Kashmakash (E-4)

Episode-4

Recap: Janhvi aur Raghav ki three months anniversary hai, par Raghav ne Janhvi ke ghar walo ko nahi bulaya hai, jisse Janhvi hurt hoti hai aur Raghav se uski shikayat karti hai, jiski wajah se Raghav aur Janhvi ke beech ladayi ho jati hai. Wo isi wajah se pareshan hai aur Raghav ki maa bhi Janhvi ko hi is sab ka doshi batati hai. Is sab ka sara gussa wo Mayank par nikal deti hai. Par Mayank hi aakhir me uske gusse ko shant karta hai. Isi wajah se Janhvi Mayank ki aur apni dosti ke baare me ab sochne lagti hai. Ab aage……..

Raat ko Raghav jab office se aaya, tab na to Raghav ne Janhvi se koi baat ki aur na hi Janhvi ne Raghav se koi baat ki. Khane ki table par bhi teeno hi chup the. Khane ke baad Janhvi ne kaha, “Mujhe neend aa rahi hai, main ja rahi hu.”

Aur wo uth kar apne kamre me chali gayi. Ab sirf Raghav aur uski maa wahan the. Thodi der baad Raghav kamre me gaya aur chillate hue Janhvi se bola, “Janhvi! Tumne khud ko kya samjha hua hai?”

Janhvi hairan hui ki ab to usne kuch nahi kia, fir ab achanak ye gussa kyun hai. Janhvi kuch bol pati isse pehle hi Raghav ne kaha, “Tumne meri mom se kya kaha?”

Janhvi ab samajh gayi ki kuch der pehle jo behas uski mom aur Janhvi ke beech hui thi uske bare me Raghav ki maa ne Raghav ko bata dia hai.

Janhvi: Maine kuch nahi kaha. Bas yahi kaha ki mujhe is topic par baat nahi karni hai.

Raghav: Bas yahi kaha tumne?

Janhvi: Han! Yahi kaha tha par wo maan hi nahi rahi thi, to mujhe fir bolna pada.

Raghav: Tumhe meri maa ki respect karni chahiye.

Janhvi: Han! Main unki respect karti hu. Maine sirf ye kaha tha ki jo aap mujhse keh rahi hain wo Raghav ko bhi samjha dijiye.

Raghav: Wo mujhe kyun samajhaengi, jab galati meri hai hi nahi.

Janhvi: Aap kehna kya chahte hain? Maine aisi kya galati ki thi kal?

Raghav: Party me ek to tumhe guests se problem thi. Uske baad, baad me bhi tumne mere sath dhang se behave nahi kia.

Janhvi ab ye baat yahi khatam karna chahti hai aur isilie wo bolti hai, “Waise mujhe aapke guests se koi problem nahi thi. Par fir bhi agar aapko aisa laga ho to I am sorry for this.”

Raghav: Aur meri maa se badtameezi ke lie bhi unse jake maafi mango.

Janhvi: Main subah chali jaungi.

Raghav: Abhi jao!

Janhvi: Sorry! Par abhi main nahi ja sakti. Main aapse keh chuki hu ki main unse subah baat kar lungi.

Raghav: Janhvi! Tumhara naam tumse bilkul match nahi karta.

Janhvi: Aur kuch baat karni hai aapko?

Raghav gusse me bed par let jata hai. Janhvi bhi bed ke dusre sire par let jati hai. Raat ke 10:44 baj rahe hain aur wo soch rahi hai. Kya isi din ke lie shadi ki thi? Uski aankhon me aansu hain, par wo kisi ko dikha nahi sakti. Uske mann me dard hai par wo kisi ko bata nahi sakti.

Kya isilie hum shadi karte hain? Kisi ladki ke jazbaaton ke sath khelna ho to log shadi kar lete hain. Kya ladki ka koi mann, koi pehchan nahi reh jati dusre ghar me jane ke baad? Logon ko aksar kehte suna hai, ladki ko shadi ke baad apne ghar se duri banake rakhni chahiye. Kyun? Jisse wo log ache se uska shoshan kar sake? Wo roti rahe, bilakhti rahe par apne ghar walon ko bhi apna dard na bataye ya ghar wale uske zakhmo par marham lagane ka kaam na kar de. Yahi chahte hain? Kabhi kabhi is samaj ki kuch cheeze bahut khokhali hoti hain aur unse jyada khokhle hote hain wo log jo aisi cheezon ko mante hain.

Jab rote rote Janhvi ke aansu sookh jate hain, tab wo sone ki koshish karti hai, par use neend nahi aa rahi hai. Raat ke 11:30 baj chuke hain. Janhvi ko sari baatein reh reh kar yaad aa rahi hain. Wo apna phone uthati hai, jisse wo apna dimag wahan se hata sake. Tabhi use Mayank ki baat yaad aati hai, ki wo chaubeeson ghante uske lie maujood hai. Wo hichkichate hue message likhti hai, “Hi!” aur intezaar karti hai. Jab ek minute tak jawab nahi aata to wo kuch aur karne ke baare me sochti hai. Tabhi uska phone baj uthta hai. Usme Mayank ki notification hai, “Hi!”

Janhvi ke chehre par chamak aa jati hai, wo likhti hai, “Tum soye nahi abhi tak?”

Mayank: Tum bhi to nahi soyi.

Janhvi: Mujhe laga ek baar try karke dekhu ki tum sach me mere lie available ho ya bas aise hi keh rahe the.

Mayank: To kya laga fir aapko?

Janhvi: Thodi late service hai.

Mayank: (muskurate hue) Don’t worry! I will make it fast from now onwards.

Janhvi: Okay!

Mayank: Waise aap to kal milne wali thi, kya hua? Main itna pasand aa gaya?

Janhvi: Plz! Apni tareefein band karo. Tumne kaha tha na ki gussa aaye to message kar lena, bas isilie.

Mayank: Oh! Aapne to seriously le lia. Main aapki anger management pill thode hi na hu.

Janhvi: Thik hai. To main jati hu.

Mayank: Arey! Main majak kar raha tha.

Janhvi: Main abhi majak ke mood me nahi hu.

Mayank: Even not I am. Ye batao itna gussa kyun karti ho?

Janhvi: Kyunki mujhe acha nahi lagta.

Mayank: To fark mat padne do khud par, kisi bhi chiz ka.

Janhvi: Aise kaise ho sakta hai.

Mayank: Ho sakta hai, if you try.

Janhvi: I don’t know.

Mayank: Waise mujhe acha laga, ki tumne mujhe msg kia. At least tumne kisi layak to samjha mujhe.

Janhvi: Waise mujhe is time msg nahi karna chahiye tha. Its really late now.

Mayank: No! U can…

Janhvi: I don’t know…

Mayank: Acha ye sab choro ye batao ki tum us din apni mom ka phone lene aayi thi?

Janhvi: Han!

Mayank: Tumhari family me aur kaun hai?

Janhvi: Maa papa aur meri choti behen.

Mayank: Meri family me bhi… Mom dad aur meri choti behen.

Janhvi: Aur tum apni family me kisse sabse jyada close ho?

Mayank: Papa….

Janhvi: Main to maa se jyada close hu…

Mayank: Main chahta hu ki aisi hi dosti tumhari mujhse bhi ho jaye.

Janhvi: Tumhari baate mujhe kabhi kabhi samajh nahi aati. Do din me itna lagav…. Aur fir kehte ho ki gussa na kia karo.

Mayank: Hehe! Tumhe pata hai, koi aur ladki hoti to ab tak mujhme chappal aur joote bhi baja sakti thi. Par tum ne aisa nahi kia.

Janhvi: Aur isilie tum mere pichhe pade ho?

Mayank: Na ji na… Main sirf islie pichhe pada hu kyunki tum baki ladkiyon se alag ho.

Janhvi: Kya alag ho alag ho bolte rehte ho….

Mayank: I mean… Tum gussa karti ho, par samajhti bhi ho, tum sweet ho, tum logon ki emotions ki kadar karti ho. Khud to emotional ho hi aur tumhara sense of humour bhi acha hai. Mere jitna nahi, par han acha hai.

Janhvi: Aur baki ladkiyan aisi nahi hoti hain?

Mayank: Baki ladkiyon me ek sath itni sari chize mushkil se milti hain. Aur ye sari qualities sirf do din me pata chali hain mujhe. Abhi to aur janna baki hai. Isilie main har waqt interested rehta hu tumse baat karne me. Kya pata kab konsi new quality dekhne ko mil jaye.

Janhvi: Maine to abhi tak aisi koi quality nahi dekhi hai tumhare andar…

Mayank: Wo islie ki aapne abhi tak mujhe janne me interest nahi lia hai. Jab janne ki koshish karogi to qualities bhi dikhne lagengi.

Janhvi: Waise ek quality to hai tum me… Tum logon ka mind bhot ache se divert karte ho.

Mayank: Ye compliment tha ya burayi?

Janhvi: Compliment… Tumse maine do baar baat ki aur tumne mera mind divert kar dia.

Mayank: Fir thik hai… Par iska matlab ye nahi hai ki ab tum yahan se bhag jao. Mujhe aur baat karni hai tumse.

Janhvi: Par mujhe sona hai.

Mayank: Main bhi office jata hu… Islie ye sab mat bolo mujhe.

Janhvi: Kya baat karni hai?

Mayank: Baatein to mil hi jati hain, baaton ka kya hai.

Janhvi: Thik hai to karo fir baatein…

Mayank: Hmmmm… Gud… Gud…

Janhvi aur Mayank kafi der tak baat karte hain. Kareeb 2 baje Janhvi Mayank ko daant kar use message band karne ke lie kehti hai aur tab wo wahan se jata hai. Mayank ki baaton se Janhvi fir se acha mehsoos karne lagi hai. Uska dhyan ghar ki ladayi jhagde se hat jata hai. Janhvi ab Mayank ki baaton ko yaad kar ke muskura rahi hai, aur isi tarah wo kuch der me so jati hai.

Janhvi agle din subah jaagti hai, wo achha mehsoos kar rahi hai. Halaki aaj wo thoda deri se uthi hai, par use chinta nahi hai. Wo office ke lie taiyar hoti hai aur office chali jati hai. Aaj Janhvi aur Mayank dono ke lie hi alag din hai, kyunki ab tak sirf Mayank Janhvi ko janna chahta tha, usse baat karna chahta tha, aaj Janhvi bhi Mayank se baat karna chahti hai.

Janhvi ke office pahunchne se pehle hi har roz ki tarah Mayank ka message Janhvi ke paas pahunch jata hai. Aaj Janhvi ko bhi Mayank ke message ka intezaar tha. Janhvi bhi Mayank ko reply kar deti hai aur dono ki baat fir se shuru ho jati hai. Use Mayank ki dosti pasand aane lagi hai.

Janhvi ne jise aisa hi ladka samjha tha wo kuch din me uska dost ban gaya hai. Janhvi usse baat kar ke ghar ki sari pareshaniyan bhul jati hai. Wo Janhvi se har tarah ki baatein karta hai, chahe wo emotional baat ho, political ho, religious ho ya comedy ho. Aisa nahi hai ki dono ki soch har chiz me milti hai par wo ek dusre ke vicharon aur khayalon ki izzat karte hain. Wo dono kabhi ek dusre par apne vichar thopte nahi hain. Wo jo is shadi se pehle pareshan thi, ab nahi hai, kyunki ab wo jab bhi pareshan hoti hai tab hi wo Mayank se baat kar leti hai aur Mayank ke sath reh kar uska gussa bhi kam ho gaya hai. Dhire dhire dono ki dosti badh rahi hai aur ab is dosti ko ek mahina ho gaya hai.

Janhvi apne office me hai wo kaam kar rahi hai ki tabhi Mayank ka phone aata hai. Janhvi phone uthati hai aur kehti hai, “Mayank busy hu abhi. Baad me baat karungi.”

Mayank: Oye hello! Maine tumhe islie phone nahi kia hai. Bas kuch yaad dilana tha.

Janhvi: Kya?

Mayank: Tumne milne ka promise kia tha.

Janhvi: Sorry! I can’t.

Mayank: This is not fair Janhvi.

Janhvi: First of all, I don’t want to meet you and second thing, I am busy.

Mayank: Tumne kaha tha.

Janhvi: Maine kaha tha ki hum milenge, par aaj hi milenge ye nahi kaha tha.

Mayank: To kab?

Janhvi: Tumhe ab main date aur time bhi batau?……. Kaam karne do mujhe.

Mayank: Kab bataogi mujhe?

Janhvi: Main baad me baat karungi Mayank. Bye!

Janhvi phone kaat deti hai, muskurati hai aur sath me dhire se bolti hai, “Idiot!”

Preeti ye sab dekh rahi hai aur Janhvi se kehti hai, “Ab kya hua use?”

Janhvi: (Preeti se) Apna kaam karegi? Jab dekho meri baatein sunti rehti hai.

Preeti: To tu ja rahi hai?

Janhvi: Abhi kya bola maine use? Ki main usse nahi milna chahti.

Preeti: Par tune hi kaha tha na ki ladka decent hai aur dosti karne me koi problem nahi hai.

Janhvi: Han! Par main usse nahi milna chahti kyunki main ise bas yahi tak rakhna chahti hu. Waise bhi maine pehle hi use nahi bataya ki main married hu.

Preeti: Tu khud chahti hai usse milna ya nahi?

Janhvi: (sochte hue) I don’t know really. Kabhi kabhi mann karta hai ki usse milu, aur kabhi lagta hai ki ye sab bekar hai. Hum sirf ek dusre ke sath time pass kar rahe hain. Isilie main usse dur rehna chahti hu, office me har time use busy hu bolke baat karne se mana kar deti hu, kyunki ye kahin na kahin sahi nahi hai and I know this.

Preeti: Tu ye sab mat soch sirf ye bata ki tujhe usse milne ka mann hai ya nahi?

Janhvi: Mann hai ya nahi isse fark nahi padta. Bas mujhe ye pata hai ki mujhe usse milna nahi chahiye.

Preeti: Waise tum sirf dost ho, to milne me burayi hi kya hai?

Janhvi: Mujhe ye sahi nahi lagta bas.

Preeti: Okay! Teri marzi.

Janhvi ne Mayank se dosti to kar li, par yahin se uski zindagi ki kashmakash bhi shuru ho gayi hai. Aur wo kashmakash ye hai ki ek shadishuda ladki hote hue bhi kya use Mayank se dosti aage badhani chahiye ya is dosti ko bas yahi tak seemit rakhna chahiye. Janhvi kabhi sahi aur galat ke baare me sochti hai to kabhi khud ke baare me, kyunki use bhi Mayank ki ye dosti pasand hai aur wo bhi is dosti ko aage badhana chahti hai.

Sham hoti hai aur Janhvi ke office se nikalte hi Mayank ka phone aata hai. Janhvi phone uthati hai.

Janhvi: Hello!

Mayank: Yes Miss!

Janhvi: Kya hua?

Mayank: Aap mujhe time bata rahi thi. Kya hua uska?

Janhvi: Mayank! Not again please. Do din se kya rat laga kar baithe ho tum milne ki.

Mayank: Kya tumhe mujh par trust nahi hai? Bolo.

Janhvi: Wo baat nahi hai.

Mayank: To kya baat hai?

Janhvi: Mujhe lagta hai ki tumhe mujh par trust nahi karna chahiye.

Mayank: Kyun? Tum mujhe kidnap karne wali ho? Kar bhi logi to mujhe koi problem nahi hogi. I will be happy with you.

Janhvi: Mayank will you please stop this? Main nahi milna chahti tum se.

Mayank: (udas ho kar) Thik hai. Mat milo. Baat bhi mat karo. Sirf apni chalati ho tum. Maine ek chiz maangi to mana kar diya.

Janhvi: Kya milega tumhe milkar?

Mayank: (gusse me) Bol diya na, mat milo. Aur iske baad bolunga bhi nahi.

Ye keh kar Mayank phone kaat deta hai. Janhvi use fir se phone karti hai, par wo call nahi uthata. Uske baad Janhvi use message karti hai, “Thik hai! Don’t talk to me ever. Bye!”

Janhvi ab apne ghar chali jati hai. Ghar par use ab apni galatiyon ke baare me sunne ki aadat si pad gayi hai. Raghav ke sath us ladayi ke baad bhi ab tak kayi baar isi tarah ladayi hui hai. Isilie ab usne apne mann ki koi bhi chiz Raghav ya uski maa se kehni band kar di hain, kyunki wo samajh chuki hai ki dono me se koi bhi use samajh nahi paega. Wo sirf un dono ki baat sunti hai aur waisa hi kar deti hai. Uska waqt ghar me kaatne se kat nahi pata. Use ye samajh aa chuka hai ki ye shadi uski zindagi me ek galati hi thi, par wo is galati ko aaj bhi apnane ki koshish kar rahi hai. Aur isilie, sirf isilie usne Mayank se baat na karne ka faisla lia hai. Usne socha hai ki ab jab Mayank usse khud naraz hai to use is mauke ko jaane nahi dena chahiye aur ye dosti yahin ki yahin khatam kar deni chahiye. Ye sab wo islie soch rahi hai kyunki Mayank se baat karke use ehsaas hone laga hai ki mard aise bhi hote hain. Aise mard usne aaj tak nahi dekhe the, jo uski baat sun sake, uske samne apne dil ki baat rakh sake, uske samne ro sake, use apne har chote bade faisle me shaamil kar sake. Kyunki na to uske papa aise hain aur na hi Raghav aisa hai. Wo sirf aurat ko ghar ki shobha, ghar ki Lakshmi ya sath me bahar show karne ki chiz samjhte hain, isse jyada unke dimag me ek aurat ya ladki ke lie koi Bhavna nahi hai. Par Mayank alag hai, aur uska yahi alag hona uske lie apne pati ko apnane me pareshani paida kar raha hai. Wo aaj kal hoti apne pati ke sath hai, par wo Mayank ke baare me sochne lagi hai. Wo baat Raghav se kar rahi hoti hai par uske dimag me Mayank ki koi kahi hui baat goonj rahi hoti hai. Aur wo ye sab achhe se jaan chuki hai ki aisa uske sath kyun ho raha hai. Wo samajh chuki hai ki agar usne jald hi koi kadam na uthaya to shayad ye shadi uske lie koi mayne nahi rakhegi. Ek wajah aur thi Janhvi ke Mayank se baat khatam karne ka faisla lene ki, wo ye ki Janhvi ne Mayank ko ye nahi bataya tha ki wo shadishuda hai. Aur agar ab itne din baad wo Mayank ko ye sab bataegi to ho sakta hai uski dosti Mayank se toot jaye ya Mayank use ek acha insan na samjhe. Wo ab Mayank ke mann me apne lie koi bhi galat Bhavna nahi dekh sakti aur isilie use ye sab batane se acha hai ki wo usse abhi sab chize khatam kar le. Wo us puri raat yahi sochti rehti hai. Kabhi sochti hai usse baat na karne ka faisla sahi hai, to kabhi sochti hai ki usse baat na karke jo use kuch der ka sukoon milta hai wo fir use nahi milega. Aur ye sab sochne ke baad wo yahi faisla karti hai ki ab uska Mayank se baat na karna hi sahi hai. Use ek mauka mila hai ki Mayank usse naraz hai to wo is mauke ko jane nahi degi aur usse dosti khatam kar legi.

Agle din wo office pahunch jati hai. Roz ki tarah Mayank ka aaj koi message nahi aaya hai. Janhvi khush bhi hai aur ye bhi soch rahi hai ki wo sach me usse itna naraz hai ki Mayank ne use yaad tak nahi kia. Wo ye sab soch hi rahi thi ki ek message ki notification uske phone se jhankne lagti hai. Mayank ki umr bahut badi hai. Janhvi phone lekar message padhti hai. Message me likha hai, “Gud mng!”

Janhvi dhire se muskurati hai. Uska dil karta hai ki wo palat kar use jawab de, par wo ruk jati hai. Use raat me khud se ki hui wo baat yaad aati hai aur wo use reply nahi karti. Wo phone ko apni desk par side me rakh deti hai aur kaam me lag jati hai. Mayank ka fir ek aur message aata hai par wo ab message dekhti bhi nahi, kyunki wo janti hai ki agar usne message dekha to use Mayank ko message ke reply karne ka mann karega. Aadha din beet jata hai, ab lunch time hai. Janhvi lunch kar rahi hai aur uska phone lagataar baj raha hai. Mayank use lagataar call kar raha hai. Janhvi dekh rahi hai par call nahi utha rahi hai.

Preeti wahin uske sath baithi hai aur wo dekh rahi hai ki Mayank baar baar Janhvi ko phone kar raha hai. Wo Janhvi se kehti hai, “Phone utha le ek baar. Wo itna pareshan ho raha hai.”

Janhvi: Agar ab utha lia to fir main baat kabhi band nahi kar paungi.

Preeti: At least use bata to de ki tujhe usse baat nahi karni hai.

Janhvi: Main use bata chuki hu already.

Preeti: Ek baar thik se bata de.

Janhvi: Nahi!

Preeti: Wo sochega ki itni choti se baat par tune usse dosti khatam kar di, kya sochega wo tere baare me?

Janhvi: Sochne de.

Preeti: This is not fair yaar. At least give him a proper reason to break this friendship.

Janhvi: Proper reason ye hai ki use mere baare me pura sach nahi pata hai aur ye ki agar main usse baat karti rahi to main apni khud ki life me dhayan nahi de paungi.

Preeti: To main reason ye hai.

Janhvi: Main reason jo bhi ho, ye do reason hain aur bahut valid reasons hain.

Preeti: Aur teri ye dono chize ek baar me hi khatam ho sakti hain.

Janhvi: Kya matlab?

Preeti: Tujhe use bata dena chahiye ki tu married hai aur dusri baat ye ki jab use pata chalega to wo khud hi chala jaega. To teri dono problems dur ho jaengi.

Janhvi: Aur wo mere baare me jo sochega wo?

Preeti: To kya ho gaya? Sochne de jo soch raha hai. Ek mahina hi to hua hai tujhe usse mile hue, kya wo tere baare me kya soch raha hai ye itna important hai tere lie? Aur fir tu is sab ko ek hi baar me khatam kar sakti hai.

Janhvi ab soch me pad jati hai kyunki Preeti ki baat bilkul sahi hai.

Preeti aage kehti hai, “Usse baat kar aur jo bolna hai bol de.”

Janhvi is baar uska phone utha leti hai aur phone leke thodi dur chali jati hai. Wo kehti hai, “Hello!”

Mayank: Hello!

Janhvi Mayank se kya baat karti hai? Iske lie intezaar kariye agle episode ka… Tab tak……

Take care of yourselves…

&

Keep feeling the love………… ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s