Kashmakash (E-11)

Episode-11

Recap: Janhvi aur Mayank ki ye mulakaat sach me pehli mulakaaton se alag thi. Wo dono is mulakaat me kafi kareeb aa gaye the. Aur wo dono hi is kareebi se khush bhi the. Ab aage…….

Janhvi aur Mayank movie hall se bahar nikalte hain. Mayank ne Janhvi ka hath abhi bhi pakada hua hai. Dono hi bahut khush hain. Ab dono hi ek café me ja kar baith jate hain. Jahan wo dono coffee pi rahe hain aur baat kar rahe hain. Dono ek kone me ek table par ek dusre ke barabar wali kursiyon par baithe hain. Mayank ab bhi Janhvi ke hath se khel raha hai.

Mayank: Janhvi!

Janhvi: Hmmm!

Mayank: Ek baat kahu?

Janhvi: Kaho.

Mayank: Meri behen ko mujh par shaq hai ki tum meri girl friend ho.

Janhvi: (hairat se) Kya?

Mayank: Waise main tumhe ye bol sakta hu ya nahi?

Janhvi: (ghurte hue) Nahi!

Mayank: But why?

Janhvi: We are friends.

Mayank: But I like you.

Janhvi: Aage bolo, use kyun lagta hai ye?

Mayank: Wo islie ki jab bhi main tumse baat karta hu, chahe wo call ho ya message, mere face par hasi rehti hai aur wo hamesha notice kar leti hai.

Janhvi ye sab sun kar muskura rahi hai.

Mayank: Aur ek din to tumhara message bhi padh lia tha.

Janhvi: Kaun sa message?

Mayank: Ek din main so gaya tha aur mera phone bed ki side table par tha, wo mere room me kisi kaam se aayi thi aur tabhi tumhara message aa gaya.

Janhvi: Maine kya message bheja tha?

Mayank: Tumne message bheja tha, “U slept?”

Janhvi: Hmmm! Maine bheja tha kuch din pehle.

Mayank: Bas usne agle din shor macha dia ki ye Janhvi kaun hai.

Janhvi: Tumhari behen, tumhari jasoos hai.

Mayank: Bahut badi. Main to pareshan hu usse.

Janhvi: Acha hai, koi to tumhe sabak sikhata hai.

Mayank: Abhi se uski side?

Janhvi is baat par chup rehti hai.

Mayank: To tumhari behen ke baare me tumne kabhi kuch nahi bataya.

Janhvi: Meri behen mujhe chhedti nahi, wo mujhe samjhti hai. Mere sare secrets uske paas aur uske sare secrets mere paas safe hain.

Mayank: Mere baare me janti hai wo?

Janhvi: Not properly.

Mayank: Tumhare ghar par kisi ko?

Janhvi: Nahi!

Mayank: To batana hai ya nahi?

Janhvi: Pehle kuch chize karni hain, uske baad.

Mayank: I will wait for it.

Janhvi: Pehle tum apni trip se wapas aao. Uske baad.

Mayank: Okay! As you wish Ma’am.

Dhire dhire waqt khatam ho gaya hai. Wo ek din jo Mayank ne maanga tha wo guzar gaya hai. Ab dono fir se metro me hain. Janhvi gate ke paas ek seat ke sahare kone me khadi hai aur usi ke samne us seat ko pakade Mayank khada hai. Ab dono hi kuch nahi bol rahe chup hain. Mayank Janhvi ko dekh raha hai. Wo Janhvi ki har harkat par dhyan de raha hai. Wo jab apne baal kaan ke piche karti hai, wo jab apna dupatta thik karti hai, wo jab apne phone me time dekhti hai aur wo jab Mayank ko dekhti hai. Aur tabhi Rajiv chowk metro station bhi aa jata hai, jab bheed ek sath metro me andar aa jati hai aur jagah bahut kam ho jati hai.

Metro me bheed ki wajah se Janhvi aur Mayank ab kafi kareeb aa chuke hain. Dono hi ek dusre ko dekh rahe hain. Tabhi metro rukti hai aur uske jhatke se Janhvi Mayank ki taraf girti hai. Mayank Janhvi ko sambhalta hai aur Janhvi Mayank ki t-shirt pakad leti hai. Dono hi thode aur kareeb aa gaye hain. Par Janhvi dusre hi pal Mayank ki t-shirt chhod deti hai. Kuch der baad dono hi Janhvi ke station par utarte hain.

Mayank: So?

Janhvi: So?

Mayank: I don’t want you to go.

Janhvi: Ye to mujhe kehna chahiye. Kal tum ja rahe ho, wo bhi ek week ke lie.

Mayank: Nahi jau?

Janhvi: Jao…

Mayank: Kabhi to mana kar diya karo.

Janhvi: Tum chahte ho main mana karu?

Mayank: Mujh par haq hai tumhara.

Janhvi: Main nahi chahti ki meri wajah se tum apne baki rishton se dur ho jao. Wo tumhare dost hain, tumhe unke sath jana chahiye. Aur fir tumhe trekking pasand bhi hai.

Mayank: I will miss you there.

Janhvi: (Mayank ko pyar se dekhte hue) Me too.

Dono kuch der aise hi khade rehte hain, fir Janhvi kehti hai, “Ab jao aur nikalne se pehle mujhe ek baar inform kar dena.”

Mayank: Aurr?

Janhvi: Aur apna dhayan rakhna.

Mayank: Aurrr?

Janhvi: Aur wahan enjoy karna.

Mayank: Aurrr?

Janhvi: Aurrr… Han! Aur mujhe yaad mat karna.

Mayank: Ye to nahi ho sakta.

Janhvi: (haste hue) Ab jao.

Mayank: Okay!

Mayank wahan se chala jata hai. Janhvi ghar ki taraf badhne lagti hai. Wo soch rahi hai ki ab wo waqt aa hi gaya hai jab use apni zindagi ka sabse bada kadam uthana hai. Wo hai Mayank ko sach batana.

Mayank ko sach batana shuruaat me uske lie zaruri nahi tha kyunki Mayank uske lie koi bhi nahi tha, par kuch hi dino me Mayank ne Janhvi ke dil me sabse upar apni jagah bana li thi. Jis Mayank ko sach batana zaruri nahi tha, aaj usi Mayank ko sach batana uski zindagi ka sabse bada kaam ban gaya tha. Ek aisa kaam jise karne se shayad wo Mayank ko hamesha hamesha ke lie kho degi. Par wo Mayank ko ab andhere me nahi rakh sakti. Wo Mayank ke upar hi ab apni kismat ka faisla chhodna chahti hai. Wo dekhna chahti hai ki Mayank usse kitna pyar karta hai. Itna ki uski galati ko bhul kar use apna sake ya itna ki uski galati se wo itna hurt ho jaye ki use kabhi na apna paaye. Dono suraton me Mayank ka pyar hi jeetega, chahe Janhvi us sach se Mayank ko jeete ya haar jaye.

Mayank agle din apni trip ke lie nikal jata hai aur Janhvi wahan himmat juta rahi hai ki wo Mayank ko sab sach bata sake. Ye ek hafta Janhvi ke lie bahut hi mushkil hafta tha islie nahi ki Mayank is beech uske sath nahi tha, balki is lie ki is hafte baad hi uski zindagi ka faisla hona tha. Janhvi ko Mayank ko sach batana tha.

Wo hafta beet chuka hai aur Mayank ab wapas aane ke lie wahan ke airport par hai. Mayank trip se wapas aane ke lie chalne se pehle Janhvi ko call karta hai aur kehta hai, “Hello! Janhvi.”

Janhvi: (khushi se) Mayank!

Mayank: Ohhh! Kitne din baad fir se tumhari sukoon bhari awaz sun raha hu.

Janhvi: (khush ho kar) Kaisa raha sab?

Mayank: Wo sab baad me. Pehle I want to meet you. Kahan milogi?

Janhvi: Par main abhi office me hu.

Mayank: Please yaar. Mere lie itna nahi kar sakti kya? Aa jao na.

Janhvi: Okay! Kahan aana hai?

Mayank: Airport.

Janhvi: Tum pagal ho kya? Wahan tak aane me pata hai na kitna time lagega mujhe.

Mayank: Han! Tabhi to pehle hi tumhe call kar ke bata dia. Main jab tak wahan pahunchunga tum bhi wahan pahunch jaogi.

Janhvi: Aur main office me kya bolu?

Mayank: Janhvi! Mere lie please.

Janhvi: Acha thik hai. Main promise nahi kar rahi. Ek baar flight land karne ke baad call karke puch lena.

Mayank: Okay baba!

Mayank ki flight udati hai aur land karti hai. Is beech ke waqt me Mayank ka waqt kaatne se nahi kat raha tha. Bas use jaldi se Delhi airport pahunchna tha. Kyunki jab se wo Janhvi se mila tha tab se ye pehli baar tha jab usne Janhvi se baat nahi ki thi. Aur wahan pahunchte hi wo Janhvi ko call karta hai.

Mayank: Tum aayi ho?

Janhvi: Kahan ho tum?

Mayank: Bahar aa raha hu.

Janhvi: To main bahar hi khadi hu.

Mayank khush ho jata hai aur bhag kar bahar ki taraf jata hai. Wahan wo Janhvi ko dekhta hai aur daud kar Janhvi ke paas jata hai.

Mayank: (khushi se) Hi!

Janhvi: Hi!

Mayank aur Janhvi dono ek dusre ko dekh rahe hain. Dono ne hi ek dusre ko bahut yaad kia. Waise ek hafta bahut bada waqt nahi hai, par jab kisi se roz baat hone lage aur wo aapke bahut kareeb aa chuka ho to ek din bhi ek mahine jaisa lagta hai, fir ye to saat mahine, I mean saat din the.

Janhvi: Mujhe yahan kyun bulaya? ………… Tumhare ghar wale nahi aaye?

Mayank: Ghar walon ko maine mana kar diya tha.

Janhvi: Aur dost?

Mayank: Janhviiii! Chup raho.

Janhvi: Kya hua hai tumhe?

Ab Mayank Janhvi ke hothon par apni hatheli rakh deta hai aur kehta hai, “Shushhhh!”

Ab wo apne dono hathon se Janhvi ko pakad leta hai aur Janhvi ke gale lag jata hai. Janhvi Mayank ke is bartaav se hairan khadi reh jati hai. Kuch pal baad Mayank alag ho kar khada ho jata hai.

Janhvi: Ye sab kya hai Mayank?

Mayank: I love you!

Janhvi fir se hairan ho jati hai aur kehti hai, “Aaj tumhe isi tarah surprises dene hain?”

Mayank: Mujhe laga ki jo main tumhare baare me sochta hu wo main tumhe bata du.

Janhvi: Abhi tak to…. I like you tha na. Wahan se aane ke baad I love you ho gaya?

Mayank: Tum sare questions abhi puchne wali ho, ya kuch khud bhi keh sakti ho?

Janhvi: Kya?

Mayank: Tumne mujhe miss nahi kia?

Janhvi: (muskura kar) To miss karne ka matlab I Love you hota hai?

Mayank: Ohh! Janhvi mujhe nahi pata kya hota hai. Lekin ye zarur pata hai ki I love you. Aur ye main tab se kehna chahta hu jab se tumhe I like you bol raha hu. Bas himmat aaj hui hai. Tumhe ab jo samjhna hai samajh lo…. Jo kehna hai keh lo… jo….

Janhvi: (beech me hi bolte hue) I love you too!

Mayank: (Hairani se) Kya?

Janhvi: I love you too!

Mayank Janhvi ko fir se gale laga leta hai aur kehta hai, “I love you…. I love you so much!”

Janhvi: Ab ghar chale?

Mayank: Han! Bilkul.

Dono ab ghar ke lie nikal jate hain. Janhvi aur Mayank dono hi apne ghar par pahunch jate hain. Ye shayad Mayank ke sabse khushi ka din hai aur shayad sabse jyada dukh ka bhi. Wo kaise…. Dekhte hain….

Janhvi se kuch der phone par baat karne ke baad Mayank ab sone chala gaya hai. Par Janhvi aaj soyi nahi hai. Wo ab tai kar chuki hai ki Mayank ko sach batana hi hai. Wo Mayank ke naam ek letter likhti hai aur use bhej deti hai. Usme likha hai…….

“Mayank!

Aaj jo main tumhe batane ja rahi hu, isse shayad meri life badalne wali hai. Par main ab tumse sach aur nahi chhupa sakti. Jab tum mujhe mile the usse teen mahine pehle hi meri shadi ho chuki thi. Han! Main married hu. Mere maa papa ne meri shadi ek government job karne wale officer se karwa di thi. Uska naam hai Raghav. Unhe lagta tha ki jyada rupye kamane wala ladka unki beti ko khush rakhega. Par wo ye nahi jante the ki khushi jyada rupyon se nahi, apnepan aur pyar se milti hai. Meri shadi ho gayi par main samajh nahi pa rahi thi ki meri life me kya missing hai, jab tak tum mujhe nahi mile the. Tumhare milne se pehle tak mujhe yahi lagta tha ki aadmi aise hi hote hain, insensitive, kisi ki parwah na karne wale, kabhi kuch bhi bina soche samjhe kisi ka bhi dil dukhane wale. Par jab tumse mili to laga ki aisa nahi hai. Jab tumse pehli baar mili thi aur tumne mujhe approach kia tha. Tab mujhe tum me koi interest nahi tha. Us waqt sirf formality ke lie maine tumse dosti ke lie han kar dia tha. Aur isilie maine tumhe apne baare me sab kuch batana zaruri bhi nahi samjha.

Bas yahin mujhse galati ho gayi. Jab dhire dhire tumse baatein badhi to wo formality dosti me badal gayi aur dosti kab pyar me mujhe pata nahi chala. Main tumhe sach batana chahti thi par nahi bata payi kyunki main darti thi ki tum kahin mujhe chhod kar chale na jao. Darr mujhe aaj bhi hai, par main ye jhuth ab aur nahi bol sakti. Main janti hu ki ye meri life ki sabse badi galati hai par main ye karna nahi chahti thi. Mujhe nahi pata tum ye sab padhke kaise react karoge, mere baare me kya sochoge. Par aaj tak meri shadi ke alawa maine tumse jo bhi baatein ki hain wo sab sach hain. Aur main tumhe bahut pyar karti hu. Main tumhare bina nahi rehna chahti. Aur ye bhi janti hu ki is letter ko bhejne ke baad shayad tum mujhse kabhi baat na karo. Main sab kuch tumhare upar chhodti hu. Tum mujhe jo saza dena chaho de sakte ho. Iske lie main tumse kabhi koi shikayat nahi karungi.

Tumhari Janhvi……”

Janhvi ye sab likhti hai aur send ka button daba deti hai. Wo us raat so nahi pati, kyunki use nahi pata ki subah Mayank is sab ko padh kar kis tarah bartaav karega. Wo Janhvi ki is galati ko samjhega aur use maaf kar paega ya wo use maaf nahi kar paega? Iske lie intezaar kijiye agle episode ka….. Tab tak……

Take care of yourselves………..
&
Keep feeling the Love……………. ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s