Kashmakash (E-7)

Episode-7

Recap: Janhvi aur Mayank metro me hain aur tab Janhvi ko pata chalta hai ki Mayank uske sath waqt bitane ke lie aur do station aage jana chahta hai, jabki uska station pehle hai. Use Mayank ki ye baatein achi lagti hain aur isilie uski aankhein bheeg jati hain. Mayank ye dekh kar pareshan ho jata hai. Aur use hasane ki koshish karta hai, uske aansu ponchta hai, usse kuch baatein karta hai. Wo Janhvi ko bata dena chahta hai ki wo use pasand karta hai par Janhvi uski baat ko rok kar use ghar wapas bhej deti hai. Ab aage………

Janhvi ghar pahunch gayi hai. Wo apne kamre me ja kar darwaza band kar deti hai aur bas bed par baithi hai. Ab wo bed par let gayi hai. Wo kisi ko dikhana nahi chahti ki wo kitni khush hai, kyunki Janhvi ki khushi se kisi ko koi farq nahi padta hai. Use Mayank ki ye choti choti baatein bahut achi lagti hain, jinse wo use bole bina jata deta hai ki wo Janhvi se kitna pyar karta hai. Janhvi wo har pal dobara yaad kar rahi hai aur muskurahat uske chehre par hai.

Mayank bhi ghar pahunchta hai aur sidhe apne room me ja kar darwaza band kar deta hai aur bed par ja kar let jata hai. Wo bhi dikhana nahi chahta ki wo kitna khush hai, kyunki uski behen pure ghar me shor macha degi aur fir Mayank ko apne ghar walon ko pata nahi kya kya keh ke manana padega.

Dono ki wajah alag alag hain, par kaam dono ek hi kar rahe hain. Dono chupane ki puri koshish kar rahe hain par chupa nahi pa rahe, aap khud hi dekh lijiye.

Mayank khane ki table par baitha dheeme dheeme muskura raha hai. Aur uski behen jo jasoos number one hai, wo use dekh rahi hai. Wo kehti hai, “Lagta hai aaj, bina phone me dekhe hi tujhe joke yaad aa raha hai.”

Mayank ka dhyan Anshika ki taraf jata hai aur wo kehta hai, “Tu hamesha mere piche kyun padi rehti hai? Apna khana kha.”

Anshika: (haste hue) Thik hai. Mat bata, main ek din pata kar hi lungi.

Mayank: Shaunk se!

Mayank’s mom: Waise wo ladki ka naam kya hai?

Mayank: Janhv…. (Khud ko sambhalte hue) Ummmhhh.. kaun ladki?

Mayank’s mom: Wahi jisse tu baat karta hai.

Mayank: Nahi koi ladki nahi hai.

Anshika: To ye Janhvi kaun hai fir?

Mayank: Tujhe Janhvi ke baare me kaise pata?

Mayank’s mom: To Anshika sahi bol rahi thi.

Mayank: Arey nahi mom! Hum bas dost hain.

Mayank ke papa ko in sab chizon me koi dilchaspi nahi hai, wo to khana kha kar T.V. dekhne me mashgool hain.

Mayank’s mom: Hume koi problem nahi hai. Life teri hai, tujhe agar wo pasand hai to teri marzi. Hume mehnat nahi karni padegi.

Mayank: Hum bas dost hain mom.

Anshika: Sirf dost raat ko messages nahi karte.

Mayank: Ache dost hain hum.

Anshika: Agar bol dega ki wo tujhe pasand hai to kuch bigad jaega tera?

Mayank: Han! Pasand hai.

Mayank’s dad: Photo to dikha zara.

Mayank hairan hai ki papa ab tak bas T.V. dekhne ka natak kar rahe the, unka pura dhyan yahan baaton me hi tha.

Mayank’s mom: Han! Pic dikha.

Mayank: Arey! Aap log bhi na, hum bas dost hain.

Anshika: Tujhe pasand hai na wo.

Mayank: Par use main pasand na hua to?

Anshika: To photo to dikha hi sakta hai.

Mayank apne phone me se Janhvi ki photo dikhata hai. Sab log uski photo dekhte hain.

Mayank: Kaisi hai?

Mayank’s mom: Jyada achi to nahi hai. Han! Thik hai.

Anshika: Aapka ladka to bada rajkumar hai na jaise.

Mayank’s dad: Han! Sahi kaha. Ladki humare is nalayak se to achi hi hai. Dono ki jodi achi rahegi.

Mayank mann hi mann khush ho raha hai.

Mayank: Waise wo achi dikhti hai, aap dusri pic dekho.

Mayank’s mom: Haann! Isme lag rahi hai achi. Ye wali pic kyun nahi dikhayi pehle?

Mayank’s dad: Tu kahe to baat kare?

Mayank: Nahi! Pehle main uske mann ki baat janna chahta hu.

Mayank’s mom: Ye bhi sahi hai. Kahin wo ladki hi interested na ho.

Lijiye Mayank ke ghar par to sabko Janhvi ke baare me pata bhi chal gaya aur wo log Mayank ki shadi Janhvi se karane ke lie taiyar bhi ho gaye. Par tab kya hoga jab unhe ye pata chalega ki Janhvi to pehle se hi shadishuda hai. Aapko kya lagta hai? Kya Janhvi ko Mayank ko sach bata dena chahiye? Kya Janhvi bewajah hi is baat se darr rahi hai ki agar usne sach bata dia to wo Mayank ko kho degi? Ya uska ye darr sach me saccha hai?

Aaj Janhvi ko khush dekh kar Janhvi ke ghar me bhi Raghav Janhvi se kehta hai, “Kya baat hai? Aaj bahut khush lag rahi ho tum.”

Janhvi: (sambhalte hue) Nahi! Aisi koi baat nahi hai.

Raghav: Ek baat puchu?

Janhvi: Puchiye!

Raghav: Ab tumhe mujhse shikayatein nahi rehti?

Janhvi: Aap chahte hain ki main shikayatein karu?

Raghav: Nahi! Main bahut khush hu. Tumhe koi shikayat nahi hai mujhse.

Janhvi iske aage kuch nahi kehti.

Raghav: Tum aise hi achi ho. Pata nahi beech me tumhe kya ho gaya tha? Ladkiyon ko itna bolna nahi chahiye.

Janhvi kuch nahi bolti sirf sunti hai aur chup rehti hai.

Raghav khush hai ki Janhvi ne ab shikayat karna band kar diya hai, par wo ye nahi janta ki shikayatein tab band ho jati hain jab ummidein khatam hoti hain. Janhvi ko ab Raghav se koi ummid koi expectation nahi hai aur ye ek rishte ke lie achi baat nahi hai. Par Raghav khush hai, wo nahi janta ki ye aane wale toofan ki khamoshi hai.

Dhire dhire din bhi beet rahe hain aur din par din Mayank aur Janhvi kareeb bhi aa rahe hain. Ek mahina aur beet jata hai aur Janhvi ko jyada kaam ki wajah se office me der tak rukna pad raha hai. Janhvi ne ghar par der se aane ke baare me bata diya hai. Roz Janhvi 6 baje tak apne office se nikal jati hai par aaj raat ke 9:30 ho rahe hain aur wo office me hi hai. Wo ab office se nikal rahi hai aur Mayank se phone par baat bhi kar rahi hai, “Han! Mayank mere sath Preeti bhi hai, you don’t worry.”

Mayank: Han thik hai. I know ki Preeti bas metro station tak hi jati hai tumhare sath, uske baad wo alag ho jati hai. Tum bolo to main aa jata hu tumhe lene.

Janhvi: Nahi! Uski zarurat nahi hai.

Mayank: Acha tum pehle metro station pahunch jao, uske baad mujhe phone karna.

Janhvi: Okay!

Janhvi aur Preeti dono metro station par pahunchti hain. Janhvi Mayank ko batane ke lie call kar hi rahi hai ki Preeti usse kehti hai, “Janhvi ye Mayank hai kya, jo samne se aa raha hai?”

Janhvi: (dhyan se dekhte hue) Hey bhagwan! Mayank bhi na. Mana kia tha ise.

Preeti: (muskurate hue) Tu sach me bahut lucky hai.

Itne me Mayank wahan pahunch jata hai.

Mayank: (Janhvi ko dekhte hue) Hi!

Janhvi: Maine mana kia tha na.

Mayank: Han! Par mera mann nahi maan raha tha.

Janhvi: Isse milo, ye hai Preeti.

Preeti: Hi!

Mayank: Hi! Aapke baare me bahut suna hai maine.

Preeti: Aur aapke baare me maine bahut suna hai.

Mayank: (Preeti se) Acha! Ye mere bare me baat karti hai? Mujhe to laga tha ki bas mujhe jhel rahi hai.

Preeti: (haste hue) Ab ye to aap dono hi jano. Chalo main chalti hu fir.

Mayank: Preeti! Aapka ghar kahan hai? We can drop you first.

Preeti: Nahi! It’s okay. Mujhe waise bhi opposite side jana hai. I will manage.

Mayank: You sure?

Preeti: Yeah!

Mayank: Okay!

Preeti: (Janhvi se) Thik hai fir main chalti hu. Bye!

Janhvi: Bye!

Preeti wahan se chali jati hai. Ab bas Janhvi aur Mayank hain.

Mayank Janhvi ko dekh kar muskurata hai.

Janhvi: Iski koi zarurat nahi thi.

Mayank: Tumhe pata hai tumne aaj Pink pehna hai.

Janhvi ek nazar khud par daalti hai aur muskurati hai.

Mayank: Aur maine pehli baar tumhe is tarah suit me dekha hai.

Janhvi: Kya kehna chahte ho?

Mayank: Yahi ki agar main tumhe dekhta rahu to mujhe tokna mat.

Janhvi: (sharam wali muskurahat ke sath) Ab chale?

Mayank: Hmmm!

Metro me pahunchne ke baad dono ko hi ek seat mil jati hai. Aur Mayank baat shuru karta hai, “To ye late aana kab tak rahega?”

Janhvi: Ek week to ho hi sakta hai.

Mayank: Main tumhe lene aaunga.

Janhvi: Mayank! Iski koi need nahi hai.

Mayank: I know you are a brave girl. And you can travel alone. Par ye bas meri satisfaction ke lie. Aur tumse milna bhi to ho jaega.

Janhvi Mayank ko dekh rahi hai, Mayank Janhvi ko dekh raha hai.

Mayank: Acha suno! Kal na tum black colour pehen kar aana.

Janhvi: Aur koi farmaish?

Mayank: Han! Aur hairs should be open.

Janhvi: Aurrr?

Mayank: Aurrr? Ek choti si bindi.

Janhvi: Aurrr?

Mayank: Ummm… Aur han ye bracelet ki jagah agar bangles ho to acha rahega.

Janhvi Mayank ki baatein sunkar muskura rahi hai, “Aur koi aagya?”

Mayank: Aur kal ke lie bas itna hi, baki abhi to pura week hai. Kar lunga sari farmaishe puri.

Janhvi hasti hai aur Mayank use dekh kar hasta hai. Kuch pal dono ek dusre ko aise hi dekhte hain aur phir nazare chura lete hain.

Mayank: Waise mujhe tumhe ek baat batani hai.

Janhvi: Bolo!

Mayank: Main aur mere kuch friends trekking par ja rahe hain.

Janhvi: Okay! Kab?

Mayank: Abhi pata nahi we are planning for it.

Janhvi: To?

Mayank: To ye Ma’am ki main wahan par tumse baat nahi kar paunga.

Janhvi: Kitne din ke lie jaoge?

Mayank: Ek week.

Janhvi: (hairani se) Ek week? Ye jyada lamba time nahi hai?

Mayank: (chhedne ke andaaz me) Why? You will miss me?

Janhvi: Shut up! You know that I don’t miss you.

Mayank: But I will miss you.

Janhvi: To kyun ja rahe ho?

Mayank: Ab bachpan ke dost hain, mana nahi kar sakta aur mujhe bhi pasand hain trekking. Pahad chadhna, natural scenic beauty dekhna.

Janhvi: To fir jao, aur enjoy karna wahan.

Mayank: Abhi to time hai. Waise tum na bologi to nahi jaunga.

Janhvi: Itni baat maante ho meri?

Mayank: Ab maanta to huuuu…. Par tumhe lagta nahi hai.

Janhvi: Aur kyun maante ho?

Mayank: Kyunki tumhari baat nahi maanke mujhe marna thode hi hai.

Janhvi: Aaj tak ek chaata bhi lagaya hai tumhe?

Mayank: Par bolti to rehti ho, maar dungi maar dungi.

Janhvi: (jhuthe ko rooth kar) Thik hai. Ab se kuch kehne hi nahi wali.

Mayank: Acha suno! Kal na ye earrings bhi na dusre daal kar aana.

Janhvi: Main gussa hu.

Mayank: To?

Janhvi: To tum fir bhi farmaishe kie ja rahe ho.

Mayank: Because I know ki tum tab bhi meri sari farmaishe puri karogi.

Janhvi: Kitna confidence hai khud par?

Mayank Janhvi ko dekhte hue uski naak par halke se ungali chhua kar kehta hai, “Confidence mujhe khud par nahi, tum par hai.”

Janhvi muskura deti hai aur Mayank samajh jata hai ki uski jhuthi narazgi khatam ho chuki hai.

Mayank: Tum kabhi nahi bol sakti na ki tum mujhe miss karti ho ya tumhe mere sath acha lagta hai.

Janhvi: (muskurate hue) Acha ab bas bhi karo tum.

Mayank: No! You have to tell me ki you like me or not.

Janhvi: Ab ye kya zid hai?

Mayank: Zid nahi hai, bas I want to know ki tum mere baare me kya sochti ho?

Janhvi: Maine tumhe bataya tha ki tum ek decent ladke ho aur isilie main tumse baat kar rahi hu.

Mayank: Bas? Yahi wajah hai? Ye to tum mujhe milne ke baad hi bol chuki thi na.

Janhvi: To kya sunna hai?

Mayank: Main tumhe pasand hu ya nahi?

Janhvi: Pasand ho tabhi to hum baat karte hain, hum dost hain.

Mayank: Tum janti ho Janhvi main tumse kya puch raha hu.

Janhvi: (muskura kar) Maine tumse pehle hi kaha tha….

Mayank: (baat kaat’te hue) Janhvi ye sab mat bolo na, jo sach hai wo bolo.

Janhvi: Main kya bolu. Tum aise questions kyun puchte ho? Kya main kabhi tumse ye sab puchti hu?

Mayank: Thik hai nahi puch raha. But I will judge your actions from now onwards.

Janhvi: What do you mean?

Mayank: Matlab kal agar tumne black colour pehna, aur wo sab kia jo maine tumse aaj kaha hai. To main samajh jaunga.

Janhvi: Ye kya baat hui.

Mayank: Ye hi baat hai. Tum kuch bolti nahi to main kaise pata karu, tumhare mann me kya hai?

Janhvi: Aur iski zarurat hi kyun hai?

Mayank: Kyunki main janna chahta hu. Ab tumhari marzi hai. Tumhe jo show karna hai karo. Main to ab yahi karunga. If you like me to tum ye sab karna nahi to bilkul bhi, kuch bhi karne ki koi zarurat nahi hai.

Janhvi: Mayank! I like you…… maine kaha to.

Mayank: Na! Na! Na! Na! Na! Na! Ab to main aise hi pata lagaunga. Tum ab kuch bhi mat bolo.

Janhvi has rahi hai aur bolti hai, “Ye kya pagalpan hai?”

Mayank: (haste hue) Ab ye jo bhi hai, ye sab tum hi karwa rahi ho mujhse.

Janhvi: Acha! Ab tum jaoge? Tumhara station aa gaya hai.

Mayank: Tumhe har baar batana padega, main tumhare sath hi jaunga.

Janhvi: Tum bhi na Mayank!

Mayank: Aur mujhe fir se koi emotional scene nahi chahiye.

Janhvi: Ab main har baar nahi rone wali.

Mayank: That’s good.

Mayank Janhvi ko uske metro station tak chhod deta hai. Waise to wo aage tak jane ke lie bhi bol raha tha par Janhvi ne mana kar dia. To kya lagta hai aapko? Kal Janhvi black suit pehen kar jaegi ya nahi? Ab kal ki baat to kal hi dekhenge. Aaj ke lie….. Bas itna hi……

Take care of yourselves…………..
&
Keep feeling the Love…………….. ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s