HUMSAFARS… (E-4)

Episode-4

Recap: Poonam apne ghar par aati hai aur apne room me chali jati hai, jahan wo apni aur Prem ki school ki baatein yaad karti hai. Wo use din ko yaad karti hai, jab wo aur Prem pehli baar ek dusre se akele me baat karte hain. Wo dono movie bhi dekhte hain aur fir sath me mc-donalds me khana khate hain. Dono ko hi sath me reh kar acha lagta hai. Agle din school me bhi dono sath me hi ek hi seat par baithte hain aur Prem use school se uske ghar tak bhi chhodta hai. Jiski wajah se use uski tai ji se daant bhi padti hai. Ye sab wo yaad kar rahi hoti hai ki tabhi uski maa use dinner ke lie bahar bula leti hai. Isse aage janne ke lie aage ki kahani padiye……

Itne me unke Papa bhi dinning table par aa jate hain. Sab log mil kar khana khate hain. Fir Poonam aur Ananya apne room me chali jati hain. Waise Poonam aur Ananya ke rooms alag hain. Par mostly Ananya Poonam ke paas Poonam ke room me hi soti hai. Aur aaj bhi wo Poonam ke room me hi hai. Dono behene bed par leti hui hain.

Ananya: Ab bata kya hua hai?

Poonam: (hichkichate hue) Wo aaj… Hospital me wo aaya tha.
Ananya: Wo kon?

Poonam: Prem.

Ananya: Prem aa gaya! Ye hui na baat. Maine to pehle hi kaha tha wo aaega.

Poonam: Jyada khush mat ho. Wo apni bhabhi ke ilaaj ke lie aaye the. Mujhse milne nahi, wo to main use mil gayi coincidently.

Ananya: Coincidence se hi, mili to.

Poonam: Wo specially mujhse milne nahi aaya tha.

Ananya: Wo sab chhod. Usne kuch bataya nahi? Kyun gaya tha wo?

Poonam: Maine pucha nahi.

Ananya: Kyun?

Poonam: Kyunki mujhe usse baat nahi karni thi.

Ananya: Kyun nahi karni thi?

Poonam: Kyun karu main usse baat? Mujhe koi farak nahi padta wo jahan bhi ho.

Ananya: Baat nahi karni thi to ab kyun pareshan hai?

Poonam ki aankhon me aansu aa jate hain. Ananya use chup karati hai.

Ananya: Waise ye sab tune Maa ko kyun nahi bataya?

Poonam: Tujhe to pata hai na, jab wo gaya tha aur main pareshan rehti thi. Padhayi me bhi mann nahi lagta tha. Is wajah se mera ek year drop bhi ho gaya tha. Tai ji hamesha bola karti thi Maa ko, par Maa hamesha unhe chup kara deti thi. Par baad me jab sach samne aaya to wahi sab tha…. (Poonam kuch seconds chup reh kar dobara bolti hai.) Tujhe to pata hai ki Maa ko tab kitna bura laga tha. Unhe mujh par pura confidence tha. Lekin maine unka trust tod dia tha. Itni mushkil se main is sab se nikal payi thi, wo bhi unhi ki wajah se. Ab dobara bataungi to pata nahi kaisa lagega unhe? Hhh… Waise bhi wo sirf apne ghar walon ke sath aaya tha. Kal uski bhabhi discharge ho jaengi to ye sab band ho jaega.

Ananya: Tu kyun bhul rahi hai ki Maa tujhse naraz hui thi to unhone hi tujhe support bhi kia tha.

Poonam: Han! Par main unhe pareshan nahi karna chahti.

Ananya: Main unhe bula rahi hu. Unhe bata dena sab.

Poonam: Tu nahi manne wali. Thik hai, bula unhe.

Ananya apni Mom ko room me leke aati hai.

Poonam’s Mom: Hmm! Ab bata kya baat hai?

Poonam: Maa! Wo aaj Prem hospital me aaya tha.

Poonam’s Mom: Ye wahi hai na jo school time me….

Poonam: (unki baat puri hone se pehle hi) Han! Wahi hai.

Poonam’s Mom: Hmm! To kuch kaha usne?

Poonam: Maine baat nahi ki.

Room me kuch seconds ke lie shanti hai. Poonam ki Mom uske chehre ko padh rahi hain.

Poonam’s Mom: Tu use ab bhi pasand karti hai.

Poonam: Aisa nahi hai. Maine usse baat bhi nahi ki. Mujhe nahi pasand wo.

Poonam’s Mom: Tujhe wo pasand hai to bol sakti hai. Jab mujhe tumhare aur uske baare me pata chala tha, tab tu bhot choti thi. Tab teri umr nahi thi, ye sab karne ki. Par ab to teri shadi ka time hai. Tu is bare me soch sakti hai. Main aur tere Papa to bolte hi rehte hain tujhe ki koi ladka pasand kar le.

Poonam: Aisa kuch nahi hai Maa. Mujhe usse baat bhi nahi karni.

Poonam’s Mom: To fir pareshan kyun hai?

Poonam: (apne maathe par hath rakhte hue) Mujhe nahi pata main pareshan kyun hu?

Poonam’s Mom: Aise hi pareshan rehna hai?

Poonam bed par hi baithe hue apni Maa ke gale lag jati hai, aur aankhon se aansu nikalte hue kehti hai, “Main kya karu? Aapne tab bhi mujhe samjha tha aur bola tha ki aage badho. Aapne kaha tha ki meri age nahi hai, main nikal jaungi is sab se. Main nikal bhi gayi thi. Par ab…”

Poonam’s Mom: (Poonam ke baalon ko sehlate hue) Poonam! Pehle to bilkul chup ho. Rona nahi hai.

Poonam apni Mom ke gale lage hue hi apne aansu pochti hai.

Poonam’s Mom: Tujhe usse baat karni chahiye thi.

Poonam: Use dekh ke hi gussa aa gaya. Islie maine baat nahi ki.

Poonam’s Mom: Thik hai! Koi baat nahi. Ab agar wo aaye to baat kar lena aur sunna ki wo kyun gaya tha aur kyun wapas aa gaya?

Poonam: Thik hai.

Poonam’s Mom: Aur uske baad decide karna ki tujhe uspar gussa karna hai ya dosti?

Poonam: Thik hai.

Poonam’s Mom: Aur agar aage ka bhi sochna ho to soch sakti hai. Hume apni beti par pura bharosa hai.

Poonam: Maaa! To pehle itna sab kyun kia tha? Mera ek year drop bhi ho gaya.

Poonam’s Mom: Tab teri tai ji thi. Aur hume achanak shock laga tha. Humne socha hi nahi tha ki tu aisa karegi. Wo sab bhi to soch. Ab to hume pata hai tu aisi hi hai. To consider kar lenge.

Poonam: Maaaa!

Ananya aur uski Mom dono haste hain.

Agle din Poonam hospital jati hai. Wahan wo apne cabin me phochti hai aur patients aane shuru ho jate hain. Wo apne ek patients se baat kar rahi hai ki tabhi Prem uske cabin ke bahar aake use awaz lagata hai. Jaise ki Poonam ki Mom ne use shant rehne ke lie kaha tha, wo shant rehti hai aur kehti hai, “Aap in logon ke baad aana.”

Prem Poonam ki ye baat sun kar wahin ruk jata hai aur wait karta hai. Un patients ke jane ke baad, wo aur uske bhaiya Poonam ke cabin me jate hain.

Poonam: Kahiye.

Pratap: Poonam! Mujhe kal raat ko pata chala ki aap Prem ke sath padhi ho.

Poonam: Ji!

Pratap: Kya main us naate aapse ek request kar sakta hu?

Poonam: Kahiye.

Pratap: Dekhiye. Main aksar kaam me busy rehta hu. Aur main ye chahta hu ki aap Suman ka case le.

Poonam: Okay! Wo to main hi dekh rahi hu.

Pratap: Ji! Par ho sake to ghar par bhi aake check up kar lia kare.

Poonam: Agar koi emergency hui, to alag baat hai. Nahi to aap logon ko hi yahan aana padega.

Pratap: Ji! Main emergency ke lie hi bol raha tha.

Poonam: Okay! Par abhi aapki wife thik hain. Main unhe dekh ke aa chuki hu. To aap unhe ghar le ja sakte hain. Aur ho sake to unhe bahar bhejiye. Kayi baar sirf ghar me rehne ki wajah se bhi insan bimar feel karne lagta hai. Nature ke jitna paas rahenge utna swasth rahenge.

Pratap: Han! Wo to hai.

Poonam: Aur unke lie time nikaliye. Wife ke lie husband ka sath bhi zaruri hota hai.

Pratap: Main try karta hu. Par ho nahi pata.

Poonam: I am sorry, agar aapko bura lage. Par hum paise kis lie kamaate hain? Apno ko khush rakhne ke lie. Aur agar apne hi khush aur healthy nahi, to in paison ka kya fayda?

Poonam ki is baat ko sun kar Pratap chup ho jata hai aur Prem muskurane lagta hai.

Poonam: I hope aap meri baat ko samjhenge.

Pratap: Yes doctor.

Poonam: Okay!

Prem aur Pratap dono wahan se uthate hain. Prem Pratap ko bolta hai, “Bhaiya! Aap chalo main aata hu.”

Pratap room se chala jata hai. Prem Poonam se kehta hai, “Tum ab bhi wahi sab baatein karti ho.”

Poonam: (Prem ki baat ko ignore karte hue) Koi aur kaam hai?

Prem: Han! Disha ka birthday ek month baad hai na.

Poonam hairan hai ki use Disha ka birthday yaad hai.

Poonam: Han! To?

Prem: Mujhe pata hai ki tum uske ghar jaogi.

Poonam: Han!

Prem: Kya main bhi chal sakta hu tumhare sath?

Poonam: Nahi!

Prem: Mujhe bas use wish karna hai.

Poonam: Main nahi chahti uska birthday kharab ho.

Prem udasi se Poonam ki taraf dekhta hai.

Poonam: Aur tumhara mood bhi.

Prem dhire se muskurata hai aur kehta hai, “Tum mujhse naraz ho fir bhi mera khayal hai. Thanks!”

Prem Poonam ko pyar bhari nazaron se dekhta hai aur aage kehta hai, “Mujhe pata hai sab mujhse naraz hain. To sab hi mujhe daantenge. Jaise tumne mujhe daanta tha. Par is darr se kab tak nahi milunga main sab se?”

Poonam: Tum usse milne uske birthday ke baad kabhi bhi chale jana. Tab na jao to behtar hai.

Prem: Par mujhe use birthday wish karna hai.

Poonam: (Gusse me) Tumhe koi baat ek baar me samajh kyun nahi aati?

Prem: Poonam! Wahan sab honge. Main sabke samne maafi mangunga to jyada asar padega.

Poonam: Us din Disha aur Manav ki sagayi hai.

Prem: Kya? Fir to mujhe zarur jana chahiye.

Poonam: Kyun?

Prem: Mujhe lagta hai mujhe jana chahiye. Aur tum itni sure kaise ho ki wo gussa karenge?

Poonam: Kyunki main unke sath itne saalon se reh rahi hu.

Prem: Okay! Tum address to do. Main baad me chala jaunga.

Poonam: Tumhe ab uska address bhi dena padega? Uska ghar bhul gaye tum?

Prem: Nahi! Bhula to nahi, par uske ghar gaya tha main ek din. Tab maine kafi der bell bajayi thi, par kisi ne khola hi nahi tha door.

Poonam: Tumhe aate hue dekh lia hoga.

Prem: Hmm! Isilie main Nupur ke ghar par bhi gaya tha. Par wahan koi aur hi rehta hai ab.

Poonam: Wo ab yahan nahi rehti.

Prem: To kahan rehti hai?

Poonam: Wo log Canada shift ho gaye hain.

Prem: Ohh! Nice. Baat to hoti hogi.

Poonam: Han! Har koi bina bataye nahi jata.

Prem chup ho jata hai aur dhire se badbadata hai, “Pura gussa gaya nahi hai abhi madam ka. Har chiz par taane maar rahi hain.”

Poonam: Kya kaha?

Prem: Kuch nahi! Bas ummhh.. Bol raha tha kiii… tumhara ghar maine kabhi dekha nahi tha. Han! Sirrfff ghar ki gali hi dekhi thi islie wahan nahi ja saka. Nahi to zarur jata.

Poonam: Itna atak ke kyun bol rahe ho?

Prem: Nahi bas aise hi.

Poonam: Safayi de rahe ho?

Prem: Nahi! Bas bata raha hu.

Poonam: Aur Manav?

Prem: Jab main is shehar se gaya tha tab Manav ke parents ek ghar khareedne wale the, to mujhe pata nahi ki wo kahan rehta hai.

Poonam: Han! Tum to uske ghar milne se pehle hi chale gaye the. Yaad aaya.

Prem: (Poonam ko dekhte hue) Tumhari tai ji ab bhi waisi hi hain? Strict aur gusse wali?

Poonam: Han!

Prem: To abhi bhi kisi ladke ka ghar par aana allowed nahi hai?

Poonam: Aa jate hain ab.

Prem: (udas hoke) Ohh! Bas mere time tak hi mana tha?

Poonam chup rehti hai.

Prem: (Muskurate hue) Koi baat nahi. Jab mujhe maaf kar do na, tab mujhe lekar chalna apne ghar. Main tumhari Mom se milna chahta hu.

Poonam: Koi aur kaam hai tumhe?

Prem: Han! Wo main bhul gaya tumne apna number kya bataya tha?

Poonam: Maine tumhe koi number nahi dia.

Prem: Nahi dia to de do na.

Poonam Prem ko ghurti hai.

Prem: (Nazarein churate hue) Nahi dena hai to mat do. Main to islie bol raha tha ki jab Disha ke ghar par jaunga tumhe bhi bula lunga. Thoda sath de dena mera.

Poonam ab bhi Prem ko ghur rahi hai.

Prem: (awaz dheemi karke) Acha sath mat dena, par aa to jana. Meri himmat badhane.

Poonam: 98722536… (Aur wo Prem ko apna number bata deti hai)

Prem aur Poonam dono ki nazare milti hain.

Prem: (Smiles) Thanks Poonam! Main Disha ke ghar jald hi aaunga, par unki sagayi ke baad.

Prem uth kar wahan se chala jata hai.

Poonam sochti hai, “I hope, Prem unki sagayi par na aaye.”

Poonam raat ko ghar phochti hai. Wahan uski Mom aur uski behen Ananya use pakad leti hain.

Ananya: Bata kya hua?

Poonam: Arey yaar! Pani to pine do kam se kam.

Ananya: Pani kya tu coffee lena. Par pehle bata.

Poonam: Aaya tha aur usse maine aaram se baat bhi ki. Par usne koi aisi baat nahi ki. Wo bas Disha ke ghar jana chahta tha.

Poonam’s Mom: Wo Disha me interested hai kya?

Poonam: Nahi Maa!

Ananya: (haste hue) Acha to manti hai ki tujhme hi interested hai.

Poonam: Anuuu!

Poonam’s Mom: Acha aage bata.

Poonam: Aage kya? Disha ka birthday hai. Use wahan jana hai. Bas. Aur koi baat nahi hui.

Ananya: Lae! Ye kya baat hui? Means ab wo contact kaise karega fir tujhe? Baar baar hospital me aaega?

Poonam: Nahi! Usne mujhse mera contact number lia hai.

Ananya: Hmmm! Ladka samjhdar hai.

Poonam’s Mom: Aur puri koshish kar raha hai ise manane ki.

Poonam: Aap dono chup raho please. Aur Maa aapko kya hua hai? Jab pehle pata chala tha tab to aap bhot gussa hui thi.

Poonam’s Mom: Pehle tu bhot choti thi na. Ab to hum waise hi pareshan hain ki tu shadi kisse karegi na jane. Ab aise me jab wo ladka aa gaya hai, jisse tu shadi kar sakti hai to hum kuch kahe bhi na? Bata Anu (Ananya’s Nick name).

Poonam: He bhagwan! Dono pagal ho gaye hain. Main ja rahi hu apne lie coffee banane, kisi ko peeni hai?

Ananya: Han! Main to piyungi.

Poonam kitchen me chali jati hai.

Ab to Poonam ne ghar par bhi sab bata dia hai. Aage kya hoga use janne ke lie aapko aage ki story to padhni hi padhegi. Par use padhne ke lie kal raat 8 baje tak ka intezaar kare. Tab tak haste rahiye, muskurate rahiye, zindagi ka maza lete rahiye aurrr….

Keep Feeling the Love…….. ❤

One thought on “HUMSAFARS… (E-4)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s