HUMSAFARS… (E-13)

Episode-13

Recap: Prem Ananya ko purani baate bata raha hai aur Poonam kitchen me wahi sab yaad kar rahi hai. Yaad karte karte wo Prem ke lie juice bana rahi hai. Wo Ananya ko Prem ko juice dene ke lie kehti hai. Par Ananya Poonam ko hi Prem ke paas bhej deti hai. Isse aage janne ke lie ye episode padhe......

Poonam kitchen se nikal kar Prem ke paas jati hai.

Poonam: Prem! Ye juice pi lo, thoda acha lagega tumhe.

Prem jo leta hua hai, bed par baith jata hai aur Poonam ke hath se juice ka glass le leta hai. Poonam wahin khadi hai.

Prem: Baith jao na.

Poonam: (baith kar) Tumne apne ghar par kisi ko bataya hai ya nahi? Tum kal raat se ghar nahi gaye ho. Wo log chinta kar rahe honge.

Prem: Arey han! Ye to main bhul hi gaya.

Prem phone nikalta hai jo switch off hai.

Prem: Poonam! Charger milega?

Poonam use charger deti hai. Prem phone me charger lagata hai aur phone on karta hai. Uske phone me ghar se 17 missed calls hain.

Prem: Ohh god! 17 missed calls. Mar gaya.

Poonam: Call karke bol do ki tum thik ho. Wo log pareshan ho rahe honge.

Prem: Par bolu kya? Ki kahan tha raat bhar?

Poonam: Mujhe kya pata?

Prem: Arey yaar!

Poonam: Tumhe bhot shaunk tha na drink karke mera ghar dekhne ka, ab tum hi socho kya bolna hai.

Prem ghar par phone karta hai. Uski bhabhi call uthati hain.

Prem: Hello!

Suman (Prem’s bhabhi): Kahan ho tum?

Prem: Wo main Poonam….. (Prem bolte bolte ruk jata hai.)

Suman: Tum Poonam ke sath the?

Prem apne sir par hath marta hai. Poonam bhi use ghurti hai ki usne uska naam kyun le lia.

Prem: (Baat sambhalte hue) Nahi! Matlab abhi main Poonam ke sath hu. Wo mera chota sa accident ho gaya tha.

Suman: Kyaa? Accident? Tum thik ho? Main tumhare bhaiya ko call karti hu.

Prem: Arey! Nahi! Bhabhi, main thik hu. Chota sa hi accident tha.

Suman: Accident kaise hua?

Prem: Woo.. Main aapko ghar phoch kar bataunga. Poonam ka ghar paas me tha islie maine use bula lia tha, to wo mujhe apne ghar le gayi.

Suman: Raat ko hua tha accident?

Prem: Nahi bhabhi! Aaj subah.

Suman: To raat me kahan the? Jhuth mat bolna raat me tumhare bhaiya sab jagah gaye the jahan tum ho sakte ho. Tum kahin nahi mile.

Prem soch me pad jata hai ki ab kya bole.

Suman: Kuch bologe?

Prem: Bhabhi! Main ghar aake batata hu sab. Aap Papa aur bhaiya ko phone karke bata do, ki main thik hu meri chinta na kare.

Suman: Thik hai.

Prem phone kaat deta hai. Poonam Prem ko dekh rahi hai.

Prem: Kya hua? Aise kyun dekh rahi ho?

Poonam: Ghar ja kar kya bologe?

Prem: (Sochte hue) Pata nahi… abhi to kuch socha nahi. Koi na koi bahana banana padega aur kya?

Poonam: Kya bahana?

Prem: Nahi pata. Agar tum maaf kar deti to bata hi deta, tumhare baare me sab.

Poonam: Achaa? Aur wo tumhe kuch nahi kahenge?

Prem: Nahi! Maine bataya tha na mere ghar me sab ache hain.

Poonam: Haann! Wo to tumne apne chacha ji ke lie bhi kaha tha. Wo nikale nahi.

Prem: Hmmm! Wo bhi hai.

Poonam: To soch ke rakhna aur kya bataoge fir mujhe bhi batana.

Prem: Wo sab to thik hai. Par kya iska matlab me ye samjhu ki tumne mujhe maaf kar diya?

Itne me Ananya wahan aa jati hai.

Prem apne mann me sochta hai, “Iski behen hamesha galat time par hi aati hai.”

Ananya: Juice pi lia? Ab story continue kare?

Prem: Han!

Poonam Prem se juice ka glass leti hai aur bahar chali jati hai. Prem chahta hai ki Poonam ko wahin apne paas rok le lekin kuch bol nahi pata.

Prem aage story continue karta hai.

Previous days…………

Us din jab dono ne bina kahe apne jazbaat zahir kar die the, uske baad se to sab jaise acha hi acha ho raha tha unke sath. School sath jana, sath me class me baithna aur fir teachers ke samne khule aam romance karna. Wo ye bhi kar sakte the, play ke through. Hero heroine jo the play ke. Har roz dono ke beech koi na koi scene hona hota tha, jo wo bade aaram se kar lete the kyunki feelings real hi thi. Lekin kehte hain na raat ke baad din aur din ke baad raat hoti hai. Yahi hua unke sath bhi, jab play me entry hui Prem ke cousin Sameer ki. Use Michael Cassio ka role karna tha jo play me Desdemona yani Poonam ke bhot close tha aur usi wajah se Othello yani Prem ko apni wife Desdemona par use dhokha dene ka shaq hota hai. Jaise hi Sameer Poonam ke paas jata, Prem ko gussa aane lagta. Lekin wo kar bhi kya sakta tha, ye sab play me ho raha tha. Par Sameer Prem ko hamesha show karta tha ki use Poonam ke sath reh kar, play me uska hath pakad kar kitna acha feel ho raha hai. Prem ye sab baatein sun kar aagbabula ho jata tha par kuch kar nahi sakta tha. Par ek din aisa hua ki Prem apna gussa rok nahi paya.

Recess me abhi do periods baki the. Poonam aur Prem dono hi dhayan se period attend kar rahe the. Period over hua, aur period over hote hi Sameer Poonam ke paas uski seat par phocha aur usse uska pen maang lia, ye bahana bana kar ki uska pen khatam ho gaya hai aur uske paas koi dusra pen nahi hai. Poonam ne bhi chupchap use apna pe de dia. Aakhir pen hi to tha, itna to wo kar hi sakti thi. Prem Sameer ko ghur raha tha aur Sameer Prem ko dekh kar muskurate hue apni seat par baith gaya. Ye period bhi over hua aur recess ho gaya.

Recess me Poonam upar class me aksar ladkiyon ke sath lunch karti thi aur Prem apne baki doston ke sath niche ground me. Sabhi ladkiyan class me lunch kar hi rahi thi ki Manav ghabraya hua class me aaya aur Poonam ko awaz lagayi.

Manav: Poonam! Poonam! Wo Prem…

Poonam: (hairani me) Kya hua?

Poonam Manav ke paas jati hai. Manav use aage ki baat batata hai.

Manav: Yaar Sameer aur Prem ki ladayi ho gayi hai. Prem ne Sameer ka sir phod dia hai. Sameer ne bhi Prem ko palat kar mara. Dono ko hi lag gayi hai aur principal sir ne un dono ko apne office me bulaya hai.

Poonam: Kyaa? Par ye sab hua kyun?

Manav: Tumhari wajah se….

Poonam darr jati hai. Use Prem ki chinta to hai, par use ye bhi darr hai ki agar principal sir ke samne Sameer ne uska naam le lia to kya hoga? Uske ghar tak baat phochi to tai ji to uska jeena mushkil kar dengi. Yehi sab sochte hue wo Principal office ke lie bhagti hai. Uske piche Disha, Nupur aur Manav bhi aa rahe hain. Wo Principal office ke bahar wait karne lagte hain.

Prem aur Sameer bahar nikalte hain. Poonam bhag kar Prem ke paas aati hai.

Poonam: Ye sab kya hai Prem? Usse ladne ki kya zarurat thi?

Prem: Mujhe tumse baat karni hai, chalo mere sath.

Prem Poonam ko le kar wahin chala jata hai jahan askar koi nahi hota. Jab bhi unhe akele me baat karni hoti hai to wo dono wahin jate hain.

Poonam: Ye sab kya tha?

Prem: Tum usse bilkul baat nahi karogi.

Poonam: Pehle mujhe batao ki hua kya?

Prem: Tumhe jo bol raha hu wo suno. Tum usse bilkul baat nahi karogi aur use koi chiz nahi dogi. Saaf mana kar dogi.

Poonam: Premm! Aisa hua kya ki tumne usse ladayi kar li.

Prem: Mujhe nahi batana.

Poonam: Kyun nahi batana?

Prem: Tumhe mujh par trust hai?

Poonam: Mujhe reason janna hai.

Prem: Tumhe trust hai ya nahi?

Poonam: Hai.

Prem: To bas. Ye sab mat pucho aur jo bol raha hu wo suno. Agar wo tumhare paas aata hai to tum usse nahi bologi.

Poonam: Thik hai. Nahi bolungi. Par tum mujhe bataoge ki hua kya tha?

Prem: Nahi!

Poonam: Main kyun nahi jaan sakti?

Prem: Kyunki ye tumhare baare me nahi hai.

Poonam: Manav ne mujhe bata dia hai ki ladayi meri wajah se hi hui thi. Aur mere bare me nahi hai to mujhe kyun rok rahe ho usse baat karne ke lie?

Prem: Han! Tumhare baare me hi hai. Par tum isse dur raho to acha hai. Tum usse baat hi nahi karogi to kuch hoga hi nahi.

Poonam: Thik hai.

Prem: Tum jao. Main recess ke baad milta hu class me.

Poonam: Okay!

Poonam wahan se chali jati hai.

Prem aur Sameer ke beech kya hua ye Prem ne Poonam ko nahi bataya. Poonam is soch me hai ki aisi kya baat hui hogi ki Prem ne Sameer par hath utha dia. Yahi sochte hue wo class me chali jati hai. Poonam ke jane ke baad Manav Prem ke paas aata hai aur kehta hai, “Ye sab kya hai?”

Prem: Kya?

Manav: Tere aur Poonam ke beech?

Prem: (ignore karte hue) Kuch nahi.

Manav: Tujhe kya lagta hai? Hume kuch samajh nahi aata?

Prem: Tu soch agar Sameer Disha ke baare me wo sab bolta to tu kya karta?

Manav: Same… Main bhi uska muh tod deta. Matlab… Tere aur Poonam ke beech bhi same relation hai?

Prem: Wo meri achi dost hai.

Manav: Tujhe pata hai na, dhuaan wahin par uthta hai jahan aag lagi hui ho.

Prem: Aur tujhe pata hai na, ki usi aag me main tujhe jalne ke lie fenk sakta hu.

Manav: Mat bata. Ek na ek din to bataega hi…

Prem: (muskurate hue) Maine tere aur Disha ke baare me kuch pucha tha kya? Jab tumne bataya tabhi bola tha na.

Manav: (Prem ko dekh kar, muskurate hue) Matlab main bhi baad me hi bolu, jab tum dono declare kar do?

Prem: Abey! Maaf karde bhai. Bola na aisa kuch nahi hai.

Manav: Han! Han! Han!

Prem muskurata hai. Manav Prem ko dekh kar muskurata hai aur fir dono hasne lagte hain.

Prem: (Manav ko dekh kar) Disha se ye sab mat bolna.

Manav: Declare karne ke baad bataunga. Waise problem kya hai declare karne me?

Prem: Yaar chup ho ja.

Manav: Arey! Bata na. Promise kisi ko nahi bataunga.

Prem: Problem kuch nahi hai. Bas main use ye sab bol nahi sakta. Use bhi kahin na kahin pata hai, par shayad wo bhi sunna nahi chahti. To bas sahi time ka wait hai. Jab ye sab chize use aur mujhe dono ko sahi lage.

Manav: Means you both understand the feeling but not able to accept it.

Prem “Han” me gardan hila deta hai.

Manav: Use batane ki jaldi mat karna. Jab sahi time aaye tab hi batana.

Prem: Tu aisa kyun bol raha hai?

Manav: Kyunki humare sath bhi yahi hua tha. Main accept nahi karna chahta tha par Disha was ready to accept the things. Middle class wale logon ke yahan ab bhi bhot se restrictions hote hain. Meri aur uski family same type ki hi hai to main samajh sakta hu. Isilie shayad Poonam abhi is phase me nahi hai, to jaldi mat karna. Agar wo same feel karti hai, so she will stick around, chahe kuch bhi ho jaye. To sahi time par hi use bolna.

Prem: Main teri ye baat yaad rakhunga.

Manav: (muskurate hue) Ab chal nahi to class ke lie late ho jaenge.

Prem: Hmmm!

Manav Prem ke gale me hath dalta hai aur dono class ki taraf badh jate hain.

Manav ne sahi kaha tha. Twenty first century shuru ho chuki thi, par ab bhi middle class ke log itne advance nahi hue the. Poonam apni family ko lekar chalne walon me se thi, aur isilie shayad wo ye sab accept karna nahi chahti thi. Isse aage Sameer ne kuch kia ya wo Prem ki maar se sudhar gaya? Ye dekhne ke lie aage ka episode zarur padhiyega. Tab tak, swasth rahe, mast rahe, ek dusre ka sath de, zindagi ka maza lete rahe, aur hamesha ki tarah……..

Keep Feeling the Love……… ❤

One thought on “HUMSAFARS… (E-13)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s