HUMSAFARS… (E-14)

Episode-14

Recap: Prem Sameer ki harkatein dekh kar gusse me hai. Sameer Prem ko aur uksata hai jis wajah se Prem aur Sameer ke beech ladayi ho jati hai. Prem Poonam ko usse dur rehne ke lie kehta hai. Manav Prem aur Sameer ki ladayi ki wajah se Prem aur Poonam ki dosti ke baare me puchta hai. Prem Manav se kuch chhupa nahi pata aur use apne dil ki baat bata deta hai. Isse aage janne ke lie, ye episode padhe.........

Agla din hota hai. Prem ne Poonam ko Sameer se baat karne ke lie mana kar dia hai, par Sameer maar khane ke baad bhi apni harkaton se baaz nahi aata. Wo aaj fir Poonam ke paas uski seat par aaya hai. Poonam use dekhti hai aur ignore karne ki koshish karti hai. Prem Sameer ko is waqt gusse me ghur raha hai. Sameer Poonam se kehta hai, “Hi! Poonam.”

Poonam uski baat ka jawab nahi deti.

Sameer dobara Poonam se kehta hai, “Poonam I am sorry for yesterday. Par sach, main Prem par kabhi hath nahi uthata agar wo mujhe na marta. Aur wo bhi itni choti si baat par ki maine tumse ek pen le lia tha.”

Poonam ab bhi kuch nahi kehti.

Sameer aage bolta hai, “I will not ask anything from you now. But can you please forgive me?”

Poonam chup hai aur uski taraf dekh bhi nahi rahi.

Sameer: It’s okay! I know tumhe mere against bhadkaya hua hai, isilie tum mujhse baat nahi karna chahti. I don’t know Prem ko mujhse kya problem hai. Main sochta tha ki tum apne decisions kisi ke influence me aakar nahi leti. Aur isilie mujhe laga tha ki shayad hum ache dost ban paye. But I was wrong. Anyways….(Pen desk par rakhte hue) Ye lo tumhara pen.”

Sameer ye keh kar wahan se chala jata hai. Poonam apna pen uthane ke lie apna hath badhati isse pehle hi Prem us pen ko lekar tod deta hai. Poonam ko Prem ki is harkat par bhot gussa aata hai.

Poonam: Ye kya kia?

Prem: Jo sahi tha wahi kia.

Poonam: Tum pagal ho gaye ho kya? Kya main use ek pen bhi nahi de sakti?

Prem: Nahi!

Poonam: Tum itne insecure ho, mujhe nahi pata tha.

Prem: Aur tum itni badi bewakoof ho, mujhe bhi nahi pata tha. Koi tumhe kisi bhi tarah influence kar sakta hai.

Poonam: Han! Jaise tumne kia hai.

Prem Poonam ki ye baat sun kar gusse me aa jata hai. Poonam to pehle se hi gusse me hai.

Prem: Maine tumhe influence kia hai?

Poonam: (gusse me) Han!

Prem: Thik hai. Tumhe jo karna hai karo. Usse baat karni hai, use dost banana hai, uski god me jake baithna hai? I will not say a single word.

Poonam: Tum bhot jyada bol rahe ho.

Prem: Abhi maine kuch bola nahi hai, kyunki ye class hai.

Poonam: Thik hai. Main bhi sunna chahti hu ki tum kitna bol sakte ho. Chhutti ke baad baat karna.

Prem ab kuch nahi bolta. Pura din nikal jata hai, dono ek dusre ki taraf dekhte tak nahi. Chhutti ho jati hai aur Poonam Prem ka wait kar rahi hai. Prem samne se scooty lekar aa raha hai.

Prem: (Poonam ke samne scooty rok kar) Baitho!

Poonam: Nahi! Main yahan islie nahi ruki ki mujhe tumhare sath jana hai. Main dekhna chahti hu ki tum mere bare me kya kya bol sakte ho.

Prem bhi gusse me hi hai aur bolta hai, “Thik hai, chalo fir library ke piche.”

Poonam aur Prem dono wahan phoch jate hain. School dhire dhire khali ho hi raha hai to koi nahi hai unhe dekhne wala.

Poonam: Bolo ab.

Prem: Tumhe Sameer se dosti karni hai?

Poonam: Maine kab kaha?

Prem: To kyun lad rahi ho mujhse?

Poonam: Tumne wo pen kyun toda?

Prem: Kyunki wo Sameer ne lie tha.

Poonam: To?

Prem: To mujhe todna tha.

Poonam: Tum psycho ho kya? Main sirf tumhari property nahi hu? Main kisi se baat karu, kisi ko kuch bhi du, tumhe isme problem nahi honi chahiye.

Prem: Mujhe kisi se problem nahi hai, par Sameer se hai. Tumhe ye shuru se pata hai.

Poonam: Ye koi zaruri nahi na ki jo tumhe pasand nahi wo mujhe bhi pasand na ho.

Prem: To tumhe wo pasand hai?

Poonam: Preemm! Wo bas ek pen tha. Ek pen ke lie tumne uska sir phod dia. Ye sab kya hai? Tum is tarah se behave kyun kar rahe ho?

Prem: Last baar puch raha hu… tum meri baat manogi ya nahi?

Poonam: Nahi!

Prem: Okay! Fine. Raho fir uske sath. Main aaj ke baad beech me nahi bolunga. Par humari dosti yahin khatm.

Poonam: Preemmm!

Prem: Tumhe main psycho lagta hu. Tumhe mujh par trust hi nahi hai, ki jo maine kia wo sahi kia to kya fayda hai is dosti ka. You can do what you want.

Poonam: Tumhe sab apne hisab se karna hota hai? Jab tumne chaha dosti kar li, jab chaha tod di.

Prem: Tumhe trust nahi hai. Jab trust hi nahi to dosti bhi nahi.

Poonam: Are you serious about this?

Prem: Yes! I am.

Poonam: Thik hai.

Prem scooty start karta hai aur kehta hai, “Chalo! Tumhe aakhiri baar tumhare ghar chhod du.”

Poonam: Main doston ke sath jati hu anjaan logon ke sath nahi. Thanks a lot!

Prem bina kuch kahe wahan se chala jata hai. Prem ke jane ke baad Poonam mehsoos karti hai ki uski aankhon me aansu hain. Use samajh nahi aa raha ye kyun ho raha hai. School me uske kayi dost bane aur chhute bhi, par aaj tak kisi ke lie royi nahi wo, fir Prem ke lie kyun? Iska jawab wo janti hai par jaan kar anjaan banna shayad yahi to wo aaj tak karti aayi hai. Prem bhi udhar scooty chalate hue apne aansu ponch raha hai.

Agle din Poonam school aati hai aur Prem ne jahan apna bag rakha hua hai wahin apna bag rakh deti hai. Assembly ke baad sab class me aate hain. Prem Poonam ko dekhta hai aur fir seat par baith kar samne dekhte hue bolta hai, “Tumhe yahan nahi baithna hai, to it’s okay.”

Poonam: Main bewajah ye sabko show nahi karna chahti ki ab hum dost nahi hain.

Prem: Thik hai.

Jab wo log Play ke lie jate hain, to play me bhi ab dono ke beech galatfehmi paida ho chuki hai yahi scenes chal rahe hain. Matlab, jo unke sath real me ho raha hai wahi sath sath play me bhi chal raha hai aur shayad isi wajah se unke emotions bilkul real hain. Sameer ke Poonam ko scene karte dekh Prem ko aaj bhi gussa aa raha hai, lekin ab wo dono ke beech kuch nahi bol raha. Sameer apne aur Poonam ke scene ke baad Poonam se kehta hai, “That was great Poonam.”

Poonam: Thanks! Par main tumse baat karne me interested nahi hu. Hum play me sath hain iska matlab ye nahi ki hum dost ban sakte hain. Aur han… Main apne decisions khud leti hu. So, please… Aaj ke baad, mujhse dur rehna.

Poonam ye keh kar wahan se chali jati hai.

Din beet rahe hain. Par Poonam aur Prem ke beech koi baat nahi ho rahi. Wo dono group ke sath hangout to karte hain, par ek dusre se baat nahi karte. Ye sab unke baki teeno doston ko bhi dikh rahi hai aur wo is baare me dono se baat bhi karte hain. Par dono hi un teeno ko is sab se dur rehne ke lie kehte hain. Aur naya saal bhi aa gaya hai. Play ki practice ab khatam ho chuki hai. Aur Pre-boards bhi ho chuke hain. Ab sab apne boards ki tyariyon me lage hue hain. Is baar Prem ko bhot ajeeb lag raha hai, kyunki Poonam hamesha Prem se Mathematics padhti thi aur Prem hamesha Poonam se biology padhta tha. Ab is ladayi ki wajah se wo dono ye bhi nahi kar pa rahe. Ki tabhi Prem ko ek idea sujhta hai. Wo Disha ko phone karta hai aur use kuch biology ke topics Poonam se samajhne ke lie bolta hai. Disha Prem ki baat maan jati hai aur Poonam ke ghar jakar usse wo sab topics ke baare me puch leti hai. Lekin Poonam ko Disha par shaq hota hai kyunki wo aaj tak Poonam se kabhi is tarah ki discussion karne nahi aayi thi. Wo Disha se puchti hai, “Tujhe Prem ne bheja hai?”

Disha pehle mana karti hai par aakhir me maan jati hai aur kehti hai, “Jab tum dono ek dusre ko itne ache se jaante ho to ladayi kyun ki hui hai?”

Poonam: Tu ye sab chhod. Ek kaam karna main bhi tujhe kuch topics batati hu, tujhe pata hai to tu bata nahi to fir kisi se bhi puch ke mujhe batana.

Disha: Kisi se bhi? Ya Prem se?

Poonam: Agar tujhe problem na ho to usse hi puch lena.

Disha: (muskurate hue) Thik hai. Dono pagal hain, lad kar baithe hain par kaam ab bhi ek dusre se hi karana hai.

Disha wahan se chali jati hai aur Prem ke paas jake sab bata deti hai. Prem Disha ko un sab chizon ke baare me samjha deta hai. Isse thoda gyan Disha ko bhi prapt hota hai aur Poonam ki problem bhi solve ho jati hai.

Ab exams sir par hain aur sab jam kar tyari me lage hue hain. Puri mehnat se padhne ke baad sab exams dete hain. Aur exams ke baad ab fir se rehearsal shuru ho gayi hai kyunki 15 din baad hi annual day hai. Ab kisi ko exams ki tension nahi hai, to sab apne apne performance ko best banane ke lie lage hue hain. Kisi room me dance practices ho rahi hain to kisi room me debate ki tyari, kisi jagah teachers decoration ko le kar discuss kar rahe hain to kahin bacche play prepare kar rahe hain. Aaj kal bas yahi chal raha hai school me. Prem aur Poonam ab bhi usi tarah apne scenes karte hain. Prem ko sabse bura scene wo lagta hai jab use Poonam ka muh ko takiye se daba kar marna hai. Wo jab bhi wo scene karta hai uski aankhon me sach me aansu aa jate hain. Usi scene ke baad Prem ko khud ko bhi khatam karne hai. Aur yahi hai play ka last scene. Ye scene khatam hota hai aur sab bahar nikal kar aa jate hain. Manav Prem ko dekh raha hai. Prem bhi room se bahar nikalta hai. Manav Prem ki gardan me hath dalta hai aur kehta hai, “Ye mujhe play ka best scene lagta hai.”

Prem: (muskura kar) Thanks!

Manav: Kab tak rehna hai tum dono ko aise?

Prem: Chhod na!

Manav: Tujhe usse ladna nahi chahiye tha.

Prem: Yaar wo sun hi nahi rahi thi.

Manav: To bata deta na ki Sameer ne tujhse kya kaha tha?

Prem: Use acha nahi lagta.

Manav: Agar tu use bata deta to wo tujhse naraz hone ki bajaay usse baat na karti. Aur tumhari dosti bhi bachi rehti. Tujhe dosti pyari nahi hai?

Prem: Hmmm! Tu sahi keh raha hai. Par ab wo manegi?

Manav: Maths ke questions puche the na usne?

Prem: (muskura kar) Disha ke pet me koi baat nahi pachti.

Manav: (muskura kar) Han! Ye to hai.

Prem: Sochta hu ki kaise baat karu.

Manav: Soch!

Annual day ka din aa chuka hai. Prem apne ghar par apne parents se annual day par aane ke lie kehta hai. Par wo use kisi kaam me busy lag rahe hain. Wo fir bhi apni Mom se bolta hai, “Mom! Aap dono time par aa jana.”

Prem’s Mom: Beta! Tum jao. Hum shayad is baar nahi aa paenge.

Prem: Aap try karna.

Prem’s Mom: Thik hai.

Ye keh kar Prem apne ghar se nikal jata hai. Use nahi pata ki uske ghar wale kis uljhan se guzar rahe hain. Unhone Prem ko kuch nahi bataya kyunki wo nahi chahte the ki uske exams bure jaye. Lekin shayad aaj wo din hai jab uski zindagi me sab badalne wala hai. Wo school phochta hai aur ready hota hai. Function shuru hota hai aur unke play ki baari bhi aa jati hai. Play me har character bhot ache se perform karta hai. Bheed me baithe kuch log play ko dekhte hue apne aansu bhi ponch rahe hain. Play khatam hota hai aur sab back stage phochte hain. Sab hi bhot khush hain. Teachers Prem aur Poonam ki acting ke lie un dono ko shabashi dete hain. Prem aur Poonam ek dusre ko dekhte hain. Sab log ab change karne ke lie ja rahe hain. Par Prem Poonam ko rokta hai, “Poonam!”

Prem ne Poonam ko awaz lagayi hai. Prem kis tarah se Poonam ko samjhata hai ye ab kal hi pata chalega. Tab tak aap intezaar kijiye aur ye kahani padhte rahiye. Khush rahiye, muskurate rahiye, ek dusre ka sath dijiye, aur….

Keep Feeling the Love……… ❤

One thought on “HUMSAFARS… (E-14)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s