Kashmakash (E-12)

Episode-12

Recap: Janhvi aur Mayank mile the aur uske agle hi din Mayank ko apne doston ke sath trekking par jana tha. Janhvi ne Mayank ko vida kia aur wo sochne lagi ki ab wo Mayank ko sab sach bata hi degi. Wo ek hafte Mayank ka wait karti rahi aur himmat jutati rahi. Mayank ke aane ke baad Mayank ne Janhvi ko milne ke lie bulaya aur use wo bol dia jo wo kab se bolna chahta tha, “I Love You!” Badle me Janhvi ne bhi Mayank ko in teen shabdon ka jawab unhi teen shabdon se dia jo wo kab se apne mann me dabaye baithi thi. Par Janhvi janti thi ki is sach ke sath use ek aur sach Mayank ko batana hai aur usne Mayank ko usi raat ek khat likha jisme usne apne baare me sab kuch sach bata diya tha. Ab wo bas Mayank ke jawab ke intezaar me thi. Ab aage…………

Janhvi aaj office nahi gayi hai. Use sirf Mayank ke jawab ka intezaar hai. Wo chahti hai ki jab bhi Mayank usse baat karna chahe to wo Mayank ke lie wahan ho.

Aaj badi ajeeb baat hai ki Mayank ka koi good morning message bhi nahi aaya hai. Wo soch rahi hai ki kya ye uske khat ka hi nateeja hai. Wo use khud message karti hai. “Gud mng!”

Mayank ka jawab aa jata hai, “Gud mng Kudiye!”

Janhvi use dobara message karti hai, “Raat ko maine tumhe ek document bheja tha tumne wo padha nahi?”

Mayank jawab me likhta hai, “Yaar itna bada kaun padhega?”

Janhvi: To tumne abhi padha nahi hai?

Mayank: Nahi! Waise bhi main aaj late utha hu. Kal itna acha din tha, ki mujhe neend hi nahi aa rahi thi. Tumne mujhe kuch kaha jo tha.

Janhvi: Mayank use padhna hai tumhe.

Mayank: Han! Han! Baba… Padh lunga. Ek to tumhe pata hai mujhe padhna pasand nahi hai, fir bhi pata nahi kyun mujhe kya kya likh ke bhej dia hai.

Janhvi: Mayank!

Mayank: Ok… Ok… Samajh gaya tum gussa ho jaogi. Office jate me raste me padh lunga.

Janhvi: Thik hai.

Mayank: I love you!

Janhvi sirf likhti hai, “Hmmm!”

Mayank: Ye ‘Hmmm’ kya hai. Mujhe uska reply karo.

Janhvi: Kal bola to tha.

Mayank: Dobara nahi bol sakti?

Janhvi ye sab dobara islie nahi bolna chahti kyunki kuch hi der me Mayank ka dil tootne wala hai, par is sab se jo bhi Janhvi ke mann me Mayank ke lie hai wo khatam nahi hoga. Islie wo likh deti hai, “I love you too!”

Mayank bahut khush hai aur wo likh kar use bhejta hai, “I love you 3…. 4…. 5….”

Janhvi Mayank ke reply ko padh kar dheeme se muskurati hai aur likh deti hai, “Idiot… I love you so much….”

Mayank: Hmmm! Gud… Gud…. Acha mujhe is weekend tumse milna hai.

Janhvi: Tum pehle wo padh lo.

Mayank: Arey padh lunga na…

Janhvi: Thik hai. Padh lena. Bye!

Mayank: Ja kahan rahi ho? Maine kuch kaha hai tumse…

Janhvi: Tumhe late nahi ho raha ab office ke lie?

Mayank: Sath sath ready bhi ho raha hu na…

Janhvi: Tum bhi na…

Mayank: Han! I know main kaun hu… ab mujhe ye batao milogi na weekend par?

Janhvi: Kyun milna hai?

Mayank: Mujhe na ek mandir me leke jana hai tumhe.

Janhvi: Kaun sa mandir?

Mayank: Mom bata rahi thi ki wahan couples jate hain to unke mann me ek dusre ke lie hamesha wahi love aur care bani rehti hai.

Janhvi: Aisa kuch nahi hota hai. Aur tum kab se ye sab manne lage? Tum to is sab me believe nahi karte na.

Mayank: Han! Manta to nahi… Par ab kuch chize karne ka mann karta hai.

Janhvi: Aur aisa kyun hai?

Mayank: Kyunki tum sath ho.

Janhvi soch me pad jati hai ki Mayank usse kitna pyar karta hai. Janhvi ne uske sath kitna galat kia hai. Jab use sach ka pata chalega to wo toot jaega. Wo yahi sab soch rahi hai ki Mayank ka call uske phone par aane lagta hai. Janhvi phone uthati hai aur kehti hai, “Tum late ho rahe the na.”

Mayank: Ab to main raste me hu islie call par baat kar sakta hu.

Janhvi aaj bahut emotional ho rahi hai. Wo use apni dil tadap aur chinta dikhana chahti hai par wo bas itna hi bol paati hai, “I love you!”

Mayank: I love you too!

Janhvi: I am sorry!

Mayank: Ab ye kislie?

Janhvi: Ye jab maine tumhe hurt kia ya aage karne wali hu uske lie.

Mayank: Kya hua? Tum thik ho?

Janhvi: (aankhon me aasuon ke sath) Han!

Mayank: Nahi! Tumhari awaz se nahi lag raha hai. Kya hua hai batao mujhe?

Janhvi: (aah bharte hue) Why do you love me this much? Sab pata chal jata hai tumhe.

Mayank: (dhire se haste hue) Tumhe bhi to pata chal jata hai.

Janhvi: Tumhe pata hai tum abhi agar mere samne hote to main tumhe hug kar leti.

Mayank: Tumhare office aa jata hu main. I don’t wanna miss this opportunity.

Janhvi: (haste hue) Shut up idiot! Main waise bhi aaj office nahi gayi hu.

Mayank: Ohhhh! Tabyat thik hai?

Janhvi: Han! Main thik hu. Bas tumse dher sari baat karne ka mann tha islie off le lia.

Mayank: Arey! To pehle batati na, main bhi off le leta.

Janhvi: Itni sare chhutti le chuke ho already.

Mayank: To kya hua? Tumhare lie ek chhutti aur le leta.

Janhvi: Okay! Tum ye batao ki tum kya keh rahe the?

Mayank: Main ye keh raha tha ki main hamesha sochta hu ki tum mere ghar ke mandir me baith kar Deepak jala rahi ho aur main tumhe dekh raha hu.

Janhvi: (aankhon se aansu giraate hue) Atheist (nastik) ji aaj believer (aastik) kaise ban gaye?

Mayank: Aisa nahi hai, par han tumhare sath baith kar pooja karna mandir jana mujhe acha lagega. Tum wahan pooja karna aur main wahan tumhe pooja karte hue dekhunga. Kyunki tum mere lie hi to maang rahi hogi bhagwan se. Ki main khush rahu, aur tumhe aise hi pareshan karta rahu.

Janhvi: (apne aansu ponchte hue) Han! Ye main hamesha maangungi ki tum khush raho.

Mayank: Aur pareshan wala nahi?

Janhvi: (aansu ponchte hue haste hue) Main to chahti hu ki tum mujhe puri life pareshan karo. Par tum ne nahi chaha to?

Mayank: Main waise to believe nahi karta, par han main mangunga zarur ki tum hamesha mere sath raho.

Janhvi chup hai, khush hai aur dukhi bhi. Wo bebas hai, use samajh nahi aa raha ki wo kya kare. Wo Mayank ko bahut chahti hai, Mayank use bahut chahta hai, par uska sach sab khatam kar sakta hai. Wo ab bhi yahi soch rahi hai ki kaash koi aisi chiz uske hath lag jaye jisse wo apni zindagi ko piche le ja sake, jab uski shadi nahi hui thi. Par bhagwan kya karta hai, kyun karta hai pata nahi. Janhvi ye hi soch rahi hai aur tabhi Mayank use kehta hai, “To tum chal rahi ho na mere sath is weekend?”

Janhvi iska jawab deti hai, “Agar tumne aur bhagwan ne chaha to zarur.”

Mayank: Main to chah hi raha hu na.

Janhvi: Mayank! Tum pehle wo letter padh lo please. Uske baad hum is bare me baat karenge.

Mayank: Okay baba…. Aisa kya hai usme? Love letter hai?

Janhvi: Padh lo uske baad baat karein?

Mayank: Okay! Pehle tumhara letter hi padhta hu. Call karunga padh ke, utha lena.

Janhvi: Hmmm!

Janhvi ab call rakh deti hai aur soch rahi hai ki kya hoga pata nahi. Wo pareshan hai aur apne kamre me hi chakkar kaat rahi hai.

Janhvi ke dil me is waqt kya chal raha hai, wo shayad aapko is gaane se pata chale…….. Gaane me awaz ladke ki hai par jazbaat Janhvi ke hain…… Dhayan se suniyega, Janhvi ke dil ki awaz….

Kuch waqt baad Mayank ka call aata hai. Janhvi darr ki wajah se pehli baar call uthati hi nahi hai. Mayank dobara call karta hai, Janhvi wo call bhi nahi uthati. Ab Mayank Janhvi ko message karta hai, “Janhvi! Kahan ho tum? Call uthao. Aur ye sab kya likha hai tumne? Mujhe tumse call par baat karni hai.”

Janhvi ye message padhti hai aur samajh jati hai ki Mayank ne letter padh lia hai. Mayank fir se call karta hai, is baar Janhvi call utha leti hai, “Hello!”

Mayank: “Hello!”

Janhvi chup hai.

Mayank: Ye sab kya hai?

Janhvi: Kya?

Mayank: Yahi sab jo tumne letter me likha hai.

Janhvi ab bhi chup hai.

Mayank: Ye sab jhuth hai na Janhvi? Tum majak kar rahi ho.

Janhvi: Nahi! Ye sach hai.

Mayank: (Pareshan) Dekho Janhvi mujhe aise majak bilkul pasand nahi hain. Main tumse gussa ho sakta hu.

Janhvi: Ye sab sach hai. Is letter me jo bhi likha hai wo sab, uska ek ek shabd sach hai.

Kuch der tak Mayank kuch nahi bolta. Use bahut bada jhatka laga hai. Usne jo sab sapne dekhe the, ek sath hi choor ho chuke hain. Par wo fir se ek koshish karta hai kyunki use pata hai Janhvi is tarah ke majak bahut karti hai, “Janhvi!”

Janhvi: Han!

Mayank: Ye jhuth hai na?

Janhvi: (rote hue) Nahi!

Mayank ko achanak aisa lag raha hai jaise uski saans ukhad rahi hai. Uske dil ki dhadkane jo aksar badh jaya karti thi aaj wo use thami se mehsoos ho rahi hain. Uske hath pair thande pad chuke hain. Uska dimag kaam karna band kar chuka hai. Uske pure shareer me ek sunni si chha gayi hai. Aaj tak jis ladki se usne pyar kia wo ladki wo hai hi nahi jo wo use samajh raha tha. Wo ek shadi shuda ladki hai. Use kuch samajh nahi aa raha ki wo kya kare? Use samajh nahi aa raha ki uske sath ye kis tarah ke majak hua hai. Usne jise itni shiddat se chaha usi ne uske sath itna bada dhokha kia. Uske vishvaas ke tukde ho chuke hain. Wo har tarah se soch raha hai, par use ye samajh nahi aa raha ki Janhvi ne use itna bada jhuth kyun bola? Wo khud ko sambhalta hai aur office ki building ke upar pahunch jata hai. Jahan wo akela ho aur use aur koi dekh na sake aur iske baad wo Janhvi se puchta hai, “To tum married ho?”

Janhvi: (darte hue) Han!

Mayank: Husband ka naam?

Janhvi: Raghav!

Mayank: Kitna time hua hai shadi ko?

Janhvi: 8 mahine hone wale hain.

Mayank: To sab jhuth tha?

Janhvi: Han!

Mayank: Wo sare messages, wo sab baatein, wo sab jhuth thi?

Janhvi: Meri shadi ke alawa sab sach hai.

Mayank: Tumhara pyar? Wo sach hai?

Janhvi kitni badnaseeb hai, uske ek jhuth se uska pyar bhi jhutha ban gaya hai. Par aise hi hota hai, ek jhuth se baaki sari sacchi baatein bhi jhuthi ho jati hain. Janhvi soch rahi hai, aur bolti hai, “Han! Wo sach hai.”

Mayank: Kyun kia mere sath tumne aisa? Bolo.

Janhvi: Main ye sab karna nahi chahti thi Mayank.

Mayank: (ab Mayank ki aankhon me bhi aansu hain) Fir kyun kia?

Janhvi: (rote hue) Main darr gayi thi. Main darr gayi thi ki agar maine tumhe sach bataya to main tumhe kho dungi.

Mayank: Aur ab tumne pa lia mujhe?

Janhvi: I am sorry!

Mayank: Kya tum mujhe batati ki tum married ho to main tumse dosti nahi karta?

Janhvi chup hai. Janhvi use batana chahti thi ki usne is wajah se usse jhuth nahi kaha tha. Wo to bas is sab ko ek majak samajh rahi thi. Wo to usse dosti karna bhi nahi chahti thi aur isilie sirf Mayank ne usse jo kuch pucha uska jawab usne de dia, par baad me jab Janhvi ko bhi ye dosti pasand aane lagi tab usne sach batane se dosti tootne ke darr se use kuch nahi bataya. Par wo aaj doshi hai aur wo use koi bhi safayi pesh nahi karna chahti kyunki wo galat hai aur wo ye janti hai.

Mayank: (rote hue) Tumne sab kharab kar dia Janhvi. Sab kuch khatam kar dia. Kitna kuch socha tha maine humare baare me. Sab khatam.

Janhvi sirf sun rahi hai.

Mayank: Tumne usko cheat kia, mujhe cheat kia. Kyun nahi bataya tumne Janhvi. Matlab sab jhuth tha. Tumhari care, ye dosti, wo pyar sab jhuth?

Janhvi: Mayank! Mera pyar sach hai.

Mayank: So, You loved me?

Janhvi: I love you.

Mayank: This feeling is true?

Janhvi: Yes!

Kuch der dono chup hain. Bas dono ke aansu nikal rahe hain.

Mayank: Mere lie ye sab feel karne ke baad bhi, were you physical with him?

Janhvi chup hai.

Mayank: Were…. You physical with him Janhvi?

Janhvi: Yes!

Mayank: So this is your love?

Janhvi ab bhi chup hai. Janhvi ko Mayank se pyar hai ye ehsaas hi use tab hua tha jab Raghav uske kareeb aata tha aur wo uski jagah usme Mayank ko dekhne lagi thi. Par wo use koi safayi nahi dena chahti kyunki use pata hai usne Mayank se kitna pyar kia hai, aur wo ab agar is sabke baare me use safayi degi to wo apne pyar ki hi tauheen karwaegi.

Mayank: You ruined everything. You have ruined my every memory which I have spent with you. Main ab kuch bhi yaad nahi kar sakta. Main kuch bhi yaad nahi karna chahta. (rote hue)

Janhvi sirf sun rahi hai.

Mayank: Tumhari us innocent awaz ne kabhi ye shaq hone hi nahi dia ki tum kabhi jhuth bhi bol rahi ho. Sab kuch sach hi lagta gaya. Mujhe nahi pata tha ki tum is tarah jhuth bhi bol sakti ho.

Janhvi: (rote hue) I am sorry.

Mayank: (rote hue) You have ruined my life Janhvi. I loved you Janhvi. I loved you so much.

Janhvi sirf chup hai.

Mayank: It’s all destroyed. You have changed my perception to see you. Now…….. You are no more that Janhvi whom I used to love.

Kuch der fir se dono shant ho jate hain aur fir Mayank bolta hai, “Tumhe kuch nahi kehna hai iske baare me?”

Thodi der baad Janhvi kehti hai.

Janhvi: (rote hue) I know, I can’t fix anything now………………. Mujhe pata hai ki main tumhe ye sab bolti hui achi nahi lagungi……… Mayank!…….. But I tried………… (sisakte hue) I tried Mayank. I tried so many times………… Kitni baar tumhe aise hi khat likhe, kitni baar tumhe messages karne ki koshish ki……… Kitni baar likh likh kar mita diya, kyunki main tumhe nahi khona chahti thi……….. (Kuch der rone ke baad aage bolte hue) Maine kabhi tumse kaha nahi par tumse door jane ka sochte hi dhadkane meri bhi badh jati thi……….. Islie tumse kabhi kuch nahi keh payi……. Mujhe lagne laga tha ki meri life tumhare sath hi better ho sakti hai. I know I was a selfish………. Maine sirf apne baare me socha………. And you have all rights to do what you want to do with me.

Mayank: Main ab tumse kabhi nahi milna chahta. I don’t want to see your face now. Tumne mujhe sikha dia ki kisi par bharosa nahi karna chahiye. Now I will not able to trust anyone.

Janhvi sirf sun rahi hai.

Mayank: You just go. Never ever try to contact me. I hate you. I hate you very much.

Janhvi chup hai.

Mayank: (rote hue) I love youuuuuhhh! I Love you Janhviiiii! Kyun kiya tumne ye.

Janhvi: (khud ke aansu ponch kar khud ko sambhalte hue) I knew ki tum yahi decision loge. So, this is my last conversation with you. And main kuch bhi kehne layak nahi hu. Par fir bhi keh rahi hu……… Tumhare jaisa ladka maine nahi socha tha ki mujhe milega. The days which I spent with you were the best days of my life…… Aur sach me maine itni intensity ke sath kisi ke lie feel nahi kiya. Tumhare aansu, mujhe rula dete the, tumhara pareshan hona mujhe pareshan kar deta tha. Par jab maine hi sab bigaada hai to main na to kuch maangne layak hu aur na kuch bolne layak………………………. I will miss you Mayank! And You don’t know how much I love you. And yeah…. I am really very sorry for coming in your life.

Mayank: Bye Janhvi!

Aur Mayank call kaat deta hai.

Janhvi wahan apne kamre me baithi hui ro rahi hai aur Mayank apne office ki chhat par baitha ro raha hai. Kya galati thi dono ki? Sirf pyar hi kia tha, par kismat shayad unhe milana nahi chahti thi. Agar kismat ko unhe milana hota to shayad Mayank Janhvi ki zindagi me uski shadi se pehle hi aata. Lekin jab bhagwan ko kisi ko milana nahi hota to unhe zindagi me laate hi kyun hain? Janhvi ne galat kia, bahut galat. Use uski saza milni hi chahiye. Usne ek insan ke jazbaaton ke sath khela hai. Par sach me khela hai? Ya wo darti thi ki jo aaj uske sath hua hai uske darr se? Hum kehte hain kal ke baare me kal dekha jaega pehle aaj ki zindagi ache se jee lo, usne yahi kia. Usne wo waqt ache se bitane ke lie use sach nahi bataya. Jiski yaadein shayad wo ab puri zindagi apne sath rakhegi.

Kya shadi sach me itni badi chiz hoti hai? Ki hum use tod kar nikal nahi sakte? Agar koi insan apni shadi me khush nahi hai aur use koi aisa insan mil chuka hai, jiske sath wo khush reh sakta hai to kya uska wo shadi todna galat hai? Par humare samaj me na jane kaise niyam aur kaayde banaye hue hain ki insan unhe tod nahi sakta aur apni hi zindagi khul ke jee nahi sakta.

Log Krishna aur Radha ki pooja karte hain, par agar apne aas paas koi do pyar karne walon ko dekh leta hai to use na jane kitne sanskaar aur gyan ki baat suna deta hai. Mujhe ye doglapan aaj tak samajh nahi aaya. Aur inhi niyam aur kaydon ki wajah se insan apni zindagi khul ke jee nahi pata.

Ye wo niyam hi the jo Mayank aur Janhvi ko alag kar rahe the. Aur shayad un niyamo ko todne ki taaqat na Janhvi me thi aur na hi Mayank me.

Yehi hota hai kayi logon ke sath, jo pyar kisi aur se karte hain aur apni zindagi kisi aur ke sath bitate hain. Wo bhi sirf inhi niyam aur kaydon ki wajah se.

Chaar saal baad Mayank aur Janhvi fir mile hain aur ab metro me unki kya baat hoti hai, ye hum janenge agle episode me……..

Tab tak…..

Keep feeling the Love…………. ❤

Agar aapko ye kahani pasand aayi to please ise like aur share karna na bhule…… 🙂

For previous episode go to the below link:

Kashmakash (E-11)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s