Kashmakash (E-13)

Episode-13

Recap: Janhvi ne Mayank ko sab bata diya hai. Mayank ne sab kuch janne ke baad Janhvi ki shakal dekhne ke lie bhi mana kar dia hai. Wo dono ro rahe hain, wo dono pareshan hain. Wo dono ek dusre se bahut pyar karte hain, par wo dono ek sath nahi aa sakte. Ab aage…….

Mayank ab khud ko sambhalta hai, apne aansu ponchta hai aur office me chala jata hai. Wo aaj kaam nahi kar pa raha. Janhvi ki har kahi hui baat uske dimag me goonj rahi hai. Use uski har wo baat yaad aa rahi hai jisme wo usse alag hone ka zikr karti thi. Use ab sab kuch saaf samajh aa raha hai ki wo kyun kehti thi ki uske jaane ke baad wo nahi reh paegi. Use Janhvi ka har jhuth dhire dhire yaad aa raha hai. Wo ab uth kar washroom me jata hai aur apna muh dhota hai. Uski aankhon me fir aansu aa jate hain. Uska mann kar raha hai ki wo sab kuch tod de aur bahut zor se cheekhe chillaye. Wo bolta hai, “Why did you do this Janhvi? Main kaise rahunga tumhare bina. Kitna mushkil hai ye sochna bhi ki tum ab meri life me nahi hogi.”

Uski aankhon se aansu rukne ka naam nahi le rahe hain. Wo Janhvi ko yaad kie ja raha hai aur roye ja raha hai. Wo Janhvi ko fir se phone karta hai par fir kaat deta hai. Kuch hi second ke baad Janhvi ka call Mayank ke paas aa jata hai. Mayank call kaat deta hai. Janhvi fir se Mayank ko call karti hai lekin Mayank phone nahi uthata. Wo fir se office se bahar chala jata hai aur ab Janhvi ko call karta hai.

Janhvi: Mayank!

Mayank: Han!

Janhvi: Tum thik ho?

Mayank: Tum pakka koi majak nahi kar rahi ho na?

Janhvi: Ye sach hai.

Mayank: (Khud ko sambhalte hue) Jab tumhari life me koi aur tha to mere sath wo sab kyun kiya?

Janhvi: Main kuch bhi nahi karna chahti thi Mayank. Sab kuch khud-b-khud hota chala gaya.

Mayank: Tumne ek baar bhi nahi socha ki mera kya hoga jab mujhe pata chalega?

Janhvi: Main to tumhe ye sab bina bataye hi jana chahti thi. Main apni wajah se tumhe kabhi hurt hote hue nahi dekhna chahti thi.

Mayank: To mat batati na mujhe. Kam se kam meri jo yaadein hain wo to na kharab hoti.

Janhvi: Koshish ki thi, par tum call par call karte rahe.

Mayank: Ab main kya karu batao?

Janhvi: Mayank! I….

Mayank: (aansu ponchte hue) Tumhe pata hai mere ghar walon ko tumhare baare me pata hai……. Ab kya bolu main unse? Ki main itna bewakoof hu ki ek married ladki ke sath ghumta raha aur mujhe kabhi shaq tak nahi hua.

Janhvi: Aisa mat bolo Mayank.

Mayank: To kaisa bolu? Shayad tum isilie mujhe har baat par idiot bulati thi…….. Tum sach me bahut intelligent nikali.

Janhvi: Maine tumhari hamesha respect ki hai.

Mayank: Mujhe bewakoof bana ke?

Janhvi ki har baat par Mayank ka ek sawal taiyar rehta hai. Kyunki wo toot chuka hai, use sach me samajh nahi aa raha ki wo kare to kya kare? Use gussa hai par uske sath hi kahin jyada Janhvi se alag hone ka dukh hai.

Mayank: Raghav naam hai na uska.

Janhvi: (jhijhakte hue) Han!

Mayank: Tumhe khush nahi rakhta wo?

Jab Janhvi ki taraf se koi jawab nahi aata to Mayank dobara puchta hai, “Bolo Janhvi!”

Janhvi: Is sab ko discuss nahi karna mujhe.

Mayank: Mujhe karna hai. Bolo…

Janhvi: Han! Main khush nahi hu is shadi me.

Mayank: To shadi todi kyun nahi ab tak?

Janhvi: Nahi tod sakti.

Mayank: Kyun nahi tod sakti?

Janhvi: Kyunki mere ghar walon par iska impact padega.

Mayank: Aur tum par jo iska impact pad raha hai?

Janhvi: Main aisa nahi kar sakti.

Mayank: Dekho! Janhvi tum intelligent ho, talented ho, tum ek achhi ladki ho. Tumne mere sath jo bhi kia uske baad bhi main ye keh raha hu kyunki main tumhe janta hu. Leave him and pursue your dreams.

Janhvi: Use chhodne ke baad tum meri life me aa sakte ho?

Mayank: Nahi!

Janhvi: To fir jaisa hai waisa hi thik hai.

Mayank: Apni life kharab mat karo.

Janhvi: Meri life….. Chhod do use jaisi bhi hai. You live your life and try to forget me as soon as possible.

Mayank: Maine kabhi nahi socha tha ki ye main tumse kabhi kahunga. Par ab to tumhare bina jeene ki aadat daalni padegi. I can’t accept you Janhvi because you broke my trust.

Janhvi: I know…. Par ho sake to mujhe maaf kar dena.

Mayank: I will try… agar kar paya to….

Janhvi: Take care Mayank!

Mayank: You too Janhvi….

Janhvi: So……

Mayank: So bye….. forever……

Ye keh ke Mayank phone kaat deta hai.

Ye Mayank aur Janhvi ki aakhiri baat thi. Us din ke baad na to Mayank ne kabhi Janhvi ko call kia aur na hi Janhvi ne Mayank ko. Aur aaj chaar saal baad Mayank aur Janhvi fir se ek dusre ke samne hain, usi tarah metro me.

Janhvi aaj tak Mayank ki yaadon ko samet kar jeeti aayi hai. Usne apne dard ko apna lia hai aur ye dard use pasand aane laga hai. Use raaton ko neend nahi aati, wo ghanton aise hi beeta deti hai. Aisa koi din nahi jata jab wo Mayank ke baare me nahi sochti. Use uske baare me yaad karke kabhi khushi milti hai to kabhi gham.

Today’s Day…….

Mayank aur Janhvi ek dusre ke samne khade hain. Mayank Janhvi ke kareeb jata hai aur kehta hai, “Sab kuch kaisa hai?”

Janhvi: (Mayank ko dekhte hue) Sab sahi hai.

Mayank: Wo main Anshika ko lene aaya tha.

Janhvi: Matlab?

Mayank: Uski shadi ho chuki hai aur kafi dino se ghar par nahi aayi thi, islie main lene chala gaya.

Janhvi: Ohh okay!

Dono ke beech ek ajeeb si khamoshi hai. Ye khamoshi aur jhijhak waisi hi hai jaisi unki pehli mulakaat ke waqt thi bas usme thoda dard bhi ghula hua hai.

Janhvi: Ghar par sab kaise hain?

Mayank: (muskura kar) Sab ache hain.

Janhvi: Anshika to tumse chhoti hai na.

Mayank: Han!

Janhvi: To tumhari shadi……

Mayank: (Janhvi ki baat puri hone se pehle hi) Nahi hui….

Janhvi: Kyun?

Mayank: Koi achi ladki nahi mili.

Janhvi: Okay!

Mayank: Raghav kaisa hai?

Janhvi: I don’t know.

Mayank: Why?

Janhvi: Ab hum sath nahi hain. We have separated.

Mayank: (muskura kar) To tumne meri baat maan hi li.

Janhvi: Tumne kabhi koi galat advice di hi nahi hai mujhe, islie socha maan hi leti hu.

Ye kehne ke baad Janhvi Mayank ki taraf dekh kar muskurati hai. aur Mayank bhi muskurata hai.

Mayank: To abhi bhi wahin job karti ho?

Janhvi: Nahi!

Mayank: Fir kahan?

Janhvi: Ek orphanage hai, wahin par hi padhati hu bacchon ko.

Mayank: (Hairani se) Why?

Janhvi: Bas aise hi… Mujhe acha lagta hai unke sath rehna.

Mayank: Kya naam hai orphanage ka?

Janhvi: Pariwar….

Mayank: Kahan par hai?

Janhvi: Laxmi Nagar…..

Mayank: Okay!

Wo dono baat kar hi rahe hain ki tabhi Janhvi ka station aa jata hai aur Janhvi Mayank se kehti hai, “Mera station aa gaya hai. Main chalti hu.”

Mayank use rokna chahta hai, par wo sirf bolta hai, “Okay! Take care.”

Janhvi: (muskurahat ke sath) You too….

Janhvi metro se bahar nikal jati hai aur Mayank bas use dekhta rehta hai.

Janhvi ke jane ke baad Anshika Mayank ke paas aati hai aur kehti hai, “Ye wahi hai na?”

Mayank: Kaun wahi?

Anshika: Jisse milne tu jata tha, aur tune iski photo hum sab ko dikhayi thi.

Mayank: Nahi! Aisi koi ladki nahi thi.

Anshika: Jhuth! Mujhe nahi pata ki tum dono ke beech kya hua hai. Par kuch hua hai….

Mayank: Anshika… Leave it… Waise bhi hum ab contact me nahi hain.

Anshika: Kya hua tha?

Mayank: Kuch nahi…. Jo bhi hua tha wo tujhe kabhi samajh nahi aaega.

Anshika: Tujhe samajh aa gaya?

Mayank: Han!

Anshika: Galati kiski thi?

Mayank: Circumstances ki….. shayad….

Anshika: Hua kya tha?

Mayank ab Anshika ko ghur kar dekhta hai.

Anshika fir bhi bolti hai, “Jo bhi problem hai sort out kar lo. Mom dad bhi pareshan hai teri shadi ko lekar.”

Mayank: Han! To maine kab mana kia hai shadi ke lie?

Anshika: Han bhi to nahi kia…

Mayank: Anshika please yaar, don’t irritate me.

Anshika: Sach sach soch ke bata ki koi ladki samajh nahi aa rahi ya har ladki me use dekhne ki koshish karta hai, aur jab wo milti nahi to mana kar deta hai?

Mayank: Han! Mujhe uske jaisi ladki chahiye.

Anshika: Par wo kyun nahi….

Mayank: Bas wo tu samajh nahi paegi.

Anshika: Try me.

Mayank: No…

Anshika: Jab tune use propose kia tha to usne mana kar dia tha?

Mayank: No…

Anshika: To problem kya hai?

Mayank: Tu chup karegi?

Mayank ki behen ne itni koshish ki ki Mayank use kuch bataye par Mayank Janhvi ke khilaf ek shabd nahi bola. Usne Anshika ko kuch nahi bataya kyunki wo nahi chahta ki koi bhi Janhvi ke baare me koi bhi opinion banaye ya koi bhi uske baare me bura soche. Sach…. Mayank aur Janhvi dono ko hi pyar aaj bhi hai. Bas ab wo izhaar nahi hai. Ab wo har waqt ki baatein nahi hain. Ab wo ruthna manana nahi hai. Ab wo milna nahi hai. Par pyar abhi bhi hai aur uski shiddat shayad badhti ja rahi hai.

Aage kya Mayank Janhvi se mil paega, ya ab use isi tarah rehna hai Janhvi se alag, Janhvi se dur? Ab bhagwan ne fir se Janhvi aur Mayank ko kyun milaya hai?

Keep feeling the love……….. ❤

Agar aapko yeh kahani pasand aa rahi hai to please like, comment and share this story as much as you can……… 🙂

12 thoughts on “Kashmakash (E-13)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s