HUMSAFARS… (E-16.2)

Episode-16.2

Recap: Poonam ne Prem ko bhot kuch sunaya, jis wajah se wo uske ghar se chala gaya. Wo jate jate ye bhi bol gaya ki ab wo Poonam ko kabhi disturb nahi karega. Iske baad Prem ke parents shadi se wapas aate hain aur sari baat sunte hain. Poonam ke papa Poonam se kehte hain ki wo kuch din me apna decision unhe bata de, nahi to wo uske lie ladka dekhna shuru kar denge. Ye keh kar uske papa ghar se bahar chale jate hain. Isse aage janne ke lie, ye episode padhe.........

Ab Ananya se bilkul ruka nahi jata. Papa ke samne wo chup thi lekin ab wo chup nahi rehti. Wo apni Maa ko wo sab batati hai jo hua tha. Uski Maa sab sunti hai. Poonam bhi wahin baithi hai par chup hai.

Ananya: Aapko pata hai Maa. Acha khasa sab thik ho gaya tha. Mujhe to laga tha ye maan bhi gayi hai. Uske chot lagi to yahan rok lia isne. Aur fir juice dia bana kar. Aur fir achanak pata nahi kya hua ise, use itna kuch bol dia. Wo bhi kitna sunta. Chala gaya wo.

Poonam’s Mom: Kya hua? Kuch bolegi.

Poonam: Maa! Kuch samajh nahi aa raha. Ek time lagta hai usne kitna kuch saha hoga aur fir main jab apne baare me sochti hu to lagta hai ki usko ek baar aa kar batana to chahiye tha.

Poonam’s Mom: To tujhe kya lagta hai, jo bhi kuch tere sath hua usme Prem ki galati thi?

Poonam: Han!

Poonam’s Mom: To agar wo tujhe inform kar deta aur uske baad bhi tu is tarah se kuch likhti aur wo pakda jata tab bhi uski galati hoti?

Poonam: Nahi! Main tab likhti hi kyun?

Poonam’s Mom: Yaad karke hi likh rahi thi na.

Poonam: Hmmm. Shayad likh bhi sakti thi.

Poonam’s Mom: To tab kiski galati hoti? Tab bhi teri padhayi chhudwane ki baat chalti, tab bhi wo sab kuch hota jo tere sath hua.

Poonam: Tab meri galati hoti.

Poonam’s Mom: Ab bhi teri galati hi thi. Kyunki tu chize sambhal nahi payi. Par tujhe lagta hai ki Prem ne tujhe nahi bataya wo sab islie hua.

Poonam: To aap uski taraf se bol rahi ho.

Poonam’s Mom: Bilkul nahi. Uski galati to hai hi, usne itne saal tujhe inform nahi kia aur ab aaya hai. Par jo sab tere sath hua, usme Prem ki nahi teri hi galati thi. Main ye sab tujhe islie bata rahi hu ki tujhe chize clear ho sake. (kuch ruk kar) Aur wo aa nahi paya par phone par bhi inform nahi kia?

Poonam: Usne phone kia tha, Disha aur Nupur ke ghar par, par wo bol raha tha ki uska naam sunke phone kat jata tha.

Poonam’s Mom: Tujhe unse ye baat puchni chahiye. Phone karke puch ki wo sach keh raha hai ya nahi?

Ananya ye baat sunte hi bilkul wait nahi karti aur Disha ka number dial kar ke Poonam ko phone de deti hai.

Disha: Hello!

Poonam: Hello!

Disha: Han bol Poonam. Kaise phone kia?

Poonam: Tujhse kuch baat puchni thi.

Disha: Han bol.

Poonam: Jab Prem gaya tha, uske kuch din baad uska phone aaya tha kya?

Disha: Tu fir shuru ho gayi. Us chapter ko ab band kar de. Kitne saal ho gaye hain.

Poonam: Ye sab main us chapter ko band karne ke lie hi puch rahi hu. Please bata, uska call aaya tha?

Disha: Han! 2-3 baar aaya tha. Par maine Mom se mana kar dia tha, aur phone kaatne ke lie keh dia tha.

Poonam: Kyun?

Disha: Uske chacha aur us Sameer ne hume itna kuch sunaya tha. Main gusse me thi.

Poonam: Nupur ke paas bhi aaya tha?

Disha: Han!

Poonam: To tumne ye mujhe kyun nahi bataya? Tum dono pagal ho kya? Wo kuch message dena chahta hoga shayad.

Disha: Tujhe pata hai na, us din Prem ke ghar se wapas aane ke baad humne kya decide kia tha?

Poonam: Han! Par at least tum ye mujhe bata to sakti thi. Na ye bataya ki uska phone aaya tha aur na ye bataya ki kis number se aaya tha. Tumhe baat nahi karni thi to main hi use phone karke puch leti.

Disha: Hum us waqt gusse me the. Par tu ab ye sab kyun puch rahi hai?

Poonam: Baad me batati hu. Abhi tu phone rakh.

Disha: Par hua kya?

Poonam Disha ki baat ansuni karke phone rakh deti hai.

Ananya: Kya hua?

Poonam: Usne phone kia tha.

Ananya: Mujhe pata tha, usne phone kia hi hoga.

Poonam’s Mom: (Ananya se) Tu kuch jyada excited nahi hai?

Ananya: Wo acha ladka hai Maa. Aur ye bhi use pasand karti hai. I know uski galati thi. Par ye kyun bhul rahi hai ki uske ghar walon ne aur usne kaise manage kia hoga. Pehle to ghar se be-ghar aur fir unki Maa bhi nahi rahi. Ghar me bas ek hi lady thi, wo bhi nahi rahi. Teeno ne kis tarah sab kuch kia hoga.

Poonam’s Mom: Han! Waise ye to sahi hai. Ek aurat hi himmat bandhati hai, agar aurat na ho to ghar ko sambhalna bhot mushkil hota hai. Lekin fir bhi uski galati to kam nahi ho jati, usne Poonam ko inform nahi kia.

Poonam: Koshish ki thi usne, par mere pagal doston ki wajah se sab bekar ho gaya.

Poonam’s Mom: Kya soch rahi hai?

Poonam: Kya mujhe use maaf kar dena chahiye?

Ananya: Pehle to tujhe jake use Sorry bolna chahiye. Tune jo uske sath kia acha nahi tha.

Poonam: Maa! Ek to ise chup karao.

Poonam’s Mom: (muskura kar) Chup ho ja Anu! Meri beti ko pareshan mat kar.

Poonam: Agar Tau ji tai ji nahi maane to?

Poonam’s Mom: Wo mera aur tere Papa ka kaam hai. Tujhe uske baare me nahi sochna hai.

Ananya: Unke ek bete ne bhi love marriage ki hai, wo bhi American ladki se. Agar wo log kuch bole na Maa, to yahi bol dena unhe.

Poonam’s Mom: Han meri Maa! Main nahi tu hi bol dena.

Ananya: Main to bol dungi. Fir baad me mujhse mat kehna kuch.

Aur sab muskurane lagte hain.

Chaliye Poonam ke mann se ye confusion to dur hui. Par jab Poonam razi hui hai to Prem piche hat gaya hai. Aise me Poonam kaise Prem se baat karegi aur kaise use manaegi ye bhi sochne wali baat hai.

Poonam ko ab Manav aur Disha ki sagayi ka intezaar hai. Wo soch kar baithi hai ki ab use jo bhi karna ya kehna hai wo ab Manav aur Disha ki Sagayi par hi karegi.

Din beete aur Sagayi ka din bhi aa hi gaya. Aaj Poonam puri tarah se tyar hai Prem se milne ke lie. Wo bas chahti hai ki Prem sagayi me aaye aur wo use apne dil ki har baat keh dale.

Poonam ne ek khoobsurat si dress pehni hai. Kaano me lambe earrings hain, aankhein kajal se saji hui hain, hathon me kangan hain aur baal… wo to school time se aur bhi jyada lambe ho chuke hain, jinhe kholne ke baad Poonam aur bhi khoobsurat lagne lagti hai. Poonam time se Disha aur Manav ki sagayi me phoch jati hai. Manav bahar stage par baitha hai aur Disha andar room me wait kar rahi hai. Wo dono ko milti hai, aur congratulate karti hai. Fir wo Disha ki Mom ke sath kaam me thoda hath bhi batane lagti hai. Lekin uska pura dhyan darwaje par hai. Wo Prem ke aane ki raah dekh rahi hai. Par Prem ka koi aata pata nahi hai.

Kuch der baad, Disha ki Mom Poonam ko Disha ke paas uske room me bhej deti hai aur kehti hai ki jab Disha ko bulaye tab wo use lekar bahar aaye. Poonam jana to nahi chahti par Disha ki Mom ki baat taal bhi nahi pati. Aakhir Disha uske school ki dost hai, islie wo andar room me chali jati hai.

Thodi der baad Disha ko bahar bulate hain. Tab Disha ko leke Poonam aur baki ladkiyan bahar aati hain. Ab tak Prem bhi wahan aa chuka hai. Wo Poonam ko Disha ko le jate hue dekh raha hai. Dono ki nazarein milti hain aur ab dono hi ek dusre ko dekh rahe hain. Disha stage tak phoch jati hai. Poonam fir se dono ko sath me congratulate karti hai aur stage se niche aa jati hai.

Poonam Prem ki taraf badhti hai, par Prem stage ki taraf chala jata hai. Stage par jake wo Disha aur Manav ko ek bouquet deta hai.

Prem: Congratulations to both!

Manav: Thanks!

Disha yaad karti hai ki kuch din pehle Poonam ne usse Prem ke baare me pucha tha aur aaj Prem khud yahan hai. Wo isi soch me hai aur Prem se kuch keh nahi pati.

Prem: Soch rahe hoge na, itne din baad ye kahan se tapak gaya?

Manav: (smiling) Han!

Prem: I am sorry! Main tum logon ko kuch bata nahi paya aur mujhe jana pada. Par maine Disha ko phone kia tha.

Disha ye sab sun rahi hai aur bolti hai, “To isilie Poonam ne mujhe phone karke wo sab pucha tha.”

Prem: Kya?

Disha: Bhadka raha hai meri dost ko? Ki maine baat nahi ki tujhse?

Prem: Yaar! Maine sirf apni safayi di thi.

Disha: Ye tune sahi nahi kia.

Itne me Disha aur Manav ke ghar wale stage par aake un dono ko ring ceremony ke lie baitha dete hain aur aage Prem Disha se baat nahi kar pata. Prem stage se niche utarta hai aur sochta hai, “Ye bhi gusse me hain. Ye log bhi maaf nahi karenge shayad.”

Prem khada hua yahi sab soch raha hai aur Poonam uske paas aakar khadi ho jati hai.

Poonam: Hi!

Prem: (Poonam ko dekhte hue) Hi! Main Disha aur Manav se mila.

Poonam: Kya kaha unhone?

Prem: (Muskura kar apni udasi chhupate hue) Wahi! Wo log bhi… Maaf na kare shayad.

Poonam: Prem! Unse sagayi ke baad baat karna.

Prem: Nahi! Ab bhot ho gaya. Ab mujhe kisi se baat nahi karni. It’s my fate.

Poonam: Aise kyun bol rahe ho?

Prem: Poonam! Ring ceremony dekho. Ache lag rahe hain na dono.

Poonam: (Manav aur Disha ki taraf dekhte hue) Han!

Prem: Pata hai, mujhe aaj bhot acha lag raha hai. Apne do school ke dost aaj ek sath hain.

Poonam: Mujhe bhi.

Prem: Agar aise apni sagayi hoti to ek alag hi khushi hoti na.

Poonam Prem ko dekhti hai.

Prem: (Poonam ko dekhte hue) Par meri kismat me nahi hai. Jane do.

Poonam apni palakein jhuka leti hai.

Prem: Poonam! Tum pareshan mat hona. Main sambhal lunga khud ko. 10 saal bhi to raha hu na tumhare bina. Ab bhi reh lunga.

Aur Prem ki aankhein bhar aati hain. Manav aur Disha ek dusre ko ring pehna dete hain. Sab taaliyan bajate hain.

Prem: So… Chalo main chalta hu. Ab kabhi dobara tum logon ko pareshan nahi karunga.

Poonam Prem ko rokne ki koshish karti hai, par Prem nahi rukta. Wo wahan se bahar chala jata hai. Poonam sochti hai ki uska yahan rukna sahi hai ya Prem ko rokna. Aur use samajh aata hai ki agar Prem ko nahi roka to shayad aaj ke baad wo use na mil paye. Wo bhi bahar nikal jati hai aur dekhti hai ki Prem seediyon se niche utar raha hai. Poonam lift me jati hai. Prem se pehle hi parking wale floor par phoch jati hai. Prem seedhiyon se niche utarta hai aur samne Poonam ko dekhta hai. Uski aankhon me jo aansu ab tak ruke hue the wo ab nikal rahe hain.

Poonam: Matlab jab pareshan hote ho to dimag bhi kharab ho jata hai kya? 7 floors niche utar kar aaye ho lift use nahi kar sakte the?

Prem: (aankhon me aansu lie) Tumhe to pata hai ki aise me mera dimag kaam nahi karta.

Poonam: Hmm!

Prem: (aansu pochte hue) Kya hua? Koi kaam hai kya?

Poonam: Han! Kya tum mujhe ghar tak chhod sakte ho?

Prem: (Han me sir hilate hue) Hmm! Par tumhe abhi jana hai?

Poonam: Nahi! Abhi to nahi. Thodi der aur rukna hai. Tum tab tak wait kar sakte ho?

Prem: Han! Kyun nahi.

Poonam: Okay! Aur main kuch aur bhi puch sakti hu?

Prem: Pucho!

Poonam: Kya tum mujhe roz hospital chhod sakte ho?

Prem: Poonam!

Poonam: Bataaaoooo…

Prem: Han!

Poonam: Hamesha chhodoge aur leke bhi aaoge?

Prem: (muskura kar) Han!

Poonam: Aur fir shadi ke baad bhi ye karoge?

Prem: (aankhon me aansu fir se chhalak aaye hain) Par uske lie mujhe tumhare husband se baat karni padegi.

Poonam: (aansu bhari aankhon me muskaan lie) Uski zarurat nahi padegi.

Prem: Kyun?

Poonam: (Prem ki taraf badhte hue) Kyunki hum hi sath rahenge na.

Prem: Poonam!

Poonam: Kyaa? Ab tumhe meri aadat ho gayi hai kya? Tab se bas mera naam lie ja rahe ho, kuch bol hi nahi rahe.

Prem aankhon me aansu lie hasta hai.

Poonam: I know ye sab bahut awkward hai. Main itne dino se bhot gussa thi, tumhari ek bhi baat manna nahi chahti thi. Aur aaj is tarah tumse sab bol rahi hu. Aisa nahi hai ki mera gussa khatam ho gaya hai. Par main sirf tumhare sath hi apna har safar kar sakti hu. Tumhari humsafar banke. Kisi aur ke baare me in 10 saalon me nahi socha, to tumhare aane ke baad kaise soch sakti hu. Mujhe nahi pata ise kya kehte hain. Ise dosti kehte hain ya kuch aur. Mujhe itna pata hai bas, ki ye sahi time hai. Shayad hum alag hi islie hue the ki sahi waqt par sath ho sake. Main ab tumse dur rehne ka risk nahi lena chahti, islie chupchap apne ghar par batao aur mujhse shadi karo. Taki is baar agar tum kahin jao, to mujhe apne sath lekar jao. To bolo… Tum hamesha mere sath safar karne ke lie tyar ho? Mere sath rahoge, mere humsafar ban kar?

Prem Poonam ke paas aata hai aur use kas ke gale laga leta hai. Aansu dono ki aankhon se beh rahe hain. Wo bhot zor se rone lagta hai aur kehta hai, “I am Sorry Poonam.”

Poonam bhi apne dono hathon se use pakad leti hai aur kehti hai, “I am sorry. Tumhe itna satane ke lie”

Prem: It’s Okay! Maine kaha tha na ki tum humesha gussa karna aur main tumhe manaunga. Wo baat shayad jyada seriously leli tumne.

Poonam aur Prem dono haste hain. Ab dono kuch nahi bol rahe bas dono ki aankho se aansu gir rahe hain. Kuch der baad dono ek dusre se alag hote hain. Prem Poonam ke baalon ko kaan ke piche karta hai. Dono chup hain, aur dono ko hi samajh nahi aa raha ki kya bole. Tabhi Poonam ke mobile par ek call aata hai. Poonam purse me se mobile nikalti hai aur call receive karti hai. Ye phone Manav ka hai.

Manav: Poonam!

Poonam: Han! Kya hua Manav?

Manav: Tumne Prem ko dekha tha? Wo yahan aaya tha abhi.

Poonam: Han! Dekha tha. Kyun kya hua?

Manav: Ab dikh nahi raha. Tab ring ceremony ki wajah se baat nahi kar paya.

Poonam: Main usi ke sath hu.

Manav: Goood! Leke aa kamine ko, pehle use marunga aur uske baad puchunga kahan tha wo.

Poonam: (Haste hue) Tum use kal marna. Abhi to main use marne wali hu.

Manav: (muskurate hue) Han! Tumhara pehla haq hai. Uske baad hum se bhi maar khaega wo.

Poonam: Zarur!

Ye keh ke Poonam phone rakh deti hai.

Prem: Kya hua?

Poonam: Kuch nahi. Manav tumhe peetna chahta hai. Par usse pehle to main marungi na.

Prem: Yaar! Isse to mera dost hi acha hai. Tumne itne din laga die manne me. Wo ek baar me hi maan gaya.

Poonam: Wo dost hai par main to…

Prem: Tum kya?

Poonam: (muskura kar) Kuch nahi…

Prem Poonam ko apni baahon me bhar leta hai. Poonam bhi Prem ke gale lag jati hai.

To doston… Ye thi Poonam aur Prem ki kahani. Poonam ke ghar walon ko to sab pata hi hai. Prem ke ghar wale maan jaenge. Dost bhi use thoda peetenge, par fir maan hi jaenge. To ab bas unhe shadi karni hai. Lekin agar aap iske baare me bhi detail me janna chahte hain to bataiyega zarur. Ho sakta hai nayi kahani inki shadi ke bare me hi ho. Par uske lie kuch din ka intezaar…. Tab tak aapse vida lete hain. Aapke samne dobara hazir honge ek nayi kahani ke sath. Aap Valentine’s Week enjoy kijiye. And….

Keep Feeling the Love….. ❤

One thought on “HUMSAFARS… (E-16.2)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s