AITIHASIK (E-1)

Kailash Mandir

Namste Satsriakal Adaab!

Aitihasik me aap sabhi ka swagat hai. Main hu Neeti Gupta aapki host aur dost. Aaj main aapke samne Bharat ki ek dharohar ke bare me baat karne ja rahi hu, jiske bare me jaankar sirf Bharat ko hi nahi balki bahari logon ko bhi achambha hai. Lekin afsos Bharat ke jyada log iske bare me nahi jante. Kyunki hume iske bare me bataya hi nahi gaya. Main aaj baat karne ja rahi hu Bharat ke ek aise monument ki jo duniya me apne aap me iklauta hai. To chaliye doston shuru karte hain aaj ka safar………

Doston! Aapne kabhi koi ghar bante dekha hai? Kitni mehnat lagti hai na ghar banane me. Eenton ko jod jod kar ghar banaye jate hain. Par agar aapko yeh pata chale ki eenton ko jod kar nahi logon ne pahadon ko tod kar bhi kayi imarate banayi hain? Ji han doston! Is tarah ki karigari karke banayi gayi buildings ko rock cut monuments bolte hain. Aur kyunki ye ek pahad ko kaat kar banayi jati hain islie ise monolithic rock cut monuments kaha jata hai.

Duniya me aisi kayi imaratein hain, par sabse anokhi imarat hai, Maharashtra ka Kailash Mandir. Yeh iklauta aisa mandir hai jo cut out techniques se banaya hai. Iska matlab hai ki baki monuments jo pahadon ko kaat kar banaye gaye the wo sabhi pahad ko samne se kaat kar banaye gaye the. Par yeh puri duniya me ek aisa iklauta mandir hai jo ek pahad ke upar se banana shuru kia gaya tha. Matlab sabse pehle iski sabse upar wali manjil bani thi, uske baad dusri manjil aur sabse aakhir me iska ground floor banaya gaya tha.

Sochiye ek pahad, yani parbat yani mountain ko toda gaya upar se niche aur us pahad se ek mandir banaya gaya, upar se niche ki taraf.

Aap khud hi sochiye eent se jod kar ghar banane me hi hume kitna waqt lag jata hai. Yeh mandir ek pahad ko upar ki taraf se kaat kar banaya gaya hai. Yeh lagbhag namumkin sa kaam hai. Tabhi to kuch log maante hi nahi ki yeh mandir insaano ne banaya hai.

Aap log soch rahe honge ki aisa kya anokha hai is mandir me bas pahad ko kaat kar hi to banaya gaya hai. Par aap bhul rahe hain ki jis waqt yeh mandir banaya gaya tha us waqt log sirf chheni aur hathode ka prayog karte the. Jisse aise bhavya mandir ko banana namumkin sa hi lagta hai.

Kailash mandir, jaisa ki naam se hi samajh aata hai ki yeh ek Shiv mandir hai, jo ki Maharashtra ke Aurangabad shehar me Ellora ki gufaon me 16vi gufa me aata hai. Kaha jata hai ki yeh mandir Ellora caves me se sabse purana hai. Yeh mandir 2km me faila hua hai matlab sabhi Ellora caves me se yeh mandir sabse bada hai aur vishwa ke sabhi Shiv bhagwan ke mandiron me se sabse bada hai. Yeh Kailash parbat ko hi darshata hai. Kehte hain ise banate waqt logon ne yahi socha tha ki yahan par Kailash ke jaisa hi Bhagwan Shiv ka ek ghar hona chahiye.

Foreign ke kayi archeologists bhi yahan par aaye is mandir ko jaancha, ise explore kia aur wo log bhi is mandir ke baare me jaan kar ashchryachakit reh gaye. Is mandir ko banane me kareeb 18 saal lage the. Is mandir ko banane ke lie isme se jo malba nikala hoga wo kareeb 400,000 ton tha. Achambhe ki baat yeh hai ki is mandir ka malba aas paas ke kisi bhi ilaake me kahin nahi paya gaya. To itna sara malba gaya kahan? Aur us waqt kaise is malbe ko ek jagah se dusri jagah le jaya gaya hoga? Iske baare me logon ne hisab bhi lagana chaha to bhi wo hairan kar dene wala tha. Kyunki agar 18 saal me yeh mandir bana hai aur is mandir me lage mazdooron ne agar har roz 12 ghante bhi kaam kia hoga, wo bhi sirf is malbe ko nikalne ke lie. Isme unhone jo nakkashi aur karigari ki hain, jo murtiyan banayi hain, wo abhi hum is calculation me nahi le rahe hain. Is hisab se agar 400,000 ton ko 18 se divide kia jaye to hume milega 22, 222 ton. Iska matlab 22,222 ton har saal is mandir se nikalne wala malba tha. Aur ab hum is 22,222 ton ko 365 se divide karenge to hume ek din ka malba milega, jo hai, 60 ton. Matlab 60 ton rocks ek din me is mandir se nikale gaye honge. Isko bhi agar hum 12 ghante ki shift ke hisab se dekhe to 60ton divided by 12 hours, means har ek ghante me 5 ton rocks ya patthar. Agar hum 24 ghante ki shift bhi lagaye tab bhi 2.5 ton malba ek ghante me nikalna jana hairani ki baat hai. 2.5 ton matlab 2.5 hazar kg malba ek ghante me. Aur is malbe ka kahin naamo nishan nahi hai. Hai na yeh kitna bada ajooba? Aur kya yeh kaam aaj ke time me hum kar sakte hain? Bikul nahi, to tab un logon sirf chheni aur hathode se yeh sab kaise kia hoga? Kya karigaron ne din raat bina ruke kaam kia tha? Kya unhe bhookh pyas nahi lagi thi? Kya jis samay yeh mandir bana tha us waqt na barish hui, na koi toofan aaya aur na hi koi yuddh hua? Yeh kaise ho sakta hai? To yeh sab hua kaise? Koi iska jawab nahi de sakta.

Aapko ek aur chiz jaan kar hairani hogi, ki jaise Bharat ke har mandir ko todne ki koshish ki gayi thi, is mandir ke sath bhi aisa kia gaya tha. Aurangzeb ne lagataar 3 saal tak is mandir ko todne ke lie apne mazdoor bheje. Par wo is mandir ka kuch bigaad nahi paye. Wo 3 saal tak lagataar koshish karte rahe par kuch murtiyon ko hi shat vishakt kar paye. Aakhir me Aurangzeb me haar maan li aur is mandir ko todne ke mansoobe tyag die.

Is mandir ko banane me kitni planning ki gayi hogi aur kitne precision se yeh mandir banaya gaya hoga, yeh aap is mandir ko dekhne ke baad hi samajh paenge. Kyunki mandir ko upar se niche banaya gaya wo bhi ek parbat ko todte hue ya taraashte hue. Jab sabse upar ki manjil bani thi tab uske sath hi seediyan bhi banayi gayi aur uske sath hi is mandir ki ek imarat ko dusri imarat se jodne ke lie pull bhi bananye gaye. Is sab ki planning pehle se hi ki gayi hogi kyunki yeh mandir jod kar nahi tod kar banaya gaya hai.

Bade hi adbhut dhang se is mandir ki murtiyan aur kalakritiyan banayi gayi hain. Is mandir me aapko Ramayan aur Mahabharat ke depictions bhi dekhne ko milenge aur yahan milenge aapko Kailash parbat par viraajmaan Bhagwan Shiv jinke aaradhna Ravana kar raha hai. Jo Bhagwan Shiv ko ek ek kar ke apne sir arpan kar raha hai. Mandir ke garbhagriha me hai Bhagwan Shiv ka ek bhavya Shivalinga. Mandir ki deewaron par to shilp kala hai hi, sath me mandir ki chhat yani ceiling par bhi kala ka adbhut pradarshan kia hua hai. Sochiye kisi karigar ne kis tarah se mandir ki chhat par Shiv ko tandav karte hue darshaya hoga?

Itni saari anokhi chize ek hi mandir me aur fir bhi yeh mandir humari kitaabon me nahi hai. Aur agar hai bhi to bas ek line tak seemit. Aisa kyun hai yeh to wahi jane jinhone humari kitaabe likhi hain. Yeh mandir itna adbhut hai ki foreign archeologist to yeh tak mante hain ki ise insaan ne nahi swam bhagwan ne banaya hai, kyunki aap to jante hi hain ki wo humare Shiv bhagwan ko Alien kehte hain. Foreigners ke lie humare sare bhagwan alien hi hain kyunki wo kabhi unhe thik se janta hi nahi hai.

Is mandir ki ek mysterious aur rehasymayi baat yeh bhi hai ki is mandir me jagah jagah par surange hain par wo surange aage jane ke baad patli aur patli hoti jati hain. Itni patli ki koi insan usme ghus na paye. Par agar itni patli surang hai, to jisne bhi ye surange banayi hain usne yeh sab kaise banaya hoga? Hai na yeh bhi hairani ki baat?

Logon ka manna hai ki yeh surange mandir ke niche jati hain jahan ek duniya purane rishi muniyon ne banayi thi, apni tapsya aur shodh karne ke lie.

Kya sach hai aur kya jhuth yeh to main nahi janti par yeh zarur janti hu ki yeh mandir manav ka banaya hua ek ajooba hai. Jo koi bhi ise dekhega wo hairani se bhar jaega. Islie doston main aapse bhi kehti hu ki ek baar is mandir ko dekh kar zarur aaiye. Apni desh ki dharohar ko janne ka isse acha mauka pata nahi fir kab mile. Lekin han, corona ek khatam hone ke baad hi jaiyega.

Doston! Aise kayi mandir, kayi jagah, kayi ghatnaye aur kayi mahan log hue hain humare itihas me jinke bare me hum tinka bhar bhi nahi jante. Humare bacchon ko History padhayi jati hai sirf course complete karne ke lie, islie nahi ki wo apne desh ko jane,us par gaurav kare. Meri is koshish me aap mera sath de aur mere sath jude rahe. Main aisi hi baatein aapke samne laati rahungi.

Abhi aapse vida leti hu, aapse fir mulakaat hogi ek naye episode ke sath…

Tab tak…

Jai Hind!

Vande Bharat!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s