HUMSAFARS… (E-16.1)

Episode-16.1

RecapPurane dino me Prem aur Poonam ki ladayi ke baad Prem ko realise hota hai ki use ab aur chup nahi rehna chahiye aur wo Poonam se apne dil ki baat keh deta hai. Par us din ke baad Poonam aur Prem dobara nahi milte. Poonam unhi purane dino ko yaad kar rahi hai. Isse aage janne ke lie, ye episode padhe......

Present day……..

Wo isi kash-m-kash me hai ki use kya karna chahiye. Tabhi uske mobile par ek phone aata hai. Wo phone receive karti hai. Dusri taraf se uski tai ji ki awaz aati hai, “Hello!”

Poonam: Tai ji! Namaste!

Tai ji: Maine islie phone kia tha ki apni Maa ko phone karke bol de ki shadi me hamari taraf se bhi shagun de degi. Main itni der se teri Maa ka number mila rahi hu, mil nahi raha.

Poonam: Main unhe bol dungi tai ji.

Tai ji: Thik hai.

Poonam: Tai ji! Aapne itne dino baad mujhse baat ki mujhe acha laga.

Tai ji: Karni padi. Teri Maa ka phone lag nahi raha aur teri behen kabhi phone uthati nahi hai. Isilie karna pada. Nahi to tujhe… tujhe to main kabhi phone na karu.

Poonam: Ab us baat ko kitne saal ho gaye hain, aap ab tak use le kar kyun baithi hain?

Tai ji: Tune jo kaand kie hain, usse jo sab me hamari badnaami hui, wo jaegi kya? Aaj bhi log tujhe usi nigaah se dekhte hain wahan. Hume bhi to isilie wahan se jana pada. Nahi to hum kyun jate apna desh chhod ke. Aur tera aaj bhi kya bharosa, raat ke 9-9 baje ghar aati hai. Kaam karti hai ya kuch aur…. Kise pata hai? Kam se kam hum yahan hain to hum par to baat nahi aaegi. Aur teri behen… wo kya kam hai. Wo tujhse bhi aage nikalne wali hai.

Tai ji ki ye sab baate sun kar Poonam ki aankhon se aansu beh rahe hain.

Tai ji: Chal ab phone rakh. Tujhse baat karke mujhe apna B.P. nahi badhana.

Tai ji phone kaat deti hain, par unke kahe hue shabd ab bhi Poonam ke kaano me goonj rahe hain. Wo sab jo 10 saal pehle hua tha, wo fir se uski aankhon ke samne aa raha hai. Kis tarah Prem ki wajah se use kitna kuch sunna pada tha, wo sab use dikhayi de raha hai. Prem ke halaat to sudhar gaye, lekin Prem ki wajah se uske ghar ke halaat ab bhi waise hi hain. Ye sab baate Poonam ke dimag me ghoom rahi hain.

Prem Ananya ko apne aur Poonam ke baare me bata chuka tha. Ananya chahti thi ki ab wo Poonam aur Prem ko kuch pal ke lie akela chhod de. Wo un dono ko wo sab yaad dilana chahti thi. Par use nahi pata tha ki Tai ji ke phone se Poonam ka gussa fir se saatvein aasmaan par phoch chuka hai. Ananya Poonam ko kheench kar room me le aati hai.

Ananya: Tune kabhi ye sab nahi bataya mujhe.

Poonam: Jo zaruri tha, bas wahi bataya.

Ananya: Par in sab chizo ko jaan kar mujhe lagta hai ki tujhe na Prem ko maaf kar dena chahiye.

Poonam: Ye sab baate sirf ek saal ke lie thi uske baad 10 saal use yaad tak nahi aayi, tu ye kyun bhul jati hai?

Prem Poonam ki baate sun kar chup rehta hai.

Ananya: Arey yaar! Ho gayi na galati. Ab phansi chadhaegi kya? Wo maafi maang raha hai.

Poonam: Mujhe ab iske kisi bhi natak se koi fark nahi padta.

Ye sunne ke baad Prem se raha nahi jata aur wo bolta hai, “Poonam! Kuch bhi natak nahi hai.”

Poonam: Mujhe tumse certificate nahi chahiye. Tum jo bhi karte ho wo sab natak hota hai. Sirf logon ko apni baaton se influence karte ho.

Prem: Poonam! Ye tum bhi janti ho ki aisa kuch nahi hai. Isi baat par hum pehle bhi lad chuke hain.

Poonam: Han! Galati kar di maine jo tab tumhe samajh nahi payi. Usi raat maafi maangi thi tumne aur usi din ke baad shakal tak nahi dikhayi apni. Aur ab dekho Ananya ko apni baaton se apni side kar lia. Ye influence hi hai.

Ananya: Tu kya bole ja rahi hai? Main shuru se tum dono ke relationship ki side hu.

Poonam: Ananya! Tu chup kar. Isne bhot natak kia hai, iski acting ki wajah se hi itni ladkiyan iske piche thi. Yaad hai na tumhe Sam? Use milo ja kar wo pakka aaj bhi tumhara wait kar rahi hogi? And ye weakness ka natak bhi band kar do. I know ki tum yahan par rehna chahte ho islie ye sab natak kar rahe ho.

Poonam gusse me thi aur use khud pata nahi tha ki wo kya bole ja rahi hai. Wo bolte bolte itna jyada aage chali gayi thi ki usne apni baaton se Prem ko bhot hurt kar dia tha. Ye sab sun kar ab Prem se nahi baitha gaya. Prem khada hua aur usne Poonam ke samne aakar bola, “I am sorry! Tumne sahi kaha, main sab natak kar raha hu. Pehle bhi jo kia wo bhi natak tha. Ab ye weakness bhi natak hai, wo behosh hona bhi natak tha, aur ye jo chot lagi hai na maathe par ye bhi natak hai. Ye maine jaan kar doctor se patti karwayi hai jisse main tumhare ghar par reh saku. I am so sorry, but you got me. So, ab main ye patti khol raha hu aur yahan se ja raha hu.”

Prem Poonam ke samne hi wo patti hata deta hai. Ananya ye sab dekh kar shocked hai. Poonam bhi Prem ko patti hatane se rokne ki koshish karti hai par wo tab tak patti hata chuka hai. Patti hatate hi use bhot tez dard mehsoos hota hai. Wo kuch seconds ke lie bed par baith jata hai. Dard itna jyada hai ki aansu ki boonde uski aankhon se nikalti hain, lekin wo un par kaabu kar leta hai. Poonam ghav ko dekhti hai, wo wakai bhot gehra hai, itna gehra ki us par ek ya do stiches lag sakte the. Ananya to Prem ke ghav ko dekh hi nahi payi aur usne apna muh fer lia.

Ananya: Ye kya kia aapne? Chot se patti kyun hatayi?

Prem: (dard me) Ye chot nahi hai ye natak hai.

Prem ghar se bahar jane ke lie khada hota hai. Poonam use rokti hai, “Prem! Chupchap baitho.”

Prem: Nahi! Main ja raha hu.

Poonam: Ananya! Ja dawayi wala box le kar aa jaldi se.

Ananya room se bahar chali jati hai. Prem dhire dhire room se bahar jane ki koshish kar raha hai.

Poonam: Tum pagal ho kya? Ye sab karne ki kya zarurat thi? Ab yahin baitho tum.

Prem Poonam ki awaz ko ansuni kar aage badh raha hai. Poonam Prem ka hath pakad kar use rokti hai aur use bed par baitha deti hai.

Poonam: Chupchap yahin baitho. Agar hile to maar khaoge.

Prem chupchap baith jata hai. Itne me Ananya dawayi wala box le aati hai. Poonam use garam pani lane ke lie kehti hai. Ananya fir room se bahar chali jati hai.

Poonam: (ghav ko dekh kar pareshan hote hue) Ye sab karna zaruri tha? Aur wo doctor… bilkul pagal hai… Is par bas patti kar ke bhej dia.

Ananya pani lati hai. Poonam cotton ko garam pani me bhigo kar blood saaf karti hai. Ananya samajhdar hai aur wo samajhti hai ki is waqt dono ko akele chhodna sahi hai, islie wo dhire se room se bahar nikal jati hai. Poonam chot par antiseptic lagati hai aur dawa laga kar uski patti karti hai.

Poonam ko feel hota hai ki usne kuch jyada hi bol dia, isilie wo kehti hai, “I am sorry! Mujhe wo sab nahi kehna chahiye tha.”

Prem chup hai. Poonam patti baandh deti hai. Prem khada hota hai aur kehta hai, “Thanks! Par ab mujhe chalna chahiye.”

Poonam: I know tumhe bura laga hai. Main bhot harsh ho gayi thi. I am sorry.

Prem: (aankhon me aansu lie par muskurate hue) Nahi! Ye sab sunne ki aadat mujhe daal leni chahiye. Aakhir maine sab galat kia hai. Sab Karma hai, main us waqt tumhe chhod kar chala gaya. Tum mujhe aaj chhod do. Aur maine to ye soch bhi lia tha ki ab main tumse kabhi nahi milunga shayad. Par us din tum mujhe hospital me dikhi aur mujh idiot ne pata nahi kya kya soch lia. Jab main soch hi chuka tha ki tum ho hi nahi kismat me to fir se ye sab sochna galat tha. I am sorry, maine fir se tumhari life me aane ki gustakhi ki, tumhe wo sab buri memories fir se yaad dilayi. Pata nahi main kyun soch raha tha ki Maa ke jane ke baad jo ek kami si aa gayi thi life me, wo tumse mil kar puri ho jaegi. I was wrong. Jo insan 10 saal tak tumhe dekhne nahi aaya uske sath tumhe bilkul nahi rehna chahiye. Tum sahi ho Poonam. Tum bilkul sahi ho. Par bas ek chiz kehna chahta hu. Wo sab natak nahi tha aur na aaj hai. (Ye kehte hi uski aankhon se aansu gir jate hain.) Par shayad main tumhe deserve nahi karta. I am sorry for all the trouble I made. I am sorry!

Prem room se bahar nikal jata hai. Lekin shayad use kuch yaad aata hai aur wo fir mudta hai aur kehta hai, “Poonam! Can you please give me the venue jahan Disha aur Manav ki sagayi hai? Main ek baar usne milke maafi mangna chahta hu. Wo maaf kar sake to acha hai nahi to maine hopes to chhod hi chuka hu.”

Poonam: (apna bharraya hua gala saaf karte hue) Ahem! Tumhe wahan jana nahi chahiye.

Prem: Han! Bas main unhe ek baar congratulate karna chahta hu. Tabhi unhone maaf kia to thik, nahi to unhe bhi apni shakal nahi dikhaunga.

Poonam: Main tumhe message kar dungi.

Prem: Thanks!

Poonam: Prem! Tum ja nahi paoge. Thodi der ruk jao. Main tumhe chhod aaungi.

Prem: No! It’s okay! I should manage on my own. Main tumhe ab aur takleef nahi dena chahta.

Prem ye kehte hi jane ke lie fir mud jata hai. Poonam use rokna chahti hai par nahi rok pa rahi. Kyunki wo janti hai ki galati is baar uski hai. Prem use sab bata chuka tha, par fir bhi wo bas use neecha dikhaye ja rahi thi. Poonam ne bhi bhot kuch jhela hai, par Prem bhi un dino bhot pareshan raha tha. Aisa nahi tha ki wo jaan kar Poonam se milne nahi gaya. Wo waqt hi aisa tha. Ye sab agar Poonam ki family ke sath hua hota to shayad use samajh aata ki Prem usse kya kehna chahta tha. Poonam janti hai ki galati uski hai, par is waqt uski ego, use Prem ko rokne se rok rahi hai. Prem ghar se bahar nikal jata hai. Poonam Prem ko bahar jate hue dekh rahi hai. Aur uske jane ke baad bed par baith jati hai. Use ehsaas hota hai ki usne kya kho dia hai. Uski aankhe geeli hain. Par ab kuch nahi ho sakta. Kuch bhi nahi. Shayad yahi unki kismat hai.

Poonam bed par baithe hue ro rahi hai. Prem bhi car chalate hue apne aansuon ko rokne ki koshish kar raha hai. Wo dono hi apne purane dino ko yaad kar rahe hain. Prem ghar phoch kar na kisi ki baat sunta hai aur na kisi se baat karta hai. Wo sidha apne room me jata hai aur wahin rehta hai. Prem ke ghar wale pareshan hai ki Prem ko kya hua hai? Wo kahan gaya tha aur ab jo aaya hai to kisi se baat nahi kar raha.

Suman (Prem’s bhabhi): (Prem ke bhaiya Pratap se) Pata nahi ise kya hua hai? Kal ghar nahi aaya aur aaj ye sab.

Pratap: Abhi iske baare me Dad ko mat batana. Nahi to kha-m-kha pareshan ho jaenge.

Suman: Thik hai.

Pratap: Kahan tha ye? Usi doctor ke ghar par tha na?

Suman: Han!

Pratap: Usse puche kya? Shayad wo bata de.

Suman: Aise usse puchna sahi nahi. Pehle isi se pucho kya hua hai?

Pratap: Abhi rehne do, raat ko dekhte hain, tab tak normal ho jaega.

Suman aur Pratap dono raat hone ka intezaar karte hain. Wahan Ananya Poonam ko samjhane ki koshish karti hai.

Ananya: Ye tune thik nahi kia. Use ye sab kyun bola tune?

Poonam: Kyunki wo usi ke layak hai.

Ananya: Aur tu isi ke layak hai. Wo tujhe chhod ke jaega na tab tujhe samajh aaega. Maa ko aane de main sab bataungi unhe.

Poonam: Kya bataegi?

Ananya: Yahi ki uski galati na hone ke bawajood tune use itna kuch sunaya. Wo bhi kab tak sunega. Aur aaj ke baad rona mat, kyunki tune jo bhi kia hai khud kia hai.

Poonam chup rehti hai. Ananya wahan se chali jati hai.

Raat ko Prem ke ghar par uske Papa aate hain. Dinner ka time hai aur Suman Prem ko bula kar lati hai. Prem chupchap aa kar baith jata hai.

Prem’s Dad: (chot ki taraf ishara karte hue) Ye kya hua tujhe?

Prem: Wo.. Chota sa accident.

Prem’s Dad: Kaise?

Prem: Wo car ke door se kat gaya tha. Aur jab hospital phocha to pata nahi kyun chakkar aa gaye. Aur mere sir par bhi lag gayi.

Prem’s Dad: Raat bhar kahan tha?

Prem: Wo…..

Prem’s Dad: Bol!

Prem: Wo.. Kal maine thodi drink kar li thi to mujhe laga ki ghar jana thik nahi hai.

Prem’s Dad: To kahan raha?

Prem: Car me hi so gaya tha. Aap logon ke call ka mujhe pata nahi chala. Nahi to utha leta.

Prem’s Dad: Ye shaunk kab laga tujhe?

Prem: Wo.. bas aise hi kar li thi. Aage se nahi karunga.

Prem’s Dad: Thik hai. Khana kha ke aaram karna. Aur ek do din kaam par mat jao.

Prem: Ji!

Sab log khana khate hain. Koi kuch nahi kehta kyunki sabko pata hai ki Prem ke Dad gusse me hain. Wo is tarah seriousness se tabhi baat karte hain, jab unhe gussa aa raha ho. Lekin Pratap aur Suman ko abhi Prem se baat karni hai.

Khana khatam hote hi Suman aur Pratap Prem ke room me jate hain. Prem apne bed par leta hua hai. Dono ke jane se wo bed par baith jata hai.

Prem: Bhaiya! Koi kaam hai kya?

Pratap: Han! Kal kahan tha?

Prem Pratap ko ghur kar nazare pher leta hai aur kehta hai, “Dad ko bataya to.”

Pratap: Wo to thik hai. Par tu Poonam ke ghar kyun gaya tha?

Suman: Aur jab wahan se aaye to khud ko room me band kar lia.

Prem kuch seconds ke lie soch me pad jata hai ki ab wo in dono ko kya jawab de.

Pratap: Kya hua hai?

Prem: Kuch nahi.

Suman: Tum Poonam ko pasand karte ho?

Prem Suman ki taraf dekhta hai aur nazare chura leta hai.

Prem: Aisa kuch nahi hai bhabhi.

Pratap: To bata fir kaisa hai? Dekh jo bhi hai bata de, hum Dad se baat karenge.

Prem: Kuch nahi hai.

Suman: To tumne khud ko room me band kyun kia tha? Poonam ne kuch kaha?

Prem: Bhabhi! Bhaiya! Main abhi is baare me baat nahi karna chahta.

Pratap: Thik hai! Jab tujhe thik lage tab baat kar lena.

Suman aur Pratap dono Prem ke room se chale jate hain. Suman apne room me jakar Pratap se kehti hai, “Ho na ho. Ye Poonam se hi juda hua hai. Maine hospital me bhi dekha tha.”

Pratap: Kya dekha tha?

Suman: Yahi ki Prem Poonam se baat karne ki koshish kar raha tha aur wo jis tarah se baat kar rahi thi aisa lag raha tha ki wo isse bhot naraz hai.

Pratap: Wo humse to thik se baat kar rahi thi.

Suman: Hum se to thik se baat karegi hi, naraz Prem se hai.

Pratap: Tumhe kya lagta hai ye dosti ka mamla hai ya kuch aur?

Suman: Shayad kuch aur…. par keh nahi sakte.

Pratap: Abhi Prem ko thoda time dete hain. Kuch din baad fir se puchenge.

Suman: Aur agar ye wahi hua, jo hum soch rahe hain to?

Pratap: To kya? Poonam achi ladki hai. Papa ko koi problem nahi hogi usse. Tumhare lie bhi to maan gaye the.

Suman: Han! Aur sath me hume ek doctor bhi mil jaegi.

Pratap: Hehe! Agar ye sach hua to.

Suman: Bhagwan kare sach hi ho.

Prem ke bhaiya bhabhi jo soch rahe hain, wo sahi to hai. Par uske lie ladki ki razamandi bhi zaruri hai. Par ladki to bhot confused hai. Pata nahi kis tarah use ye sab samajh aaega?

Is din ke do din baad Poonam aur Prem ke parents shadi se wapas aate hain. Poonam upset hai aur uski Maa ye janti hain. Maa Papa ke aane ke baad Poonam aur Ananya unse milte hain. Sab living room me sofe par baithe hain.

Poonam’s Dad: Poonam! Kya hua? Sab thik hai?

Poonam: Ji! Papa.

Poonam’s Mom: Main tere Papa ko sab bata chuki hu.

Poonam: (Hairani se) Kya? (Papa ki tarah dekhte hue) Aap mujhse naraz to nahi hain na?

Poonam’s Dad: Tumne khud se to kuch nahi kia, wo khud aaya hai na.

Poonam: Han!

Poonam’s Dad: Tum kya chahti ho?

Poonam is baat par kuch keh nahi pati.

Ananya: Ye kuch decide kare isse pehle mujhe kuch kehna hai.

Poonam’s Mom: Kya hua?

Ananya: Wo aaya tha yahan, Sunday ko. Mujhe to wo ek acha ladka laga. Aap log khud mil kar ek baar decide kar lo kyunki ye to pagal ho chuki hai.

Poonam’s Mom: Anu! Life uski hai na, to yahi decide karegi.

Ananya: Ye kuch decide nahi kar sakti. Itne ache se baat kar raha tha wo, mujhe to koi burayi nahi lagi usme. Par isne insult karke bhej dia use. Wo bhi bewajah.

Poonam’s Dad: (Poonam se) Kya bataya usne?

Ananya: Usne ye bataya…..

Poonam’s Dad: (Anu ko rokte hue) Poonam ko bolne de.

Poonam apne Maa Papa ke samne uski batayi hui sari baate rakh deti hai.

Poonam’s Dad: To ab tu bata tujhe kya lagta hai?

Poonam: Mujhe ye lagta hai ki agar aisa tha to ek baar inform karna chahiye tha.

Poonam’s Dad: Ye tera final decision hai?

Ananya: Papa!

Poonam’s Dad: Tu chup kar, main Poonam se baat kar raha hu.

Ananya chup ho jati hai.

Poonam’s Dad: Bol Poonam.

Poonam: Pata nahi. Mujhe kuch samajh nahi aa raha.

Poonam’s Dad: Decide to tujhe hi karna hai na. Thik hai. Kuch din ka time le le. Par mujhe decide karke bata. Agar tu is ladke ko pasand karti hai to main aage baat karunga aur agar nahi karti to main dusre ladke dekhne shuru kar dunga. Kyunki main nahi chahta ki wo tujhe aur pareshan kare.

Poonam “Han” me sir hila deti hai. Uske Papa wahan se uthate hain aur Poonam ki Mom se kehte hain, “Mujhe thoda kaam hai, main dinner tak wapas aa jaunga.”

Poonam ki Mom bhi “Han” me sir hila deti hain. Poonam ke Papa ghar se bahar chale jate hain.

Poonam aur Prem ke beech ki ye luka chhuppi na jane kab khatam hogi? Shayad ab Poonam ko ja kar Prem se baat karni chahiye. Par kaise? Yahi janne ke lie, is story ke last episode ka last part padhna na bhule, jo abhi kuch hi der me aapke samne prastut hoga. Tab tak thoda sa sabr kijiye, hum milenge break ke baad…..

Keep Feeling the Love…….. ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Madhusudan Singh

Hindi Poems

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

%d bloggers like this: