HUMSAFARS… (E-1)

Episode-1

“Doctor! Doctor! Dekhiye inhe kya ho gaya hai?”
Prem, uske bhaiya Pratap aur uske Papa teeno Prem ki bhabhi Suman ko lie hospital me aaye hain. Wo log kafi pareshan hain aur hospital me aate hi chilla rahe hain. Ek nurse unhe wahin rokti hai aur wait karne ke lie kehti hai.

“Aap jaldi doctor ko bulaiye na.” Pratap yani patient ke husband nurse par chillate hain.

Nurse: Sir! Wo aa rahi hain aap please thoda sabr rakhiye.

Nurse ke ye kehte hi samne se doctor aa rahi hai.

“Poonam!” Prem hairani se ye naam leta hai. Use purane waqt ki sari jhalkiyan dikhne lagti hain, jab wo Poonam ko bhot ache se janta tha aur wo uski bhot achi dost thi.

Prem aur uska pariwar isi shehar se belong karta hai. Lekin kuch saal pehle wo is shehar ko chhod kar apni kismat aazmane kahin aur chale gaye the. Aur ab wo fir se apne hi shehar wapas laut aaye hain. Lekin wapas aane ke baad aisa lagta hai ki na wo is shehar ko aur na ye shehar unko pehchanta hai. Pehle jab wo yahan rehte the, to har koi unhe janta tha. Aur itne saalon baad maano yun lagta hai ki fir se unhe apni pehchan banani padegi. Yahan par jo log unhe jaante the, wo bhi ya to kahin chale gaye hain, ya unki nayi pidhi unhe pehchanti nahi hai. Lekin Poonam…. Poonam to Prem ki sabse achi dost thi, wo bhala use kaise nahi pehchanegi?

Par ye kya? Poonam ne to use dekh ke react bhi nahi kia. Aisa kyun hai? Kya wo Prem ko pehchan nahi payi hai?

Namaskaar doston! Aapko yaad hoga ki maine aap sabhi ko is kahani ka kuch ansh bataya tha. To chaliye aaj is kahani ki shuruaat karte hain. Prem ki bhabhi 3 months pregnant hain. Jinki tabyat achanak hi kharab ho gayi hai aur unhe hospital leke aaya gaya hai. Hospital me wo emergency me admit hoti hain.

“Doctor! Ise achanak kya ho gaya hai abhi tak to ye thik thi.”

Prem apne bhaiya ki awaz se fir se reality me aata hai.

Poonam: Main abhi examine karne hi ja rahi hu, uske baad aap logon ko batati hu ki inhe kya hua hai?

Pratap (Prem’s elder brother): Okay! We are waiting here.

Prem’s Dad: (Pratap se) Chinta mat kar beta sab sahi hoga.

Kuch der baad Dr. Poonam bahar aati hain. Pratap usse puchta hai, “Kya hua? Kya problem hai use?”

Poonam: Actually! Your baby is no more. So, ye sab usi wajah se ho raha hai. Aur ye kafi time pehle ho chuka hai. Isilie ab body wo chiz accept nahi kar rahi aur bahar push kar rahi hai use. Aap chahe to kisi aur doctor ko dikha sakte hain. Aur chahe to hum fir aage ka procedure kar sakte hain.

Pratap: Nahi! Aap aage ka procedure kar sakti hain doctor. Ye pehli baar nahi hua hai uske sath. Pehle do baar bhi ho chuka hai aisa. Par is tarah se dard use pehli baar hua hai.

Poonam: Agar unhe ye sab pehle bhi ho chuka hai to aap logon ko unka proper ilaaj krana chahiye tha aur uske baad hi baby ke baare me sochna chahiye tha.

Pratap: Doctor! Ilaaj chal raha tha aur sab sahi hi ja raha tha, tabhi humne ye step do saal baad dobara lia par fir se wahi sab…

Poonam: Thik hai. Hum aage ki baat baad me karte hain. Pehle main patient ko dekhti hu.

Poonam ye keh kar wahan se chali jati hai. Prem ab bhi use dekh raha hai. Poonam ne bhi use dekha hai par Prem samajh nahi pa raha ki wo use pehchani kyun nahi?

Prem: Don’t worry bhaiya. Sab thik ho jaega.

Kuch der baad Poonam fir se bahar aati hai aur kehti hai, “Abortion ho gaya hai. Aap log chahe to unhe aaj ke lie yahan rakh sakte hain, nahi to ghar bhi le ja sakte hain. Ye aap ki marzi hai.”

Pratap: Doctor! Mujhe aapse kuch baat karni hai. May I?

Poonam: Yeah! Sure.

Poonam unhe apne cabin me le aati hai aur sab wahan beth jate hain.

Prem’s Dad: Doctor sahiba! Baat ye hai ki ilaaj karane ke baad bhi ye sab kyun ho raha hai uske sath? Dekhiye hume koi jaldi nahi hai. Aur aap hume clearly bata sakti hain, agar ye possible nahi bhi hai to, kyunki hume apni bahu ki jaan jyada pyari hai.

Poonam: Kya aapke ghar me koi aur lady nahi hain?

Prem’s Dad: Ji nahi! Pehle inki Maa thi, Par wo kuch saal pehle hi chal basi. To bas hum hi hain.

Ye sun kar Poonam shock me aa jati hai. Kuch seconds baad wo kehti hai, “Okay! To mujhe unke husband se akele me baat karni hai.”

Prem: Okay! Poonam! (Prem aur Poonam ki nazarein milti hain) Chaliye Dad! Hum bahar chalte hain.

Prem aur uske Dad room se bahar chale jate hain.

Pratap: Boliye!

Poonam: Dekhiye aisa nahi hai ki wo Maa nahi ban sakti. Aaj kal is tarah ki complications har kisi couple ke beech hoti hai. Iski wajah stress aur pareshani bhi hai. Maine abhi koi tests to kie nahi hain. Par main apne experience se keh sakti hu ki jo bhi problems hain wo solve ho jaengi. Aap inhe kuch din baad yahan leke aaiye, hum inke tests karwate hain aur jo purane tests hue hain unki reports bhi sath me laiyega.

Pratap: Hum kitne din baad aaye doctor?

Poonam: Abhi unhe aaram ki zarurat hai, to lagbhag 15 to 20 days baad. Ek chiz aur bata dijiye, aap unhe discharge karana chahte hain ya yahin rakhna chahte hain ek din.

Pratap: Wo yahin rahe to acha hai. Kyunki ghar par hum teen hi hain, koi aur nahi hai dhayan rakhne wala.

Poonam: Meri ek advice hai agar aapko sahi lage to, aap ek permanent house maid dhund sakte hain, ya yahan se koi nurse.

Pratap: Ji zarur. Aap please ek do baar aa jaiyega use check karne.

Poonam: Okay! Uski aap tension na le.

Pratap: Thank you doctor!

Poonam: (smiles) Your welcome!

Pratap wahan se uth kar chala jata hai. Poonam wahin baithi hui hai. Wo sochti hai, “Oh God! Prem ki Mom nahi rahi. Ye sab kab hua? Prem to apni Mom ke bhot close tha. Should I talk to him????? Nahi… Usne khud hi sabse dosti todi hai. Main nahi jaungi.” Ye soch kar wo us room se bahar nikal jati hai.

Uske bahar nikalte hi piche se use koi pukarta hai, “Poonam!”

Wo palat kar dekhti hai. Samne Prem khada hai. Ek halki si smile hai uske chehre par. Poonam wahin khadi rehti hai. Prem aage badhta hai aur Poonam ke paas, uske samne jake khada ho jata hai.

Prem: Poonam!

Poonam: Dr. Poonam!

Prem: Yeah! I know tum ab doctor ban gayi ho. Wo bhi gynecologist, jo tum chahti thi.

Poonam: Sorry! Main thoda busy hu to aapko kuch kehna hai to kahiye, nahi to mujhe jana hai.

Prem: Tum mujhe nahi pehchani kya? Main Prem hu. Yaad hai na humne sath me….

Poonam: (Prem ki baat kaatate hue) Sorry! Par mujhe purani chize yaad nahi rehti.

Prem: To tum mujhe nahi janti?

Poonam: Mujhe aur bhi patients ko dekhna hai. So, please aap hatenge?

Prem: Han! Par tum sach me mujhe nahi janti ya naraz ho? Mujhe pata hai, maine bhot sari galatiyan ki hain. Jiske lie main maafi mangna chahta hu. Tumse se aur sab se.

Poonam: Mujhe der ho rahi hai.

Prem: Okay! To tum yahan se free kab hoti ho? Mujhe tumse baat karni hai.

Poonam: Par mujhe aapse koi baat nahi karni hai.

Prem: Poonam! Please. I know meri galati hai par is tarah se treat mat karo na.

Poonam aage badhne lagti hai. Prem piche se use awaz deta hai, “Main wait karunga tumhare lie.”

Poonam wahan se chali jati hai.

Sham ke waqt Poonam hospital me patients ko dekhne ke lie round laga rahi hai, aur wo Prem ki bhabhi ke room me phochti hai. Prem bhi room me hi baitha hua hai.

Poonam: Ab kaisa feel kar rahi hain aap?

Suman (Prem’s Bhabhi): Yeah! Better. Par pata nahi kyun chakkar aa rahe hain aur thodi behoshi bhi lag rahi hai.

Poonam: Wo Anaesthesia ki wajah se hai. Kal tak thik ho jaega. (after a pause) Aapke husband bata rahe the ki ye pehle bhi hua hai aapke sath.

Suman: Han! Do baar.

Poonam: Kitne time baad hua tha?

Suman: Wo to first month me hi… Is baar wo time nikal gaya tha tabhi hume laga ki ab sab thik hai.

Poonam: Okay! Abhi aapko aaram ki zarurat hai. Maine aapke husband se kaha hai ghar par nurse ya maid rakhne ke lie.

Suman: Arey! Uski kya zarurat hai? Main thik hu.

Poonam: Nahi! Aapko abhi rest karna chahiye. Kuch din ke aaram se kafi health sudhregi aapki.

Prem: Main ye chiz bhabhi se abhi bol raha tha. Acha hua tumne bhaiya se keh dia. Thank you Poonam!

Suman: Tum doctor ko jante ho kya Prem?

Prem: Han! Bhabhi. Hum dono ek hi school me padhte the. Yaad hai na Poonam?

Poonam: (Prem ki taraf na dekhte hue) Ye sahi bol rahe hain. We were in same class.

Prem khush hota hai ki chalo, kam se kam ab Poonam ne use pehchana to.

Suman: Waise Prem kafi time ho gaya hoga na tum dono ko mile hue. Kyunki college to tumne yahan se kia nahi tha.

Prem: Hmmm. 6-7 saal shayad.

Poonam: 9 saal.

Prem Poonam ki taraf dekhta hai aur Poonam bhi Prem ki taraf. Prem guilty feel kar raha hai. Poonam nazare hata leti hai aur Suman se kehti hai, “Aap ab thik hain. koi problem ho to nurse ko awaz laga dijiyega. Raat ko dusre doctor aate hain. Koi bhi problem hogi to wo honge yahan par.”

Ye keh kar wo room se bahar nikalne lagti hai. Tabhi mud kar Prem se kehti hai, “Aap kal inhe ghar le ja sakte hain.”

Prem: Okay!

Poonam wahan se chali jati hai. Prem uske piche aata hai. Poonam apne cabin me ja kar apna saman nikal rahi hai. Wo cabin se bahar nikalti hai aur Prem fir se uske samne hai. Poonam use nazarandaz kar aage badh jati hai.

Prem: (Poonam ke piche aate hue) Poonam! Please suno na.

Poonam: (ruk kar) Ab to maine pehchan lia na. Tum aur main same class me the. Bas ab kya problem hai?

Prem: Mujhe tumse kuch baat karni hai.

Poonam: Mujhe nahi karni.

Prem: Poonam! Please, meri baat sun to lo ek baar.

Poonam aage badhe ja rahi hai aur Prem Poonam ke piche piche chalte hue bol raha hai.

Poonam hospital ke bahar nikal gayi hai. Prem bhi uske piche aa gaya hai.

Prem: Please yaar Poonam.

Poonam: Problem kya hai tumhari? Mujhe nahi baat karni.

Prem: Par kyun?

Poonam: Kitne saal ho gaye hain hume baat na kie hue? Tumhe ye tak to pata nahi hai, aur tum mujhse puch rahe ho ki kyun nahi baat karna chahti.

Prem: Yaar main bhul gaya tha ki kitna time hua hai. Par mujhe baat karni hai tumse.

Poonam: I am not interested.

Prem: Please yaar.

Poonam: Itne saalon se kahan the tum? Koi koshish ki milne ki? Ya contact karne ki? Aaj bhi main tumhe achanak yahan mil gayi, nahi to tumhe kya pata hai ki kahan hai Poonam? Kahan hai Nupur? Kahan hai Manav? Kahan hai Disha?

Prem: Mujhe unhi ke baare me baat karni hai na.

Poonam: Tumhe samajh nahi aa raha hai kya? Mujhe nahi karni hai koi bhi baat.

Prem: Meri majboori thi yaar.

Poonam: Ye kis type ki majboori hai ki apne friends ko ek din bina bataye chhod kar chale jao aur 10 saal baad aao ki mujhe sabse ke baare me baat karni hai. Wo bhi dhundha nahi hai tumne kisi ko, coincidently mil gayi hu tumhe main.

Prem: 10 nahi 9 saal. Tumne andar 9 saal bola tha.

Poonam: 9 saal 10 mahine to be exact, ab thik hai?

Prem: Tumhe itna sab pata hai. Aur tum bol rahi ho ki tum mujhe janti nahi ho. Ye kyun kahan tumne? Bolo?

Poonam: Main tumhe koi bhi explanation dena zaruri nahi samajhti.

Prem: Yaar please! Tum mili ho aur tumhare through sab mil sakte hain mujhe.

Poonam ab parking me se apni scooty nikalti hai aur bolti hai, “Tumhe sabke ghar to pata hain na. Jao khud milo unhe jake.”

Ye kehke Poonam wahan se chali jati hai. Prem maayus wahi khada rehta hai.

Ye sab kyun ho raha hai? Poonam jo Prem ki itni achi dost thi, wo usse itni naraz kyun hai? Aisa kya kia hai Prem ne? Ye janne ke lie humara next episode padhna mat bhuliyega. Tab tak aap wait kijiye. Dusra episode bhi jaldi hi aapke samne pesh karenge. Stay connected friends and Keep feeling the love… ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Madhusudan Singh

Hindi Poems

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

%d bloggers like this: