Kashmakash (E-6)

Episode-6

Recap: Janhvi ne Mayank ko manaya aur wo dono ek mall me milne pahonch gaye. Dono hi phone par bahut ache se baat karte hain, par ek dusre ke samne wo kuch nahi bol pa rahe. Tabhi Mayank Janhvi se kuch kehta hai. Wo kya hai dekhte hain ab……………………….

Mayank ab Janhvi ko dekh raha hai aur achanak kehta hai, “Tumse kuch kahu?”

Janhvi: Han! Kaho.

Mayank: You are very special for me.

Janhvi sirf sunti hai, kuch kehti nahi.

Mayank: Ab se is tarah chhod kar jane ki baat kabhi mat karna.

Janhvi: (dheemi se muskurate hue) Nahi karungi.

Mayank: I can handle all other things but can’t handle this.

Janhvi soch rahi hai ki kya ye sab chize tab bhi hongi jab wo Mayank ko bata degi ki wo shadishuda hai.

Mayank: Kya soch rahi ho?

Janhvi: Kuch nahi. Bas yahi ki this friendship is special for me as well. Par main nahi janti ki ye dosti kab tak rahegi.

Mayank: Maine kaha tha na, ki ye dosti chand tak jaegi.

Janhvi: Main to chahti hu ki ye puri galaxy cover kar le, but I can’t say anything about this. Ho sakta hai time aisa aaye ki tum khud hi ye dosti todna chaho.

Mayank: Aisa kabhi nahi hoga.

Janhvi: Don’t be so sure about anything.

Mayank: I am sure about you.

Janhvi ab kuch nahi kehti, kyunki bina sach jane Mayank nahi samajh paega ki wo ye sab baatein kyun keh rahi hai.

Khana khane ke baad dono kuch der mall me ghumte hain, baatein karte hai, kuch waqt sath me bitate hain. Dhire dhire dono ke beech ki awkwardness khatam ho jati hai aur wo dono thik se baat karne lagte hain. Janhvi ne jis lie Mayank ko bulaya tha wo baat usne ab tak usse nahi ki hai. Wo soch rahi hai ki kis tarah Mayank se ye baat shuru kare, par use baar baar Mayank ki dosti kho dene ka darr sata raha hai. Aur dhire dhire waqt beet gaya hai, sham ho chuki hai aur ab dono ghar jane ke lie metro me aa chuke hain.

Mayank: To…

Janhvi: To kya?

Mayank: Ab fir mulakaat kab hogi?

Janhvi: Abhi ghar to aane do.

Mayank: Hum kabhi kabhi apne office ke baad bhi mil sakte hain.

Janhvi: Han! Mil to sakte hain.

Mayank: Aur ye kabhi kabhi roz bhi ho sakta hai?

Janhvi muskurate hue Mayank ki taraf dekhti hai par kuch bolti nahi.

Mayank: I know tum kya soch rahi ho?

Janhvi: Kya?

Mayank: Yahi ki ye kaisa pagal ladka hai. Ise bilkul bhi chain nahi hai.

Janhvi: Han! Ye to hai.

Mayank: Tumse baat karke, tumse milke acha lagta hai. Aur usi wajah se main na jane kya kya bol jata hu.

Janhvi Mayank ko ek nazar dekh kar nazare hata leti hai, kuch kehti nahi.

Mayank: Kuch kahogi nahi?

Janhvi: Aur aisa kyun hai?

Mayank: Kaisa?

Janhvi: Mujhse baat karke mujhse milke acha kyun lagta hai?

Mayank: Ab ye kyun hai, mujhe nahi pata. Bas ye hai. Tumhare sath time spend karna pasand hai mujhe. Tumhe kaisa lagta hai mera sath reh kar?

Janhvi: Bas… Tumhe jhel leti hu.

Mayank: Hehe! Mere lie itna hi kafi hai.

Janhvi: Bas itne se hi khush ho?

Mayank: Ab insan ki chahat to kabhi khatam nahi hoti. Jitna mil jaye utna kam lagta hai use.

Janhvi: Par tum to aise nahi ho. Kahan maante tum? Milne bula hi lia na.

Mayank: (muskura kar) Meri life me mujhe bas kuch apne chahiye aur kuch paise jinse main mere apno ki zaruratein puri kar saku. Isse jyada mujhe kuch nahi chahiye. Money is not that important for me. Aur tum un kuch apnon me se ek ho, to tumse kaise na milu?

Mayank ki is ek line se use Raghav ki wo baat yaad aati hai jab Raghav ne use ye kaha tha, “Tum pagal ho gayi ho, tumhe paise ki keemat nahi pata.” Janhvi wahi sochte hue bolti hai, “Hmmm!”

Mayank: Aur wo apne agar mujhe apni life me utni hi importance denge to mujhe aur acha lagega. Jaise tum deti ho.

Janhvi: Main? Maine kab tumhe importance di? Hamesha to tumhe daant’ti rehti hu, tumhe bhagati rehti hu.

Mayank: Wo sab sirf upari hai, I know tum andar se mere lie kya sochti ho.

Janhvi apne mann ki baat batana nahi chahti islie wo baat ko ghumane ki koshish karti hai.

Janhvi: By the way, tumhara station kaun sa hai?

Mayank: Next!

Janhvi: Mera aur do station aage hai.

Mayank: To main chal raha hu tumhare sath.

Janhvi: (hairani se) Kyun?

Mayank: 5 minute aur baat kar lenge hum.

Janhvi: Mayank!

Mayank: Janhvi!

Janhvi: 5 minute me kya ho jaega, tum apne station par utar jao.

Mayank: Mujhe tumhare sath acha lagta hai, aur main apni marzi se chal raha hu tumhe kya problem hai?

Janhvi Mayank ko pyar bhari nigaahon se dekhti hai aur kehti hai, “Tum na idiot ho, tumhe pata hai?”

Mayank: Han! I know. Aur tum bahut intelligent ho.

Janhvi aur Mayank dono hi dhire se haste hain.

Janhvi Mayank ko dekh rahi hai. Wo dekh rahi hai ki Mayank subah se uske sath hai fir bhi 5 minute bitane ke lie wo 2 station dur uske sath aa raha hai. Aisa kabhi Raghav ne kyun nahi kia? Usse waqt maang maang kar thak gayi wo, par usne kabhi dhyan hi nahi diya. Aur Mayank ko mana karne ke baad bhi wo uske sath aa raha hai.

Mayank: Kya soch rahi ho?

Janhvi: Kuch nahi.

Mayank: Okay!

Janhvi: Tum aisa kyun karte ho?

Mayank: Ab maine kya kar dia?

Janhvi: Ye sab mat kia karo. Mujhe is sab ki aadat nahi hai. Jab tum chale jaoge to main ye sab bahut yaad karungi.

Mayank: Main kahin nahi ja raha hu, kitni baar kehna padega tumhe?

Janhvi ki nazare neechi hain aur ab Janhvi ka station bhi aa chuka hai. Janhvi metro se bahar nikal jati hai uske sath hi Mayank bhi bahar aa jata hai.

Janhvi: (nazare neechi kie hue hi) Ab tum jao.

Mayank: Pehle idhar meri taraf dekho.

Janhvi Mayank ki ore dekhti hai, Janhvi ki aankhein bhari hui hain. Mayank ye dekh kar hairan hai.

Mayank: Kya hua Janhvi? Meri koi baat buri lagi kya?

Janhvi: Tum yahan se jaoge ya nahi?

Mayank: Han ja raha hu. Pehle batao kya hua hai. Maine kuch galat keh dia?

Janhvi: Tum kabhi kuch galat keh ya kar sakte ho?

Mayank: Mujhe taane maar rahi ho?

Janhvi: Uff Mayank! Sach keh rahi hu. Main hamesha nahi daant’ti tumhe.

Mayank: I know, ye to main tumhe hasane ki koshish kar raha tha. Ab ye batao ye eyes bheegi hui kyun hain?

Janhvi: Mayank! Bahut der ho gayi hai, ab ghar jao.

Mayank: Main jane nahi wala jab tak tum nahi bataogi.

Janhvi aankhein band kar ke ek lambi saans leti hai aur kehti hai, “Bas mujhe is sab ki aadat nahi hai. Itna special treatment mat do mujhe.”

Mayank: (sir pakad kar) Tum is baat par aankhein bhigaye ho? Ek lagaunga tumhe.

Janhvi: Han! Ye treatment better hai.

Mayank: Pagal ladki.

Janhvi aur Mayank dono hi muskurate hain. Mayank Janhvi ke bilkul samne aa jata hai aur usse kehta hai, “Meri taraf dekho.”

Janhvi use dekhti hai. Mayank uski aankhon ke kone se girte hue uske aansu ponch deta hai.

Mayank: Janhvi! Mujhe acha nahi lagta jab tum roti ho.

Janhvi Mayank ko dekh rahi hai aur uski baat sun rahi hai.

Mayank: Pata hai pehle sirf meri mom thi jinhe main rota hua nahi dekh sakta tha. Ab usme tum bhi shaamil ho gayi ho.

Janhvi ki aankh se fir ek aansu girta hai aur Mayank use fir se phonch deta hai.

Mayank: Please! Ab nahi nikalna chahiye.

Janhvi: Aise tum meri aadatein bigaad doge.

Mayank: Main hi bigaad raha hu aur mujhe hi jhelni hain tumhari aadatein, islie mujhe koi darr nahi hai. Tum jitna bigadna chaho bigad sakti ho.

Janhvi Mayank ko dekh rahi hai, wo hairan hai ki kya sach me aise ladke hote hain?

Janhvi: Tum kabhi kabhi dusre ladkon ke jaise bhi behave kar lia karo.

Mayank: Maine to pehle hi kaha tha ki main iklauta piece hu. Waise dusre ladke kaise hote hain?

Janhvi: Jaise bhi hote hain, par tumhare jaise nahi hote. Tum iklaute piece ho sach me

Mayank: Main hamesha sahi hi bolta hu.

Janhvi: Now! You go.

Mayank: Ja raha hu na.

Mayank Janhvi ke baalon ko kaan ke piche karta hai aur kehta hai, “Apna khayal rakhna.”

Janhvi Han me apni gardan hila deti hai. Mayank uska hath apne hath me leta hai aur kehta hai, “Is tarah milna bahut acha hai.”

Janhvi sirf “Hmmm” kehti hai.

Mayank Janhvi ke hath pakade use dekh raha hai. Janhvi pyar se usse kehti hai, “Ab tum mujhe jane doge?”

Mayank: Ab to jane hi dena padega aur koi option nahi. Kya main tumhare ghar tak drop karu tumhe?

Janhvi hasti hai aur kehti hai, “Tum pagal ho chuke ho.”

Mayank bhi hasta hai.

Janhvi: Ab jao nahi to maar padegi.

Mayank: (mayusi se) Ja raha hu.

Janhvi Mayank ki ye choti choti chize dekh kar bahut khush hai. Wo kitna masoom hai, wo kitna pyara hai, wo Janhvi ko jane nahi dena chahta. Janhvi kisi ke lie itni important bhi ho sakti hai usne kabhi nahi socha tha. Janhvi inhi khayalon me hai ki Mayank fir kuch keh deta hai.

Mayank: Listen!

Janhvi ab sirf muskurati hai aur ishare se Mayank ko bolne ke lie kehti hai.

Mayank kehta hai, “You know na, you are very important for me.”

Janhvi: Hmmm! I know.

Mayank: I know tumne mujhe kaha tha par main bas kehna chahta hu.

Janhvi: Bolo jo bhi kehna hai.

Mayank: Dekho naraz mat hona.

Janhvi: (aankhein ghumate hue) Main ja rahi hu.

Mayank: (Janhvi ko rokte hue) Nahi! Nahi! Nahi! Nahi!

Janhvi: Bolo fir.

Mayank: I really like you Janhvi.

Janhvi: I like you too.

Mayank: Sach?

Janhvi: Han! Hum tabhi to dost hain na.

Mayank: Ohhhooo! Waise nahi.

Janhvi: Mayank! Ab main pitayi lagane wali hu. Baki baatein kal karna ab.

Mayank: Arey ye important hai.

Janhvi: Koi baat nahi. Ab jao.

Mayank: Thik hai. Ja raha hu. You take care.

Janhvi: You too.

Mayank: Bye!

Janhvi: Bye!

Janhvi Mayank ko dusre platform par jate hue dekh rahi hai. Ab Mayank samne wale platform par pahunch chuka hai aur metro ka intezaar kar raha hai. Janhvi wahin ruk kar use dekh rahi hai. Dono ek dusre ke samne hain aur muskura rahe hain. Thodi der me metro aati hai aur Mayank usme baith jata hai. Janhvi dur se hi Mayank ko “Bye” karti hai aur ab wo bhi apne ghar ke lie nikal jati hai.

Janhvi aaj bhi use nahi bata payi. Aisa nahi tha ki wo aaj use bata nahi sakti thi ki wo shadishuda hai. Par wo nahi bata payi. Iske lie hum use dhokhebaaz, swarthi, kisi ki feelings se khelne wali bhi keh sakte hain. Par uske mann ki kashmakash shayad bas wahi samajh sakti hai, hum nahi. Usne pehli baar ek aise ladke se baat karna shuru kia tha jo uske sare gham bhulane me madad kar raha tha, islie wo aage badh gayi, wo piche hatna chahti thi, par us waqt uski dost ne kaha ki ye sahi tareeka nahi hai, islie usne ek kadam aur aage badha dia. Aur aaj jab wo usse mili to use wo mehsoos hua jo wo itne din se apne pati ke sath mehsoos karne ki koshish kar rahi thi. Wo chah kar bhi nahi bata payi. Usne pehli baar ye mehsoos kia ki wo bhi kisi ke lie aehmiyat rakhti hai. Uski koi kadar karta hai, use koi samjhta hai, use koi pyar karta hai. Mayank ne saaf lafzon me nahi kaha par uski baaton me, uske bartaav me, uski harkaton me ye saaf jhalak raha tha ki wo Janhvi se pyar karta hai. Wo Janhvi se kehna bhi chah raha tha, par Janhvi bhi shayad samajh gayi thi isilie usne Mayank ko beech me hi tokte hue use jane ke lie keh dia. Kyunki agar wo kuch bol deta to Janhvi ke paas shayad koi jawab nahi hota.

Janhvi ne is dosti ko ek kadam aur aage badha dia hai. Ab dekhna ye hai ki ye dosti kab tak aur kahan tak aage badhti hai aur ye hum dekhenge kal……….. tab tak……

Take care of yourselves…………
&
Keep feeling the Love………….. ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s