HUMSAFARS… (E-11)

Episode-11

Recap: Prem Poonam ke ghar par hai. Poonam Prem se naraz hai, Ananya Prem ki help karne ki koshish karti hai aur Prem ko ghar se jane nahi deti. Prem kitchen me Poonam ki help karne ki koshish karta hai jiski wajah se uska hath kat jata hai. Bhot jayda khoon dekh kar Prem behosh ho jata hai aur uske sir me bhi lag jati hai. Poonam use apne room me le jati hai. Isse aage janne ke lie ye episode padhe..........

Poonam Prem ko lekar room me jati hai aur Prem ko razai odha kar leta deti hai. Prem Poonam ko dekh kar smile karta hai.

Poonam: Tum ye sab kyun karte ho?

Prem: Kya?

Poonam: Herogiri! Normal nahi reh sakte?

Prem: Main normal hi hu.

Poonam: Achaaa! Ab mujhse faltu mat bolo. Mujhe pata hai tum kab Herogiri dikhate ho aur kab normal rehte ho.

Prem Poonam ki ye baat sunkar dhire se muskurata hai.

Poonam: Kyaa? Muskurao mat tum. Chupchap let jao.

Prem: Hmmm.

Prem let jata hai. Poonam use razai odha deti hai. Prem Poonam ko dekh kar kehta hai, “I am sorry Poonam.”

Poonam: For what?

Prem: For whatever I have done. Meri problems thi, par ye bhi sach hai ki us waqt main pagal sa ho gaya tha. Ek sath sab kuch change ho gaya tha life me, aur ek ke baad ek incidents. Mujhe kuch samajh hi nahi aa raha tha ki kaise react karu. Pehle hume ghar se nikal dia. Dhire dhire jab hum stand hone lage aur main college chala gaya. Us time I tried to be in contact with all of you through phone. Par contact nahi kar paya. Fir Mom chali gayi. Mujhe to yakeen hi nahi hua tha ki ye bhi ho sakta tha meri life me. It’s like main ye soche hue tha ki meri Mom ko kabhi kuch nahi hoga. Par jab mujhe pata chala to aisa laga ki shayad main kisi sapne me tha. Mom ke jane ke baad suddenly sab change ho gaya meri life me. Main kuch feel hi nahi kar pata tha. Jaise mere andar koi emotions hi nahi bache the. Unke jane ke baad main sab bhul hi gaya tha. Bas jee raha tha, par kis lie pata nahi. Tumhe to pata hai na ki wo mere lie kya thi.

Poonam: (dhyan se Prem ki baatein sunte hue) Hmmm!

Prem: I am really sorry for what I did but sach me main shayad kahin kho gaya tha is beech. Aur fir….. fir Dad ne decide kia ki hum sab wapas Delhi jaenge. Aur mano mujhe sab yaad aa gaya. Apna school, apne dost, tum….. mujhe pata hai Poonam, ye jo bhi kuch main bol raha hu, ye sab tumhare lie shayad bekar hai. Par sach yahi hai. Jab main wapas aaya to maine sabko dhundne ki koshish ki. Par sach bolu to mann me darr tha. Yahi darr ki sab mujhse kaise baat karenge. Kya wo meri baat samajh bhi paenge ya nahi? Islie bas har kisi ke ghar ek baar gaya aur wapas aa gaya ye soch kar ki shayad yahi meri kismat me hai. Par agar wahi kismat me hota to mujhe us din tum na milti. Aur mere andar himmat na hoti ki main tumhara saamna bhi kar pau.

Poonam Prem ki sari baate bina koi sawal kie sunti hai.

Prem: Poonam!

Poonam: Hmmm!

Prem: Kuch bologi nahi?

Poonam kuch keh pati isse pehle hi Ananya nashta le kar room me aa jati hai.

Ananya: Ye lijiye garma garam nashta.

Ananya room me aa kar dono ko dekhti hai aur kehti hai, “Sorry! Should I go for some more time?”

Poonam: Nahi! Waise hi bhot der ho gayi hai. Ab nashta karte hain.

Ananya dono ko nashte ki plates deti hai aur khud bhi wahin baith jati hai. Ananya dekhti hai ki dono bhot serious baithe hue hain. To wo dono ke mood ko light karne ke lie kehti hai, “Prem! Aapse ek baat puchu?”

Prem: Han! Pucho na.

Ananya: Aap aur didi me se pehle who fall?

Prem: Who fall?

Ananya: Yeah! I mean, who fall in love first?

Poonam Ananya ki ye baat sunte hi use warn karti hai, “Ananya!”

Ananya: Chill na di. Ab tak tumse tumhare side ki story sunti aayi hu, aaj mujhe Prem ke muh se sunni hai. (Prem ke bed par baithate hue) Waise di na, aapse bhot darti thi jab wo school me thi.

Prem: Aur aaj dekho, main tumhari di se darta hu.

Ananya aur Prem dono is baat par haste hain aur taali marte hain. Prem Poonam ke serious expressions ko dekhta hai aur serious tone me kehta hai, “I am sorry. Par sach me mujhe ab tumse bhot darr lagta hai.”

Poonam: Lagna bhi chahiye.

Prem muskurata hai.

Ananya: Okay! Stop arguing. Mujhe batao dono me se kon tha jise pehle pyar hua?

Prem: Pehle aur baad ka mujhe pata nahi. Par itna pata hai ki mujhe Poonam ke sath ek hi seat par baithna hota tha aur mujhe bhot gussa aata tha jab koi hum dono ko seat se alag karne ki koshish karta tha.

Poonam us waqt ko yaad karti hai aur uske chehre par ek halki muskurahat ubhar aati hai. Prem to batate hue muskura hi raha hai aur Ananya Prem ki kahi hui baaton ko itminaan se sunna chahti hai. Ananya ko bhi pyar hua hai, is umr me kise nahi hota. Par aisa pyar usne pehli baar dekha tha, jo dus saal ek dusre se dur hone ke baad bhi waisa hi tha. Dono ek dusre se alag the, par ek dusre ke sath bhi the, kyunki wo chahe apni zindagi me kuch bhi kar rahe ho, chahe koi kisi se naraz ho ya koi kisi ko apni zindagi ki kashmakash ki wajah se mil na paya ho…. lekin…. Lekin pyar dono taraf se tha aur hai. Intezaar bhi dono taraf se tha aur hai bhi. Fir chahe Poonam kuch bhi bol rahi ho, chahe wo kitna hi gussa dikha rahi ho, intezaar use bhi tha. Aur isi pyar ke baare me Ananya janna chahti hai ki ye pyar shuru kaise hua?

Ananya: Aage batao.

Prem: (muskurate hue) Kya batau? Bas yahi tha ki mujhe Poonam ke sath rehna itna pasand aane laga tha ki sab log bolne lage the. Par mujhe isse koi fark nahi pad raha tha.

Ananya: Di ko pada tha?

Prem: Han! Shuru me… Par dhire dhire meri company ka asar hone laga tha use bhi. Dhire dhire usne bhi sochna band kar dia tha.

Ananya: I know is par asar kyun pad raha hoga?

Prem: Kyun?

Ananya: Tai ji!

Prem: Haannn! Maine bhi Poonam se yahi sawal pucha tha us waqt. Par main reason pata hai kya tha?

Ananya: Kya?

Prem: Her age.

Poonam ab uth kar room se bahar jane lagti hai.

Ananya: Arey yaar baitho na.

Poonam: Mujhe nahi sunna ye sab. Tu sun le, tujhe ye sab acha lag raha hoga.

Poonam Ananya se ye sab keh kar room se bahar nikal jati hai aur kitchen me chali jati hai. Par jaisa ki usne Ananya se kaha tha ki use nahi sunna ye sab, wo sab jhuth tha. Sach ye tha ki wo Prem aur Ananya ke samne wo sab chize sochke muskurana nahi chahti thi. Aur isilie hi wo kitchen me jakar wo sab yaad karti hai. Kyunki chahe is sab ke baad Prem use chhod kar chala gaya ho, par wo uski zindagi ki sabse khoobsurat yaadein hain.

Wo yaad karti hai wo pal jab pehli baar Prem ne uska hath pakda tha aur wo use jane nahi dena chahta tha. Ye wahi pal tha jab Prem ne kaha tha ki use bas Poonam ke paas rehna hai. Usi pal ko yaad karte hue wo purane dino me kho jati hai……

Old days……..

Prem: Ab tum chahe daanto ya maaro par main tumhe kahin jane nahi dunga.

Poonam: Tum ye sab aise kaise bol dete ho?

Prem: Kyun? Kya problem hai isme? Kya ek dost dusre dost ko rukne ke lie nahi bol sakta?

Poonam: To ye dosti ki wajah se hai?

Prem: Mujhe nahi pata iski wajah. Wajah janni main zaruri nahi samjhta. Main bas itna janta hu ki mujhe tumhare sath rehna hai hamesha.

Poonam: Par kyun?

Prem: Tumhe jawab janna zaruri hai?

Poonam: Han!

Prem: Tumhe mere sath rehna pasand nahi?

Poonam: Pasand hai.

Prem: To problem kya hai?

Poonam: Hume dusron ke sath bhi rehna chahiye. Hum dono apne me hi rahe ye sahi nahi hai.

Prem: Kyun sahi nahi hai? Kya Disha aur Manav puchte hain jab wo akele rehna chahte hain?

Poonam: Preemm!

Prem: Mera naam lene se kuch nahi hoga. You know ki is tarah tum jab bhi mera naam leti ho main maan jata hu par aaj nahi.

Poonam: Ohoo! Tumhe samjhana itna mushkil kyun hai?

Prem: Tumne samjhaya hi nahi hai. Bas mujhe chup karana chahti ho. Bolo jab Disha aur Manav sath reh sakte hain to hum kyun nahi?

Poonam: (ek sath bol kar nazare jhuka leti hai) Kyunki wo couple hain.

Prem kuch seconds ke lie chup ho jata hai, par fir himmat juta kar bolta hai, “Kisi ke sath hone ke lie couple hona zaruri hai kya?”

Poonam Prem ki is baat par chup rehti hai. Prem aage bolta hai, “Agar hai…. agar hai to mujhe wo bhi manzoor hai.”

Poonam jo ab tak nazare jhukaye khadi thi wo Prem ki taraf dekhti hai.

Poonam: Tum pagal ho kya?

Poonam ne pehli baar Prem ko is tarah bola tha. Wo ye bolna nahi chahti thi par Prem ki baat par use kuch aur sujha hi nahi.

Prem: Kyun?

Poonam: Kya age hai humari?

Prem: Arey yaar! Ab isme age kahan se aa gayi?

Poonam: Main ja rahi hu.

Prem Poonam ka hath pakad leta hai aur kehta hai, “Please! Bas mere sawal ka jawab dedo.”

Poonam: Prem! Main is baare me soch bhi nahi sakti.

Prem: Kyun?

Poonam: Kyunki main sochna nahi chahti. Sirf islie ki tum mere sath akele me time spend karna chah rahe ho, hum ek dusre ko Disha aur Manav ki tarah couple announce kar de?

Prem: Areeyyy….

Poonam: Shut up! Abhi meri baat khatam nahi hui hai. Ek to mujhe ye reason ajeeb lagta hai, aur koi valid reason bhi ho to bhi, it’s not the age to do all these kind of stuff. We should be more focused on our studies and careers.

Prem: To tum kuch same feel nahi karti jo main karta hu?

Ab kaise kahe Poonam isilie to wo Prem se lad rahi thi, kyunki wo Prem se dur rehna chahti thi. Jitna wo Prem ke kareeb rehti, utna hi wo uski taraf khich rahi thi, aur yahi wo bilkul nahi chahti thi. Use apne ghar walon ki seekh bakhoobi yaad thi. Aur wo seekh ye thi, ‘Sahi kaam sahi waqt par hi karna chahiye, nahi to zindagi me uthal puthal ho jati hai.’ Jo kahin na kahin uski zindagi me sahi saabit hui. Par abhi to Poonam ko Prem ki baat ka jawab dena tha aur uske paas koi jawab nahi tha.

Prem: Chup kyun ho? Answer me.

Poonam: I don’t have any answer.

Prem: Tum same feel karti ho ya nahi?

Poonam: Mujhe nahi pata. Aur mujhe nahi batana.

Prem Poonam ki is baat ko sun kar muskurata hai.

Prem: Abhi jab khud mere piche padi thi to???

Poonam: Ab main jau?

Prem: Nahi!

Poonam: Kyuunn?

Prem: Kyunki tum meri dost ho, sabse special dost. Jiske sath main har waqt rehna chahta hu. So, please, stay with me. Na main tumse kuch puchunga aur na tum mujhse kuch puchogi. Samjhi? I don’t want to complicate things.

Poonam: Means tum mujhe jane nahi doge?

Prem: (with seriousness) Main tumhe jane nahi dena chahta. (Smiling) Par tum jana chahti ho to ja sakti ho.

Poonam dhire se muskurati hai aur wahin Prem ke sath khadi rehti hai.

Ufff! Kya kare in dono ka? Jo jaan kar bhi chizon se muh pher rahe hain. Par isme Prem ki koi galati nahi hai. Wo to ek baar ishara kar chuka hai, par jab Poonam hi dur jana chahti hai to wo bhi kya kare. Isilie usne Poonam aur apne sath is khaas rishte ko “Special Friendship” ka naam de dia hai. Kyunki “Pyar”, ye naam to shayad wo chah kar bhi nahi de sakta.

Prem aur Poonam ke bare me ab unke dost bhi bolne lage hain. Poonam is baare me hamesha hi pareshan rehti hai, par Prem ko koi fark nahi padta. Wo bas khush hai ki wo Poonam ke sath hai.

Is sab ko aur kuch din beet jate hain. Poonam aur Prem ka group aur unke classmates sab ab ye baatein karne lage hain. Aur ye hi nahi ab to Poonam aur Prem dono hi ek play me ek sath main leads me hain. Jis wajah se dono hi pure school me gossips ki wajah ban chuke hain. Kamaal hai na! Aisa lagta hai shayad bhagwan hi chahte hain ki ye sab ho, kyunki teachers ko kahan pata hai ki Poonam aur Prem ke baare me kya kya baate hoti hain. Lekin fir bhi teachers ne Poonam aur Prem ko ek sath main lead me rakha. Aapko play ka naam bhi bata dete hain. Play ka naam hai- “Othello.” Ji han! Ye wahi play hai jis par “Omkara” naam ki movie bhi ban chuki hai. Shayad yahi wajah hai ki teachers ne bhi yahi play choose kia. Ye Shakespeare ka aisa play hai jisme pyar to hai lekin pyar ke sath shaq, dhokha, be-imaani jaisi chize bhi hain. Ye wahi play hai jisme Othello naam ka ek shakhs Desdemona naam ki ladki se pyar karta hai aur usse shadi bhi karta hai. Par ek chote se shaq ki wajah se wo apni pyari patni ki hatya kar deta hai. Lekin jab use apni patni ki sacchai ka pata chalta hai to wo bebas ho kar khud ki jaan bhi le leta hai.

To is play me ab Prem ko role karna hai Othello ka aur Poonam ka role hai Desdemona. Ye play maano jaise Prem aur Poonam ki life me aaya tha unhe unke pyar ka ehsaas dilane ke lie.

12th class aadhi nikal chuki thi, aur characters ke name selection ke bhi ho chuke the. Waise to ye play is session ke last dino me annual day wale din hona tha, lekin is play ko karwane ka zimma jis teacher par aaya tha. Wo chahte the ki ye play best ho. Aur isilie unhone is play ki tyari October me hi shuru karwadi thi. Lekin school me har koi is story ke baare me janta nahi tha to teachers ne pehle is story ki brief summary bacchon ko di, jisse wo apne apne characters ko ache se samajh paye.

Sabhi bacche room me story sunne ke lie baithe the. Par Prem khush nahi hai. Prem ko bilkul acha nahi lag raha tha wo ek shakhs jo is play me tha. Wo tha “Sameer”. Kuch yaad aaya? Ye Sameer Prem ke chacha ji ka beta hai jise wo bilkul pasand nahi karta. Wo chahta tha ki wo is play me na rahe, par teachers ke aage Prem bhi kuch nahi kar saka.

Teacher story sunna shuru karte hain, “Othello! (Small Pause) Kon tha Othello? Wo Venice city ki army ka General tha. General yani senapati. Wo bhot bahadur tha. Wo Desdemona naam ki ladki se pyar karta tha. Aur un dono ne apne ghar walon ko bina bataye chupke se shadi bhi kar li thi. Othello black tha aur Desdemona white. Sath me Desdemona ke ghar wale uche aur royal log the. Par Othello ek senapati. Isilie Desdemona ke ghar walon ko ye shadi manzoor nahi thi. Aur wo is chiz ko court me le gaye. Court bhi Othello ke khilaf faisla karna chahta tha par tabhi Venice par hamla ho gaya. Aur court ye janta tha ki agar is waqt Othello ko na chhoda gaya to Venice ko koi bacha nahi paega. Islie court dono ki shadi ko maan leti hai. Unki shadi manne ke baad ab Desdemona Othello ke sath rehne lagti hai. Othello ka ek bhot khaas aadmi, “Michael Cassio” jo bhot mazakiya aur bhot achi sense of humour wala tha, use Desdemona se milwata hai. Othello chahta tha ki Desdemona akeli rehti hai to uske sath baat karne ke lie wo uske paas aata raha kare. Othello shuru se hi Michael Cassio se khush tha aur wo use army ka lieutenant yani upsenapati bana deta hai. Ye baat, “Iago” naam ke ek sainik ko pasand nahi aati kyunki wo Cassio se bhot senior tha aur bhot din se koshish kar raha tha ki Othello use upsenapati bana de. Isilie Iago ne Cassio aur Othello ke against plan kia aur Othello ko ye yakeen dila dia ki Cassio aur Desdemona Othello ko dhokha de rahe hain. Iago ke bhadkane par Othello apni patni aur apne wafadaar Michael Cassio par shaq karta hai aur ye samjhne lagta hai ki uski patni aur Cassio ka affair hai. Iske chalte Othello Desdemona ko maar deta hai. Par jaise hi Othello Desdemona ko marta hai waise hi Michael Cassio saboot lekar aata hai jisse Othello ye jaan jata hai ki ye sab Iago ki sazish thi. Par ab kuch nahi ho sakta kyunki wo apni pyari patni jisse wo bhot pyar karta tha use maar deta hai. Aur isi afsos me wo khud ki jaan bhi le leta hai. So, bacchon ye thi kahani… Aap sabhi ko aapke characters pehle hi bata die gaye hain. Ab aap apne apne character par focus kare aur unke baare me janna shuru kare. Aaj bas itna hi, ab kal milenge, isi time par.”

Ye keh kar teacher wahan se chale jate hain, par Prem bhot gusse me hai. Kyunki jo wo nahi chahta tha wahi hua. Sameer ko Michael Cassio ka role mila hai. Prem khud ko roke hue hai par use bhot gussa aa raha hai. Sameer uske samne se muskurate hue nikal jata hai. Poonam Prem ke expressions note karti hai aur kehti hai, “Kya hua?”

Prem: (khud ka gussa chhupate hue) Kuch nahi. Chalo chale.

Poonam: (chalte hue) Par kuch to hua hai. Batao.

Prem: Mujhe gussa aa raha hai.

Poonam: Par kyun?

Prem: Kyun… Michael Cassio ka role Sameer ko mila hai.

Poonam: To kya hua?

Prem: Tumhe pata nahi hai kya? Main use class me to bardaasht kar nahi sakta play me mere dialogues honge uske sath.

Poonam: Wahan wo koi shaitani nahi kar paega. Teacher bhi honge wahan…

Prem: Kuch karega to uska muh tod dunga.

Poonam: Aisa kuch nahi karega wo.

Prem: Poonam tum use nahi janti. Agar usne tumhare sath koi badtameezi ki to wo mujhse bachega nahi.

Poonam: Tum negative kyun soch rahe ho?

Prem: Kyunki tum use nahi janti.

Poonam: Par tumhe to janti hu na. Jab wo kuch kare to sochna abhi se kuch mat socho.

Prem: Thik hai.

Poonam aur Prem class me ja kar baith jate hain. Par Prem pareshan hai. Uski pareshani sahi bhi hai kyunki Sameer ke dimag me kuch to chal raha hai. Wo kya hai ye sab play ke time par hi pata chalega.

Is play ki wajah se kya Poonam aur Prem ki dosti pyar me badal jaegi ya Sameer un dono ke beech deewar ban jaega? Is sab ko janne ke lie aage ka episode zarur padhe. Tab tak…. Muskurate rahiye doston kyunki muskurane ka naam hi zindagi hai. Keep enjoying your life and…..

Keep Feeling the Love……….<3

One thought on “HUMSAFARS… (E-11)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s