Kashmakash (E-14)

Episode-14

Recap: Jab Janhvi ne Mayank ko sach bataya to Mayank ko bilkul vishwas nahi hua. Use samajh nahi aa raha tha ki wo kya kare. Wo dobara Janhvi ko call karta hai aur fir se usse baat karta hai. Ye dono ki aakhiri baat hoti hai. Uske baad wo dono char saal baad mile hain. Wo dono ek dusre ke samne hain. Mayank Janhvi se uske baare me kuch sawal karta hai. Janhvi bhi badle me kuch sawal karti hai. Uske baad Janhvi apne station par utar jati hai. Mayank ki behen Anshika usse Janhvi ke baare me puchti hai, par Mayank use kuch nahi batata kyunki wo nahi chahta ki Janhvi ko koi bhi galat samjhe. Ab aage……..

Aaj Sunday ka din hai, yani chhutti ka din hai. Janhvi apne ghar me aaram se so rahi hai. Par uski neend khulti hai. Bahar gate par shayad koi doorbell baja raha hai. Wo badbadate hue jati hai, “Aaj mana kia tha doodhwale ko fir bhi aa gaya.”

Janhvi jakar darwaza kholti hai to samne usi orphanage ka ek ladka khada hai, jahan wo kaam karti hai aur uske sath khada hai Mayank. Janhvi hairan hai. Uske muh se bas yahi shabd nikalte hain, “Tum? Yahan kaise?”

Mayank uske sath khade ladke se kehta hai, “Ab to yakeen ho gaya na, ki mujhe ye janti hai.”

Mayank ke sath khada ladka Janhvi se kehta hai, “Ma’am! Aap inhe janti hain?”

Janhvi: Han!

Wo fir Janhvi se puchta hai, “Aapko koi problem to nahi hai na in se? You are safe?”

Janhvi: Yes! I am safe.

Wo ladka kehta hai, “Okay! Then you both can continue, I am going.”

Mayank: (muskurate hue) Thanks!

Janhvi Mayank ko hairani se ghur rahi hai. Mayank Janhvi ki is nazar ko janta hai. Wo aisa tabhi karti hai jab uske sath kuch unexpected hota hai aur use bahut sare sawal karne hote hain. Mayank Janhvi se kehta hai, “What?”

Janhvi uski tarah Mayank ko dekhte hue kehti hai, “Why are you here?”

Mayank: Ab tumne nahi bulaya to main hi aa gaya. Waise tumhe mujhe invite karna chahiye tha, hum itne din baad mile the. Aur dekho andar aane ke lie bhi nahi bol rahi.

Janhvi: Andar aao.

Mayank ghar ke andar aa jata hai. Janhvi darwaza band kar deti hai. Mayank ghar ko dekhta hai aur kehta hai, “Nice house.”

Janhvi: Thanks!

Mayank: Aur kaun rehta hai yahan?

Janhvi: Bas main.

Mayank: (hairani se) Why?

Janhvi: Bas aise hi……. Tum batao. Tum yahan kyun aaye ho?

Mayank: Ab mujhe laga ki check karna chahiye ki tum is baar bhi sach bol rahi ho ya nahi? Mujhe baar baar dhokha khana pasand nahi.

Janhvi: Hmmm! Ye bhi thik hai. Parrr…….. subah 7 baje?

Mayank: Socha tumhare koi plans na ho, islie pehle hi chala jau jisse tum apne baki sare plans cancel kar do.

Janhvi: Aur main aisa kyun karungi?

Mayank: For old times’ sake?

Janhvi: Don’t worry mere koi plans nahi hain.

Mayank: Hote to cancel karti?

Janhvi Mayank ke is sawal ko nazarandaz karte hue usse dusra sawal puchti hai, “Orphanage kyun gaye the?”

Mayank: Tumhara address chahiye tha. Par wo dene ko ready hi nahi the. Bahut mushkil se manaya hai maine unhe. Tab unhone mere sath wo ladka bheja aur main yahan aa paya.

Janhvi: Kyun aana tha tumhe?

Mayank: Main janna chahta tha tum kaisi ho.

Janhvi: Pani loge?

Mayank: No! I am okay.

Janhvi: Tumhe wait karna padega, main thodi der me aati hu.

Mayank: Kahan ja rahi ho?

Janhvi: Nahane….

Mayank: Okay! I am waiting here.

Janhvi apne kamre me chali jati hai. Mayank ab Janhvi ke ghar me ghoom raha hai aur dekh raha hai ki kis tarah Janhvi ne apne ghar ko sambhala hua hai. Janhvi ke paas wo kuch chize aaj bhi hain jo kabhi Mayank ne use gift me di thi aur wo usne apne ghar me sajayi hui hain. Mayank ye sab dekh kar khush hota hai. Janhvi ki kuch tasveer ab orphanage ke bacchon aur uske staff ke sath hain, jinme wo khush nazar aa rahi hai. Wo bahut baariki se sab kuch dekhta hai.

Kuch der baad Janhvi apne room se apne gile baal pochti hui bahar nikalti hai. Mayank samne hi sofe par baitha use dekh raha hai, magar nazar bacha kar. Janhvi Mayank ke samne aati hai aur kehti hai, “Coffee loge?”

Mayank: Hmmm!

Janhvi: Abhi aayi….

Mayank: Kyaaa? Main bhi aau?

Janhvi: Okay!

Mayank Janhvi ke sath uske kitchen me pahunch jata hai. Janhvi coffee bana rahi hai aur Mayank se puchti hai, “Nashta to karoge na?”

Mayank: Nashta? Main to khana bhi khaunga.

Janhvi use ghurti hai. Mayank dhire se hasta hai.

Mayank: Mujhe yaad hai jab tum kehti thi ki tum bahut hi spicy khana banati ho, to aaj mujhe wahi khana hai.

Janhvi: Par tumhe to spicy bilkul pasand nahi.

Mayank: Par maine kaha tha na ki tum banaogi to kha lunga.

Janhvi ab chup chap nashta banati hai Mayank wahi khada use dekh raha hai aur uski thodi madad bhi kar raha hai.

Mayank: To tum akeli kyun rehti ho?

Janhvi: To kiske sath rahu?

Mayank: Tumhare ghar wale hain na, tumhari mom, dad aur behen.

Janhvi: Divorce ke baad kisi ne bhi mujhe accept nahi kia.

Mayank: (achambhe me) What? Par kyun?

Janhvi: Kyunki meri shadi me main hi galat thi.

Mayank: Ye tum se kisne kaha?

Janhvi: (Pyaz kaatate hue) Sab ne… Kyunki mera shadi todne ka koi reason nahi tha. Sab kuch acha tha.

Mayank: Tum khush nahi thi.

Janhvi: Han! Par ye koi reason nahi tha. Body par marks dikhne chahiye, mann par chahe kitne bhi ghav kar lo.

Mayank: Fir?

Janhvi: Fir kya? Main apni baat par adi rahi to mere ghar walon ne keh dia ki bina wajah shadi tod kar aaegi to hum tujhe apne ghar me nahi rakh paenge.

Mayank: Ab kisi se koi contact hai?

Janhvi: Maa aur behen se…. Wo aa jate hain kabhi kabhi yahan, papa se jhuth bol kar.

Mayank soch raha hai ki Janhvi ne kitna saha hoga. Use pehle Mayank ne chhoda aur fir uske ghar walon ne bhi. Wo kitni akeli hogi us waqt aur wo us waqt uske sath nahi tha.

Tabhi Janhvi kehti hai, “Chale? Breakfast is ready.”

Mayank: (Apne khayalon me se nikal kar) Han!

Janhvi aur Mayank bahar jakar baith jate hain. Mayank nashte ka pehle tukda muh me dalta hai aur kehta hai, “It’s nice! Tum acha khana bana leti ho.”

Janhvi: Thanks!

Mayank dekh raha hai ki Janhvi ab bahut kam muskurati hai, wo pehle se bahut chup bhi hai. Pehle to wo bol bol kar Mayank ka sir kha jaya karti thi. Ab sirf utna hi jawab de rahi hai jitna Mayank usse puch raha hai. Shayad ye itne din baad milne ki wajah se bhi hai. Mayank yahi sab soch raha hai aur dobara Janhvi se kehta hai, “Aur coffee to bahut hi achi hai.”

Janhvi fir se bas ek hi shabd bolti hai, “Thanks!”

Mayank: Waise ek baat puchu?

Janhvi: Abhi tak kya kar rahe the?

Mayank: (muskura kar) Han! Puch hi raha hu tab se.

Janhvi ke chehre par ab halki muskurahat aati hai. Mayank ke dil ko ye dekh kar tasalli milti hai.

Mayank: Waise wo Preeti kahan gayi?

Janhvi: Kyun?

Mayank: Nahi! Meri shadi nahi ho rahi hai, koi achi ladki hi nahi mil rahi. Wo bhi achi thi. Main soch raha hu usi se mil lu.

Janhvi: Usse baat karni hai?

Mayank: Han!

Janhvi: Abhi uska number deti hu.

Janhvi: (Phone me Preeti ka contact dhundte hue) Waise tumhari shadi me kya problem aa rahi hai?

Mayank: Aaj kal is duniya me ladkiyan hain hi kahan dhang ki.

Janhvi: (Mayank ko dekhte hue) Achhaa…

Mayank: Tumhari nazar me koi ho to batao.

Janhvi: Preeti ka number… Ye lo….

Mayank: Ab bhi baat hoti hai usse tumhari?

Janhvi: Mujhe har kisi ne nahi tyaga hai.

Mayank: (Muskura kar) Tum aur tumhari Hindi nahi badli.

Janhvi: Aur tumhari faltu baatein….

Mayank: Madam! Kabhi marti thi aap inhi baaton par….

Janhvi: Aur ye dialogues bhi….

Janhvi ki is baat par dono hi haste hain.

Mayank: To tum marti nahi thi mere dialogues par?

Janhvi: Ohh please! Aisa kuch nahi tha. Dialogues to mujhe kabhi pasand nahi aaye tumhare.

Mayank: To kya pasand aaya tha?

Janhvi: Tum……… (kuch ruk kar) Tum ye sab baatein mat karo ab.

Mayank: Meri ye baatein ab pasand nahi tumhe?

Janhvi: Tum ye baatein kar kyun rahe ho?

Mayank: Nahi karni chahiye?

Janhvi: You were the person who didn’t want to see my face.

Mayank: Wo sab maine gusse me kaha tha. Tumne itni badi baat chupayi thi mujhse.

Janhvi: I know. Galati meri thi aur main us galati ko jee rahi hu. Mujhe jeene do.

Mayank: Kya hum dobara dost nahi ban sakte?

Janhvi: Nahi!

Mayank: Par kyun?

Janhvi: Kyunki main ab tumhe dost nahi samajh sakti. Tum mere lie dost nahi ho.

Mayank: Tum bhi mere lie dost nahi ho. Par hum dost ki tarah reh sakte hain.

Janhvi: Maine jhuthe rishte na pehle nibhaye hain aur na aaj nibha sakti hu. Han! Tumse jhuth zarur bola tha, par rishta saccha tha.

Mayank: Koshish karo. Aadat pad jaegi.

Janhvi: Mujhe aise hi rehne ki aadat pad gayi hai. Main ab aise hi rehna chahti hu.

Mayank: Main tumhe aise nahi dekh sakta.

Janhvi: Tumhe dekhne ki zarurat bhi nahi hai. Aaj aa gaye ho, aaj ke baad mat aana.

Mayank: Why are you so rude?

Janhvi: Tumhe yaad nahi main pehle bhi rude hi thi.

Mayank: Mere aane se badal gayi thi.

Janhvi: Mayank! Kya chahte ho? Main jaisi hu thik hu.

Mayank: Agar tum nahi milti to chhod deta shayad. Par ab nahi chhod sakta.

Janhvi: Mujhe kisi ki sympathy nahi chahiye.

Mayank: Janhvi! Main koi sympathy nahi dikha raha hu.

Janhvi: Kya chahte ho? Dosti karna? Usse kya hoga? Itni mushkil se maine khud ko sambhala hai, tum fir se wahi sab kyun yaad dilana chahte ho?

Mayank: Main apne parents ko manane ki koshish karunga.

Janhvi: Kis lie?

Mayank: Humare lie.

Janhvi: Koi zarurat nahi hai.

Mayank: Kyun?

Janhvi: Are you mad? Tumhe pehle maine sach nahi bataya tha par ab to tum sab jante ho na. Stop being so stupid.

Mayank: Mere parents maan jaenge.

Janhvi: Tumhe yaad hai jab maine tumhe sab kuch bataya tha to tumhara kya reaction tha?

Mayank ab chup hai.

Janhvi: Tum jo aaj ke ladke ho, tum jo modern ho, tumhe kitna fark pada tha isse. Tumhare parents ko nahi padega? Maine apni life me bahut rejections dekh lie hain. Ab ye sab drama main nahi chahti hu apni life me. Islie please ye sab band karo aur jao.

Mayank: Agar main unhe sach hi na batau to?

Janhvi: Tumhe lagta hai sach chupana itna aasan hota hai? Mujhe dekh rahe ho na. Main uska jeeta jagta example hu.

Mayank: Main manage kar lunga Janhvi.

Janhvi: Aur mere ghar wale kahan hain? Wo kyun nahi rehte mere sath? Iska jawab kya doge unhe?

Mayank: Mujhe nahi pata, par hum dono sath rahenge to ho jaega sab.

Janhvi ab wahan se jane lagti hai. Mayank uska hath pakad kar use rok deta hai.

Mayank: Please don’t go.

Mayank Janhvi ke kareeb aata hai. Uske baalon ko samet kar kaan ke piche karta hai. Uske maathe ko chumta hai. Janhvi ki aankhon se ab wo aansu nikal hi jate hain jinhe wo kab se roke baithi thi. Janhvi fir Mayank se dur hone ki koshish karti hai par Mayank use khud se dur jane nahi deta. Wo kehta hai, “Mujhe nahi pata kya hoga kaise hoga. Par hum kar lenge.”

Janhvi Mayank ki baat sun kar aur zor se rone lagti hai. Mayank use gale laga leta hai. Janhvi bhi use zor se pakad leti hai. Mayank uske gale lage hi bolta hai, “I missed you so much.”

Janhvi: I missed you too!

Mayank: I love you so much.

Janhvi: I love you too!

Dono alag hote hain. Janhvi ki aankhon me abhi bhi aansu hain. Mayank uske aansu ponchta hai aur kehta hai, “Tumhe pata hai jab tum roti ho na to tumhari naak lal ho jati hai.”

Janhvi Mayank ki is baat par rote hue has deti hai. Mayank uski naak par kiss karta hai. Mayank uske baad use apni baahon me aur kas leta hai aur uske hothon par apne honth rakh deta hai. Wo pal kuch der tham sa jata hai. Ye sab dono ne socha nahi tha, par wo dono hi itne saal ke baad apne emotions ko sambhal nahi paye.

Ab dono ke beech me sab kuch normal tha. Dono hi khush the. Dono has rahe the. Janhvi ne Mayank ke lie spicy khana bhi banaya jo Mayank ne badi mushkil se khaya. Khata kaise nahi, aakhir Janhvi ne jo banaya tha.

Sham ko vida lete waqt Mayank Janhvi se kehta hai, “Now, you don’t worry Janhvi. Main ghar par baat karunga.”

Janhvi: Ek baar fir soch lo Mayank.

Mayank: Soch lia hai.

Janhvi: Kab karoge baat?

Mayank: Ab wo jab bhi shadi ke lie bolenge main bol dunga ki tum ho mere sath.

Janhvi: Aur kaise manaoge unhe?

Mayank: Nahi mane to main bhi yahin aa jaunga.

Janhvi muskurati hai aur kehti hai, “Ab natak band karo aur jao.”

Mayank: Okay! Apna khayal rakhna. Aur call karu to utha lena.

Janhvi: Han!

Mayank: Okay! Bye!

Janhvi: Bye!

Mayank wahan se chala jata hai aur Janhvi apna darwaza band kar leti hai. Ye din dono ke lie hi khushi ka din hai. Wo itne saal baad bhi dobara mil gaye. Mayank ghar jata hai to ghar wale bhi aaj uski is alag si khushi ko dekh kar hairan reh jate hain. Par Mayank abhi unhe kuch batana nahi chahta. Wo chahta hai ki pehle wo Janhvi ko emotionally strong banne de. Isilie wo sab se sab kuch chupa leta hai.

Ab Mayank aur Janhvi ki roz baat hone lagi hai. Mayank ne Janhvi se is Saturday uske orphanage me milne ke lie kaha hai aur wo wahan jata hai.

Mayank wahan jakar reception par puchta hai, “Hi! I have came here to meet Miss Janhvi!”

Receptionist: Sorry sir! But Miss Janhvi has left the job yesterday.

Mayank hairan ho jata hai. Wo kehta hai, “Par wo kal tak to yahin kaam kar rahi thi.”

Receptionist: Yes sir! Wo kal hi chhod kar gayi hain aur han wo bol rahi thi koi aaega unke lie puchta hua to use ye envelope de dena.

Mayank receptionist se wo envelope le leta hai aur use jaldi se kholta hai. Usme likha hai……

“Hi Mayank!

Jab tak ye letter tumhe milega main yahan se bahut dur ja chuki hongi. I know tum soch rahe hoge ki main har baar tumhe aise hairan aur pareshan kyun kar deti hu. Maine tumhe bahut samjhane ki koshish ki par tum nahi maane. Pehli baar maine sahi waqt par sahi decision nahi lia tha aur uske lie aaj tak pachhta rahi hu aur shayad puri life hi main regret karne wali hu. Par ab main wahi galati dobara repeat nahi kar sakti. I am in very much pain while writing all this to you. Par hum ek dusre ke lie nahi bane hain. Main pehle yahi chahti thi ki tum mujhe accept kar lo. Mera shayad sabse bada sapna yahi tha ki main tumse shadi kar pau. Maine har waqt tumhara intezaar bhi kia. Lekin Mayank, hume humare aas paas ke logon ke sath bhi rehna hota hai. Main janti hu ki tum apne parents se kitna pyar karte ho. Tum mujhse bhi bahut pyar karte ho mujhe pata hai. Isilie ye silly ideas leke aaye the tum mere paas. Tum mere lie jo bhi kuch karna chaho, par main janti hu ki ye sahi nahi hai. Tumhare parents is baat ko kabhi accept nahi karenge. Jab tumhe hi ye sab accept karne me 4 saal lag gaye to wo shayad puri life nahi kar paenge. Aur main fir se wahi sab apni life me nahi dekhna chahti. Main ek buri shadi se nikali hu, main janti hu kitna mushkil hota hai. Main nahi chahti ki tumhe mujhe ya apne parents me se kabhi bhi kisi ek ko chunna pade. Main apna sab kuch kho chuki hu aur main nahi chahti ki tum bhi meri hi galatiyan dohrao.

I know tum bahut strong ho, you will manage. Ek achhi si ladki dekh kar shadi karna aur uske sath khush rehna. Main bhi yahi soch kar khush rahungi ki tumne mujhe finally maaf kar diya hai.
Is life me to hum nahi mil paenge. Ye kahani aise hi adhuri rehne do. Agli life me hum ise zarur pura karenge. And I promise you ki us waqt main tumse sirf sach bolungi….. Sirf sach…….

Yeah! Please don’t try to call me kyunki maine number change kar lia hai. Main ab Delhi se dur ja rahi hu jisse tum mujhe kabhi na mil pao. I think maine tumhari sari farmaishe puri kar di hain sirf ek farmaish ko chhod kar. Wo tumhari black saree wali farmaish…….. Ab next life ke lie bhi to kuch bachana hai na……

Ab jaldi se smile karo aur mujhe ek good bye hug bhi chahiye……….

I will miss you a lot…….
I loved you….. I love you…… And….. I will love you…….. Forever………

Tumhari Janhvi………..”

Mayank us letter ko padhte padhte hi rone lagta hai. Use padhne ke baad wo samne padi ek bench par baith jata hai aur zor zor se rota hai. Uske muh se sirf ek shabd nikal raha hai. Wo hai…… “Janhvi…….”

Mayank orphanage se bahar nikalta hai aur dekhta hai ki ek ladka aur ladki khel rahe hain. Wo bhi wahan jata hai aur unse puchta hai, “Bacchon tum Janhvi ko jante ho?”

Dono zor se ek sath bolte hain, “Han!”

Ladka bolta hai, “Aap Janhvi didi ke dost ho kya?”

Mayank: Han!

Ladki bolti hai, “Main to unko bahut miss kar rahi hu.”

Mayank: Main bhi…..

Ladki: Pata nahi wo kyun chali gayi. Wo mujhe bahut pyar karti thi.

Mayank: Mujhe bhi aisa hi lagta hai…..

Ladka: Pata hai wo isi bench par baith jati thi aur hum unke paas khelte the.

Mayank: (bench ke paas ja kar) Yahan?

Ladka: Han!

Mayank us bench ko dekhta hai, use chhuta hai, aur Janhvi ko sochta hai. Wo kuch der un bacchon ke sath Janhvi ki tarah hi khelta hai aur fir wo wapas apne ghar chala jata hai.

Janhvi ab kisi aur jagah, kisi aur shehar pahunch chuki hai aur bas soch rahi hai ki Mayank khush rahe. Use Mayank ke sath bitaye har pal yaad aa rahe hain. Wo Mayank ko kabhi bhul nahi paegi, par uske lie Mayank se alag hona hi sahi tha.

Janhvi ka ye faisla sahi tha ya galat pata nahi. Par wo apni zindagi me itni pareshaniyan dekh chuki thi, wo itna kuch sun chuki thi ki ab wo ye sab aur jhelna nahi chahti thi. Aur sabse badi baat, Janhvi ki wajah se ab ya to Mayank ko logon ki baatein sunni padti ya use khud ke ghar walon ko chhodna padta, jo Janhvi bilkul nahi chahti thi.

Janti hu ye mushkil hai, par is zindagi me kahaniyan puri hone se jyada adhuri reh jati hain. Ye kahani adhuri reh kar bhi puri hai kyunki dono ek dusre se pyar aaj bhi karte hain aur hamesha karte rahenge. Kyunki pyar karne ke lie kisi ka sath hona zaruri nahi, sirf us ehsaas ka hona zaruri hai jo aapke dil me uske lie hai aur wo Janhvi aur Mayank dono ke dilon me hai.

Isi tarah aap bhi apne pyar ko apne dilon me rakhiye aur use mehsoos karte rahiye…….

Hum ek nayi aur alag kahani ke sath fir se aapke paas hazir honge…….. Tab tak………

Take care of yourselves……….
&
Keep feeling the love…………… ❤

15 thoughts on “Kashmakash (E-14)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s