HUMSAFARS…(E-7)

Episode-7

Recap: Purane dino me Prem Poonam se naraz tha aur Poonam ne uski galatfehmi dur kar di thi. Jab Prem ko pata chala ki Poonam ke dil me uske lie koi khalish nahi hai aur wo use pasand bhi karti hai to uski sari narazgi dur ho gayi aur dono Class me baith kar copy par likh likh kar baate karne lage. Isse aage janne ke lie ye episode padhiye……

Chhutti ke waqt Prem aaj Poonam ke lie rukta hai aur use apni scooty pe piche baitha kar ghar ke lie chal padta hai. Prem aur Poonam dono hi bhot khush hain. Ye hum unki aankhon aur unki muskurahat se bata sakte hain. Par dono hi nadaan hain, bhole hain, abhi unhe nahi pata ki ye sab kya hai aur kyun hai?

Ab to ye roz ka hi hai ki Poonam aur Prem class me sath me baithte hain aur chutti me dono scooty par jate hain. Dono ki dosti dhire dhire gehri hoti ja rahi hai. Unke group ab Disha aur Manav ke sath unke baare me bhi baatein hone lagi hain. Jinhe dono hi sire se nakar dete hain. Par unke mann me kya hai, ye koi nahi janta. Aur isi tarah dekhte hi dekhte ye class bhi paar ho gayi hai aur wo log 12th class me aa gaye hain. 12th class ka pehla din hai aur Disha aur Manav ne sabko library ke piche wali stairs par bulaya hai. Sab log wahan phochte hain. Jab unka group aa jata hai tab Disha bolna shuru karti hai, “Guys! Main tumse ek baat kehna chahti hu.”

Kuch atakne ke baad wo fir se bolti hai, “I mean hum… Hum ek baat tum logon ko batana chahte hain.”

Nupur: Kaun hum?

Disha: Main aur Manav…

Prem: Kya batana hai? Ki tum dono ek dusre ko date kar rahe ho?

Manav aur Disha Prem ko hairani se dekhte hain.

Manav: Tujhe kaise pata?

Poonam muskurati hai aur Prem bhi.

Prem: Saalon! Ek saal se chal raha hai aur bata ab rahe ho?

Disha: Tujhe ye bhi pata hai?

Prem: Tum logon ka baap hu main. Mujhe nahi pata chalega? Huuhh?

Manav: Yaar wo hum khud hi confused the ki kya kare? Aur sure bhi nahi the.

Prem: Ab to sure ho na?

Manav: (smiling and hesitating) Han!

Prem: To party kahan hai?

Nupur: Kaisi party? Pehle to mujhe ladayi karni hai ki ye ab bata rahe ho tum log?

Poonam: Koi baat nahi Nupur. Wo dono sath hain, yahi bhot hai.

Prem: Poonam sahi bol rahi hai Nupur.

Nupur: Tum dono bhi bata do, tum dono ka kya scene hai?

Poonam: Hum dono ka kya scene hoga?

Nupur: Dekho mujhe ke aur shock nahi chahiye. Abhi bata do.

Prem: Koi baat nahi, tab dobara shocked ho jana.

Disha: Seriously? You both are also…..

Poonam: Nooooo! Aisa kuch bhi nahi hai.

Disha: Nahi hai to hona chahiye. You both look so adorable together.

Prem: (Muskurate hue) Main to kehta hu isse, ye hi nahi manti.

Poonam: Prem! Tumne kab kaha ye mujhse?

Prem: Kahu to maan jaogi?

Poonam: Stop it yaar!

Manav: Ye Prem hai, ise bak bak karne ki aadat hai tum logon ko pata hona chahiye.

Disha: Han! Ye to tum sahi keh rahe ho.

Prem Poonam ko dekh raha hai aur Poonam Prem ko. Aur Poonam ko dekhte hue hi Prem kehta hai, “To… tum dono party kahan de rahe ho?”

Disha: Plan karte hain kuch acha sa.

Prem: (Disha ki taraf dekh kar) Yeah! Great idea. Par ye party hai, sab tumhe hi dekhna hai.

Disha: Han! Han! Is weekend plan karte hain.

Sab log is baat se sehmat hain, lekin Poonam ne abhi tak kuch nahi bola hai. Sab log wahan se library me chale jate hain. Wahan bas Prem aur Poonam hi hain.

Prem: Kya hua? Tumne kuch kaha nahi..

Poonam: Wo sab kya tha? Main kahunga to maan jaogi?

Prem: Majak tha…

Poonam: Ye majak tha?

Prem: Han! Tha to… Par…

Poonam: Par kya?

Prem: Kuch nahi… Library chale?

Poonam: Prem! Please… Ye sab majak mat kia karo. Log galat samajh lete hain.

Prem: Poonam! Tumhe pata hai na tumhare mann me kya hai? To don’t affect yourself from all this.

Poonam: To tumhe koi problem nahi hai ki sab log humare bare me kya soch rahe hain?

Prem: Kya soch rahe hain?

Poonam: Abhi Nupur ne kya bola tha? Tum is tarah kyun behave kar rahe ho jaise kuch hua hi nahi hai.

Prem: Tum kya chahti ho? Main wahan jake sabko bolu ki hum dono ke beech aisa waisa kuch nahi hai, hum bas friends hain.

Poonam: (Kuch soch kar) Aur wo aise Manenge is baat ko?

Prem: Nahi Manenge!

Poonam: Han!

Prem: (thode gusse me) To kyun piche padi ho?

Poonam: Main piche padi hu? Tumhe wo sab majak karne ki zarurat hi kya hai?

Prem: (Poonam ke samne hath jodte hue) Thik hai meri Maa! Ab nahi karunga koi majak.

Prem ye sab keh kar library me chala jata hai. Poonam bhi gusse me hai aur wo bhi library me chali jati hai. Is sab ke baad dono hi ek dusre se pure din baat nahi karte. Chutti ke waqt Prem Poonam ka wait kar raha hai. Par Poonam Prem ke samne se chali jati hai. Prem scooty le kar uske piche aata hai.

Prem: Oye! Main tumhara wahan wait kar raha hu aur tum yahan aa gayi.

Poonam: Ghar jao Prem. Aaj mera akele jane ka mann hai.

Prem: Kyun?

Poonam: Please! Mujhe baat nahi karni abhi.

Prem samajh jata hai ki Poonam usse naraz hai. Wo wahan se chala jata hai.

Agle din Prem school aata hai aur dekhta hai ki Poonam Nupur ke sath baithi hai. Prem ko ye sab dekh kar gussa aata hai aur wo Poonam ka bag uske samne hi Nupur ki seat se utha kar apni seat par rakh deta hai. Poonam bhi gusse me bolti hai, “Prem! Mera bag wapas rakho.”

Prem bina kuch bole Poonam ka hath pakad kar bahar le jata hai, wahan jahan aas pass koi nahi hai.

Prem: Ye sab kya hai Poonam? Means ab tumhe mere sath baithna bhi nahi hai?

Poonam chup rehti hai.

Prem: Ek baar bol do bas. Pichli baar maine tumhe bolne ka mauka nahi dia tha, is baar bata do khud se.

Poonam: Mera hath chhodo pehle.

Prem: Nahi! Pehle batao.

Poonam: Ye school hai Prem.

Prem: Yahan koi nahi hai.

Poonam: (ghurte hue) Prem!

Prem: (Pareshan hote hue) Please yaar Poonam! Maine bola hai na main koi aisa majak nahi karunga.

Poonam: Par log humare baare me bolne lage hain.

Prem: Bolne do na! We know about each other, that’s more important.

Prem Poonam ke dono hath pakad leta hai aur kehta hai, “Bolo Poonam.”

Poonam apne mann me sochti hai, “Pata nahi aisa kyun ho raha hai? Tum mere sath hote ho to sab acha lagta hai aur abhi bhi mujhe acha lag raha hai. Par ye sab aise hi chalta raha to wo sab sach na ho jaye jo log bol rahe hain. Isilie main dur rehna chahti hu tumse.”

Par kehti hai, “Mujhe ab nahi baithna tumhare paas.”

Prem: Main aise jane hi nahi dunga tumhe. Main janta hu tumhe, aisa hota to tum bhot pehle hi mana kar chuki hoti. Koi aur baat hai. Bolo kya baat hai?

Poonam: (Nazare churate hue dhire se bolti hai) Koi baat nahi hai.

Prem: Dekho! Tumhe nahi batana tumhari marzi. Agar bata bhi deti to bhi main tumhe jane nahi deta. To chup raho aur bina nakhre kie mere sath chalo.

Poonam: Prremmm!

Prem: Mujhe pata hai tum mera naam bhot ache se leti ho. Par abhi main kuch nahi sunne wala.

Poonam: Seat par baithne na baithne se kya fark padta hai? Hum dost to hain na.

Prem: Fark hai! Tumhare sath pura din milta hai mujhe. Tumhare sath rehna mujhe acha lagta hai. Bas ye samajh lo ki aadat ho gayi hai tumhari.

Poonam: Tumhe pata hai na 12th ke baad humare colleges alag honge. Tab kya karoge?

Prem: Tab college ke baad tumse milunga aur college ki har detail tumhe bataunga.

Poonam: Roz miloge?

Prem: Han! Koi shaq hai kya?

Poonam: (Na me sir hilate hue) Nahi! Aur aisa kyun hai? Baki dost bhi hain na tumhare?

Prem: Han! Hain wo bhi. Par pata nahi kyun? Waise ye to main bhi sochta hu ki kyun main tumse freely frankly sab bolta chala jata hu. Ye sabke sath nahi kar pata. Tumhare sath reh kar mujhe lagta hai ki main main hu. Kuch bhi change nahi lana padta khud me.

Poonam: Change matlab?

Prem: Ummm… Change matlab… Ab dekho… Jaise main sab ke sath hota hu to sab log mujhe bhot mischievous samajhte hain aur main waisa rehta bhi hu. Sabko chhedna, sabko pareshan karna, ye sab karta hu. Par jab tumhare sath hota hu, to pata nahi meri sari shaitaniyan kahan chali jati hain? Mann karta hai ki bas tumhare sath hi rahu. Chahe hum kuch bole na, kuch baat na kare. Par bas acha lagta hai, relaxing hota hai sab. Aur main ye sab nahi jane dena chahta. Islie meri Maa… (hath jodte hue) Please maan jao.

Poonam: (muskurate hue) Okay!

Prem: (khush hote hue) Thank god!

Poonam classroom me jane ke lie aage badhti hai. Prem dobara Poonam ka hath pakad leta hai.

Poonam: (in surprise) Kya hua? Chalna nahi hai?

Prem: Abhi time hai assembly me. Tab tak yahin raho please.

Poonam: Par baki sab class me…..

Prem: (Poonam ki baat ke beech me hi) Mujhe bas tumhare sath rehna hai.

Poonam wahin khadi rehti hai.

Poonam smile karti hai. Dono ek dusre ki aankhon me dekhte hain. Dono ko hi ek alag sa ehsaas hota hai, jo unhe acha lag raha hai. Dono bilkul shant khade hain, ek dusre ki aankhon me dekhte hue. Dhoop un dono ke chehre par pad kar un dono ki aankhon ko aur chamak de rahi hai. Kuch der is tarah ek dusre ko dekhne ke baad, dono hi achanak ek awaz se alag ho jate hain. Ye awaz hai Sam ki. Aapko yaad hai na doston ye wahi hai jise Prem bhot pasand hai, aur isi ke lie Poonam ne pehle apni seat change ki thi.

Sam: Poonam!

Poonam aur Prem ek dusre ka hath chhodte hue use dekhte hain. Prem dhire se bolta hai, “Yaar ye kahan se aa gayi? Kabab me haddi.”

Poonam: Han Sam. Kya hua?

Sam: Yaar! Nupur bata rahi thi ki tu aur Prem ab sath nahi baithoge. To main Prem ki seat par aa jau?

Poonam usse kuch bolti isse pehle hi Prem bolta hai, “Poonam mere sath hi baithegi. Tum Nupur ke paas jao.”

Sam: Par Prem…

Prem: Maine kaha na. Jao Nupur ke paas baitho.

Sam: Okay!

Sam wahan se chali jati hai.

Poonam: To ye kabab me haddi hai?

Prem: (muskurate hue) Hmmm!

Poonam: To tum kabab ho?

Prem: Nahi! Tum aur main milkar kabab bante hain.

Poonam: (Ghurte hue) Prem!

Prem: (haste hue) Hahahaha! Ab tum chahe bura mano ya acha. Par sach to yahi hai Senorita!

Poonam: Kaise ho tum? Itna daant khane ke baad bhi waise hi.

Prem: Ab tum chahe daanto ya maaro par main tumhe kahin jane nahi dunga.

Present Day…………

Prem sochte hue apne khayalon se bahar nikalta hai. Aur Poonam ko ek text send karta hai. Usme likha hai, “I am sorry Poonam. Maine jo tumse kha tha wo pura nahi kar paya. Poonam main kahin nahi jana chahta tha, par mujhe jana pada. I promise you, main ab se aisa kuch tumhe bina bataye nahi karunga. I am sorry.”

Prem ko samajh nahi aa raha hai ki wo Poonam ko kaise manaye. Shayad use Poonam ko thoda waqt dena chahiye. Kyunki achanak Poonam ki life me is tarah aana aur usse har baat ke baare me janna shayad sahi nahi hai. Kyunki shayad Poonam ne bhi nahi socha hoga ki wo is tarah se achanak uski life me aa jaega. Khair jo bhi ho…. Ab aage Prem kya krega ye to hume agle episode me hi pata chal paega. Janne ke lie zarur padhiyega. Tab tak aap is zindagi ka maza lete rahiye, haste rahiye, muskurate rahiye aur ye kahani padhte rahiye.

Keep Feeling the Love……..<3

One thought on “HUMSAFARS…(E-7)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s