Kashmakash (E-5)

Episode-5

Recap: Janhvi ki Raghav se fir se ladayi hoti hai. Raghav aaj apni maa ke lie Janhvi se ladta hai. Janhvi jaise taise Mayank se baat karne ke baad acha mehsoos kar rahi thi, lekin fir Raghav se ladayi ne use pareshan aur nirash kar dia. Use neend nahi aa rahi aur isilie wo Mayank ko message kar deti hai. Mayank se baat karne ke baad use acha mehsoos hota hai. Mayank aur uski dosti ko ek mahina ho gaya hai aur ab Mayank usse milna chahta hai jo Janhvi mana kar rahi hai kyunki use lagta hai ki Mayank kahin uski shadishuda zindagi me pareshani na ban jaye dusri baat ye bhi hai ki Mayank ko nahi pata hai ki Janhvi shadishuda hai. Yahi sab soch ke Janhvi Mayank se baat karna band kar deti hai. Mayank use call kar raha hai par Janhvi uska call nahi utha rahi. Ye sab Janhvi ki dost Preeti dekh rahi hai. Ab aage…………..

Janhvi lunch kar rahi hai aur uska phone lagataar baj raha hai. Mayank use lagataar call kar raha hai. Janhvi dekh rahi hai par call nahi utha rahi hai.

Preeti wahin uske sath baithi hai aur wo dekh rahi hai ki Mayank baar baar Janhvi ko phone kar raha hai. Wo Janhvi se kehti hai, “Phone utha le ek baar. Wo itna pareshan ho raha hai.”

Janhvi: Agar ab utha lia to fir main baat kabhi band nahi kar paungi.
Preeti: At least use bata to de ki tujhe usse baat nahi karni hai.
Janhvi: Main use bata chuki hu already.
Preeti: Ek baar thik se bata de.
Janhvi: Nahi!
Preeti: Wo sochega ki itni choti se baat par tune usse dosti khatam kar di, kya sochega wo tere baare me?
Janhvi: Sochne de.
Preeti: This is not fair yaar. At least give him a proper reason to break this friendship.
Janhvi: Proper reason ye hai ki use mere baare me pura sach nahi pata hai aur ye ki agar main usse baat karti rahi to main apni khud ki life me dhayan nahi de paungi.
Preeti: To main reason ye hai.
Janhvi: Main reason jo bhi ho, ye do reason hain aur bahut valid reasons hain.
Preeti: Aur teri ye dono chize ek baar me hi khatam ho sakti hain.
Janhvi: Kya matlab?
Preeti: Tujhe use bata dena chahiye ki tu married hai aur dusri baat ye ki jab use pata chalega to wo khud hi chala jaega. To teri dono problems dur ho jaengi.
Janhvi: Aur wo mere baare me jo sochega wo?
Preeti: To kya ho gaya? Sochne de jo soch raha hai. Ek mahina hi to hua hai tujhe usse mile hue, kya wo tere baare me kya soch raha hai ye itna important hai tere lie? Aur fir tu is sab ko ek hi baar me khatam kar sakti hai.

Janhvi ab soch me pad jati hai kyunki Preeti ki baat bilkul sahi hai.

Preeti aage kehti hai, “Usse baat kar aur jo bolna hai bol de.”

Janhvi is baar uska phone utha leti hai aur phone leke thodi dur chali jati hai. Wo kehti hai, “Hello!”

Mayank: Hello!
Janhvi: Bolo kya kehna hai?
Mayank chup hai, wo kuch nahi bol raha.
Janhvi: Mayank!
Mayank ab bhi chup hai.
Janhvi: (chinta ke sath) Mayank! Kuch bolo.
Mayank: (ek dheemi si awaz me) Kuch nahi.
Janhvi: (chinta ke sath) Tum thik ho? Kya hua?……………. Mayank……
Mayank: Nothing! (ek aah ki awaz)
Janhvi: Mayank! Are you okay?
Mayank: (dhire se) Yeah!
Janhvi: Jhuth mat bolo.
Mayank: Tum mera phone nahi utha rahi to kya karu main?

Janhvi apni aankhein band karti hai aur afsos karti hai ki usne ye kya kia. Wo Mayank ko hurt nahi karna chahti thi par use nahi pata tha ki uska baat na karna Mayank par is tarah ka asar karega.

Janhvi: (afsos ke sath) Acha! Tum pehle pani piyo.
Mayank: Mujhe nahi peena. Tum batao tum mere sath aisa karogi agar main ek baar tumse thoda sa gussa ho jaunga to?
Janhvi: Nahi!
Mayank: To fir subah se phone kyun nahi utha rahi ho mera.
Janhvi: To tum zid kyun karte ho?
Mayank: Tum agar yahi chahti ho to nahi bolunga main kabhi tumse milne ke lie.
Janhvi: Ye milne ki wajah se nahi hai.
Mayank: To aur kis wajah se hai?
Janhvi: Tum pehle pani pi lo.
Mayank: No Janhvi! Ab tumhari zid nahi chalegi. First you tell me, tumne mera phone
kyun nahi uthaya?
Janhvi: Bata dungi.
Mayank: Tumhe pata hai mera kaam me bhi mann nahi lag raha kab se bas tumhe call kie ja raha hu. Tum ab mujhse kabhi baat nahi karogi ye soch kar hi meri heart beats badh gayi thi pata hai. Kuch samajh nahi aa raha tha kya karu. Aur tum bol rahi ho bata dungi.
Janhvi: (dhire se) I am sorry!
Mayank: Don’t be! Because you are not sorry. Tumhe maza aata hai mujhe aise pareshan karke.
Janhvi: Aisa nahi hai.
Mayank: To kaisa hai?
Janhvi: Saturday ko milte hain, main milke tumhe kuch batana chahti hu.
Mayank: Mujhe ab nahi milna hai. Ye sab milne ki wajah se hi hua hai.
Janhvi: Mayank! I am sorry na.
Mayank: Mujhe subah se pareshan karke, you are sorry.
Janhvi: Ab daantna band bhi karo.
Mayank: Aur na karu to?
Janhvi: To daant lo aur jitna daantna hai.
Mayank: Wo to main daantunga hi.
Janhvi muskurati hai.
Mayank: Aur tumhara ye Riday parivartan kaise ho gaya?
Janhvi: Bas ho gaya. Saturday ko miloge?
Mayank: Sochunga.
Janhvi: Achha! Ab tum natak mat karo.
Mayank: Ye natak nahi hai.
Janhvi: Thik hai. Bata dena. Ab main ja rahi hu.
Mayank: Ab agar phone nahi uthaya na to sach me tumse kabhi baat nahi karunga main.
Janhvi: (muskura kar) Aisa kabhi nahi ho sakta ki tum mujhse baat na karo.
Mayank: Acha! Khud par itna confidence hai tumhe?
Janhvi: (muskurate hue) Khud par nahi, par tum par hai.

Ab Mayank ke chehre par bhi muskaan aa jati hai aur wo kehta hai, “Thik hai, thik hai. Ab tum jao, mujhe kaam karna hai.”

Janhvi: (khush hote hue) Okay! Byeeeee!
Mayank: (muskurahat ke sath) Bye!

Sham ko Janhvi Mayank ko dobara phone karti hai aur usse puchti hai ki Mayank ne kya socha hai.

Janhvi: To batao, kya socha hai?
Mayank: Pehle tum batao ki tum itne din se mana kyun kar rahi thi?
Janhvi: Jab milungi tab hi bata dungi.
Mayank: Okay! Jaisi tumhari marzi.
Janhvi: To Saturday?
Mayank: Yes!
Janhvi: To thik hai, Saturday ko Pacific mall, Kaushambi me.
Mayank: Okay! Time?
Janhvi: Dopahar ko 12 baje tak.
Mayank: Thik hai. Time se aa jana.
Janhvi: Tum bhi.
Mayank: Okay!

Janhvi phone rakh deti hai. Phone rakhte hi Janhvi ki dil ki dhadkan thodi badh jati hai wo is dosti ko aage badhana nahi chahti thi, par wo is tarah khush kyun hai? Aur yahi haal wahan Mayank ka bhi hai. Waise kehne ko dono pehle hi mil chuke hain, par dono ki ye mulakaat hi sahi mayne me pehli mulakaat hogi. Jab wo dono thik tarah se ek dusre ko jaan paenge. Dono ke dil me hi ek ajeeb si gudgudahat hai. Halaki ye ek dosti hai, par dono jaante hain ki ye sirf dosti nahi kuch aur hai par jaan kar bhi anjaan hain. Iski wajah shayad ye bhi ho sakti hai ki dono ne dosti ki shuruaat me hi ye baat final kar di thi ki ye dosti sirf dosti hi rahegi. Par dil is tarah dimag ki baat maan jata to baat hi kya thi. Dil sirf apne hisab se chalta hai, sirf apni sunta hai, apni hi karta hai aur…. apni hi karata bhi hai.

Wo din bhi aa jata hai jab dono ko milna hai. Mayank ne apne ghar par kapdon ka dher laga diya hai, wo har kapda pehen kar dekh raha hai ki kisme wo jyada acha lag sakta hai. Aur uski behen ye dekh kar pareshan hai ki ye aise kahan ja raha hai jo itni taiyari kar raha hai. Wo isi wajah se apni mom ke paas pahunch jati hai.

Anshika (Mayank’s sister): (Mayank ke room se bahar nikalte hue) Mom! Mom! Dekho to zara ye kahan ja raha hai. Isne cupboard me se sare kapde bahar nikal die hain. Main bol rahi hu zarur kisi ladki ka chakkar hai.
Mayank’s mom: Anshika! Aisa kuch nahi hai, agar aisa hoga to wo mujhe bataega hi.
Anshika: Mom! Hai. Nahi to ye pure time phone me kyun laga rehta hai?
Mayank’s mom: Dost bhi to ho sakte hain.

Mayank ab sari baatein sunkar bahar aata hai aur kehta hai, “Han mom! Dost hi hai. Ise jyada bolne ki aadat ho gayi hai. Sambhal lo ise.”

Anshika: Acha aur fir wo jo messages karte karte muskurata hai, uska kya?

Mayank ab ek pal ko ruk jata hai, use aisa lagta hai ki jaise uski chori pakdi gayi ho, par wo kehta hai, “Woooo…. Wo to joke…. Joke par muskurata hu main.”

Anshika: Achaaaa! Thik hai to fir. Ab aage se jab bhi tujhe hasi aaegi, tere joke main bhi padhungi.
Mayank: Wo tere matlab ke jokes nahi hain.
Anshika: Kyun? Joke to joke hote hain.
Mayank: Bola na. Nahi hain. Mom ise chup karao na. Mujhe waise hi late ho raha hai.
Mayank’s mom: (Mayank se) Tu ja na. Ise bolne de jo bol rahi hai.
Mayank: Thik hai.

Mayank wahan se fir apne kamre me chala jata hai, taiyar hone aur ghar se nikal jata hai aur mall pahunch jata hai. Mall pahunch kar wo Janhvi ko call karta hai, “Hello! Kahan ho tum?”

Janhvi: (call par hi) Aa rahi hu. Bas 5 minute. Tum kahan miloge?
Mayank: Food court.
Janhvi: Okay! I am coming.

Aaj Janhvi bhi hairan hai ki aaj tak use kisi se milne me itni nervousness nahi hui, jitni Mayank se milne jane par ho rahi hai. Itni nervous to wo shayad kabhi bhi nahi thi. Aaj aisa kya khaas hai pata nahi.

Mayank: Janhvi! Acha, ye batao tumne kya pehna hua hai?
Janhvi: Kyun? Tum mujhe pehchante ho na.
Mayank: Han! Par aise jaldi mil jaogi tum mujhe.
Janhvi: Okay! I am wearing a white top and a blue jeans. Aur tumne kya pehna hai?
Mayank: Maine… Black shirt and blue jeans.
Janhvi: Okay! Wait! I am coming.
Mayank: Yup!

Mayank phone rakh kar besabri se Janhvi ke aane ka intezaar kar raha hai tabhi use ek ladki dikhayi deti hai jo white top aur blue jeans me hai. Use us ladki ka chehra nahi dikh raha hai kyunki uska chehra dusri taraf hai. Wo us ladki ke paas jata hai aur Janhvi naam pukarta hai. Wo palat kar dekhti hai aur kehti hai, “Excuse me? Kya problem hai?”

Mayank jab use dekhta hai to kehta hai, “Oh! I am sorry. I thought you are one of my friend.”

Wo ladki jawab me kehti hai, “I know all this. Idiot!”

Mayank: (pareshan ho kar) Sorry! Par main aapko pareshan nahi karna chahta tha. I am really very sorry.

Wo ladki wahan se chali jati hai aur Mayank maayus hokar dhire se kehta hai, “Kahan ho yaar tum Janhvi!”

Ye keh kar wo jaise hi piche mudta hai use samne Janhvi dikhayi deti hai. Wo usi ki taraf badh rahi hai. Jaisa usne bataya tha ki white colour ka top aur blue colour ki jeans pehni hui hai. Usne ek ponytail banayi hui hai, jisme se kuch chote baal uske chehre aur maathe par aa rahe hain aur kuch latein usne apne kaano ke piche chupayi hui hain. Uske ulte hath me ek wrist watch hai aur sidhe hath me ek bracelet hai aur gale me ek choti si chain hai. Janhvi Mayank ke paas pahunch jati hai. Wo use hath hila kar ‘Hi!’ bolti hai par us waqt Mayank uske samne hath milane ke lie hath aage badha deta hai. Ab jab Janhvi apna hath aage badhati hai to Mayank hath hila kar use ‘Hi!’ kehta hai. Matlab sidha hai, dono ko samajh nahi aa raha hai ki kya karein.

Janhvi bhi Mayank ko dekh rahi hai. Usne black shirt aur blue jeans pehni hui hai, shirt ki sleeves fold ki hui hain, aankhon par ek nazar ka chashma hai, jo Janhvi usse pehli baar milne par dekh hi chuki thi. Uske baalon me se ek do zulfein uske maathe par aa rahi hain, chehra clean shaved hai, uske ek hath me wrist watch aur dusre hath me kalawa (mauli) hai.

Ab Mayank Janhvi ko baithne ke lie kehta hai aur wo dono food court me railing ke paas wali table par baith jate hain. Dono ek dusre ke samne baithe hain is tarah se ki dono hi ek side railing se neeche bhi jhank sake aur dusri side food court ki shops ko bhi dekh sake. Mayank Janhvi ko dekh raha hai, aur Janhvi railing se neeche ke floor ko dekh rahi hai. Janhvi jab Mayank ko dekhti hai to Mayank food court ki taraf dekhne lagta hai. Dono ko hi samajh nahi aa raha ki kis tarah se koi baat shuru kare.

Fir Mayank kehta hai, “Janhvi! Should I bring something for you?”
Janhvi: (Mayank ko dekh kar) No! I am fine.
Mayank: Main akele khate hue acha nahi lagunga. Bolo na, kuch to.
Janhvi: Okay! Cold coffee.

Mayank wahan se order dene chala jata hai aur Janhvi use dur se dekh rahi hai. Wo soch rahi hai ki phone par itni baatein karte hain hum dono aur aaj jab yahan real me mile hain to dimag kaam hi nahi kar raha hai.

Mayank order de kar aa jata hai aur waise hi Janhvi ke samne aa kar baith jata hai.

Mayank: So…..
Janhvi: Sooo??
Mayank: (muskurate hue) Thanks for coming.
Janhvi: (muskurate hue) Acha.. Itne etiquettes?
Mayank: Ab aur kya kahu?
Janhvi: (muskurate hue) Kuch nahi.
Mayank: By the way, you are looking good.
Janhvi: Thanks!

Mayank fir se soch raha hai ki wo ab kya baat kare. Kitna mushkil hota hai samne baith kar baat karna.

Janhvi: To ab bataoge, tumhe milna kyun tha?
Mayank: Milna tha, kyunki main tumhe dekhna chahta tha.

Mayank ek pal ke lie Janhvi ko dekhta hai aur muskura kar fir kehta hai, “I mean hum ache dost hain, itni baatein karte hain, to bas isilie hi milna to chahiye na.”

Janhvi: (muskurahat ke sath) Hmmmm!
Mayank: (bahut sochne ke baad fir se) Tummm… Kuch nahi kahogi?

Janhvi lagataar Mayank ko dekh nahi pa rahi, ek ajeeb si jhijhak hai uske andar, wahi jhijhak Mayank ke andar bhi hai.

Janhvi: (Mayank ko dekhte hue) Maine kabhi aisa nahi socha tha…..(nazare jhuka kar) ki is tarah se tumse fir se milungi. (bas ek nazar Mayank ko dekh kar fir se nazare jhuka li)
Mayank: Maine bhi.

Wo itna hi bolta hai ki samne wale counter par uska order ready ho gaya hai. Wo uthta hai aur order le kar aata hai. Janhvi khud ko relax karne ki koshish kar rahi hai, par ye feeling ajeeb si hai. Wo aisa pehli baar mehsoos kar rahi hai. Use khushi hai aur is tarah ki khushi usne pehli baar dekhi hai. Wo apne mann me bolti hai, “Hey bhagwan, ye kya ho raha hai. Shadi se pehle main Raghav se bhi to aise hi mili thi. Tab ye sab feel nahi hua to ab kyun?”

Mayank order le kar aa jata hai.

Janhvi: (order dekh kar) Tumhe yaad tha kya ki mujhe chhole bhature pasand hain ya tumne aise hi ye order kar dia?
Mayank: Mujhe yaad hai ki tumhe ye pasand hai.

Janhvi Mayank ko dekhti hai, aur un nigaahon me hairat ke sath apnepan ka ehsaas bhi hai.

Mayank: Ab khana shuru karein? Nahi to thanda ho jaega.
Janhvi: Maine mana kia tha. Main itna sara nahi kha sakti.
Mayank: Main bhi to khaunga na.
Janhvi: Wo to khana hi padega.

Janhvi aur Mayank ek hi plate me se kha rahe hain. Janhvi Mayank ke tukda todne ke lie wait karti hai aur Mayank Janhvi ka. Isi tarah dono baari baari se ek hi plate me se khana kha rahe hain.

Mayank khana khate hue bhi Janhvi ko dekh raha hai. Janhvi bhi beech beech me Mayank ko nazar bhar ke dekh kar nazare nichi kar leti hai aur dhire se muskurati hai.

Khana khatam ho chuka hai, aur ab dono soch rahe hain ki kya kare?

Mayank: Main tumhare lie ice cream le kar aata hu.
Janhvi: Mayank! Please, ab kuch nahi.

Mayank wahin ruk jata hai. Mayank ab Janhvi ko dekh raha hai aur achanak kehta hai, “Tumse kuch kahu?”

Janhvi: Han! Kaho.

Mayank kya kehne wala hai? Kuch special ya koi normal si hi baat hai? Hum zarur janenge, lekin kal…… Tab tak……

Take care of yourselves………..
&
Keep feeling the Love…………… ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s