Kashmakash (E-10)

Episode-10

Recap: Janhvi ne ab soch lia hai ki Mayank ko sab sach bata degi. Par isse pehle wo ek aakhiri baar Mayank se milna chahti hai. Wo dono usi jagah par mile hain, jahan wo pehli baar mile the. Wo wahin metro station par hi ek jagah par baith jate hain. Ab aage………

Mayank aur Janhvi wahin station par kuch der ke lie side me padi ek bench par baith jate hain.

Mayank: (Janhvi ko dekhte hue) Tum mujhe kuch batane wali thi.

Janhvi: (muskurate hue Mayank ko dekh kar) Sab abhi bata du?

Mayank: I am curious to know.

Janhvi: Kya puchna hai tumhe?

Mayank: Pata hai Janhvi! Jab main pehli baar tumhe mila tha, tabhi se mujhe kuch alag laga tha tum me. Kuch alag chiz thi jisne mujhe tumhe approach karne ke lie kaha. Main generally aisa karta nahi hu. Mere office me girls hain, main sab se baat karta hu. Par tum un sab se alag ho.

Janhvi: How?

Mayank: Mujhe nahi pata, par mujhe lagta hai tum wo perfect ladki ho jo koi ladka apni life me chahega.

Janhvi: Aur main kahu ki mujhe khana banana nahi aata to?

Mayank: Mujhe pata hai tumhe khana banana aata hai. Aur agar nahi bhi aata hota to, uske lie maid hai, tum nahi. Aur main bhi to hu na tumhari help karne ke lie.

Janhvi: Main kaam se late bhi ho jati hu kayi baar.

Mayank: Main bhi hota hu. Ye sab chize sabke sath hoti hain, thode bahut adjustments to sabko karne padte hain.

Janhvi: Main bahut gusse wali hu.

Mayank: Mujhe koi problem nahi kyunki main janta hu ki tumhe kaise shant karana hai.

Janhvi: Aur ghar walon par bhi to gussa kar sakti hu na.

Mayank: I know tum nahi karogi.

Janhvi: Main karti hu.

Mayank: Okay! Par uski starting tumne kabhi nahi ki hogi ye main janta hu.

Janhvi: Tum mujhe mujh se bhi better jante ho. (muskurate hue)

Mayank: Itne din maine sirf yahi kia hai. Tumhe jana hai. Ab tum batao, jab tum pehli baar mujhse mili thi to kya socha tha.

Janhvi: (haste hue) Bas yahi socha tha ki acha ladka hai, kyunki tumne phone wapas kar dia tha. Aaj kal aisa koi nahi karta.

Mayank: Aur uske baad?

Janhvi: Sach batau to maine isse jyada nahi socha tha. Tumse dosti kar li thi, par mera plan tha ki do teen din me tumhe tata bye bye kar hi dungi.

Mayank: (haste hue) Chalu ladki.

Janhvi: (haste hue) Aur main isilie tumse baat karna bhi ignore karti thi, kyunki mujhe yahi lagta tha ki tum pata nahi kyun mere piche pad gaye ho.

Mayank: Matlab acha to socha hi nahi kabhi tumne mere baare me?

Janhvi: Socha! Par kuch time baad. Jab tumhari wajah se meri life ki chizon me farq aane laga.

Mayank: Jaise?

Janhvi: Jaise… Mujhe har baat se farq padta tha. Islie main gussa ho jati thi. Abhi bhi gussa hai par ab jo log important nahi hain unki baaton par ab main react nahi karti.

Mayank: That’s good.

Janhvi: Aur ye pehli baar maine tumse hi seekha. Aur isilie socha ki hum dost ban sakte hain.

Mayank: Aur kuch nahi batana?

Janhvi: Batana to bahut kuch hai mujhe.

Mayank: Pata hai tum is tarah jab beech beech me udas ho jati ho. Mujhe acha nahi lagta aisa lagta hai ki kuch hai jo tumhe pareshan kar raha hai.

Janhvi: (Mayank ki taraf pyar se dekhte hue) Aur kitna proof doge ki tum mujhe mujhse bhi jyada jaante ho?

Mayank: To kuch hai?

Janhvi: Han! Hai to…

Mayank: To wo kab batana hai?

Janhvi: Abhi nahi. Par jald hi bataungi.

Mayank: Promise?

Janhvi: Promise.

Mayank: Okay! Good.

Janhvi Mayank ko bahut pyar se dekh rahi hai.

Mayank: To batao uske baad kya hua?

Janhvi: Uske baad… Uske baad tumse baat karna acha lagne laga. Laga ki tum se baat karke mera din complete ho jata hai. Tum se jab baat nahi hoti to kuch adhura sa lagta hai.

Mayank: Mujhe bhi…

Janhvi: Tumhe pata hai mujhe tumhari choti choti baatein bahut pasand hain. Jo shayad baaki sab log miss kar dete hain, par na jane tum kaise sab chize perfect kar lete ho.

Mayank: Kaisi chize?

Janhvi: Jab bhi main pareshan hoti hu, tum mere sath hote ho. Chahe din ke 2 baje ho ya raat ke. Ye har koi nahi kar sakta. Tum mere lie pure week raat ko mujhe lene aaye. Tum mujhse sirf 5 minute baat karne ke lie har baar do station aage jate ho. Tumhari ye sab chize tumhe baki sab se alag kar deti hain. In sab chizon se ye feel hota hai ki you have a heart. Tumhari aisi har baat mujhe affect karti hai.

Mayank chupchap Janhvi ki baat ko sun raha hai kyunki Janhvi ne pehli baar apne dil ki baat kehni shuru ki hai. Use acha lag raha hai Janhvi jo bhi bol rahi hai.

Janhvi: Us din jab mere baat na karne par tum chup rahe the, mujhe affect kia tha. Mujhe pata tha ki us waqt tumhari aankhon me aansu the.

Mayank dhire se muskurata hai.

Janhvi: The na?

Mayank han me sir hila deta hai.

Janhvi: Us waqt mujhe bahut bura laga tha. Main tumhe kabhi bhi pareshan nahi dekhna chahti, specially meri wajah se.

Mayank: Jab tum is tarah se bologi ki ab kabhi baat nahi karungi to ye sab to hoga hi mere sath.

Janhvi: Uske baad maine kabhi kuch kaha tumhe?

Mayank: Kehti hi ho tum to, ki ‘jab main nahi rahungi…’ Mujhe nahi pata tum ye kyun kehti ho, par us waqt bhi meri heart beats badh jati hain. Main tumhe khud se alag nahi dekh sakta.

Janhvi: Ab nahi kahungi.

Mayank: Good!

Janhvi: Itni problem hoti hai mere dur jane ka sochke?

Mayank: To main pagal thode hi hu jo us din tumhe lagataar call kar raha tha. Tumhe pata hai, main ye sab chize kisi ke sath nahi karta. I am in my control and in my senses all the time, par tumhare sath mera mind mera sath nahi deta. Mera dimag mujhse kehta hai ki aisa mat kar par main wahi chize karta hu. Aur tum zarur sochti hogi ki main pagal hu.

Janhvi: Main aisa kuch nahi sochti.

Dhire dhire waqt beet’ta hai aur wahan shops khulni shuru ho jati hain. Mayank Janhvi se puchta hai, “Ab kahan chalke aap breakfast karna chahengi?”

Janhvi: Jahan tum le chalo.

Mayank: Okay!

Mayank aur Janhvi Connaught Place me ek jagah par ja kar nashta karte hain. Wahan se bahar nikal kar Janhvi puchti hai, “Ab kya?”

Mayank use ab wahan le jata hai jahan wo dusri baar mile the. Kuch der wo wahan bitate hain aur uske baad Mayank Janhvi se kehta hai, “Janhvi! Kya tum mere sath movie dekhne chalogi?”

Janhvi ye sunkar thoda hichkichati hai, lekin fir maan jati hai. Mayank aur Janhvi Movie dekhne jate hain. Mayank aur Janhvi hall me ek corner seat par baithe hain. Movie hall me jyada log nahi hain kyunki movie ko release hue kafi din ho chuke hain. Mayank Janhvi ko dekh raha hai ki wo yahan uske sath comfortable hai ya nahi. Janhvi use dekhti hai aur uski is chinta ko dekh kar muskurati hai.

Janhvi: Don’t worry! I am okay.

Mayank: Pakka? Nahi to hum kahin aur chal sakte hain.

Janhvi: Hmm! Pakka.

Movie shuru ho jati hai aur dono movie dekh rahe hain. Janhvi dekhti hai ki Mayank koshish kar raha hai ki wo apna hath uske kandhe par rakh sake. Par wo soch raha hai, ki use aisa karna chahiye ya nahi. Janhvi Mayank se kehti hai, “Kya hua?”

Mayank: (sidhe baithte hue) Kuch nahi. Kuch bhi nahi.

Janhvi ko Mayank ki yahi baatein pasand hain. Wo Mayank ke kandhe par apna sir rakh deti hai. Mayank Janhvi ka hath apne hath me le leta hai. Aur Janhvi ke sir se apna sir laga leta hai. Janhvi ka mann ab movie dekhne me nahi hai. Wo bas kuch waqt aise hi Mayank ke sath bitana chahti hai. Jab dono hi kuch na bole bas ek dusre ke paas rahe, bina kuch kahe. Kuch der aise hi rehne ke baad Mayank dono ke beech ke armrest ho hata deta hai aur Janhvi ke kandhe par hath rakhne ke lie apna hath faila deta hai. Janhvi fir se Mayank ke kandhe par apna sir rakh deti hai, par is baar Mayank ki baahe Janhvi ko thame hue hain. Wo dono aur kareeb aa gaye hain. Janhvi Mayank ke dil ki dhadkane sun pa rahi hai, jo aaj sach me bahut badhi hui hain. Janhvi ko aisa hi pyar chahiye tha. Ek aisa hi rishta chahiye tha. Jo use itna pyar kare, itna samjhe ki fir use kisi ki zarurat hi mehsoos na ho. Janhvi ko pehli baar kisi ke kareeb aane par sukoon mehsoos ho raha tha. Aur wo is sukoon me rehna chahti thi. Wo apni aankhein band kar ke bas aise hi rehna chahti thi. Wo apne aansu Mayank ke kandhe par girana chahti thi. Wo apni shadi ko todna chahti thi, wo waqt ko piche modna chahti thi. Par abhi wo sirf Mayank ko gale lagaye rakhna chahti thi.

Mayank Janhvi ke baalon ko dheeme se sehla raha hai. Dono ko hi acha lag raha hai aur tabhi movie ka interval ho gaya hai. Dono hi ek dusre se alag hote hain, aur kuch waqt ek dusre se nazar nahi mila pate. Par fir Mayank Janhvi se kehta hai, “Kuch khaogi?”

Janhvi uski taraf dekhe bina hi keh deti hai, “Nahi! Kuch nahi.”

Mayank: Cold drink?

Janhvi: (Mayank ko dekhte hue) Nahi!

Mayank: (Janhvi ko dekhte hue) Thik hai.

Mayank Janhvi ke baalon ko thik karta hai. Janhvi bina kuch kahe use karne deti hai. Dono ab chupchap apni seat par baith jate hain par Mayank Janhvi ka hath fir se pakad leta hai.

Janhvi: Mayank! Abhi interval hai.

Mayank: To? Main koi chori nahi kar raha. Bas tumhara hath hi pakada hai. Tum mujhe allow kar rahi ho, hai na?

Janhvi: (muskura kar) Hmmm!

Mayank: (muskura kar hi) To bas… baki kisi ko kya matlab?

Janhvi: Tum bahut shaitan ho rahe ho.

Mayank: Tumne meri shaitani abhi dekhi nahi hai.

Janhvi: Okay! Ab tum chup raho.

Mayank: Nahi! Mujhe batane do.

Janhvi: No!

Mayank: Dekho! Pehle main na tumhara hath pakadunga…..

Janhvi: Mayank! Chup ho jao….

Mayank: Uske baad main tumhare thoda sa paas aa jaunga……

Janhvi ab Mayank ke muh par apna hath rakh kar use chup kara deti hai. Aur tabhi lights bhi band ho jati hain. Janhvi ab apna hath hata leti hai aur sidhi baith jati hai. Mayank fir se uska hath apne hath me le leta hai, Janhvi use haste hue dekhti hai aur kehti hai, “Kya kar rahe ho?”

Mayank: Shhh! Logon ko movie dekhne do. Unhe disturb mat karo.

Janhvi ab chup rehti hai aur dekh rahi hai ki Mayank kar kya raha hai. Mayank Janhvi ka hath lekar apne hath se milata hai aur dhire se bolta hai, “Dekho chand ban raha hai.”

Janhvi: Tum is sab ko mante ho?

Mayank: Nahi! Manta to nahi. Par maine suna hai ki jab perfect chand banta hai to……….

Janhvi: (beech me hi baat kaat kar) Aisa kuch nahi hota.

Mayank: Okay! Tum jyada bolo mat. Chup raho. Bas mere sath… Jaise hum kuch der pehle the.

Mayank apna hath faila deta hai, Janhvi Mayank ke gale lag jati hai. Dono apni aankhein band kar lete hain aur chahte hain ki ye pal aise hi tham jaye.

Mayank kuch der baad bolta hai, “Agar hum kisi aisi jagah mile hote jahan ye public na hoti to, tum black saree pehen kar aa sakti thi.”

Janhvi Mayank ke gale hue hi hasti hai aur uske dhire se gaal par ek laga hi deti hai aur kehti hai, “Tum bina pite maane hi nahi aakhir.”

Mayank: Tum se pitna mere lie saubhagya ki baat hai.

Janhvi: Idiot!

Mayank: Dekho tum se achi Hindi bolne laga hu ab main.

Janhvi: Aur tumhe peetna mera janam siddh adhikaar hai.

Hehehe! Ye Mayank aur Janhvi. Mann karta hai na ki ye dono hi sath rehne chahiye? Lekin pata nahi kismat ne inke sath aisa kyun kia. Mujhe ab tak samajh nahi aaya ki bhagwan ko agar in dono ko milana hi tha to pehle hi mila dete. Ye sabki zindagi me kuch na kuch uthal puthal karne ke aadi hain bhagwan bhi. Pata nahi bhagwan kya chahte hain? Kya wo in dono ko milana chahte hain? Ya dono ko mila kar alag karna chahte hain? Ye to wahi jane. Iske aage kya hota hai, Janhvi kaise Mayank ko sab sach batati hai ye hum dekhenge kal. Aaj ke lie bas itna hi….. Tab tak…..

Take care of yourselves…….
&
Keep feeling the Love………. ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s