Kashmakash (E-8)

Episode-8

Recap: Janhvi ko aaj office se der ho gayi hai aur isilie Mayank Janhvi ke sath raat me metro me ja raha hai. Raste me Mayank Janhvi se uske dil ki baat puchna chahta hai aur jab Janhvi thik se jawab nahi deti to wo use ek kaam deta hai aur kehta hai ki agar usne wo kia to iska matlab Janhvi use pasand karti hai, aur agar nahi kia to wo use pasand nahi karti. Ab aage………

Janhvi ab ghar pahunchti hai. Aaj Raghav ghar par pehle se hi hai. Aaj ghar me pehle se jyada shanti hai, Janhvi ko kuch ajeeb lag raha hai. Raghav aur uski maa khane par chup hain, koi bhi ek shabd nahi bola. Janhvi khane par baithi hai aur wo Raghav ki maa se kehti hai, “Mommy! Wo office ke kaam ki wajah se kuch din aur late hoga. Ek week shayad.”

Raghav ki maa jawab deti hain, “Han beta! Kya pareshani hai, hum baithe to hain yahan ghar ka kaam karne ke lie.”

Janhvi: Nahi mommy! Aap chahe to hum khana banane wali laga sakte hain. Humare pados me aati hai na, main unse baat karti hu.

Raghav’s mom: Ab bas yahi din dekhne to bache the ki bahu ke hote hue khana banane wali lagegi.

Janhvi: Nahi! Mommy aap galat mat samjhiye. Ye bas us time ke lie jab jab main office se late ho jaungi. Nahi to wo upar ke chhote mote kaam karke chali jaegi.

Raghav’s mom: Humari sunta hi kaun hai, jaise marzi ho karo.

Janhvi: Mommy! Aisa kabhi kabhi hi hota hai. Baki din to main hoti hi hu.

Raghav: Janhvi bahut hua. Mom thik keh rahi hain, tumhare hote hue khana banane wali kyun lagani hai tumhe?

Janhvi: Main apne lie nahi mommy ke lie bol rahi hu.

Raghav: Ye tumhara kaam hai. Par tumhari job ki wajah se mom ko kaam karna padta hai.

Janhvi: Mahine me ek do baar hi karna padta hai Raghav, roz main hi karti hu.

Raghav’s mom: Bas ab yahi sunna bacha tha, ki main koi kaam nahi karti.

Janhvi: Maine aisa kab kaha hai mommy? Main bas aapki problem solve karna chahti thi islie kaam wali ke lie kaha.

Raghav’s mom: Problem solve hi karni hai to job se jaldi aao. Aur agar company wale nahi maan rahe to job chhod do.

Janhvi: (Hairani se) Kya?

Raghav: Jab tum ghar ko waqt nahi de sakti to kaam chhod do. Tumne shadi kyun ki hai? Sare din to tum kaam me rehti ho.

Janhvi: (Raghav se) Kaam me to pure pure din aap bhi busy rehte hain, to aap bhi chhodenge job?

Raghav: Janhvi! Tumhe ulte jawab dene bahut aate hain.

Janhvi: Maine is shadi ke lie han hi islie ki thi ki aap logon ko meri job se koi shikayat nahi thi.

Raghav: Han! Nahi thi…. Par ab hai kyunki mom ko kaam karna pad raha hai. Ek bahu ke hote hue bhi agar wo kaam karengi to kya fayda hai bahu ke hone ka?

Janhvi: To bahu ko kaam karwane ke lie late hain?

Raghav: Janhvi! Ab main tumhari ye badtameezi bardaasht nahi karunga.

Janhvi: Badtameezi? Main kar rahi hu? Ek din late aayi hu office se. Aapne ek baar bhi pucha nahi ki kaise aaungi, main lene aau kya? Koi pareshani to nahi hui. Upar se yahan aake meri job khatam karne ki baat aur kar rahe hain.

Raghav: Hume ye bhi chinta hai ki itni late ladkiyon ka travel karna thik nahi.

Janhvi: To ab tak aapne ye kyun nahi kaha tha?

Raghav: Kyunki fir tum mujhe narrow minded samjhti.

Janhvi: Aur aap mere job chhodne ki baat keh kar to bahut broad minded baat kar rahe hain.

Raghav’s mom: Dekh raha hai na tu. Ye aise hi zabaan ladati hai. Isse to kuch kehna hi bekar hai. Pata nahi kis ghadi me iske ghar gaye the iska hath maangne? Tu rehne de Raghav teri maa kar legi ghar ka kaam.

Raghav: Tumhe zara bhi sharam nahi hai na Janhvi? Na kabhi mujhse baat karte hue sochti ho aur na hi meri maa se?

Janhvi: Han! Main badtameez hu aur besharam bhi. But Raghav clear it in your mind ki chahe kuch bhi ho jaye main ye job nahi chhodne wali.

Raghav ab gusse se bhar chuka hai, kyunki Janhvi par uska bas nahi chal pa raha hai. Janhvi ne aaj tak uski har baat maan hi li hai, chahe wo kitni bhi ladi ho, lekin aaj wo Raghav ki baat manne ko taiyar nahi hai. Usne keh dia hai ki chahe kuch bhi ho jaye wo job kabhi nahi chhodegi. Aur isilie Raghav bahut bahut jyada gusse me aa gaya hai. Wo us kamre ki ek side table par rakha ek shishe se bana photo frame uthata hai aur use zor se zameen par fenk kar maarta hai. Wo photo frame tukde ho jata hai. Par aaj Janhvi bhi kuch galat chiz sehne ke mann me nahi hai aur wo Raghav ko ek aur waisa hi photo frame utha kar uske hath me rakh deti hai aur ishare se use bhi todne ke lie kehti hai. Raghav gusse me use bhi fenk ke maarta hai. Wo photo frame bhi toot jata hai. Raghav aur uski maa apne apne kamre me chale jate hain. Aur Janhvi wahin wahan ek sofe par baith jati hai. Wo ro rahi hai, wo pachhta rahi hai. Wo soch rahi hai, “Sirf teen mahine…. Sirf teen mahine baad hi tumhe milna tha? Kyun nahi aaye tum pehle meri life me? Kyun tumhe mujhe meri shadi ke baad hi milna tha. Aaj jab tumne pucha ki main tumhare baare me kya sochti hu, to mera mann kia ki tumhe bol du ki kitne pasand ho tum mujhe, kitna chahti hu main tumhe. Aur mujhe bhi pata nahi chala ki ye kab hua mere sath, par ehsaas tab hua jab tumse alag hone ka socha. Raghav ke sath hote hue bhi main tumhare sath hoti hu, jab wo mere kareeb aata hai to usme bhi tumhe sochti hu. Tumhe main sab batana chahti hu Mayank. Main batana chahti hu ki main tumse kitna pyar karti hu. Parrrr….. (apne aansun ponchte hue) main kya karu is shadi ka? (sisakte hue) Main kya karu Mayank? Na tumhe sach bata pa rahi hu aur na tumse door ja pa rahi hu. Aisa kyun ho raha hai mere sath? Sometimes I regret, ki acha hota ki main tumhe mili hi na hoti. Kam se kam meri ye myth ki ladke aise hi hote hain ye to na tootati. Main janti hu ki jis din maine tumhe sach bataya us din tum chale jaoge. Aur tum mujhe chahiye ho Mayank. Chahe kuch waqt aur sahi….. (aansu ponch kar muskurate hue) Tum mere lie do station aage sirf 5 min bitane ke lie aate ho. Aur main bhi wahi kar rahi hu, kuch aur din bitane ke lie tumhe aaj tak maine sach nahi bataya. Sochti hu ki kam se kam ye kuch din to ache beet jaye, aage to pata hai bichhadna hi hai. Main janti hu ki ye sahi nahi hai, main janti hu ki main selfish hu. Par main tumhe sach nahi bata sakti.”

Kya lagta hai aapko? Janhvi sahi kar rahi hai? Nahi! Sahi to ye bilkul nahi hai. Wo apni khushi ke lie Mayank ki life ke sath khel rahi hai. Wo swarthi hai. Use Mayank ko sab sach bata dena chahiye. Par….. Bas ek sawal? Aap uski jagah hote to aap kya karte? Main shayad yahi karti, jo aaj Janhvi kar rahi hai. Ab ye sahi hai ya galat sach me mujhe nahi pata, par itna pata hai ki is waqt Janhvi jis kashmakash se guzar rahi hai, wo kisi ki zindagi me na aaye, kyunki isse guzarna bahut mushkil hai.

Agle din Janhvi taiyar hoti hai aur office pahunch jati hai. Aur jaisa ki Mayank ne kaha tha ki sham ko wo use lene metro station par aaega wo wahan pahunch jata hai. Pehle din ki tarah Janhvi aur Preeti Mayank se milte hain, fir Preeti wahan se chali jati hai aur Mayank aur Janhvi metro me chadh jate hain.

Mayank muskura raha hai. Janhvi use dekh kar kehti hai, “Kya?”

Mayank: Toooo… Tumne aakhir meri farmaish puri kar hi di. Black suit, baal khule, maathe par bindi, kaano me choti choti jhumki, hatho me chudiya aur chehre par ye cute si hasi.

Janhvi: (muskurate hue) Hmmmm! Par aage ab koi farmaish mat karna.

Mayank: Wo to baad ki baat hai. Pehle do baatein important hain.

Janhvi: Kaun si do baatein?

Mayank: Pehli ye ki you are looking gorgeous.

Janhvi: (muskurahat me sharam ke sath) Thanks! Aur dusri baat?

Mayank: (Janhvi ko lagataar dekhte hue) Dusri baat ki tum mujhe pasand karti ho.

Janhvi ab bina kuch bole sirf muskura kar Mayank ko dekh rahi hai.

Mayank: (khushi ke sath) Hai na?

Janhvi ab bhi kuch nahi bolti aur nazarein jhuka leti hai.

Mayank: Arey bolo na…..

Janhvi: (dheeme se haste hue) Tumne kaha tha tum khud jaan loge, mere actions ko dekh kar.

Mayank: (Janhvi ko dekhte hue) I know… what you think about me.

Janhvi: Hmmm! Acha kuch decide hua tumhare jane ka?

Mayank: (ghurte hue) Baat palatne me maahir ho tum.

Janhvi: Arey! Aur kitni baat karoge isi baare me?

Mayank: Abhi baat khatam nahi hui thi.

Janhvi: Aur kya baat karni hai tumhe?

Mayank: (zor se muskura kar) Meri nayi farmaish…..

Janhvi: (haste hue) Daant dikhana band karo.

Mayank: To suno…

Janhvi: (haste hue) Mayank! Main kuch nahi karne wali ab. Aaj bhi Preeti mujhe bol rahi thi ki kya banke aayi hai.

Mayank: Use bolne do, tum meri baat suno.

Janhvi: (sir hilate hue) Bolo!

Mayank: I want to see you in a saree.

Janhvi: (hasi ko rokte hue) Oh god! Ye main kabhi nahi karne wali. Mujhe office bhi jana hota hai.

Mayank: Arey! Hase ja rahi ho, suno na.

Janhvi: (haste hue hi) No!

Mayank: Arey baba! I know tum office me saree nahi pehenogi.

Janhvi: Han! To fir kya chahte ho?

Mayank: Main bas bata raha hu, ki main tumhe saree me dekhna chahta hu.

Janhvi: Acha!

Mayank: Black saree.

Janhvi: (fir se haste hue) Mujhe laga tha tumhara favourite colour pink hai.

Is baar Mayank bhi hasta hai aur kehta hai, “Arey tumhe beech me commentary karni zaruri hai kya, pehle sun nahi sakti?”

Janhvi thodi der lagati hai apni hasi rokne me aur fir dheere se bolti hai, “Bolo ab!”

Mayank: I was saying ki main tumhe black saree me dekhna chahta hu.

Janhvi fir hasne lagti hai. Mayank is baar naraz ho jata hai.

Mayank: Main bol hi nahi raha.

Janhvi: Okay! Sorry. Ab nahi hasungi.

Mayank dusri taraf chehra ghuma leta hai.

Mayank Janhvi se is tarah pehli baar naraz hua hai, islie is baar Janhvi ko bhi use manana chahiye. Janhvi wahi koshish karti hai.

Janhvi Mayank ke samne jakar bolne ki koshish karti hai, par Mayank dusri taraf ghum jata hai. Metro me aas paas log bhi hain, islie Janhvi ko ye sab karna ajeeb bhi lag raha hai. Wo soch rahi hai ki ab wo kya kare. Itne me un dono ke bichhadne ka waqt bhi aa jata hai kyunki Janhvi ka station aa gaya hai. Mayank aur Janhvi dono metro se utar jate hain. Mayank ab bhi chup hai. Janhvi use dekh rahi hai. Wo kehti hai, “Mayank! Please, sorry na.”

Mayank: Ghar thik se jana aur ghar pahunch kar message me.

Ye keh kar wo aage badhne lagta hai par Janhvi uska hath pakad leti hai aur use jane se rok deti hai. Mayank ruk jata hai.

Janhvi: Mayank! Aise gussa hote hain kya?

Mayank: Nahi! Aur jab tum is tarah hath pakad ke roko to bilkul bhi nahi.

Ye sunte hi Janhvi Mayank ka hath chhod deti hai. Janhvi aur Mayank ek dusre ki aankhon me dekh rahe hain.

Mayank: Janhvi!………….I like you. Aur fir tumne aaj ye sab mere lie kia to meri himmat aur badh gayi aur main na jane tumhe kya kya kehne laga. I know tum bhi mujhe pasand karti ho par shayad us tarah nahi. Mujhe wo sab nahi kehna chahiye tha.

Janhvi: Ye sab kyun bol rahe ho? Tum jante ho ki tum ye sab mujhse keh sakte ho.

Mayank: No… because chize dono taraf se honi chahiye. Aur main tumhe force nahi karna chahta.

Janhvi: Aur tumhe lagta hai aaj jo bhi kuch maine kia wo forceful tha?

Mayank chup rehta hai.

Janhvi: Bolo na….

Mayank: To fir mujhe batati kyun nahi ho ki tum mere bare me kya sochti ho?

Janhvi: I like you!

Mayank: Han! Tabhi to hum dost hain wala.

Janhvi: Nahi! Jaise tum like karte ho waise hi wala.

Mayank: Tum mujhe khush karne ke lie to nahi bol rahi na?

Janhvi: Kya yakeen dilane ke lie kal saree pehen ke aau?

Mayank muskurata hai aur kehta hai, “Idea acha hai par ye kisi aur din ke lie, jab tum aur main akele ho. Koi aas paas na ho.”

Janhvi: Iska kya matlab hai?

Mayank: Iska matlab ye hai ki us waqt koi aur na ho tumhe dekhne wala. Sirf main hu wahan.

Janhvi: Pata nahi kya kya sochte ho tum.

Mayank: Tum kuch nahi sochti?

Janhvi: Sochti hu.

Mayank: Kabhi batati kyun nahi ho fir?

Janhvi: Bata dungi.

Mayank: Mujhe abhi janna hai.

Janhvi: Kal?

Mayank: Hmmm! Abhi to ghar jana hai tumhe. Thodi der aur nahi ruk sakti?

Janhvi: Main rukna chahti hu. Parr….

Mayank: I know… tumhe late ho raha hai.

Janhvi: Mayank!

Mayank: Han!

Janhvi: Kya tum mujhe meri life me pehle nahi mil sakte the?

Mayank: Kyun abhi kya problem hai?

Janhvi: (muskura kar) Kuch nahi. Ab main chalti hu.

Mayank: Okay! Please message kar dena jab ghar pahunch jao.

Janhvi: Hmmm!

Janhvi ne Mayank ko keh dia ki wo bhi Mayank ko pasand karti hai. Ye shayad uske lie bahut mushkil tha. Wo use ye sab nahi batana chahti thi, kyunki wo nahi chahti thi ki Mayank ke dimag me uski kahi hui koi bhi baate rahe. Wo nahi chahti thi ki Mayank ko kabhi lage ki wo Mayank se sath dhokha kar rahi thi. Wo nahi chahti thi ki Mayank use galat samjhe. Par aaj usne bol dia. Wo apne dil ki baat nahi chupa payi. Kya ye dil ki baat batana uske lie aage koi musibat banega? Ye hum dekhenge kal……. Tab tak……

Take care of yourselves……..
&
Keep feeling the love……….. ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s