Kashmakash (E-9)

Episode-9

Recap: Janhvi jab office se ghar pahunchi to Raghav aur uski maa ne use naukari chhodne ke lie kaha jiske lie usne saaf mana kar diya. Isse Raghav gusse me aa gaya aur usne ghar me kuch chize tod di. Agle din jab Janhvi Mayank se mili to Mayank bahut hi khush tha kyunki Janhvi ne uske kahe mutabik kale rang ka suit pehna tha. Wo Janhvi se puchta hai ki uske dil me kya hai aur wo kehti hai ki wo Mayank ko pasand karti hai. Ab aage………

Janhvi ghar pahunchti hai. Use pata hai ki ghar par koi usse baat bhi nahi karna chahta, wo ghar jana nahi chahti, par uske paas aur koi rasta nahi hai. Wo ghar pahunchti hai. Raghav aur uski maa dono hi living room me baith kar T.V. dekh rahe hain. Janhvi ke aate hi dono wahan se uth kar apne Kamron me chale jate hain. Janhvi kapde badal kar rasoi me jati hai. Wahan Raghav aur uski maa ke khane ke juthe bartan hain, par Janhvi ke lie khana nahi hai. Janhvi fridge me dekhti hai, use ek din purani thodi sabzi mil jati hai. Wo ab apne lie roti banati hai aur kha leti hai. Use is chiz se koi farq nahi padta kyunki use iski ummid thi. Wo sab chize samet leti hai par uska apne kamre me jane ka mann nahi hai. Wo living room me hi T.V. chala kar baith jati hai. Wo kuch der aise hi waqt bitati hai aur fir apne kamre me chali jati hai. Janhvi ke kamre me jane tak Raghav so chuka hai. Janhvi wahan jakar apni tarah let jati hai. Aur fir se uske dil-o-dimag ki kashmakash shuru ho jati hai.

Usne socha tha ki wo Mayank ko kabhi apne dil ki baat nahi bataegi, par usne bata di. Aur isilie ab use Mayank ko jyada der andhere me nahi rakhna chahiye. Wo soch rahi hai ki kaise wo use apne sach ke baare me bataye. Aur bas yahi sochte hue wo so jati hai.

Wo ek hafta beet chuka hai. Ye hafta Janhvi ke lie acha bhi tha aur bura bhi. Kyunki Janhvi ko Mayank ke sath rehne ka waqt milta tha aur bura islie ki der se ghar par aane ki wajah se Janhvi se Raghav aur uski maa baat tak nahi kar rahe the. Janhvi is waqt office me hai aur lunch time me Mayank se phone par baat kar rahi hai, “Arey! Tum pagal ho kya? Ye zid tumhari bilkul nahi chalne wali hai Mayank.”

Ab Mayank kya zid kar raha hai? Wo sach me pagal hi hai, uski farmaishe khatam hone ka naam nahi le rahi hain. Ab dekhte hain ki aaj wo Janhvi se kis chiz ki farmaish kar raha hai?

Mayank: Kya problem hai? Main roz me tumhare sath kyun nahi ja sakta?

Janhvi: Tum specially mujhe ek hafte lene aaye maine islie kuch nahi kaha ki tumhe meri chinta thi. Par ab ye jyada ho raha hai. Apna kaam chhod kar aaoge tum ab?

Mayank: Arey nahi baba…. Main jab mera kaam jaldi khatam ho jaya karega, sirf tab hi.

Janhvi: Aur main tumhe janti hu, ab se tumhara kaam roz jaldi khatam ho jaega.

Mayank: (Haste hue) Tum itna kaise janti ho mujhe?

Janhvi: Bas janti hu.

Mayank: Okay! Thik hai. Par mujhe tumse milna hai.

Janhvi: Ab ye kya naya hai? Abhi pure ek week kya kia hai tumne?

Mayank: I want a whole day. Pure din tumhare sath.

Janhvi: Apni farmaishon par rok lagao mister.

Mayank: Aur tum apne bolne par. Meri puri baat sunti nahi ho pehle hi bolna shuru kar deti ho.

Janhvi: Okay bolo!

Mayank: Wo maine tumhe bataya tha na ki main trekking par ja raha hu.

Janhvi: Han!

Mayank: Han! To wo final ho gaya hai aur after 15 days we have to go.

Janhvi: To?

Mayank: To bas usse pehle main ek din tumhare sath spend karna chahta hu. Pura din.

Janhvi: Thik hai.

Mayank: Aur tum mujhe kuch batane bhi wali thi jo tumne nahi bataya.

Janhvi: Kya?

Mayank: Ki tum kya sochti ho…

Janhvi kuch pal ke lie chup ho jati hai.

Mayank: Nahi batana?

Janhvi: Batana hai.

Mayank: To fir?

Janhvi: Phone par nahi.

Mayank: Bas tumhe mana hi karna hota hai.

Janhvi: I will tell you everything. I promise.

Mayank: Okay! To kab mil rahi ho?

Janhvi: Tumhare jaane se ek din pehle?

Mayank: Okay! I am waiting for that day.

Janhvi: Hmmm! Ab mujhe lunch karne do.

Mayank: Han! Thik hai. Par us din meri choice ke kapde.

Janhvi: Okay! Jaisi aapki aagya.

Mayank: (muskurate hue) Ye jo tum aise bolti ho na to bahut cute lagti ho.

Janhvi: Aur kuch cute lagta hai?

Mayank: Bahut sari chize hain. Jab bhi tum shuddh Hindi me bolti ho, pata nahi itne bhari words kahan se dhund ke lati ho? Tumne meri Hindi aur urdu dono sudhar di hain. Nahi to mujhe pata hi nahi tha ki konsa word Hindi ka hai aur kaun sa word urdu ka.

Janhvi Mayank ki baat par hasti hai aur kehti hai, “Ab tum jao, hum baad me baat karte hain.”

Mayank phone rakh deta hai.

Janhvi phone rakhti hai aur sochti hai ki wo shayad kabhi Mayank ke samne reh kar sach nahi bata paegi. Use Mayank ko likh kar sach batana chahiye. Wo lunch ke baad apni desk par jati hai aur ek mail Mayank ke naam likh deti hai. Usme use wo apne baare me sab batati hai. Par wo use bhej nahi pati. Wo us message ko delete kar deti hai aur sochti hai, “Aaj nahi! Ek aakhiri baar Mayank se milne ke baad main use sab sach bata dungi.”

Kitna mushkil hota hai jab kisi se pyar ho jaye aur use sach batana ho, wo sach jisse wo aapko chhod kar ja sakta ho. Kuch pal aur, kuch pal aur ki chahat me Janhvi ne kafi waqt guzar dia hai. Aur shayad yahi Janhvi ki sabse badi galati hai. Par ab jo wo kar chuki hai wo use sudhar nahi sakti. Ab dekhna ye hai ki wo kaise aur kab Mayank ko sach bata pati hai. Par usse pehle Mayank aur Janhvi ko ek baar aur milna hai. Aur wo din bhi aa hi gaya hai.

Janhvi aur Mayank office ke waqt par hi ghar se nikal jate hain. Aur Rajiv Chowk metro station par milte hain.

Mayank: Thank you! Tum meri har baat maan leti ho.

Janhvi: Itni subah milne kis lie bulaya?

Mayank: Pura din matlab pura din.

Janhvi: Main tumhari naak pakad kar kheench sakti hu tumhe pata hai?

Mayank: Kheench do. Mujhe koi farq nahi padta.

Janhvi: Ab hum kahan baithenge? 9 baje to koi shop koi jagah kuch bhi open nahi hota hai.

Mayank: Ye metro station hai na.

Janhvi: Ye?

Mayank: Han! Ye hi. Tum janti ho maine tumhe yahan kyun bulaya?

Janhvi: Yahan hi hume pura din spend karna hai islie?

Mayank: Nahi! Kyunki yahin se sab shuru hua tha.

Janhvi Mayank ko muskura kar dekhti hai.

Mayank: Sach me… Agar tumhari mom ka phone yahan na girta to hum kabhi mil na pate.

Janhvi: Hmmm!

Mayank: Tumhe pata hai kabhi kabhi chize bahut hi unplanned hoti hain. Hum sochte kuch hain aur ho kuch jata hai.

Janhvi: I know. Ye mujhse acha aur kaun jaan sakta hai.

Mayank: But I feel hum jisse bhi milte hain kisi reason se hi milte hain.

Janhvi: (dhire se) Na jane tumhe meri life me is time par bhejne ka bhagwan ka kaun sa reason tha?

Mayank: Kya bole ja rahi ho?

Janhvi: Kuch nahi.

Mayank: Tum thodi pareshan lag rahi ho.

Janhvi: Tumhare hote hue aisa ho sakta hai?

Mayank: Kahin baithe?

Janhvi: Hmmm…

Janhvi aur Mayank mile hain. Subah ke 9 baje wo usi metro station par mile hain, jahan wo pehli baar mile the. Aaj ke din kuch to special hone wala hai. Wo kya… islie ke lie kal ka episode zarur padhiyega….. Tab tak…….

Take care of yourselves………
&
Keep feeling the Love…………. ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s