Zara Thehro

Kabhi kabhi sochti hu ki humne zindagi ko thik se jiya hi nahi hai. Roz subah utho, nahao, kaam par jao, office ke AC me baith kar ghanton kaam karo, boss ki jhikjhik suno, colleagues ki politics dekho, wapas ghar aakar do char programme TV par dekhte hue khana khao aur so jao. Yeh humari aaj ki life ho gayi hai. Par kya sach me yahi life hai?

Mere hisab se life kuch aur hi hai jo hum kabhi samajh hi nahi paye. Aap bhi try kar sakte hain, shayad aap bhi life ko dhoondh hi le. Kaise? Wo main batati hu:-

Subah jab suraj aasmaan me chadhta hai uske sath hi utho. Na! Yeh yoga ke baare me nahi hai. Han! Yoga bhi zaruri hai par yeh zindagi ko aaj aur abhi mehsoos karne le lie hai. To subah suraj ke sath uthiye. Mere khayal se aaj kal sabhi ke gharon me balcony hoti hain. Agar balcony nahi hai to chhat par ja sakte hain. Kuch nahi karna, sirf ek kursi lekar baith jana hai.
Kya aapko kuch dikh raha hai? Suraj ki laal roshni se aasmaan laal hai. Suraj ki roshni hai par aakhon aur sharir ko chubhne ki bajaay rahat de rahi hai. Aasmaan me dhundhle se baadal bhi dikh rahe hain. Arey! Yeh kya? Suraj ke sath chaand bhi dikh raha hai. Raat ke keet-patangon ki aawaz ke sath chidiyon ki chehchahahat bhi hai. Aapko door khade ped dikh rahe hain? Unke patte subah ki hawa ke sath lehlaha rahe hain. Aur paas ke ped par yeh ajeeb se pakshi kaun hai? Ise to maine pehli baar dekha hai. Yeh lo, uske sath me dusra pakshi bhi aakar baith gaya. Aur yeh kya? Bijli ke taaron par do gilehriyan pakdam pakdayi khel rahi hain. Samne wale ped par jaamun ke phal aane lage hain. Abhi ye hare hain, dhire-dhire jaamuni ho jaenge, par mujhe to yeh baat aaj hi pata chali hai ki jaamun pehle hare hote hain.
Balcony ke samne hi ek stadium hai, wahan ab dhire dhire log judne lage hain. Wo roz subah ghumne aur kasrat karne aate hain. In sab chizon ko dekhte hue hi na jane suraj kab itna badh gaya aur chaand gayab ho gaya. Suraj ki chamak ab tez hone lagi hai. Wo us ped ke patton me se jhank raha hai.
Sabhi log apne kaamo me lage hue hain aur main unhe dekh rahi hu. Bilkul chup, bilkul shant, bina kisi se koi baat kie, main ghanton aise hi baith sakti hu, is parakriti aur iske anokhepan ko nihaarte hue.

Kuch logon ko lagega ki yeh pagalpan hai, mujhe aur koi kaam dham nahi hai. Par ek baar apni busy life me waqt mile to yeh karke zarur dekhna. Aas paas nazaare na bhi ho to khula aasaman zarur milega. Jisme aap hazaron chize khoj sakte hain, bas wo dekhne ki nazar chahiye.
Doston! Mere hisab se zindagi yahi hai. Apni zindagi ko kuch der ke lie rok kar, un chizon ko dekhna, un chizon ke sath waqt bitana, jinke sath yeh lage ki, Zindagi! Yahi to hai.

Is soch ko meri awaz me suniye yahan:

AITIHASIK (E-1) RECITAL MEMORIES

4 thoughts on “Zara Thehro

  1. Shayad zindayi aur kamyabi ki daud ne hume apno se aur prakriti se thoda due dhakel diya hai. Hum cheze notice karna bhool jate hain. Bhool jate hai hum isi prakiti se jude huye hai, isi me pale badhe aur inhi me mann lagta hai, sukun aur shanti milti hai. Hume acha laga ki apne bhi meri tarah ye sab mehsoos kiya.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s