E-2

Sushruta Samhita

Angrez kehte hain, ki unhone Bharat me bahut development ki hai. Agar wo log na hote to Bharat ab tak usi purane taur tarikon se chalta rehta. Angrez humare desh ko farmers aur snake charmers ki zameen bolte hain. Par kya yeh sach me sach hai? Isi se juda hua ek fact main aapse share karna chahti hu. Jo yeh btaega ki hum Hindustaniyon ne unki wajah se bahut kuch paya hai ya Angrezon ne humare logon ki wajah se sab kuch paya hai?

Aaj hum baat karenge duniya ke pehle Plastic Surgeon ke bare me jinka naam hai Sushruta.

Baat us waqt ki hai jab angrez dhire dhire Bharat me apni pakad banane ki koshish kar rahe the. Tabhi unhe Bharat se ek khabar mili. Saal tha 1794, yeh khabar aisi thi ki Europe ke log achambhe me pad gaye the. Ye baat itni badi thi ki Europe ki ek magazine “Gentalmen magazine” me bhi chhapi thi. Baat yeh thi ki Bharat ke ek shehar Pune me, jo Maharashtra me hai, wahan ek kumhaar ne ek bail gaadi wale ki kati hui naak thik ki thi. Kaise? Plastic surgery karke. Us kumhaar ne, bail gadi wale ki mathe ki skin kaati aur use naak ki taraf palat dia. Matlab mathe ki skin sharir se judi hi hui thi aur zinda thi. Us skin ko naak par palatne ke baad usne usme jadi butiyan aur dawayi lagayi. Us bail gadi wale ko koi infection nahi hua aur uski naak bhi bilkul ache se jud gayi.

Is baat se Europe ke doctors ya scientists islie bechain the, kyunki wo log bhi is par bahut samay se kaam kar rahe the, par wo successful nahi ho pa rahe the. Wo achambhe me the ki Bharat ke ek kumhaar ne yeh kaam kaise kar dia.

Isi incident ke baad 1800 CE me “The Royal Institute of Surgery” banaya gaya. Aap samajh sakte hain ki yeh koi coincidence nahi tha. Is nose skin ko thik karne ke tarike ko study karne ke baad, ek angrez JC Carpue ne 2 successful operation perform kie, bilkul usi tarah se aur is mathe ki skin ko pataltne ko naam dia gaya, “Indian Flap.” Uske baad ek German ne bhi is tarike ko jana samajha aur use apni bhasha me translate kia. Usne ise naam dia “Rhino plastic”. Is par kayi shodh hue aur kayi papers bhi likhe gaye. Aur ye takneek wahan chal gayi.

Fir kareeb 100 saal baad, 1890 me, ek British fauji, Sir Hamilton St. Clair Bower ko ek manuscript mili, wo Brahmi lipi me likhi hui thi aur bhasha thi Sanskrit. Jab use translate karaya gaya to usme bilkul waisa hi tareeka use kia gaya tha, jaisa tareeka 100 saal pehle us kumhaar ne apnaya tha. Aur yeh manuscript thi Sushruta Samhita.

Britishers jo Bhartiyon ko har tarah se neecha dikhane chahte the, wo kaise maan lete ki jis technique ka istemaal karke wo log plastic surgery kar rahe hain wo technique Bharat me vikasit hui hai. To isilie unhone ek journal nikala, jisme unhone likha tha, “Yeh technique scientific hai, aur Science Indians ke bas ki baat nahi hai. Unhone yeh bhi kaha, ki yeh book, puri tarah se practical nahi hai, isme bahut hi sari errors hain aur yeh book humare lie useless hai.”

Matlab ek taraf se wo humare rishi dwara likhi gayi book se hi surgeries kar rahe hain aur dusri taraf usi hi book ke baare me ulta sidha chhap rahe hain. Sirf islie kyunki us book ko likhne wala ek Bhartiya tha. Par unki yeh baat jyada chal nahi payi kyunki kayi doctors ne yeh mana ki skin se related operations aur surgeries wo is book ke methods ko copy kar ke hi kar pa rahe hain.

Google ya Wikipedia par agar hum search kare to Sushruta Samhita kareeb 600CE ki hai, aur humare Sushruta Rishi kareeb 600BCE ke. Columbia University bhi yahi kehti hai aur hum log bahut khush ho jate hain, kyunki Bharat ko iska credit dia ja raha hai. Par ek tarah se yeh log hume behla rahe hain, kyunki Sushruta Samhita 600CE se bhi purani hai. Yeh samhita kareeb 3000 se 4000 BCE ki hai. Iska proof khud is Samhita me hi chhupa hua hai. Kyunki is Samhita me kuch aise naam hain jo Mahabharat kaal me the, aur Mahabharat me bhi kuch aise naam hain jo is Sushruta Samhita me hain. Aise aur bhi proofs hain jo is Samhita ko Mahabharat kaal ka batate hai. Par again Britishers ye kaise hone de sakte hain? Unke hisab se to History ki shuruaat hi 4000-5000 BCE se hui thi. Wo yeh kaise maan sakte hain ki isse pehle Bharatiyon ne kuch kar bhi lia tha. In sab chizon se ek chiz to zahir hoti hai, ki hum sirf kuch hazar saal purani sabhyata nahi hain, balki hum hazaaron saal purani sabhyata hain. Jise aaj tak log jhuthlaate aaye hain. Sirf islie ki wo yeh maan nahi sakte ki aisi bhi koi sabhyata hai jo unse kayi saal pehle se wo chize janti thi jo ye aaj khoj kar nikal rahe hain. Jo yeh janti thi ki Dharti se Suraj ki doori kitni hai? Jo yeh janti thi ki is duniya me kitni species yani yoniyan hoti hain. Jo yeh janti thi ki Suraj Prithvi ke nahi balki Prithvi Suraj ke chakkar lagati hai. Jinhone Ayurved se na jane kab se kitni bimariyon ke ilaaj kar die jo wo ab khoj kar nikal rahe hain. Jo log aaj samajh rahe hain, wo na jane kab se hamare granth aur vedon me likha hua hai. Par humari yeh aadat ho gayi hai ki jab tak western log humari hi discover ki hui chizon par apna thappa na laga de, tab tak hum use sach nahi mante. Yeh humari hi kami hai jo hum khud par, khud ke itihas par bharosa nahi karte, aur jab dusre log use maan lete hain tab use sach mante hain. Aisa kyun hai? Kabhi socha hai aapne? Kyunki in logon ne jab humare desh par kabza kia tha, tab humari soch par bhi kabza kar lia tha. Hum khud ko itna kamzor aur neecha samjhne lage ki hum khud par aur apni sanskriti par vishwas karna hi bhul gaye.

Aaj hume zarurat hai khud par fir se vishwas karne ki, khud ko fir se aage badhane ki, is duniya ko fir se apni taakaq dikhane ki. Uske lie hume zarurat hai apni neev ko pehchanne ki. Meri yahi koshish hai ki aapko apne Bharat ki sahi aur gauravshali sanskriti ke baare me bata saku.

Jai Hind….

Vande Bharat!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s