Kashmakash (E-3)

Episode-3

Recap: Janhvi ko Mayank se baat karta dekh Janhvi ki colleague Preeti use kehti hai ki ladke shareef nahi hote, ye bhi waisa hi hoga. Islie pehle Mayank se thik se baat kar rahi Janhvi ab gusse me baat karne lagti hai aur use bol deti hai ki use aisi waisi koi bhi baat na kare. Mayank use samjhata hai ki uska aisa koi irada nahi hai, wo bas usse dosti chahta hai aur usse aur ache se janna chahta hai. Raat ko jab Janhvi ghar pahunchti hai to Raghav ne unki third month anniversary par ek party rakhi hai, jisme Janhvi na to koi ghar wale hain aur na hi koi janne wale. Ab aage…………..

Janhvi se ab wait nahi kiya jata. Wo jakar Raghav se puchti hai, wahan jahan Raghav apne colleagues ke sath drinks me busy hai.

Janhvi: Raghav!

Janhvi use awaz dekar dusri taraf bulati hai.

Raghav: Han Janhvi! Kya hua?

Janhvi: Ye sab aapke colleagues aur relatives hain.

Raghav: Han… To?

Janhvi: Aapne mere kisi friend ya relative ko nahi bulaya?

Raghav: Ab party ka plan hi achanak bana to fir maine socha ki ab wo log nahi aaenge, islie maine bulaya bhi nahi.

Janhvi: (hairani se) Achanak plan kaise bana?

Raghav: Actually aaj office me… sab log piche pad gaye the ki unhe party chahiye. To maine sabko dinner par bula lia.

Janhvi: Three months anniversary par?

Raghav: Han! Ek month pehle main bhi to gaya tha na aisi hi party me.

Janhvi: Aur baki relatives bhi to aaye hain aapke.

Raghav: Wo to mom ne kaha ki ab party de hi raha hai to baki sab ko bhi bula le.

Janhvi: Aur mere maa aur papa?

Raghav: Janhvi! Unhe kyun disturb karna? Raat ho rahi hai. Waise bhi yahan koi bhi itna bada nahi hai.

Janhvi: Aapki mom? Wo to hain na?

Raghav: To kya unhe main bahar nikal du?

Janhvi: Nahi! Mera matlab tha ki wo hain to mere maa papa bhi aa sakte the.

Raghav: (thode gusse me) Ye sab baatein tumhe abhi karni hain Janhvi? Tum dekh rahi ho na main apne doston ke sath busy hu? Tum jakar party enjoy nahi kar sakti ho kya?

Janhvi: Party enjoy? Kiske sath karu? Mera koi dost nahi hai yahan.

Raghav: Mere office ki ladkiyan hain jo wahan khadi hain. Usne baat karo jakar dost banao unhe. Aur rishtedaar bhi to hain.

Janhvi: Main unse jitni baat kar sakti thi ki hai.

Raghav: To jo karna hai wo karo, main abhi busy hu.

Janhvi mann masos kar wahan se chali jati hai. Wo ek jhuthi hasi odh leti hai aur puri party ka waqt isi tarah nikal deti hai. Use gussa aa raha hai, wo dukhi bhi hai, lekin wo kuch nahi keh pati. Party khatam hoti hai. Raghav nashe ki halat me hai. Janhvi use sahara dekar kamre me lekar gayi aur use bed par leta diya.

Raghav: Party achi thi na?

Janhvi Raghav ki kisi baat ka jawab nahi deti aur kapde badal kar aa kar bed ke dusri taraf let jati hai. Raghav Janhvi ke kareeb aata hai. Wo hamesha Raghav ke baare me soch kar use apne kareeb aane deti hai par aaj jo hua, uske baad wo Raghav ko piche hata deti hai aur chup chap dusri taraf muh kar ke let jati hai. Ab Raghav ko gussa aa jata hai.

Raghav: Tumhara problem kya hai Janhvi? Itna sab tumhare lie kia uske baad bhi tum is tarah react kar rahi ho.

Janhvi chup rehti hai, apni aankhein band kar ke wo leti rehti hai.

Raghav: Main tumse baat kar raha hu Janhvi. Kya problem hai tumhara? Is tarah ka attitude main bardaasht nahi kar sakta hu. Meri taraf dekho aur jawab do.

Janhvi ab bed par baith jati hai aur bolti hai, “Main is waqt aapse koi bhi baat nahi karna chahti. Main bas shanti se sona chahti hu. Abhi aap baat sunne ki halat me nahi hain. Hum subah baat karenge.”

Raghav: Mujhe abhi baat karni hai. Bolo tumhe kis chiz se problem hai?

Janhvi: Aap nahi samajh paenge.

Raghav: Kya nahi samajh paunga? Jab kuch samajhne ke lie hai hi nahi. Ladkiyon ko pata nahi kya chahiye hota hai? Kitna bhi kar lo par hamesha kam hi lagta hai.

Janhvi: Ye sab aapne mere lie kia tha? Ya aapke office me aapke colleagues ne aapse kuch keh diya tha islie kiya tha?

Raghav: Par party to tumhari aur meri anniversary ki thi.

Janhvi: Really? Meri aur aapki anniversary ki party me main kahan thi? Mere friends kahan the? Mere maa papa tak ko aapne nahi bulaya jabki wo yahin rehte hain isi shehar me. Aur maine kab koi party maangi hai? Main bas ye chahti hu ki hum ek dusre ko waqt de paye. Par aapke paas mere lie kabhi waqt nahi hota hai.

Raghav: Tumhare lie kitna kuch kia wo nahi dikha tumhe? Itni achi saree lakar di, jewellery lakar di. Wo sab kuch nahi tha kya?

Janhvi: Maine kabhi aapse aisi koi demand ki hai kya? Insan ke paas sabse keemati chiz hoti hai uska waqt, agar usne wo kisi ko de dia to usne sabse keemati chiz de di.

Raghav: Tum pagal ho gayi ho, tumhe paise ki keemat nahi pata.

Janhvi: Kyunki mujhe waqt ki keemat pata hai. Aur ye sab gifts jo aap mere lie laate hain, ye main khud bhi la sakti hu apne paison se. Par aapka time mujhe aap hi de sakte hain.

Raghav: To ab tum mujhe apne paise ka raub dikhaogi?

Janhvi: Rehne dijiye, aap nahi samajh paenge.

Raghav: Ye jo gusse me tumne faltu baatein ki hain, ise sudhar lo Janhvi. Ye humare relation ko kharab kar sakta hai.

Janhvi: Main to chup hi thi, aap hi ne mujhe bolne ke lie kaha tha. Aur jab bol dia to chup rehne ke lie keh rahe hain.

Raghav: Mujhe pata nahi tha tum aisi ho.

Janhvi: (aankhon me aansu lie) Mujhe bhi nahi pata tha.

Janhvi fir se muh fer kar leti jati hai. Wo chup hai par uski aankhein uske aansuon ke zariye bol rahi hain ki wo khush nahi hai. Par ab to use aise hi rehna hai. Kuch kia nahi ja sakta.

Raghav bhi let jata hai, aur nashe ki halat me hone ki wajah se let’te hi so bhi jata hai. Par Janhvi ko us raat neend nahi aati. Ye pehli raat hai jab wo soch rahi ki shadi karke usne koi galati to nahi kar di.

Subah hoti hai aur Janhvi roz ki tarah hi office ke lie nikal jati hai. Aur do din se jaise ho raha hai aaj bhi Mayank ka message uske phone par aa jata hai, jisme likha hai, “Gud mng!”

Lekin Janhvi kal raat ki baat ki wajah se kashmakash me hoti hai ki kal raat usne Raghav se wo sab keh kar sahi kia ya galat. Wo pareshan hai aur isilie wo Mayank ke message ka jawab nahi deti. Office pahuchane ke baad wo apne kaam me lag jati hai kyunki use kal raat ki baatein apne dimag se nikalni hai aur us sab ko nikalne ke lie kaam sabse behtar tareeka hai. Wo subah se kaam me lagi hai, tabhi uski dost Preeti usse kehti hai, “Hello madam! Khana khana hai ya nahi? Lunch time kabka ho gaya.”

Janhvi: Ohh! Lunch ho gaya? Mujhe pata hi nahi chala. Chal!

Preeti: (Janhvi ke chehre ko padhte hue) Kuch hua hai kya?

Janhvi: Nahi! Kuch nahi.

Preeti: Tu upset lag rahi hai.

Janhvi: Kuch khaas nahi.

Preeti: Wo us ladke ne kuch kar dia kya?

Janhvi: Kaun ladka?

Preeti: Arey wahi, I phone wala.

Janhvi: Tu bhi na Preeti, tujhe kya main aisi waisi ladki lagti hu? Thik hai usne phone wapas kia tha to kar li do char baat usse. Ab har time usi se hi baat thodi na karti rahungi.

Preeti: Par kal to tu kar rahi thi.

Janhvi: Han! Kal kaam thoda kam tha islie.

Preeti: Aur aaj tu upset bhi hai islie. Kya hua hai, bata mujhe.

Janhvi: Kuch khaas nahi bas thoda ghar ka stress hai.

Preeti: Tu aaj kal kuch jyada hi stress lene lagi hai. Pehle to itni tension nahi leti thi.

Janhvi: Time and marriage changes everything.

Preeti: Ye to sahi kaha waise. Isilie to mujhe shadi hi nahi karni hai.

Janhvi: Tere to farishte bhi karenge. Abhi chal lunch ke lie late ho rahe hain.

Preeti: Hmm!

Dono lunch karne jate hain aur wapas aake kaam me lag jate hain. Aaj pure din me Janhvi Mayank ko ek bhi baar message nahi karti aur na hi kuch dekhti hai. Raat ko ghar pahuchane ke baad kaam khatam karke wo phone hath me leti hai aur dekhti hai ki Mayank ke messages phone me hain. Wo phone kholti hai aur check karti hai.

“Hey! Gud mng!”

“Kahan ho?”

“Aaj to ek bhi baar reply nahi kia.”

“Busy anywhere?”

“Reply me whenever you will be free.”

Janhvi un messages ko padhti hai par uska mann nahi hota ki Mayank ko reply karke wo usse baat kare. Wo apne aur Raghav ke beech ke jhagade ko leke ab bhi pareshan hai. Aur wo phone kamre me rakh kar bahar chali jati hai aur T.V. dekhne lagti hai. Tabhi Janhvi ki saas yani Raghav ki maa wahan aati hai aur bolti hai, “Janhvi! Kal tumne thik nahi kia beta.”

Janhvi: Kya thik nahi kia mommy?

Raghav’s mom: Kal tumne Raghav ka mann kharab kar dia. Tumhe pata hai wo kitna khush tha ki Janhvi khush ho jaegi.

Janhvi: I am sorry mommy. Par main sach me is baare me baat nahi karna chahti. Kal jo bhi hua use wahin chhod dijiye.

Raghav’s mom: Par ek baat batao, mujhe dikh raha tha ki tumhari wajah se Raghav khush nahi hai to baki mehmano ko nahi dikha hoga kya?

Janhvi: Mommy! Mujhe nahi pata dikha tha ya nahi. Maine bhi adjust karne ki koshish ki thi.

Raghav’s mom: Ise tum adjust karna kehti ho? Hum karte the adjust to, tumhe karna hi kya tha?

Janhvi: Mommy! Sabki personality alag alag hoti hai, aap har kisi ko har kisi se compare nahi kar sakte. Aur us zamane aur is zamane me bahut difference hai.

Raghav’s mom: Thik hai, mat mano. Humara kaam to samjhane ka hai, ab tum apni grihasthi bigado ya sudharo, tumhari marzi.

Janhvi: Mommy! Yahi chiz aap Raghav ko bhi samjha sakti hain kya? Ki agar party ke time main upset thi to jo wajah thi use khatam bhi kar sakte the.

Raghav’s mom: Main kyun samjhau use?

Janhvi: Kyunki wo aapke bete hain. Aapka mujh par kam aur un par haq jyada banta hai. Kabhi kabhi bahuon ki jagah beton ko bhi samjha lena chahiye.

Raghav’s mom: Bahut bol rahi ho tum.

Janhvi: Main to is baare me baat hi nahi karna chahti, mommy ji. Par aapko baat karni hai.

Raghav’s mom: Thik hai. Aaj ke baad to tumse kuch kehne hi nahi wali hu main.

Janhvi: Thanks!

Janhvi se ye sab keh kar wo apne kamre me chali jati hain. Janhvi bhi inhi sab baaton ki wajah se pareshan hokar apne kamre me chali jati hai aur let jati hai.

Tabhi uske phone par ek notification aati hai aur wo Mayank hi hai. Janhvi dekhti hai aur ab use gusse me message karti hai, “Kya problem hai tumhari? Agar koi reply nahi kar raha hai to wo ni chahta hoga tumse baat karna. Kitni der lagti hai ye samajhne me?”

Mayank ye reply padh kar samajh jata hai ki Janhvi gusse me hai. Wo use turant call kar deta hai. Janhvi gusse me hai aur phone utha leti hai.

Janhvi: Hello!

Mayank: Hello Miss Janhvi!

Janhvi: Tumhe ek baar me samajh nahi aata hai kya?

Mayank: Aata hai. Par aisa kya ho gaya ki tum itne gusse me ho?

Janhvi: Tumhe har chiz batau main ab?

Mayank: Han! Agar acha dost samajhti ho to kya problem hai?

Janhvi: Main tumhe dost bhi nahi samajhti.

Mayank: Oh! That’s rude.

Janhvi: Mera mood thik nahi hai, please abhi mujhse baat mat karo.

Mayank: Okay! Par doston ka to kaam hota hai na mood ko sudharne ka.

Janhvi: Tumhe dialogues marne ka itna shaunk kyun hai?

Mayank: Jaise tumhe har baat par gussa hone ka shaunk hai waise hi?

Janhvi: Oh please! Ab tum mujhe irritate mat karo.

Mayank: Okay! Okay! To jaisa main kehta hu waisa batati jao.

Janhvi: Kaisa?

Mayank: Your favourite color?

Janhvi: Mera is waqt KBC khelne ka koi mann nahi hai.

Mayank: Shushh! Just tell me.

Janhvi: Red!

Mayank: Oh! Tabhi itna gussa hai.

Janhvi: Are you an idiot?

Mayank: Mera to puchogi nahi islie main khud bata deta hu. PINK!

Janhvi: Whattt? Pink?

Mayank: Yes! Pink! Isme itna zor se “What” karne jaisi kya baat thi?

Janhvi: Ladke kab se pink pasand karne lage?

Mayank: This is not right. You are stereotyping it.

Janhvi: Nahi! Par maine kisi ladke ka favourite color pink nahi dekha.

Mayank: Mera to hai.

Janhvi: I can’t believe.

Mayank: Arey sach me… Mere room ki walls, even bed sheet, pillow covers, floor tiles aur room accessories sab pink hain.

Janhvi: (Haste hue) Tum sach me namune ho.

Mayank: Thanks! Aise hi achi lagti ho.

Janhvi: Kaise?

Mayank: Haste hue.

Janhvi: (sochte hue) Oh! To ye sab tumne sirf mera mind divert karne ke lie bola tha?

Mayank: Han bhi aur nahi bhi.

Janhvi: Thik se bologe?

Mayank: I mean yes mind divert karna tha tumhara, par mujhe pink pasand bhi hai. Han par mere room me har jagah pink nahi hai aur mere room ki walls bhi pink nahi hain.

Janhvi: (muskurate hue) Hmmm!

Mayank: And you know maine tumhe phone kyun kia tha?

Janhvi: Kyun?

Mayank: Kyunki mujhe tumhari gusse wali awaz sunni thi.

Janhvi: Tum pagal ho?

Mayank: Bata rahi ho ya puch rahi ho?

Janhvi: Puch rahi hu, waise mujhe yakeen bhi hai ki tum pagal ho.

Mayank: (haste hue) Nahi! Actually main dekhna chah raha tha ki gusse me tum waisi hi lagti ho ya kuch changes aate hain?

Janhvi: Waisi kaisi?

Mayank: Jaisi maine tumhe pehle baar suna tha.

Janhvi: (muskura kar) To kya laga fir?

Mayank: Yaar! Tum darawani ho gusse me.

Janhvi: (haste hue) Ye acha hai, ab main sweet se darawani ho gayi.

Mayank: Arey! Awaz darawani hai par tum innocent ho.

Janhvi: (haste hue) Again a dialogue.

Mayank: (haste hue) Tum mujhe thoda bhi kuch acha bolne nahi deti ho. Tumhe pata hai, ladkiyan mujhse aisi baate sunne ke lie marti hain?

Janhvi: To un ladkiyon ko sunao na, I am not interested.

Mayank: Abhi mana kar rahi ho, baad me agar main chala gaya na to yaad karogi.

Janhvi: Jao! Jao! Bahut milte hain tumhare jaise.

Mayank: Na ji na! Mere jaisa iklauta piece hai is duniya me.

Janhvi: Waise thanks! Mere mind divert karne ke lie.

Mayank: Anything for you Ma’am.

Janhvi muskurati hai.

Mayank: Abhi tumhari awaz waisi hi ho gayi hai. Soft, peaceful, and soothing….

Janhvi: (muskurate hue) Tumhe kitni baar kahu ki ye sab baatein mujhse mat kiya karo.

Mayank: Arey! Main to sirf sach bolta hu, wo flirt khud lagne lagta hai to main kya karu? Sacchi baba….

Janhvi: Okay! Abhi tum jao. I will talk to you later.

Mayank: Kab?

Janhvi: Kal?

Mayank: Time?

Janhvi: Abhi se kaise batau?

Mayank: Time fix karo nahi to main nahi jane wala.

Janhvi: Arey! Jab bhi free hui.

Mayank: Tum goli dene me mahir ho.

Janhvi hasti hai.

Mayank: Haso mat. It’s a serious issue.

Janhvi: Okay! Main subah message par bata dungi.

Mayank: Nahi bataya to tabhi phone kar lunga.

Janhvi: Oh God! Ab tum jaoge?

Mayank: Jab dekho bhagane ki lagi rehti hai. Koi kadar hi nahi hai ladke ki.

Janhvi: Okay bye!

Mayank: Suno!

Janhvi: Han bolo!

Mayank: Gussa kam kia karo. Agar aisa kuch laga kare na to mere baare me soch liya karo. Ya usse bhi kuch nahi ho raha to mujhe message kar lia.

Janhvi: And you will be there? 24×7?

Mayank: Try kar lo. Yakeen na ho to.

Janhvi: Okay! Thik hai. Bye!

Mayank: Bye!

Mayank se baat karne ke baad Janhvi ke chehre par muskurahat hai. Wo khud ko pehle se halka mehsoos kar rahi hai. Use dhire dhire ye ehsaas bhi hone laga hai ki jaisa usne Mayank ke bare me socha tha wo waisa nahi hai. Wo ek acha ladka hai, jo usse dosti chahta hai. Aur use lagta hai ki is dosti ko nibhane me koi harz nahi hai.

Aur hume bhi aapko aage ki kahani sunane me koi harz nahi hai. Par aage ki kahani kal…. Aaj ke lie bas itna hi….. Tab tak……..

Take care of Yourselves……….

&

Keep feeling the Love……….<3

One thought on “Kashmakash (E-3)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s