HUMSAFARS…(E-2)

Episode-2

Recap: Prem aur uske ghar wale apni bhabhi ko hospital lekar jate hain. Wahan unhe treat karne jo doctor aati hai, wo Poonam hai, Prem ke bachpan ki dost. Lekin wo Prem se naraz hai aur is narazgi ki wajah Prem bhi janta hai. Par wo kya wajah hai? Ye janne ke lie aage padhiye……

 

Poonam ke ghar phochte hi uski Mom usse puchti hain, “Kaisa raha tera aaj ka din?”

Poonam: Thik tha Maa.

Poonam’s Mom: Bas thik tha? Kuch hua kya? Senior doctor ne kuch kaha?

Poonam: Nahi! Bas thodi thak gayi hu.

Poonam’s Mom: Thik hai. Jake aaram kar le thodi der. Fir dinner ke lie aa jana.

Poonam: (smiles) Okay Maa!

Poonam apne room me jakar bed par let jati hai. Wo aaj ke din ke baare me soch rahi hai. Aaj jo bhi kuch hua wo sab uski nazaron ke samne fir aa raha hai. Wo soch rahi hai, “Kya maine Prem se is tarah se baat karke sahi kia? Kam se kam usse reason to janna chahiye tha. Bina reason jane hi us par itna gussa karna thik nahi tha. Par kya karti, gussa hi itna aa raha tha. Pata nahi wo bhi kya soch raha hoga. Next time khud par control rakhungi. Par use bhi mere piche nahi padna chahiye tha. Wo piche pada tha tabhi main gussa hui thi, nahi to isse pehle main thik se hi baat kar rahi thi….. Oh! Jo bhi ho. Mujhe uske baare me nahi sochna hai. Sone ki koshish karti hu.”

Ye sochte hue wo apni aankhein band kar leti hai. Par uska mann uska sath nahi deta. Jaise hi wo aankhe band karti hai uske samne wo purane din aa jate hain. Jab wo aur Prem dost bane the. Use yaad aata hai wo din jab wo pehli baar us school me gayi thi jahan Prem use pehli baar mila tha.
Shuru se padhayi me ache hone ki wajah se uske Papa ne use Class 11th me, city ke best school me dala tha. Jisse wo aur ache se padh sake. Pehli baar jab wo us school me gayi to use pata nahi tha ki yeh hi-fi school padhayi ke sath-sath standards me bhi uncha hai. Wahan shehar ke ameeron ke bacche padha karte the. Lekin uche standards wale bacchon ke sath hi kuch ache bacche bhi the jo in sab chizon se khud ko alag rakhte the. Unhi me se kuch the, Prem, Nupur aur Disha. Sabse pehle Poonam ki dosti Disha se hi hui thi. Uske baad dhire dhire, Prem aur Nupur se bhi baat hone lagi. School time me Poonam hamesha Prem se dur hi rehti thi, kyunki use Prem se baat karna shuru se hi ajeeb laga karta tha. Prem shuru se hi bhot outgoing tha aur Poonam uske totally opposite. In teeno me, Disha hi uske sabse close thi. Usi class me ek aur ladka tha, ‘Manav’. Jo Poonam ki tarah hi middle class se belong karta tha. Poonam aur wo bhi dost ban gaye the. In sab ka group ban chuka tha, aur group me the Prem, Poonam, Nupur, Manav aur Disha. In sabhi ke alag alag dost bhi the. Par inka ye group pure school me famous tha.

Poonam ko hamesha Prem ke sath akele hona bhot awkward lagta tha aur wo hamesha koi na koi bahana dhundti thi ki wo wahan se nikal jaye. Par ek din aisa hua ki…..

Us din sabne plan banaya tha school ke baad movie jane ka, jiski permission unhe ghar walon se badi mushkil se mili thi. Nupur ka ghar movie hall ke sabse paas tha, to wo akele wahan phochne wali thi. Disha aur Manav ke ghar paas me the to Manav Disha ke sath aa raha tha. Aur Prem aur Poonam ke ghar paas hone ki wajah se Poonam aur Prem ko sath me aana tha. Poonam ne kafi try bhi kia tha ki wo mana kare par is baar uska koi bahana chalne nahi wala tha. So, use Prem ke sath aane ke lie han bolna pada. Prem aur Poonam dono scooty par ja rahe the. Dono hi chup the, Prem soch raha tha ki kaise baat karu, kyunki wo bhi Poonam se kam hi baat karta tha. Aur…. Prem is chuppi ko todta hai.

Prem: Poonam!

Poonam: Han!

Prem: May I ask you something?

Poonam: Pucho.

Prem: Hum itni… Kam baat kyun karte hain?

Poonam: I…. don’t know. Shayadd…. hum dono alag hain, islie.

Prem: Alag to hum sab hi hain na, par sirf hum dono me hi jyada conversation nahi hoti. Aisa kyun hai?

Poonam: Ye…. mujhe kaise pata hoga?

Prem: Tumhe nahi lagta ki hume baatein karni chahiye?

Poonam: Tum.. aise hi sabse.. directly… har sawal puch lete ho?

Prem: To? Isme problem kya hai? Kam se kam koi confusion to nahi rehti na dimag me.

Poonam: Hmmm…

Prem: To aage se baat karenge hum. Aur kuch nahi to ek dusre ke baare me janne se start karenge. (Smiles) Okay?

Poonam: (smiles too) Okay!

Prem aur Poonam dono hi movie hall me phoch jate hain. Par ab tak unke baki doston ka koi ata pata nahi hai. Aur kyunki us time par parents itne advance nahi the ki bacchon ko schools me hi mobile phone de de, islie wo kisi ko call karke bhi nahi puch sakte the. Kyunki ye baat tab ki hai jab mobile phones use me to aane lage the, par parents ye sab chize apne bacchon ko nahi diya karte the. Aur bacche bhi, itne ziddi nahi hua karte the, parents ki baat maan jaya karte the. Islie Prem aur Poonam dono ke paas wait karne ke alawa koi aur rasta nahi tha.

Prem: Pata nahi kahan reh gaye ye sab?

Poonam: Ab to kafi late bhi ho gaya hai. Movie shuru hone me bas 5 minute hain.

Prem: Kya kare? Hum dono chale kya?

Poonam: (In shock) Nahi! Tumhare sath… Akele… Nahi!!

Prem: (muskurate hue) Kyun? Hum apne parents ki permission leke aaye hain na.

Poonam: Han! Par humne sab friends ke sath ki permission li hai, sirf hum dono ki nahi.

Prem: (dhire se haste hue) Aur parents humara picha kar rahe honge ye dekhne ke lie ki kon kon andar hall me gaya hai?

Poonam: Han! Par…

Prem: Relax yaar… Jab wo log aaenge to hume join kar lenge.

Poonam: Par wo kabhi aaye hi na to aur….

Prem: Poonam! Main hu na.

Poonam: (ghabrate hue) Okay! Fine.

Prem aur Poonam dono movie dekhne andar chale jate hain. Movie ka naam tha, “Humko Deewana kar Gaye.”

Poonam ko darr tha ki is tarah se ek ladke ke sath movie me jate hue use uska koi relative na dekh le, kyunki is tarah doston ke sath wo pehli baar movie dekhne ja rahi thi aur ab to uske sare dost bhi uske sath nahi the. Wo movie hall me chali to gayi par use darr lag raha tha. Movie shuru hui, aur interval bhi ho gaya, par wo log ab tak nahi aaye the.

Poonam: Prem! Ye teeno to ab tak nahi aaye hain. Hum bhi chale kya?

Prem: Yaar ab itni movie dekh li hai to puri bhi dekh lo na. Wo log to ab aane se rahe. Waise bhi yahan tumhara koi relative nahi hai.

Poonam: (dhire se) Thik hai.

Prem: Tum kuch khaogi? Main kuch lekar aau?

Poonam: Nahi! Mere paas jyada paise nahi hain.

Prem: Lekin mere paas hain. Tum ruko, main lekar aata hu.

Prem hall se bahar nikalta hai aur kuch der me apne sath ek popcorn ki bucket aur do cold drinks lata hai.

Poonam: Ye sab kyun laye ho?

Prem: Kyunki mujhe thodi bhook lag rahi thi.

Poonam: Pata hai na ye sab kitna mehenga hota hai.

Prem: Main tumse iske paise nahi lene wala, kha lo.

Poonam: Par mujhe dene hain.

Prem: Okay! Tum aise to manogi nahi. Kal school me de dena.

Poonam: Okay!

Movie khatam hoti hai aur dono hall se bahar aate hain.

Prem: Wahan Mc Donald’s hai. Wahan chalke kuch khaye?

Poonam: Abhi to khaya tha.

Prem: Tum aise hi tokti ho har chiz par?

Prem apne mann me sochta hai, “Kahan phas gaya. Ye to kuch karne hi nahi de rahi hai.”

Poonam: Prem! Dekho movie hall me mere relatives nahi the par yahan to ho sakte hain na.

Prem: Don’t worry! Koi nahi hoga. Aur thoda chill bhi kiya karo. Itna darna bhi acha nahi hai.

Prem ye bolte hue Mc Donald’s me chala jata hai. Uske piche Poonam bhi aa jati hai. Dono ek seat le lete hain.

Prem: Ab batao kya khaogi?

Poonam: Mujhe nahi pata yahan kya acha milta hai. Main yahan pehli baar aayi hu.

Prem: Seriously?

Poonam: (smiles) Han!

Prem: Tum kahin bahar aati jati nahi ho kya?

Poonam: Aati jati hu. Par yahan nahi aayi kabhi.

Prem: Okay! To main hi kuch dekhta hu tumhare lie. Wait! Main abhi aaya.

Poonam ko rukne ke lie bol kar Prem order lene chala jata hai. Prem order leke aata hai aur Poonam ke samne aa kar baith jata hai.

Poonam: Oh no!

Prem: Kya hua?

Poonam: Samne mere tau ji baithe hue hain.

Prem: Ohh! Ye sahi hai. Tumhare ghar wale bacchon ko kahin bhejte nahi hain, aur khud yahan aate hain.

Poonam: Yahan se chalo. Isse pehle ki wo hume dekh le.

Prem: Don’t worry! Let’s exchange our seats.

Prem aur Poonam apni seats exchange kar lete hain, jisse Poonam ke tau ji ab Poonam ko nahi dekh paenge.

Poonam: Tumhe lagta hai ki wo mujhe nahi dekh paenge?

Prem: Hmmm! Unhe ab pata nahi chalega.

Poonam: (shant hote hue) Okay!

Prem: Tum itna darti kyun ho?

Poonam: Maine pehli baar ghar par doston ke sath ghumne ke lie permission mangi thi. Jo mujhe bhot mushkil se mili. Agar tau ji ne dekha ki mere sath sirf tum ho to wo zarur galat hi samajh lenge.

Prem: Tum ek kaam karna ghar par jake jo bhi hua hai wo bata dena apne parents ko.

Poonam: Mere parents kuch nahi kehte. Par baki log bhot strict hain.

Prem: Thank God! Mere ghar par aisa kuch nahi hai. Waise tumhare ghar me kon kon hain?

Poonam: Mere Maa Papa, meri choti behen, aur tai ji tau ji.

Prem: Tumhare cousins?

Poonam: Han tai ji tau ji ke do bete hain. Wo dono hi foreign me settled hain. Aur tumhari family me?

Prem: Meri family me…. mere Mom Dad, bhaiya, mere Chachu-Chachi aur unka ek beta.

Poonam: Okay! Tumhare bhaiya kya karte hain?

Prem: Wo graduation ke final year me hain.

Poonam: Oh! Means kafi bade hain.

Prem: Han! 5 years.

Poonam: Aur tumhare chachu ka beta?

Prem: Use tum janti ho. Sameer… Apni class wala.

Poonam: (In shock) Kya? Sameer? Par usse to tumhari bhot ladayi hoti hai.

Prem: Yeah! Unfortunately, wo mera cousin hai. Lekin chachu mujhse jyada pyar karte hain. Wo bhi uski harkaton se pareshan hain. Tumne is baare me pucha islie maine tumhe bata dia, nahi to main ye kisi ko batana nahi chahta.

Poonam: Main bhi kisi ko nahi bataungi.

Prem: (smiles) Thanks!

Poonam bhi muskurati hai.

Prem: To ab chale?

Poonam: Hmm.

Dono wahan se bahar nikalte hain aur scooty par baithte hain. Prem scooty start karta hai aur dono fir se baatein karne lagte hain.

Poonam: Tumhe ghar wale scooty se aane jane dete hain? Mana nahi karte?

Prem: Dad se deal ki thi maine, agar 10th me school me top kia to scooty laoge. Aur scooty aa gayi. Par jyada dur le jane nahi dete abhi. Bas school ya uske aas paas.

Poonam: Mujhe bhi mere Papa ne bola tha ki 10th ke baad wo ghar me computer laenge.

Prem: So, laye?

Poonam: Han!

Prem: Mujhe lagta hai mere aur tumhare parents ek jaise hain.

Poonam: Shayad… kuch-kuch…

Prem: Tum apne ghar me kis se sabse close ho?

Poonam: Maa se.

Prem: (muskura kar) Wow! Main bhi… Mujhe to lagta hai, ki Mom ke bina main reh hi nahi sakta. Bachpan me bhi jab Mom nani ke ghar par jati thi to bhaiya to jate nahi the, even mujhe bhi wahan jana jyada khaas acha nahi lagta tha. Par Mom ke bina main reh nahi sakta tha, islie har baar jata tha.

Poonam Prem ki ye baat sunkar muskurati hai.

Prem: Tumhe pata hai, main to ab tak gaya tha. Bas last time 10th ki wajah se nahi gaya. Aur mera bilkul mann nahi lag raha tha Mom ke bina.

Poonam: (haste hue)To tum school kaise jate ho?

Prem: Haha! Dad to kehte the ki pehle main school bhi nahi jata tha. Mom ko apne sath leke jata tha. Kuch din to school ke principal ne allow kia par fir unhone bhi mana kar dia.

Poonam: Fir kya hua?

Prem: (Haste hue) Hone kya tha, main fail ho gaya.

Poonam: (Haste hue) Hey bhagwan! Tum nursery me fail hue the Prem.

Prem: Please haso mat.

Poonam: Tum khud bhi has rahe ho.

Aur isi tarah baatein karte hue wo dono Poonam ke ghar ki gali ke bahar phoch jate hain.

Prem: Ye lijiye mam… aapki gali aa gayi.

Poonam: (scooty se utar kar) Thanks!

Prem Poonam ko dekh raha hai aur muskura raha hai.

Poonam: To main chalti hu fir.

Poonam jane lagti hai.

Prem: Poonam!

Poonam: (palat kar) Hmm!

Prem: Aaj tumhe…. Mere sath… kaisa laga?

Poonam: Matlab?

Prem: Matlab… Bore to nahi hui na meri company me?

Poonam: (smiles) Nahi!

Prem: (smiles) To matlab ab hum aage bhi baat kar sakte hain? Tumhe ab ajeeb to nahi lagega?

Poonam: Tumhe kisne kaha ki mujhe ajeeb lagta tha.

Prem: Kaha to kisi ne nahi, par mujhe ye feel hota tha. Even ye mere sath bhi tha. Par ab nahi hai. Kyunki aaj to humne jo baatein ki wo sab maine kisi aur se bhi nahi ki. Tumse frank hone ke chakkar me maine apni kuch jyada hi pole khol di.

Poonam Prem ki baat par dhire se smile karti hai.

Prem: To ab se… we are normal na?

Poonam: Yeah!

Prem: Okay! Good. To chalo fir main chalta hu. Kaho to tumhe tumhare ghar chor du?

Poonam: Nahi! Pagal ho?

Prem: (Haste hue) Hehe! Nahi! Par tum cute ho. Take care of yourself.

Poonam: You too.

Prem: Okay! Fir kal milte hain. Bye!

Poonam: Bye!

Poonam apne ghar ki taraf badhti hai aur Prem apne ghar ki taraf. Dono ke face par ek alag hi muskurahat hai. Ye un dono ke beech dosti ki shuruaat thi. Par ye wo bhi nahi jante the ki ye dosti kitni aage jaegi.

Han han janti hu ki wada kia tha is baar timely story post karungi. Par ki karaan? Ik jaan te sau kamm. Hor kujh nahi to bimar hi kar ditta. Ae vi koi gall hoyi?

Hehe! Deri ke lie mafi doston. Ab maine wada hi nahi karna, lekin puri koshish rahegi ki “Hamsafars…” ka ek episode roz raat 8 baje aap logon tak phocha saku.

Aap log please apna pyar aur sath banaye rakhiye, zindagi ka maza lijiye, ache kaam karte rahiye, aur… aur… aur…

Keep Feeling the Love……. ❤

2 thoughts on “HUMSAFARS…(E-2)

Add yours

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Madhusudan Singh

Hindi Poems

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

%d bloggers like this: