HUMSAFARS… (E-8)

Episode-8

Recap: Poonam aur Prem ki dosti ab itni aage phoch chuki hai ki wo dono ek dusre se bhot close ho gaye hain. Un dono ke baare me school me baate hone lagi hain. Poonam ko sab acha nahi lag raha par Prem ko usse koi fark nahi pad raha. Poonam is wajah se Prem ke sath baithna band karna chahti hai lekin Prem use ye karne nahi deta. Wo Poonam ke sath har pal bitana chahta hai. Ye hi sab purani baate sochte hue Prem apni yaadon se bahar nikalta hai aur Poonam ko apne jane ke lie sorry bolta hai. Aage janne ke lie ye episode padhe..........

Us din ke baad Prem Poonam ko fir se pareshan nahi karta aur 2-3 din aise hi beet jate hain. Poonam roz hospital jati hai, par wo hospital me bhi nahi aata. Poonam bhi soch rahi hai ki ab Prem na to call karta hai, na message aur na milne aata hai. Us din wo ghar par jati hai aur ghar jane ke baad bhi Poonam ki Maa usse puchti hai, “Prem se aaj kal koi baat nahi ho rahi?”

Poonam: Nahi! Maine bola hi tha ki wo bas apni bhabhi ki wajah se aa raha hai. Jis din se uski bhabhi discharge hui hai, wo bhi nahi aaya.

Poonam’s Mom: Aur usne koi call ya message bhi nahi kia?

Poonam: Nahi!

Poonam’s Mom: Par mujhe Anu to bata rahi thi ki 2-3 din pehle usne tumhe call kia tha.

Poonam: Han! Kia tha.

Poonam’s Mom: Fir kya hua?

Poonam: Woo… Maine us par gussa kar dia tha.

Poonam’s Mom: Maine mana kia tha na, ki pehle shanti se uski baat sun le.

Poonam: Han! Par main jab bhi usse baat karti hu to mujhe wo sab yaad aa jata hai jo mere sath hua.

Poonam’s Mom: Beta! Wo sab islie hua tha kyunki tumne kisi ko kuch nahi bataya. Aisa kuch tere mann me tha to kisi ko nahi to mujhe to batana chahiye tha na. Kam se kam main teri tai ji se kehne layak to hoti, ki main sab janti hu.

Poonam: Us waqt aapko sab batati to, aap bhi to gussa karti na mujh par.

Poonam’s Mom: To tujhe shabashi deti?

Poonam: Oho Maaa!

Poonam’s Mom: Kyaaa?

Poonam: Ab kya karu? Ye batao.

Poonam’s Mom: Kuch nahi. Bas wait kar, agar wo interested hai to dobara contact karega. Aur is baar gussa mat karna. Pehle uski baat sun lena. Sunti hi nahi hai jo bolti hu.

Poonam: (Lambi saans leti hue) Ufff! Thik hai! Is baar no gussa.

Poonam’s Mom: Hmmm!

Poonam: (muskurate hue) Thank you Maa. Aap mere sath ho na to mujhe koi darr nahi hai.

Poonam’s Mom: Abhi main sath hu, par agar tu is ladke ke baare me sochti hai, to baki sabko bhi manana padega aur tere Papa se bhi baat karni padegi. Yaad hai na pichli baar kya hua tha?

Poonam: Papa ko aap mana hi logi. I know.

Poonam’s Mom: Matlab tu bhi chahti hai ki wo tujhme interested ho.

Poonam: (Atakte hue) Aiiiisa kuch nahi hai.

Poonam’s Mom: (muskurate hue) Han! Mujhe pata hai kaisa hai. Ab ja jake ke kapde badal le.

Poonam: (muskurate hue) Hmmm! Thik hai.

Aur Poonam apne room me chali jati hai.

Aur jaise ki aisa kabhi kabhi hota hai ki hum jiske baare me baat karte hain ya sochte hain wo us din zarur humare samne aa jata hai. Prem Poonam ke samne to nahi aaya, par us raat uska message Poonam ke phone me zarur aa gaya.

Prem ke message bhejte hi wo message seen ho gaya. Prem samajh gaya ki Poonam ne wo message dekh lia hai. Prem dobara ek message bheja, “Poonam! Jagi ho?”

Poonam ne reply kia, “Han!”

Prem fir ek message bhejta hai, “Can I call you?”

Poonam Prem ko reply karti hai, “Abhi nahi. Main bata dungi message karke.”

Prem message karta hai, “Okay!”

Aur thodi der baad Poonam Prem ko message karti hai, “You can call now.”

Prem reply karta hai, “Okay!”

Prem use call kar leta hai. Poonam phone receive karti hai aur bolti hai, “Hello!”

Prem: Hello!

Poonam ab kuch nahi bolti. Prem aage bolta hai, “Thanks! Call receive karne ke lie.”

Poonam: Bolo! Kya baat hai.

Prem: Pehle tumhare aas paas koi tha kya?

Poonam: Han! Anu thi meri behen.

Prem: Tooo… Tumne use ye bola ki tumhe mujhse baat karni hai?

Poonam: Han!

Prem: To wo mere baare me janti hai?

Poonam: Wo kya sab jante hain.

Prem: Ohh! Acha.

Poonam: Ab bolo.

Prem: Kya mujhe maafi mil sakti hai?

Poonam: Nahi!

Prem: Kyun?

Poonam: Kyunki pehle tum ye batao ki gaye kyun the. Uske baad hi main kuch sochungi.

Prem: Phone par batau ya milke?

Poonam: Jaise tum chaho.

Prem: To kab milogi?

Poonam: Sunday ko.

Prem: Par usme to abhi 1 din hain.

Poonam: Han!

Prem: Hum… Kal nahi mil sakte?

Poonam: Main hospital me busy rehti hu. Aur raat ko ghar par. Islie nahi ho sakta.

Prem: Okay!

Poonam: To thik hai main phone rakhti hu.

Prem: Nahi! Hum aise hi thodi baat karte hain na.

Poonam: Nahi! Mera mann nahi.

Prem: To bas aise hi raho phone par, main bas tumhare sath rehna chahta hu.

Poonam: Why are you doing this Prem?

Prem: What am I doing Poonam? Bas tumhare sath rehna chahta hu. Tum baat nahi karna chahti to mat karo.

Poonam: Aur isse kya hoga?

Prem: Mujhe lagega ki main tumhare sath hu.

Poonam: Mujhe sona hai.

Prem: To so jao. Main phone par hi hu.

Poonam Prem ki ye baat sun kar ear phones kaan me laga kar let jati hai. Prem bhi apne bed par let jata hai aur aankhein band kar leti hai. Thodi der baad….

Prem: Poonam!

Poonam: (aankhein band kie hi) Hmmm!

Prem: Kuch nahi.

Poonam: Bolo!

Prem: Mujhe acha lag raha hai, tum mere sath ho. Pehle tumhari tai ji ki wajah se hum phone par baat nahi kar pate the. Maine itne saalon baad tumhari awaz ab jake phone par suni hai.

Poonam: (aankhein khol kar) Kyun? Phone par awaz change ho jati hai kya?

Prem: Nahi! Par kisi ke dur hote hue paas hone ka ehsaas to hota hai na.

Poonam Prem ki ye baar sun kar muskurati hai aur bolti hai, “Tumhare paas mera number tha na, tumne sab ko call kia par mujhe call nahi kia, jabki main hi sabse jyada pareshan thi.”

Prem: Wo tumhari tai ji ki wajah se. Mujhe laga ki agar unhe pata chala to wo tum par na baras pade. Par mujhe nahi pata tha ki tumhare ghar par sabko pata chal chuka hai, nahi to main phone kar deta. Kam se kam tumhe is baat ki tasalli to hoti ki main wapas aaunga.

Poonam Prem ki is baat par kuch nahi kehti. Chup rehti hai.

Prem: Kya soch rahi ho?

Poonam: Soch rahi hu ki tumhare jane ki wajah badi honi chahiye. Nahi to maafi nahi milegi.

Prem: Ab…. Ye to tum sun kar hi decide karna.

Poonam: Aur mujhe wajah badi nahi lagi to, mera picha chhod doge?

Prem: Nahi! Bilkul nahi.

Poonam fir muskurati hai aur kehti hai, “Ab tumhari baatein khatam ho gayi ho to mujhe sona hai.”

Prem: Okay! Sorry! So jao.

Prem muskurata hai. Poonam apni aankhe band kar leti hai. Prem bhi aankhe band karke Poonam ki saanse mehsoos kar raha hai. Aur isi tarah dono hi na jane kab so jate hain.

Subah hoti hai. Idhar Poonam ki aankhen khulti hain aur udhar Prem bhi jagta hai. Prem ke chehre par ek choti si muskurahat hai. Use ab yakeen hai ki Poonam use zarur maaf kar degi. Thoda waqt zarur lagega. Par han, wo ab janta hai ki Poonam aaj bhi uske lie kuch to mehsoos karti hai. Aur expectations ke against na jane kyun aaj Poonam ke face par bhi smile hai. Wo ready hoti hai aur hospital ke lie nikal jati hai. Pata nahi kyun par use sham hone ka intezaar hai. Shayad islie kyunki use lagta hai ki sham hone ke baad Prem usse baat karega. Wo hospital se free ho kar ghar aati hai aur Prem ke message ka wait kar rahi hai. Par ajeeb baat hai aaj Prem ka ek bhi message nahi aaya hai. Wo wait kar rahi hai par ab uski Mom ne use unki help karne ke lie bula lia hai. Wo Mom ki help karne jati hai ki tabhi Prem ka message uske phone ki notifications me dikhayi deta hai. Par wo use reply na karke Mom ke sath kaam karne me busy ho jati hai. Jab wo wahan se free hoti hai tab Prem ko reply karti hai. Par ab Prem ka koi ata pata nahi hai. Poonam uske message ka wait karte karte so jati hai. Raat ke kareeb 12 baje Poonam ke phone par ek call aata hai. Poonam neend me hai aur neend me hi wo call utha leti hai.

Poonam: (neend bhari awaz me) Hello!

Prem: Hello! Tum so gayi thi kya?

Poonam: Han!

Prem: Oh! Mujhe tabhi laga tum reply kyun nahi kar rahi ho mere messages ka.

Poonam: Tumne message kie?

Prem: Han!

Poonam: Bolo…

Prem: Tumhari awaz bhot achi lag rahi hai. Like a baby.

Poonam: Phone kyun kia tha?

Prem: Aise hi.

Poonam: To main so rahi hu fir. Mujhe neend aa rahi hai.

Prem: Main tumhari gali ke bahar hu.

Poonam ki neend ek sath hi ud jati hai.

Poonam: Kya? Par kyun?

Prem: Tumhara ghar dhundne aaya hu.

Poonam: Tum pagal ho kya? (time dekh kar) 12 baj rahe hain.

Prem: Nahi! Tumhara ghar mujhe pehle hi pata kar lena chahiye tha. Dobara ye galati nahi karni hai mujhe. Islie main aa gaya hu.

Poonam: To din me aana tha na. Raat me kyun aaye?

Prem: House Number batao.

Poonam: Prem! Wapas jao.

Prem: Nahi! House number batao.

Poonam: Tumhe mujhe daant padwani hai kya?

Prem: Ab tai ji nahi rehti wahan.

Poonam: Maa Papa to rehte hain na.

Prem: Main bas ghar dekh kar chala jaunga.

Poonam: Prem! Please.

Prem: House Number batao Poonam.

Poonam: 24…

Prem: Okay! I am coming aur please niche aa jao. Mujhe tumhe dekhna hai.

Poonam: Kya karu main tumhara?

Prem: Mujhse baat karo bas.

Prem Poonam ke ghar ke niche aata hai. Poonam chupke se ghar ke bahar aati hai. Prem ghar ke bahar khada hai aur Poonam ko dekh kar smile kar raha hai.

Poonam: Are you mad?

Prem: Yes! Thoda sa.

Poonam: Tumne drink ki hai?

Prem: Thodi si.

Poonam: Why?

Prem: Waise main karta nahi hu. Par aaj kar li.

Poonam: Kyun?

Prem: Waise himmat nahi hoti tumhare ghar par aane ki.

Poonam: Drive tum kar rahe the?

Prem: (zor se bol kar) Yessss! I was driving.

Poonam: (Prem ke muh par hath rakhte hue) Shhh! Dhire bolo.

Prem: Oh okay!

Prem Poonam ka hath apne hath me leta hai.

Prem: Tumhare hath aaj bhi utne hi soft hain. Mujhe laga tha operation karke kuch to rough hue honge.

Poonam: Tum jao.

Prem: Tumhe kuch yaad hai Poonam? Wo annual function….

Poonam dekh rahi hai ki Prem bilkul hosh me nahi hai aur itni drink karne ke baad use wapas jane ke lie bolna bhi thik nahi hai. Wo apna phone leti hai aur Ananya ko call karti hai. Ananya call uthati hai.

Ananya: Hello! Tu ghar me hoke call kyun kar rahi hai?

Poonam: Anu! Main ghar ke bahar hu.

Ananya: Kya? Tu wahan kya kar rahi hai?

Poonam: Prem ghar ke bahar hai. He is in drunken state.

Ananya: Ohhh! Sahi ja raha hai wo.

Poonam: Yaar tu maze mat le aur bata ab kya karu? Ise wapas bhej nahi sakti aur ghar bhi leke aa nahi sakti.

Ananya: Ruk wahin. Main aati hu.

Ananya ghar ke niche aati hai.

Prem: Hi! Tum Poonam ki sister hogi.

Ananya: Han! Sahi pehchana.

Poonam: Introduction baad me karna. Pehle bata kya karu?

Prem: Kya karu kya? Main itni der se bol raha hu ki main chala jaunga. I can drive Poonam.

Poonam: Tumhe jail jana hai?

Prem: Its only about 15 minutes yaar.

Ananya: Di sahi keh rahi hai. Abhi aap andar chalo.

Prem: Tumhare parents hain na ghar me.

Ananya: We will manage this. Waise bhi Maa Papa ko kal Kittu didi ki shadi ke lie jana hai.  Wo dono subah hi nikal jaenge.

Poonam: Anu! I cant take this risk again. Agar Maa ko pata chala to trust nahi kar paengi wo kabhi.

Ananya: Unhe pata nahi chalega.

Prem: Poonam! Main andar nahi ja raha. I am in my car. Subah tak wahin rahunga. Ye thik hai?

Ananya: Aapko pata hai na kitni thand hai? Kulfi jamani hai apni?

Prem: I will manage.

Ananya: Arey! Okay! I am promising kuch gadbad nahi hoga. Agar kuch hua to I will take the charge. Please chalo.

Poonam aur Prem dono andar jate hain. Unke piche Ananya bhi aati hai. Teeno dheere se ghar me ghus jate hain. Ananya dono ko uske room me jane ke lie bolti hai. Kyunki Ananya ka room upar hai aur Poonam aur uske maa papa ka room niche, islie wahan Prem aaram se reh sakta hai. Prem aur Poonam Ananya ke room me chale jate hain. Ananya ghar lock karke usi room me jati hai.

Ananya: Ufff! Sab ho gaya. Ab aap subah tak yahin raho. Yahan koi nahi aata. Maa Papa bhi nahi. Waise bhi kal unhe 6 baje nikalna hai.

Poonam: Hmmm!

Ananya: Main tumhare room me ja rahi hu. Tum yahin raho Prem ke paas.

Poonam: Kyun?

Ananya: Kyunki main bol rahi hu. Safety ke lie room andar se band kar lena. Good night. Waise mera room open hi hai, mann ho to aa jana.

Ananya ye keh kar smile karti hai aur room se bahar nikal jati hai. Poonam room ko andar se band kar leti hai.

Ye to interesting hota ja raha hai. Prem Poonam ke ghar me aur uske maa papa ko nahi pata. Agar unhe pata chala to kya hoga? Shayad bhuchaal aa jaega. Par jaisa Anu ne kaha ki wo subah hi chale jaenge. To shayad aisa na bhi ho. Aage kya hona hai, ye janne ke lie agala episode padhna mat bhuliyega. Tab tak khush rahe, haste rahe muskurate rahe, hume apna pyar dete rahe…..

And Never Stop Feeling the Love…….<3

One thought on “HUMSAFARS… (E-8)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s