rahi. Par main office jana chahti thi. Nahi! Aisa koi zaruri kaam nahi tha mujhe, bas main ghar se, aur ghar walon ki baaton se dur jana chahti thi.


Wajah shayad meri umr ke har log jante hi honge. Shadi! Han shadi. Pata nahi humare parents aur relatives ko shadi ke alawa kuch sujhta hi nahi hai. Har waqt bas shadi. Mere sapne, mere dreams ki unhe koi chinta nahi. Wo sirf society me apni image kaayam rakhna chahte hain. Par mujhe samajh nahi aata aisi image rakh kar unhen milega kya? Aur main kaise kisi aise insan se shadi kar sakti hu jisse main usi din pehli baar mili hu. Sirf 15 minute me main kaise ye pata laga sakti hu ki wo insan mere sath zindagi jeene layak hai bhi ya nahi. Maa baap kehte hain ki anjaan logon se dur raha karo, unse baat mat kia karo, yeh khatarnak ho sakta hai aur last me khud hi apne bacchon ko anjaan logon ke hawale kar dete hain. Ye kahan tak sahi hai?
Us din main zid karke office chali to gayi par wapas aa kar maine maa se bahut daant suni. Aur iska result yeh hua ki usi weekend meri do ladkon ke sath meeting fix kara di gayi, wahi shadi ko lekar. Main maan to gayi thi, par maine bhi shart rakhi thi ki main show piece ki tarah khud ki exhibition nahi karwane wali. Main pehle ladke se milungi agar mujhe wo sahi laga to aap log uske ghar walon se mil sakte hain. Maa papa maan gaye.


Ab ek ladke se mujhe Saturday ko milna tha aur ek se Sunday ko. Kitni ajeeb baat hai na… Yeh aisa hai jaise hum koi TV ya fridge khareedne ja rahe ho, aaj is dukaan par to kal us dukaan par.


Pehle ladke se baat karke mujhe yeh samajh aa gaya tha ki iski aur meri to bilkul nahi banne wali. Hum bilkul poles apart the. Pata nahi kisne yeh kahawat banayi hai, “Opposite Attracts.” Chumbak ka rule insan ki life me fit kar rahe hain, aisa bhi bhala hota hai kya?


Maine maa ko ghar jate hi us ladke ke lie na kehne ke lie bol dia tha. Aur main try kar rahi thi ki wo dusre ladke se milne ke mujhe na force kare. Par… Aisa ho sakta hai kya ki maa apni baat manwaye bina mujhe chhod de?

Agle din bhi tyar hoke main ladke se milne gayi. Par wo mulakat kuch alag thi. Jab usne mujhe dur se aate hue dekha to wo apni kursi se khada ho gaya. Jab tak main uske paas nahi aayi wo khada raha. Usne mujhse kaha, “Hi! I am Shubh.”
Maine usse kaha, “Hello! I am Vartika.”
Hum dono baith gaye aur humare beech baate shuru hui. Formal introduction ke baad usne mujhse mere baare me baat karni shuru ki. Meri life, mere interests, mera office. Jab main pehle ladke se mili thi to wo mujhe apne baare me bata raha tha, yeh mujhse mere baare me puch raha tha. Aisa lag raha tha, jaise wo genuinely mujhe janne me interested ho. Dhire dhire humari baate kab personal chizon par pahunch gayi hume pata hi nahi chala. Usne mujhse kaha, “Meri papa mere bahut piche pade the, mujhe yahan bhejne ke lie.”
Maine kaha, “Meri bhi maa har time mere piche padi rehti hain. I swear, parents ko aur koi kaam nahi hota bas bacchon ki life me interfere karne ke alawa.”
Usne mujhse kaha, “You know pehle main bhi yahi sochta tha. Par fir papa ne mujhe samjhaya ki yeh interference nahi unki care hai.”
“Han par yeh care hume baandh deti hai. Yahan mat jao, yeh mat karo, wo mat karo.”
“Yeah! I agree…… To tumhara arrange marriage ka mann nahi hai?”
“Nahi! Mujhe arrange marriage ka funda samajh nahi aata. Kisi ke sath ek meeting me kaise decide kar sakte hain ki iske sath lifetime rehna hai?”
“Yeah! But you know aaj kal parents bhi open minded ho gaye hain. Ab unhone hum dono ko pehle milne ke lie bhej dia, iska matlab mere aur tumhare dono ke parents open minded hain. Aur mere shayad thode jyada hain kyunki unhone mujhe ek month ka time dia hai. Agar tum chaho to apne parents se baat kar sakti ho, hum ek month tak mil sakte hain aur decide kar sakte hain ki hume sath rehna hai ya nahi.”
Shubh ki is baat par mujhe kuch samajh hi nahi aaya ki main kya bolu. Usne mujhse fir kaha, “Bolo! Kya soch rahi ho.”
Maine usse kaha, “Han! Main unse baat karke bataungi.”
Aur fir Shubh ne kuch aisa kaha jisne mujhe sochne par majboor kar dia. Usne kaha, “You know Vartika… Parents aur humari generation same nahi hai. To thoda hume unhe samjhna padega aur thoda wo hume samjhenge. Yeh balance dono taraf se banna chahiye. I dont know main yeh tumhe kyun bol raha hu. Par maine apne friends ko bhi dekha hai wo parents se apni problems share karne se pehle hi yeh maan lete hain ki wo unhe nahi samjhenge. Hume ek baar try to karna hi chahiye. Han… Kuch parents hote hain jo bacchon ko nahi samajh pate par hum shayad lucky hain. Ek baar try zarur karna.”
Yeh kehke usne choti si smile di. Aur fir bola funda kuch jyada ho gaya lagta hai. Uski is baat par main bhi muskura di.


Ghar par aane ke baad jab maine maa aur papa ko Subh ki kahi ek mahine tak milne wali baat batayi to unhone mujhe bina kuch sawal jawab kie han keh dia. Tab maine socha ki subah bhi mere ek baar kehne par hi un dono ne mujhe Shubh se pehle milne ki permission de di thi. Aur fir maine Shubh ki baat par gaur kia. Usne sahi hi to kaha tha. Main aaj tak apne parents ko galat samjhti aayi thi. Mujhe laga tha ki parents kabhi kuch nahi samajh sakte. Maine aksar movies me bhi aisa hi dekha tha ki parents kabhi kuch nahi samjhte. Par jab aazmaya to sab ulta nikla.

Us din ke baad se maine Shubh ki di advice ko mana. Har baar yeh sochne ki bajaye ki parents kabhi kuch nahi samajh sakte, apne parents se baat karne ki koshish ki aur unhone bhi mujhe samjha.


Mujhe samajh me aa gaya tha ki mere maa papa mere apne hi hain jo mera acha hi chahte hain. Han ho sakta hai ki unki aur meri soch na milti ho par us soch ko hum kisi beech ke raaste par le kar aa sakte hain. Bas thoda hum unhe samjhe aur thoda wo hume.


Rahi baat Shubh ki to use main shadi ke lie kaise mana kar deti jisne mere maa papa ke sath mere rishte sudhar die. Hum dono ab happily married hain aur humari ek chhoti si beti bhi hai.


Doston! Ho sakta hai hum bhi Vartika ki tarah yahi galati kar rahe ho. Hum bhi yahi soch rahe ho ki humare parents hume nahi samajh paenge aur islie humne unse distance maintain kar lia ho. Hume ek baar unse baat karne ki, unhe samajhne ki koshish zarur karni chahiye. Ho sakta hai wo bhi humse yahi chah rahe ho.


To agar aapko yeh kahani achi lagi ho aur is kahani se aapko kuch seekhne ko mila to ise like aur share zarur kare, jisse aur log bhi is kahani se kuch seekh sake.

Aapne apne parents ya apne bado aur apne beech se kaise is generation gap ko hataya yeh hume comment karke zarur bataye. Aisa zaruri nahi hai ki aap is kahani me dia hua rasta hi apnaye. Aap koi aur tarika bhi apna sakte hain. Karna kuch nahi hai, apne aur aapke aapno ke beech ki duri ko mitana hai bas.

Hum jald hi milenge agli kahani ke sath.

Tab tak…
Feel the Love…
Love the Zindagi…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s