HUMSAFARS… (E-12)

Episode-12

Recap: Prem Ananya ko school ke dino ke baare me bata raha hai. Wo bata raha hai ki kis tarah se wo aur Poonam kareeb aaye the. Wo use apne annual function ke baare me batata hai jab Prem aur Poonam ek play me lead roles me the. Aur Prem ka cousin Sameer bhi us play me tha, jise Prem bilkul pasand nahi karta tha. Isse aage janne ke lie ye episode padhe......

Agle din teacher sabko play ki rehearsal ke lie bulate hain. Sabhi log time par phoch jate hain. Jahan wo is play ki rehearsal karte hain wo ek hall hai. Us hall me teen taraf benches rakhi hui hain jahan log baith sakte hain aur ek taraf chota sa podium yani stage hai. Jise scene karna hota use teacher podium par bulate hain aur baki log wahan apni lines yaad karte hain. Ab jab play me bhi main hero heroine wo hi hain to un dono ka hi pehla scene hai. Dono ko teachers batate hain ki kis tarah unhe apna scene karna hai. Wo dono teachers ki baaton ko dhayan se sun rahe hain aur scene act karne lagte hain. Is scene me Othello Desdemona ko apni ladayi ke kisse suna raha hai aur Desdemona unhe pyar se sun rahi hai. Ye scene waise to normal hai par humare hero aur heroine waise hi ek dusre ko pasand karte hain to ye scene karna unke lie aur bhi aasan tha. Thodi si dikkat ke baad hi wo dono is scene ko kar lete hain. Teachers bhi dono se khush hote hain. Poonam aur Prem ko teachers aaj ke lie free kar dete hain aur next day ke lie apne scenes ki lines yaad karne ke lie kehte hain. Dono us room se bahar nikal rahe hain. Tabhi unhe ek ladka rokta hai, “Hello! Poonam… Prem…”

Dono ruk jate hain aur Prem use bolta hai, “Hi! Kya hua? Koi kaam hai?”

Wo ladka kehta hai, “Main Nitin hu. B-section se hu, tumne mujhe dekha hoga.”

Prem: Han! Dekha hai. Bolo kya baat hai?

Nitin: Actually! Aaj mera birthday hai.

Prem: Ohh! We didn’t know. Happy Birthday!

Poonam: Happy Birthday!

Nitin: Thanks! Par kya hai na ab hum is play me sath hai to dost bhi ban jaenge. So, main aaj school ke baad sham ko apne sabhi friends aur is play ke members ko apne birthday ke lie invite kar raha hu. Please! Tum dono bhi aana.

Prem: Arey! Par hum kaise aa sakte hain? Tumhare next birthday par hum zarur aaenge par abhi nahi.

Nitin: Dekho yaar! Mana mat karna. Sab maan gaye hain. Jab tum dono scene kar rahe the maine sabse baat kar li thi. Bas ab tum dono hi reh gaye ho.

Prem: Okay! Agar sab maan gaye hain, to fir hum bhi aaenge.

Nitin: Pakka na?

Prem: Han Pakka!

Nitin: Thik hai! Milte hain fir.

Prem: Okay!

Prem aur Poonam room se bahar aa jate hain.

Poonam: Prem! Main iske birthday par nahi ja sakti.

Prem: Mujhe pata hai, ek baar try karna agar ghar par koi na maane to mat aana. Tum Disha ko phone karke bata dena, wo mujhe bata degi.

Aap soch rahe honge Prem ne aisa kyun kaha? Kyunki Poonam ke Mom Dad ko to in chizon se koi pareshani nahi thi. Par Poonam ke tai ji aur tau ji thode dakyanusi kism ke log hain. Islie wo Poonam aur Ananya ki har baat par nazar rakhte the aur agar unse zara si bhi chook ho jaye to unhe sunane ka koi mauka nahi chhodte the. Prem ko Poonam apne ghar ke sare halaat pehle hi bata chuki thi. Islie usne Poonam se use phone na karne ki jagah Disha ko phone karne ke lie kaha hua tha, jisse wo Poonam tak apna message bhi phocha sake aur uski tai ji se uski daant bhi na pade. Par shayad aaj Poonam ka din acha tha islie jab wo ghar phochi to wahan na to uski tai ji thi aur na hi uske tau ji, to use us sham bahar jane ki permission aaram se mil gayi thi. Par usne ye nahi bataya tha ki wo yahan bhi Prem ke sath hi jane wali hai. Use ab Prem ke sath har pal bitana acha lagne laga tha aur isilie shayad wo Prem se milne ka koi mauka chhodna nahi chahti thi. Chahe wo kisi anjaan ladke ki birthday party hi kyun na ho.

Sham ko Poonam ready hoti hai. Uski jo choti wo hamesha bandhe rehti hai, aaj na jane kyun use wo choti khol kar jane ka mann hua hai. Aap to samajh hi gaye honge ki aisa kyun hai? Wo tyar hoti hai, aankhon me kajal bhi lagati hai aur hothon par halka sa lip gloss. Bas isse jyada tyar hoti to uske ghar walon ko bhi shaq ho jata ki pata nahi kahan ja rahi hai. Islie wo itna hi savari aur nikal gayi bilkul sahi time par apne ghar ki gali ke bahar, jahan Prem uska 15 minute pehle se intezaar kar raha tha. Poonam samne se aa rahi thi aur jaise ki hona chahiye tha Prem ki nazarein baki sab chizon ko bhul gayi thi. Use na traffic ka shor sunayi de raha tha na baki aate jate log dikhayi de rahe the. Dikh rahi thi to bas wo…. Poonam! Poonam ne ek blue colour ki jeans aur uske upar maroon colour ki kurti pehni hui thi. Usi ke sath uske gale me tha ek khoobsurat sa stall. Stalls us waqt naye naye hi market me aaye the aur sabhi ko bhot pasand aa rahe the. Par Poonam ko pata nahi tha ki aaj ye stall hi uska lucky charm banega. Poonam aayi aur uski scooty ke piche baith gayi. Prem ne ek baar fir scooty ke rear mirror se Poonam ko dekha aur dono ki nazarein mil gayi. Wo 5 second aise the jaise Prem ne Poonam se sab kuch keh dia ho aur Poonam ne sab sun lia ho. Bas…. Fir kya tha? Prem ne scooty start ki aur chal diya.

Raste me aaj dono ke beech khamoshi hai. Na Prem kuch keh raha hai aur na Poonam kuch bol rahi hai. Par ye khamoshi to kuch zarur keh rahi hai. Wo kya hai? Wo ye dono hi bade ache se samajhte the, par bas accept nahi karna chahte the. Shayad ye unke us bachpan ki masoomiyat thi ya unke beech ek dusre ke lie izzat. Ye jo bhi tha, wo tha bada khoobsurat. Aur…. Dono apni destination par phoch gaye. Jahan wo birthday party thi. Lekin jo bhi khoobsurati bahar thi wo andar jake us party me dono ko nazar nahi aayi.

Jab wo dono andar gaye, to wahan sab the. Unke group ke log bhi the. Par wahan jo ho raha tha wo tab to acha nahi mana jata tha, aaj ke baare me kuch kaha nahi ja sakta. Kyunki aaj ke lie shayad ye chize normal ho par tab in sab chizon ko acha nahi mante the, wo bhi itni choti umr me. Wo thi sharab! Jab wo dono Nitin ke ghar par phoche to usne party me drinks ka arrangement bhi kiya hua tha.

Maine bataya tha na ki jis school me wo padhte the wahan ameer logon ke bacche padha karte the. Kuch ache the par kuch bacche ameeri ki wajah se hath se nikal bhi gaye the. Jab ye sab Poonam ne dekha, to use bilkul acha nahi laga, mano jaise wahan uska dum ghut raha ho. Poonam ke ghar ka mahaul to bilkul hi alag tha. Aur use to pyar karne ki age se bhi problem thi to wo ye sab kaise bardaasht karti?

Usne turant Prem se kaha, “Prem! Mujhe nahi rehna yahan. Yahan se chalo.”

Prem: Poonam! Hum abhi to aaye hain aur dekho Nupur, Disha aur Manav bhi hain yahan.

Poonam aur Prem un teeno ke paas jate hain. Manav Prem se kehta hai, “Yaar! Mujhe nahi pata tha ye aisi party hai.”

Prem: Han! Pata to hum me se kisi ko bhi nahi tha. Par ab kya kare? Aa gaye hain to aise jana bhi sahi nahi hai.

Disha: Par yahan acha bhi nahi lag raha. Dekho na, ye sab hi drink kar rahe hain. Abhi Nitin ne hume dekha bhi nahi hai, nikal lete hain.

Poonam: Han! Chalte hain yahan se.

Nupur: Tum dono ko rehna hai to raho. Hum ja rahe hain.

Teeno ye keh kar wahan se bahar nikal jati hain.

Manav: Chal bhai! Mere naseeb me hi nahi hai daru peena. Socha tha aaj thoda se taste to kar hi lunga. Par Disha chali gayi hai, ab to jana hi padega.

Prem: Han! Disha ko batata hu jake. Wo tere sare shaunk pure kar degi.

Manav: Arey yaar! Marwaega kya? Majak kar raha tha. Chal chalte hain.

Prem: Chal!

Aur wo dono bhi party se bahar nikal aate hain. Ab pura group sath hai. To kya kare? Wo log fir se ek movie ka plan banate hain. Aur is baar ki movie ka naam tha… “Jab We Met.” Ye Apne time ki super hit movie thi. Aaj bhi TV par log ise shaunk se dekhte hain. Wo log jab is movie ko dekhne gaye, to baithe bade tareeke se the. Sabse pehle centre corner par baitha Manav, uske sath baithi Disha, uske baad baithi Nupur, fir Poonam aur Poonam ke barabar me Prem.

Lekin ye movie na to shayad kabhi Prem bhul paya aur na Poonam. Shayad nahi…. Yakeenan. Hehe! Us din hua bhi kuch aisa hi tha. October ke din the, tab thodi bhot thand October mahine se hi padne lagti thi. Hall ke AC ki wajah se Poonam ko thand lagne lagi aur usne wo stall odh lia. Han! Ye wahi stall hai jo maine kaha tha uska lucky charm banega. Poonam ne stall odh lia. Par Prem ke barabar me baithe hone ki wajah se wo stall uske hath par bhi aa gaya. Aur achanak Poonam ka hath bhi Prem ke hath se takraya. Poonam ne turant hath hata to lia Par use pata tha ki Prem ka hath wahin hai aur Prem bhi sab hote hue mehsoos kar raha tha. Wo bhi janta tha ki Poonam ka hath wahin usi armrest (handle) par hai. Prem ne apna hath halka sa aage badhaya aur un dono ki sab choti ungaliyan takarayi. Prem ne hath wahin rok lia. Aur fir Poonam ne apna hath zara sa aage badhaya. Ab Poonam ki choti ungali Prem ki choti ungali par thi. Prem ne thoda aur hath badhaya aur Prem ki sari hath ki ungaliyan aur Poonam ke hath ki ungaliyon par thi. Poonam ne apna hath palta aur dono ne ek dusre ke hath ko tham lia. Dono ke hathon ki ungaliyan ek dusre ki ungaliyon me thi. Dono ke hath stall ke andar the islie kisi ko kuch nahi dikh raha tha. Ek baar jo dono ne hath pakada to chhoda hi nahi. Poonam ki thand ab pasine me badal chuki thi. Par na to wo aur na hi Prem, dono hi ek dusre ka hath chhodna chahte the. Aur pure waqt wo dono aise hi rahe, jab tak interval nahi ho gaya. Itni achi movie thi… Par unhe nahi pata tha ki interval se pehle movie me hua kya hai. Interval ke baad jab Manav aur Prem dono kuch khane ke lie leke aate hain. Prem Poonam ko bhi deta hai, par dono nazarein nahi milate. Movie fir se shuru hoti hai aur Prem is baar bina dare, stall ke andar se hi Poonam ka hath pakad leta hai. Dono mann hi mann bhot khush hain. Wo jante hain ki wo dono ek dusre ke baare me kya mehsoos karte hain. Movie khatam hoti hai aur sab bahar nikalte hain.

Nupur: Mast movie thi yaar! Maza aa gaya.

Disha: Han! Main to ek baar fir dekhungi.

Manav: Hum dono chalenge dobara.

Poonam aur Prem dono hi un teeno ke piche ek sath chal rahe hain. Dono ke chehron par dheemi se muskurahat hai aur wo bina kuch bole chal rahe hain bas. Shayad aaj unke chup rehne ka din hai. Par ye wo aaj hi jaan paye hain ki bina bole bhi kafi sari baatein ho sakti hain.

Ab sab log kuch khane jate hain. Wahan bhi dono chup hain. Isilie Nupur bolti hai, “Tum dono ki bolti kyun band hai aaj? Jab se aaye ho kuch bol hi nahi rahe.”

Prem janta hai ki chahe unke mann me ek dusre ke lie kuch bhi ho par abhi doston ke beech is baare me shaq paida ho ye sahi nahi hai. Islie wo kehta hai, “Mujhe to Manav ne chup rehne ke lie bola tha.”

Nupur: Kyun?

Prem: Kyunki Manav ko daru peeni thi.

Disha: Kya?

Manav: (Prem ko ghurte hue) Kya bol raha hai Prem? Wo main mazak me bol raha tha.

Disha: (Manav se) Sochna bhi mat.

Manav: Disha! Ek baar try to karunga.

Disha: Bilkul nahi! Kya zarurat hai?

Manav: Ek baar?

Disha: Nahi!

Manav: Dishu pleasssee!

Nupur: Awww! Dishuuuu!

Disha: (Disha se) Shut up! Tu apna pizza kha.

Prem aur Poonam ab bhi chup hain aur un teeno ko dekh rahe hain.

Khana khatam hota hai aur sab apne apne gharon ke lie nikalte hain. Poonam fir Prem ki scooty par baithati hai aur Prem scooty start kar deta hai. Dono ab bhi chup hi hain aur kuch dur aa chuke hain. Aur fir achanak ek puppy scooty ke samne aa jata hai. Prem ek sath breaks lagata hai aur Poonam ka hath Prem ke kandhe par chala jata hai. Wo uske kandhe ko kas ke pakad leti hai, par fir chhod bhi deti hai. Is par Prem kehta hai, “Hath rakh sakti ho.”

Poonam: (Kuch ruk kar) Nahi! Aise hi thik hai.

Dono ke beech fir khamoshi aa jati hai. Par kuch der baad Poonam Prem se kehti hai, “Suno!”

Prem: Bolo!

Poonam: Tum kabhi drink to nahi karoge na?

Prem: Tumhe nahi pasand na.

Poonam: Nahi!

Prem: To bas…. Nahi karunga.

Poonam: Promise?

Prem: Agar ki to tum meri dande se maar lagana.

Poonam: Achhaa!

Prem: Han! Aur main uthak-baithak karunga.

Poonam: Fir to tum hamesha drink kar ke yahi kia karoge.

Prem: Nahi karunga.

Poonam: Pakka?

Prem: Han!

Wo dono aur baatein karna chahte hain, par ab jab unhone bolna shuru kia to Poonam ki gali aa gayi aur dono ko alag hona pada. Poonam scooty se utar jati hai. Dono muskura to rahe hain par aaj nazarein nahi mila pa rahe. Poonam Prem ko ek nazar dekhti hai aur nazarein hata kar bolti hai, “To main chalti hu.”

Prem Poonam ko dekhte hue bolta hai, “Okay!”

Poonam mud jati hai aur apni gali ki taraf jane lagti hai. Tabhi Prem Poonam ko awaz lagata hai, “Suno Poonam!”

Poonam palat kar dekhti hai, “Han! Bolo.”

Prem scooty Poonam ke paas lekar jata hai aur kehta hai, “Bas…. Ye batana tha ki….”

Poonam: Ki…??

Prem: (muskurate hue) Tumhare hath bhot soft hain.

Ye kehte hi Prem bina Poonam ko dekhe scooty start karke chala jata hai. Poonam Prem ko jate hue dekhti hai aur muskurati hai. Uski muskurahat me aaj thodi si sharam bhi ghuli hui hai.

Kaisa laga aapko is tarah unke pyar ka iqrar? Jo iqrar tha bhi aur nahi bhi, kyunki kuch kaha to gaya hi nahi, bas aankhon hi aankhon me baatein ho gayi. Wo saal to 2007 tha par Poonam aur Prem dono hi shayad unneesvin sadi se the jo is tarah se pyar ka iqrar kia. Lekin jo bhi tha bhot khoobsurat tha. Ye shayad unka lucky day tha, aaj un dono ke beech koi bhi aa nahi paya. Ye pura din hi unke lie tha.

Present Day……..

Ye sab sochte hue aapko kya lagta hai Poonam kya soch rahi hogi? Kuch nahi bas kitchen me baithi baithi muskura rahi thi aur Prem jo unke ghar par unke room me leta hua tha, uske lie juice bana rahi thi. Yaad hai na? Usne apna hath kaat lia tha aur sir par bhi chot aayi thi.

Poonam Ananya ko awaz lagati hai. Ananya room se uth kar uske paas kitchen me aati hai aur aate hi uske gale lag jati hai.

Poonam: Arrreeyy! Kya hua?

Ananya: Yaaarrr! Tumhari love story kitni achi hai.

Poonam: (muskurate hue) Paagal!

Ananya: Arey! Pagal mat bol mujhe.

Poonam: Aisa kya bata dia tujhe Prem ne jo tu itna kood rahi hai?

Ananya: Yahi ki… Tu aur wo ek ladke ki birthday party me gaye the aur wo log drinks ki wajah se wahan se nikal aaye the aur fir tum log movie dekhne gaye the?

Poonam sochti hai Prem bhot pagal hai jo usne ise movie ki baat bata di hai. Wo hichkichate hue puchti hai, “Aur kya bataya?”

Ananya: Yahi ki tumne movie se wapas aate waqt usse drink karne ke lie mana kia tha aur usne bola tha ki agar ki to tum uski pitayi karna.

Ye sun kar Poonam rahat ki saans leti hai ki Prem ne use movie me jo hua wo nahi bataya.

Ananya: Aur tune use mara bhi tha kal.

Poonam: (muskurate hue) To Marungi nahi kya? Galati karega to pitega bhi.

Ananya: Tujhe ab bhi lagta hai uski galati itni badi hai?

Poonam Ananya ki is baat par chup ho jati hai aur sochne lagti hai.

Ananya: Di! Maaf kar de na use.

Poonam: Pehle tu use ye juice de kar aa.

Ananya: Main kahin nahi ja rahi, tune banaya hai na. To tu ja.

Poonam: Anuu!

Ananya: Ja na!

Poonam kitchen se nikal kar Prem ke paas jati hai.

Poonam ke dil me Prem ke lie narmi to hai, nahi to wo Prem ke lie juice kyun banati. Par jaise wo pehle accept nahi karna chahti thi, wo ab bhi accept nahi karna chahti. Ab ye sab wo kaise accept karegi ye aage hi pata chalega. Jise janne ke lie please agla episode zarur padhiyega. Tab tak, haste rahiye, muskurate rahiye, zindagi ka maza lete rahiye. Badon ka aadar kare choton se pyar kare aur humare episode ka intezaar kare. Aur han!

Keep Feeling the Love……. ❤

One thought on “HUMSAFARS… (E-12)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s