Kashmakash (E-2)

Episode-2

Recap: Janhvi ek naye zamane ki ladki hai, wo apni shadishuda zindagi nibha to rahi hai par uski zindagi me kahin na kahin ek khalipan hai. Uske shadi ke baad uske sath uska pati, Raghav aur uski saas rehte hain. Raghav use kabhi waqt nahi de pata aur na hi uske mann ko samajh pata hai. Use ittefaq se ek ladka milta hai jiska naam hai, Mayank. Mayank Janhvi se dosti karne ki gurarish karta hai, jise wo maan leti hai. Wo is sab ke baare me raat ke waqt, apne kamre me baithi soch rahi hai. Ab aage………

Janhvi leti hui hai aur Mayank se dosti ke lie ki hui haan ke baare me soch rahi hai ki tabhi kamre me Raghav aa jata hai. Janhvi phone ko takiye ke neeche rakh deti hai aur aise dikhati hai jaise wo so gayi. Raghav Janhvi ke paas aata hai aur uske kaan ke paas apne honth lakar kehta hai, “ Janhvi! So gayi kya?”

Janhvi jaag rahi hai par wo Raghav ki baat ka koi jawab nahi deti aur aise leti rehti hai jaise wo so gayi ho. Raghav Janhvi ke kareeb aane ki koshish karta hai. Janhvi usi tarah leti rehti hai, aur jab wo dekhti hai ki Raghav usse door nahi ho raha to wo Raghav ko door karti hai aur kehti hai, “Raghav! Mujhe neend aa rahi hai.”

Raghav: Arey! Abhi bahar to tumhe mujhse baat karni thi, ab main aaya hu to tumhe sona hai.

Janhvi: Hum kal baat karenge.

Raghav: Mujhe abhi karni hai.

Janhvi janti ki Raghav usse kya chahta hai. Wo aage kuch nahi bolti aur Raghav ki taraf mud jati hai.

Janhvi: Boliye!

Raghav Janhvi ko apne aur kareeb kheenchta hai aur use apne bilkul nazdeek le aata hai.

Janhvi: Raghav! Ye sab…

Raghav Janhvi ke hothon par apni ungali rakh kar use chup kara deta hai aur fir Janhvi ke hothon par apne honth rakh deta hai. Wo dono pati patni hain aur isme kuch galat nahi hai, par Janhvi ko kabhi Raghav ka uske kareeb aana acha nahi laga. Wo shayad islie ki wo dono kabhi dil se kareeb aaye hi nahi the. Har baar ki tarah us raat bhi Janhvi ne khud ko samjha lia ki Raghav uska pati hai aur use apne pati ke lie ye sab karna chahiye.

Janhvi ke ghar walon ne use hamesha se yahi sikhaya tha, ki pati aur uske ghar walon ki har baat manana. Janhvi ek naye khayalon wali ladki thi par apne maa baap ke lie wo samaj me buri nahi banna chahti thi. Isilie shuru se hi jo uske maa baap ne use sikhaya usne wahi kia.

Agle din Janhvi usi tarah uthati hai aur apne sare kaam khatam kar, office ke lie nikal jati hai. Metro me phonch kar use ek seat mil jati hai jahan baith kar wo apna phone nikal kar dekhne lagti hai. Aur use fir se ek message dikhayi deta hai. Wo kholke dekhti hai, yeh message Mayank ka hi hai. Usne likha hai, “Hey! Gud mng!”

Janhvi message dekhti hai aur reply kar deti hai, “Good Morning!” Wo kaano me ear phones laga kar gaane sunne lagti hai. Thodi der baad gaane sunte hue bhi use kuch notifications ki awaz disturb karti hai. Wo dekhti hai to Mayank ka hi message hai. “Hey! Hows u?”

Janhvi reply karti hai, “I am fine, wat abt u?”

Mayank likhta hai, “This mng is so gud, so I m also gud.”

Janhvi uske is tarah ke alag jawab ko dekh kar muskurati hai, “Agar aap bura na maane to main aapse ek baat puchu?”

Mayank: Ji bilkul.

Janhvi: Aapko ek stranger se dosti karne ka kya mann kia?

Mayank: I feel some good vibes frm u.

Janhvi: In just 5 mins?

Mayank: Yes, main to 2 sec me bhi feel kar sakta hu.

Janhvi fir se muskurati hai aur likhti hai, “To kya lagta hai aapko ye dosti kahan tak jane wali hai?”

Mayank: Agar chali to chand tak aur na chali to raat tak. 🙂

Janhvi: Hehehe! Means aaj raat tak clear ho jaega?

Mayank: Arey wah! Aapka sense of humour to mujhse bhi acha hai.

Janhvi dhire se hasti hai aur likhti hai, “No, ye koi joke nahi tha.”

Mayank: Yes! I know.

Janhvi: To bataiye…

Mayank: Can I call? Tab thik se bata paunga.

Janhvi: Kuch jyada fayda nahi utha rahe hain aap dosti ka?

Mayank: Hehe! No.. No.. I thought hum baat kar chuke hain islie hi pucha bas… If u don’t want then its ok.

Janhvi: U can…

Mayank: Oh thanks!

Agle hi pal Mayank ka call aa jata hai. Janhvi phone uthati hai aur bolti hai, “Hello!”

Mayank: Hello!

Janhvi: Hi! To fir se good morning se baat shuru karni hai ya sidhe apne question par aau?

Mayank dhire se muskurata hai aur kehta hai, “Sidhe question par…”

Janhvi: To bataiye… Kya lagta hai aapko dosti kahan tak jaegi?

Mayank: Mujhe lagta hai chand se bhi aage ja sakti hai.

Janhvi: Aisa kyun?

Mayank: Kyunki maine pehli ladki dekhi jo I Phone ke lie itni pagal nahi thi.

Janhvi: Oh! To ye I phone ke baare me hai.

Mayank: (haste hue) Nahi! Ye aapke baare me hi hai.

Janhvi: Kaise?

Mayank: Aaj kal ladkiyan sensible kam aur fashionable jyada hoti ja rahi hain.

Janhvi: What do you mean? Main fashionable nahi hu?

Mayank: Oh! No! No! I mean to say is you are beauty with brains. Fashionable plus sensible.

Janhvi: Are you trying to flirt with me?

Mayank: Dekho bola tha na, beauty with brains.

Janhvi: Maine aapko kal raat hi bola tha ki mujhe kuch bhi aisa waisa laga to main baat band kar dungi.

Mayank: Please calm down! Main bas thoda majak kar raha tha.

Janhvi: Kya matlab? Jo aapne kaha wo sab jhuth hai?

Mayank: Arey baba! Ye to aap mujhe hi phasa rahe ho baar baar. Kuch kaho to problem aur use kaho majak tha to bhi problem.

Janhvi: Okay! Par ab is tarah ki baatein nahi.

Mayank: Okay! Waise pehli ladki dekhi hai jise kisi ladke ki tareef bhi pasand nahi aa rahi.

Janhvi: Ladke tareef matlab se karte hain bas.

Mayank: Sach me, aap dusron se alag to hain.

Janhvi: Okay! My station has come. I am going. Bye!

Mayank: Okay! Bye!

Wo office pahunchti hai aur wahan kuch der baad fir ek message aata hai. Janhvi soch me pad jati hai ki ye office me kaam bhi karta hai ya nahi. Wo message padhti hai, “Don’t think I m flirting but I think u are the most different girl I ever met. I m sure chand se to aage jane hi wali hai agar aapne chaha to.” Janhvi message padh kar muskurati hai aur reply me likhti hai, “And I think u are the weirdest person jo pata nahi kyn mere piche pad gaya hai.”

Mayank ka jawab aata hai, “Thanks! For the compliment. :)”

Janhvi fir likhti hai, “Don’t msg me now, do ur work & let me do mine.”

Mayank likhta hai, “Okay! I will talk to u whenever u will be free.”

Janhvi fir se jawab likh deti hai, “No! Ab koi baat nahi.”

Mayank bhi message bhejne me piche nahi rehta, “Kyun?”

Janhvi fir se likhti hai, “Kyunki aaj hi mujhe chand par nahi jana.”

Mayank jawab deta hai, “Okay miss! I will wait for u. Bye!”

Janhvi bhi jawab me “Bye!” likh deti hai.

Janhvi muskura rahi hai. Uske barabar wali seat par bethne wali uski colleague ‘Preeti!’ use dekh rahi hai.

Preeti: Kaun hai phone par jo itna muskura rahi hai? Jiju?

Janhvi: (muskurate hue hi) Nahi! Wo nahi hain.

Preeti: To fir kaun hai?

Janhvi: Wo kal jisse maa ka phone lia tha na, wo.

Preeti: Wo tujhe message kar raha hai?

Janhvi: Han! Acha ladka hai.

Preeti: Ache ladke ye sab chize nahi karte.

Janhvi: Kya chize?

Preeti: Ek ladki ko is tarah message.

Janhvi: Preeti! Yaar tu ajeeb baat kar rahi hai.

Preeti: Arey tujhe nahi pata ladkon ka ki ye kitne bade H……………. Sorry! Main tere samne gali nahi de sakti. Par ye hote hain sach me.

Janhvi: Har ladka same nahi hota.

Preeti: Kya bola hai isne tujhse?

Janhvi: Dosti!

Preeti: 15 din ruk iski dosti pyar me badal jaegi.

Janhvi: Aisa kuch nahi hai.

Preeti: Tujhe kya lagta hai? Iski pehle se ladki dost nahi hongi kya?

Janhvi: Mujhe kya pata? Ho sakta hai na ho.

Preeti: Dekh beta, tu aisi nahi hai. Tu ye sab handle nahi kar paegi. Ise band kar de. Aur tu to married bhi hai.

Janhvi: Hannn! Right! Married ladkiyan dosti thode hi na kar sakti hain?

Preeti: Arey! Tu samajh nahi rahi, ye dosti se sidha pyar par aaega.

Janhvi: Dekhenge wo bhi.

Preeti: Use pata hai ki tu married hai?

Janhvi: Abhi tak is baare me meri koi baat nahi hui hai usse.

Preeti: Wo tujhe unmarried samajh raha hai. Isilie dosti karna chahta hai aur kuch din baad fir usse aage.

Janhvi: Agar aisa hai to main dekhna chahti hu ki tu jo bol rahi hai wo sahi hai ya nahi.

Preeti: Thik hai.

Ab sham hoti hai aur ab wo ghar ke lie nikal jati hai. Ab fir se wo metro me hain. Wo phone nikalti hai aur dekhti hai. Phone me dikh raha hai ki Mayank ke 5 messages hain. Wo chahti nahi hai par uske dil me messages padhne ka mann karta hai. Wo uske messages khol kar dekhti hai. Uske messages is tarah hain, “Hey!”

“Abhi bhi kaam kar rahi ho?”

“Kitna kaam karti ho?”

“I m waiting….”

“Jab bhi free ho to msg kar dena.”

Janhvi uske messages dekh kar sochti hai, “Ye ladka nahi sudhrega!”

Wo uske message ka reply karti hai, “Mana kia tha, fir bhi msg kar dia. Why?”

Mayank ka reply turant aata hai, “Wo main bore ho raha tha.”

Janhvi: To main entertainment hu kya?

Mayank: Nahi! Tum dost ho…

Janhvi: Abhi mann nahi hai, kal baat karenge.

Mayank: Mujhe laga ki hum ek dusre ko jaan sakte hain aise.

Janhvi: Dosti ek limit me hi honi chahiye. I hope u will not cross that limit.

Mayank: Aur wo limit kya hai?

Janhvi: Yahi ki dosti ki limit me raho.

Mayank: Kya hua hai? Pehle jab baat hui thi tab tak to thik thi, abhi is tarah kyun behave kar rahi ho? Office me kuch hua hai kya?

Janhvi: No! Tum ho to kaise kuch hoga.

Mayank: Yaar tumhara sense of humor kahan gaya?

Janhvi: I want to say it clearly, I don’t want this friendship to happen if u are like other guys.

Mayank: Kya kehna chahti ho?

Janhvi: Ladkon ka shaunk hota hai girls se is tarah ki baatein kar ke unhe rijhana. Main waisi nahi hu.

Mayank: Agar yahi baat hai to, I will never do this thing in our friendship. Ye dosti dosti hi rahegi, par ise raat par hi khatam mat karo, ye chand par ja sakti hai.

Janhvi: Okay! Tum jis tarah ki baatein karte ho, mujhe nahi lagta ki ye chand tak ja sakti hai. Don’t show like you can’t understand what I am saying.

Mayank: I know, tum kya kehna chahti ho. Par thodi bahut flirting to sehat ke lie achi hoti hai na, you know like Yoga.

Janhvi: (muskura kar) Ranbeer Kapoor ke dialogues marna band karo.

Mayank: I will not cross my limits, I promise.

Janhvi: Okay!

Mayank: Ab ye batao ye patti kisne padhayi tumhe?

Janhvi: Kisi ne nahi.

Mayank: Thik hai mat batao. Par aisa socho bhi mat mere baare me. I know ladkon ka impression hi kuch aisa hai, ki har ladka waisa hi lagta hai. I just want a pure friendship, aur tum se hi kyun, kyunki tum alag ho. And trust me main bhi un ladkon jaisa nahi jaise tum un ladkiyon jaisi nahi ho. N main bas tumhare sath time spend karna chahta tha, kyunki bas tumhe aur janne ka mann hai, meri aur koi intension nahi thi.

Janhvi: Thik hai!

Mayank: So aur batao na….

Janhvi: Kal baat karein?

Mayank: Okay! I will wait. N don’t be sad be happy like this…. 🙂

Janhvi uska ye message dekh kar muskurati hai, aur likhti hai, “Okay! :)”

Janhvi ghar pahunchti hai, aur dekhti hai ki ghar par Raghav pehle se hi hai.

Janhvi: (Raghav se) Kya hua? Aaj aap jaldi kaise aa gaye?

Raghav: Tum bhul gayi par main nahi bhula.

Janhvi: Kya?

Raghav: Humari three month anniversary.

Janhvi: Oh! Han! Mujhe sach me yaad nahi tha.

Raghav: Happy Three months anniversary!

Janhvi: (muskura kar) Same to you!

Raghav: Kuch socha hai? Kya karna hai?

Janhvi: Nahi!

Raghav: Par maine socha hai.

Janhvi: Kya?

Raghav: Jaldi se ready ho jao, bedroom me tumhare lie surprise hai.

Janhvi bedroom me jati hai aur dekhti hai ki wahan ek bahut hi shandaar saree aur ek bahut hi keemati haar rakha hua hai. Piche se Raghav aata hai aur Janhvi ko pakad leta hai. Wo Janhvi ke baalon ko uske kandhe se hatata hai aur wahan apna chehra rakh deta hai.

Raghav: Kaisa laga surprise?

Janhvi: Acha hai! Par iski kya zarurat thi?

Raghav: Zarurat kyun nahi thi. Abhi party me jab tum ye pehen ke aaogi to sab dekhenge na tumhe.

Janhvi: (Hairani se) Kya? Aapne party rakhi hai?

Raghav: Han! Itna important day hai, party to rakhni hi chahiye.

Janhvi: Mujhe laga tha ki aaj aap jaldi aa gaye hain to hum dono time sath me spend karenge.

Raghav: Arey! Wo to hum roz hi karte hain na.

Janhvi: (Jhuthi muskurahat ke sath) Han!

Raghav: To chalo ready ho jao. Main aata hu, guests aane shuru ho jaenge.

Janhvi: (waisi hi muskurahat ke sath) Okay!

Raghav wahan se bahar chala jata hai aur Janhvi ek dheemi si aah bhar kar bed par baith jati hai. Use Mayank ki baat yaad aati hai, “Main bas tumhare sath time spend karna chahta tha, kyunki bas tumhe aur janne ka mann hai, meri aur koi intension nahi thi.”

Wo apna phone khol kar usi message ko dobara padhti hai aur bolti hai, “I don’t know why, par tumhari kuch baatein sach me alag hain.”

Phir khud ko hi samjhati hai, “Chalo ab ready hote hain, Raghav ne itne mann se party di hai. Ye sirf unke lie.”

Janhvi tyar hoti hai aur bahar nikalti hai, tab tak kuch log aa chuke hain. Wo dekhti hai ki wo sirf Raghav ke colleagues hain. Wo jakar unse milti hai, Raghav un sabse uska introduction karwata hai. Kuch waqt baad kuch aur log bhi aate hain, par Janhvi ka na to koi dost wahan hota hai aur na hi rishtedaar, yahan tak ki uske maa papa aur behen bhi wahan nahi hote.

Ye sab dekh kar Janhvi kya karegi? Wo Raghav se kuch keh paegi? Ya chup rahegi? Ye hum janenge kal. Aaj ke lie bas itna hi. Tab tak……

Take care of yourselves………

&

Keep feeling the Love…………….. ❤

One thought on “Kashmakash (E-2)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s