SOCHA NA THA (E-10)

RecapAnuj aur Shivani beach par gaye the jahan Anuj ne Shivani ko apne dil ki baat bol di thi. Wo dono ghar phoch chuke hain. Anuj Shivani se baat karna chahta hai. Dekhte hain wo dono kya baate karte hain…

Shivani subah bhi Anuj ke sath uski bike ke piche baith kar aayi thi par sham hote-hote sab kuch badal chuka tha. Ab use Anuj ki bike par baithna aur baith kar uske kandhe par hath rakhna sab me ek ajeeb se jhijhak mehsoos ho rahi thi. Khair! Anuj Shivani ko uske ghar chhod deta hai aur apne ghar aa jata hai.

Shivani dekhti hai ki ghar me sab busy hain kisi ne dhyan nahi diya hai ki wo aa gayi hai. Isi ka fayda utha kar wo jaldi se apne room me chali jati hai aur apne bheege hue kapde change kar leti hai. Anuj bhi apne ghar chala jata hai. Wahan uski Mom Anuj ka wait kar rahi hain. Jaise hi Anuj ghar me ghusta hai wo use rok leti hain.

Anuj’s Mom: Kaisa raha sab? Usse bola tune? Aur ye tere kapde kyun bheeg rahe hain?

Anuj: Mom! Abhi aata hu, pehle kapde change kar lu.

Anuj’s Mom: Thik hai. Jaldi aa.

Jab tak Anuj change karta hai, uski Mom uske lie coffee bana deti hain.

Anuj’s Mom: Ab bata kya hua?

Anuj: Kuch nahi hua. Maine bolne ki koshish ki thi, par bol nahi paya.

Anuj’s Mom: Tu pagal hai kya? Kyun nahi bol paya? Tum dono itne ache dost ho, wo tujhe itne ache se samajhti hai. Wo janti hogi ki tere dil me kya hai, par use bol to kam se kam.

Anuj: Bol dunga Mom. Don’t worry! Aur ye coffee bhot achi bani hai. Abhi main apne room me ja raha hu, baad me baat karunga.

Anuj ye sab keh kar apne room me chala jata hai. Use Shivani se baat karne ki jaldi hai. Wo room me phochta hai aur sabse pehle Shivani ko call karta hai. Dusri taraf se phone uthta hai.

Anuj: Hello! Shivani!

Par wo Shivani nahi uski choti behen Tani hai.

Tani: Hello! Main Tani bol rahi hu.

Anuj: Oh! Hi Tani! Shivani ko phone dena.

Tani: Kyun? Abhi to mile the na, ab kya kaam aa gaya?

Anuj: Nahi…. Koi kaam nahi hai, bas aise hi. Kya main usse baat kar sakta hu?

Tani: Okay! Hold karo.

Tani Shivani ko phone de deti hai aur Shivani ke paas khade ho kar uske expressions note kar rahi hai.

Shivani: (khud ke expressions ko show na karne ki koshish karte hue) Hello!

Anuj: Hello! Shivani!

Shivani: Han! Bolo Anuj.

Anuj: Kya main baat kar sakta hu?

Shivani: Koi zaruri kaam tha?

Anuj: Zaruri kaammmm… Nahi! Bas baat karne ka mann tha.

Shivani: To fir main baad me baat karungi.

Anuj: Kab?

Shivani: (dhire se) Anuj!

Anuj: (dhire se hi) Shivani!

Shivani: Baad me…

Anuj: Abhi…

Shivani: Abhi sabke sath hu… Raat ko…

Anuj: Tab tak main kya karu?

Shivani: (smiles) So jao.

Anuj: Raat ko baat karogi? Promise?

Shivani: Han!

Anuj: Pehle promise karo.

Shivani: (apni muskurahat chhupate hue) Okay!

Anuj: Bolo promise!

Shivani: Promise!

Anuj: (smiles) That’s better.

Shivani: (smiles) Bye!

Anuj: Bye!

Dono phone rakh dete hain. Aur Anuj ab raat hone ka intezaar karne lagta hai. Dhire dhire waqt guzarta hai aur raat ho jati hai, par Shivani ka call nahi aata. Anuj wait karta rehta hai. Raat ke 11 baje, Anuj ke phone ki ringtone bajti hai. Anuj jaldi se phone dekhta hai. Ye Shivani ka hi call hai. Anuj phone uthata hai.

Anuj: Hello!

Shivani: Yes!

Anuj: Itna time lagaate hain?

Shivani: Han! Ab ghar me hu to time to lagega hi. Ye flat nahi hai ki khana khaya aur aa gayi baat karne.

Anuj: Okay! Okay! Ab to free ho na.

Shivani: Han! Bolo.

Anuj: Kuch nahi, bas tumse baat karne ka mann tha.

Shivani: (smiles) Okay! To bolo… Kya baat karni hai?

Anuj: Tum kaisi ho?

Shivani: Arey! Abhi to mile the, to kyun puch rahe ho? Waisi hi hu jaisi chhod ke gaye the.

Anuj: Yaar tum samajhti nahi ho.

Shivani: (muskurate hue) To tum samjha do.

Anuj: (pareshan hote hue) Kuch nahi… rehne do.

Shivani: (muskurate hue) Achaaa! Tum kaise ho?

Anuj: Main?

Shivani: Han! Tum.

Anuj: Isse pehle itna acha to kabhi nahi tha, jitna ab hu.

Shivani dhire se hasti hai.

Shivani: Aur ghar par koi kuch bol raha tha?

Anuj: Mom!

Shivani: Kya?

Anuj: Yahi ki bheeg kaise gaya? Ab kya batata ki ek ladki ne mujhe bhiga dia. Islie bahana bana dia.

Shivani: (haste hue) Okay! Good.

Anuj: Shivani!

Shivani: Han!

Anuj: Mujhe pata nahi kyun jaldi se wapas jane ka mann hai.

Shivani: Kyun?

Anuj: Yahan tumse baat nahi ho pati. Kabhi tum busy hoti ho to kabhi main. Wahan hum jab chahe aaram se baat kar sakte hain. Ek sath, ek dusre ke samne reh sakte hain.

Shivani: Ek week ki hi to baat hai, uske baad to fir se wahin jana hai.

Anuj: Hmmmm! Par is ek week main kya karu? Mujhe tumhe abhi bhi dekhne ka mann kar raha hai. Wahan hota to jaldi se tumhare paas aa jata.

Shivani: Udas nahi hote.

Anuj: Okay! Par tum ek kaam karo fir.

Shivani: Kya?

Anuj: Video call on karo. Main uspe tumhe dekh lunga.

Shivani: No! No! No! Tani isi room me soti hai. Phone pe baat to main fir bhi kar leti hu, par video call pagal ho kya?

Anuj: Please! Ek baar. Maan jao na.

Shivani: Tum nahi manoge?

Anuj: Na!

Shivani: (dhire se muskurati hai) Okay!

Aur Anuj Shivani ko video call karta hai.

Anuj: Hi!

Shivani: Hi!

Anuj: Ye mera room hai, dekho.

Shivani: Hmmm! Aur ye mera room hai, jisme meri choti behen Tani bhi hai aur wo jaag rahi hai.

Anuj: Tumne usse kya kaha hai?

Shivani: Kehna kya hai? Yahi kaha hai ki tum zid kar rahe the video call ki.

Anuj: Tumhe hamesha mujhe hi phasana hota hai. Waise hi tumhare gharwale mujhe pasand nahi karte.

Shivani: Ye kisne kaha tumse? Agar tum pasand nahi hote to tumhare ghar par mere lie rishta kyun bhejti? (haste hue) Wo baat alag hai ki tumne uske lie mana kar dia tha.

Anuj: Ab hamesha usi baat ke lie sunati rehna mujhe. Maan raha hu na galati ho gayi.

Shivani: Beach par to bol rahe the ki acha hua.

Anuj: Han! Acha islie hua na ki main shadi se pehle hi tumhe jaan gaya ki tum kaisi ho.

Shivani: Han! Kyun nahi.

Anuj: Aur tumhe kya lagta hai?

Shivani: Kis bare me?

Anuj: Mere baare me.

Shivani: Abhi socha nahi hai. Ache se soch samajh kar bataungi. Aur ab main sone ja rahi hu, kal baat karungi.

Anuj: Arey! Kam se kam bata to do.

Shivani: Soch ke bataungi, aakhir meri life ka sawal hai.

Anuj: Oh God!

Shivani: Okay! Bye! Good night!

Anuj: (smiles) Good night!

Call khatam ho jati hai aur Shivani kuch soch kar muskurane lagti hai.

Tani: Kyun tadpa rahi ho bechare ko. Bol do.

Shivani: Usne mujhe 6 mahine wait karaya hai, aise kaise bol du. Abhi to pareshan karna hai mujhe.

Tani: (haste hue) To matlab abhi 6 mahine aur hain tumhari shadi me.

Shivani: (haste hue) Nahi! Pagal hai kya. Bas main dekhna chahti hu ki kitna patience hai janaab me.

Tani: Okay! All the best!

Shivani: Thank you little sis!

Tani: Good night!

Shivani: Good night!

Ek week bhi nikal jata hai aur din aata hai Anuj aur Shivani ke wapas jane ka. Jis tarah pehle Shivani ke ghar wale use airport par lene aaye the, usi tarah is baar Anuj ke ghar wale use airport par chhodne aaye hain. Aur Anuj ki Mom Shivani se is tarah se baate kar rahi hain jaise wo Anuj ki wife ho. Ye sab Shivani ko to ajeeb lag hi raha hai, sath me Anuj aur uski bhabhi bhi sir pakad ke baithe hain.

Anuj’s Mom: Shivani beta! Maine na iske lie laddu rakhe hain. Tu dhyan rakhna ki ye doston me na baate, tum dono hi khana. Ye to kuch sunta nahi hai, to maine socha tujhse hi keh du, tu to dhyan rakhegi har chiz ka.

Shivani: Ji Aunty!

Shivani Anuj ki taraf dekhti hai. Anuj dusri taraf dekhne lagta hai. Anuj ki Mom ko sambhalne Anuj ki bhabhi jati hai aur wo unhe Anuj ke paas bhej deti hai.

Bhavna (Anuj’s bhabhi): Hi!

Shivani: Hi!

Bhavna: Sorry! Mom thodi jyada excited ho jati hain kabhi kabhi.

Shivani: No! No! It’s Okay!

Bhavna: So! Sab acha chal raha hai?

Shivani: Yeah! Perfect!

Bhavna: Dekho! Baat actually ye hai ki… Please tum bura mat manna…

Shivani: Nahi! Boliye!

Bhavna: Baat ye hai ki Anuj tumhe bhot pasand karta hai.

Shivani: Ohh! Okay!

Bhavna: Aur hum sab ko lagta hai ki pata nahi wo ye sab tumse kabhi bol bhi paega ya nahi.

Shivani: Aur ye baat usne aap sab ko bata rakhi hai?

Bhavna: Nahi! Nahi! Usne kisi ko kuch nahi bataya.

Shivani: To fir?

Bhavna: Actually! Jab hum log tumhari family se mile the, tabse hi wo tumhe pasand karta hai, aur family ki baaton me aake usne shadi ke lie mana to kar dia, par uske dil me tum hi thi. Delhi jake jab wo tumse mila aur wo khush rehne laga to hum sab ko khud hi ye baat samajh aa gayi.

Shivani: Lekin! Jis wajah se aap logon ne shadi ke lie mana kia tha, wo wajah to ab bhi hai na.

Bhavna: Hume sirf Anuj ki khushi chahiye. Agar wo tumhare sath khush hai to hume koi problem nahi hai.

Shivani: Okay!

Bhavna: Maine ye sab tumhe islie kaha ki tumhare mann me humare lie koi misunderstanding na rahe. Iske baad bhi jo tumhari marzi hogi wo hume manzoor hoga.

Shivani: Okay! Meri marzi kya hai, wo aapko Anuj ke through pata chala hi jaega. Abhi bas main itna kehna chahti hu ki hum ache dost hain.

Bhavna: Okay!

Itne me Anuj Bhavna aur Shivani ke paas aata hai.

Anuj: Shivani! Time ho gaya hai, chale?

Shivani: Yeah! Okay bhabhi. Kabhi bhaiya ke sath Delhi aaiye.

Bhavna: Anuj ne to kaha nahi, tum invite kar rahi ho.

Anuj’s Mom: Yahi to fark hota hai, bete aur bahu me.

Shivani: (muskurate hue) Okay! Bye everyone!

Sab log dono ko Bye karte hain. Dono plane ki taraf chale jate hain.

Anuj aur Shivani plane me baith jate hain.

Anuj: Shivani! I am sorry! Wo Mom kuch jyada hi bol rahi thi aaj.

Shivani: Hmm! Lagta hai unhe main pasand thi, bas wo tum hi the jisne is rishte ke lie mana kia tha.

Anuj: Aisa kuch nahi hai. Waise bhabhi tumse kya baat kar rahi thi?

Shivani: Wo bas aise hi.

Anuj: Okay!

Shivani pani pi rahi hai aur Anuj Shivani ko dekh raha hai. Shivani use tirchhi nazaron se dekhti hai.

Shivani: Kya dekh rahe ho?

Anuj: Tumhe!

Shivani: Kyun?

Anuj: Kya main tumhe dekh nahi sakta?

Shivani bas muskurati hai aur khidki se bahar dekhne lagti hai. Anuj bhi Shivani ke sath khidki se bahar dekhne lagta hai. Dono badalon ke samandar me hawayijahaaj ko gote khate hue dekh rahe hain aur dono ko hi ye sab behadd pasand aa raha hai.

Anuj: Kya dekh rahi ho?

Shivani: Dekh rahi hu ki ye badal upar se kaise lagte hain. Waise to kayi baar dekh chuki hu, par hamesha hi mujhe yakeen nahi hota ki main in badalon ke upar hu. Ek ajeeb sa ehsaas hota hai ye sab dekh ke.

Anuj: Mujhe kabhi ek baat samajh nahi aayi?

Shivani: Kya?

Anuj: Tum itne ache se kaise mere dil ki baat explain kar deti ho. Mujhe bhi hamesha aisa hi feel hota hai. Par is sab ko words me explain kaise karu ye kabhi samajh nahi paya, lekin aaj tumne itni aasani se kar dia. Kaise?

Shivani: Kyunki shayad…. Hum dono… Ek sa hi sochte hain…

Anuj: To kya jo main tumhare lie sochta hu, tum bhi wo mere lie sochti ho?

Shivani: Shayad… Ab iska pata to tumhe lagana hoga. Waise ye to mujhe ab tak nahi pata ki tum mere bare me sochte kya ho?

Anuj: Ye galat baat hai! Tumhe sab pata hai.

Shivani: Nahi to…

Anuj: Arey! Kya janna hai? Tumhe to Mom ne bhi airport par bola tha sab.

Shivani: Tumhari Mom to pehle bhi pasand karti thi mujhe. Mana to tumne hi kia tha na.

Anuj: Shivani!

Shivani: (smiling) Han! Anuj!

Anuj aur Shivani dono ek dusre ko dekh kar smile karte hain.

Anuj: (smiling) Tumhe pata hai, tum bhot shaitan ho.

Shivani: Han! Ye to mujhe pata hai. Kuch aur batana hai?

Anuj: Han! Par samajh nahi aata ki kaise batau.

Shivani: Koi baat nahi. I will wait.

Anuj: Aise hi nahi samajh sakti?

Shivani: Naaaa…

Anuj: Bhot nirdayi ho tum.

Shivani: Jo bhi samjho.

Anuj: Okay! Thik hai. Par apna hath to do.

Shivani: Wo kis lie?

Anuj: Mujhe pakadna hai.

Anuj Shivani ka hath pakad leta hai aur apna sir Shivani ke kandhe par rakh leta hai.

Shivani: Ye achi baat nahi hai. Aap sharafat bhul rahe hain.

Anuj: Chup bhi karo.

Shivani chup ho jati hai aur Anuj ko is tarah uske kandhe par sir rakhe dekh smile kar rahi hai. Kuch der baad Anuj Shivani ke sir ko apne kandhe par rakhwa deta hai aur khud Shivani ke sir par apna sir rakh kar baith jata hai. Dono ke dusre ke pehlu me is tarah aankhe band kar lete hain.

Kuch der baad Delhi aa jata hai aur plane land ho jata hai. Shivani aur Anuj ek cab book karte hain aur apne flats ki taraf badhte hain. Cab me bhi Anuj ne Shivani ka hath pakada hua hai. Dono ke beech fir se ek khamoshi hai, par ye khamoshi pehli khamoshi se behtar hai, kyunki ab dono hi ek dusre ke dil ka haal jante hain. Bas baat itni si hai ki abhi bataya kisi ne nahi hai.

Dono apni building ke neeche phochte hain. Anuj ne ab bhi Shivani ka hath pakada hua hai aur wo Shivani ko dekh raha hai. Shivani Anuj ko yaad dilati hai, “Anuj! Ghar aa gaya hai.”

Anuj: (Hosh me aate hue) Uhm! Hmm! Ohh! Okay! (Cab wale se) Kitne hue bhaiya?

Anuj cab wale ko kiraya deta hai. Ab Anuj aur Shivani dono lift ki taraf badhte hain. Dono lift me hain aur ab bhi chup hain. Anuj Shivani ko dekhta hai aur Shivani Anuj ko. Dono ki aankhen ek dusre se sab kuch kehna chahti hain par lab hain ki khamosh hain. Dono bas ek dusre ko dekh kar muskura rahe hain. Wo floor bhi aa chuka jab dono ko lift se nikalna hai. Lift se nikalne ke baad dono ek dusre ke sath ek dusre ke flats ke samne khade hain.

Shivani: Okay! To good night!

Anuj: Hmmm! Okay! Good night!

Dono apne apne flats ki taraf badhe. Shivani ne apne flat ka door khola aur Anuj use hi dekhta raha hai. Shivani flat ke andar chali jati hai aur Anuj ko muskurate hue dekhte dekhte flat ka darwaza band kar deti hai. Door band hone ke baad use apne andar ek ajeeb se gudgudi ka ehsaas hota hai. Wo khud me hi muskurati hai. Abhi flat me bas wahi aayi hai, Kirti aur Simran ab bhi apne ghar par hi hain. To Shivani sabse pehle jakar apna room kholti hai aur apna saman rakh kar bed par jakar let jati hai. Wo ab bhi muskura rahi hai, ki tabhi doorbell bajti hai. Shivani door kholti hai. Samne Anuj khada hai, apna sara saman lekar.

Anuj: Hi!

Shivani: (surprised hokar door kholte hue) Hi! Kya hua?

Anuj: Main bhot bada bewakoof hu.

Shivani: Han! Wo to tum ho, par hua kya?

Anuj: Wo main apne room ki keys ghar lekar nahi gaya tha aur Uncle Aunty ghar par nahi hain.

Shivani: Ohh! To kya hua? Wo jab tak aaenge tum yahan aa jao.

Anuj: Nahi! Actually wo do din ke lie apne bete ke paas gaye hue hain. Unhone bataya bhi tha, unke grandson ki shadi yahin karni hai na unhone, to wo un logon ke sath hi wapas aaenge.

Shivani: Hmmm! To koi baat nahi. Tumhara saman tumhare paas hai aur Kirti aur Simran bhi ghar par nahi hai. Tum mere room me so jana aur main unke room me so jaungi. Tum pehle andar to aao.

Anuj: Yaar wo sab to thik hai, par aise baar baar mujhe acha nahi lagta.

Shivani: It’s okay! Tum mere room me hi to ja rahe ho.

Anuj: Hmm!

Anuj apna saman leke Shivani ke room me chala jata hai. Shivani bhi uske piche room me aati hai.

Shivani: Kuch chahiye ho to bata dena.

Shivani ye bol kar room ke bahar jane lagti hai.

Anuj: Suno!

Shivani: Han!

Anuj: Tum bhi yahi reh jao.

Shivani: (surprised) Yahan?

Anuj: Umhh! Han!

Shivani: Par do room extra hai na.

Anuj: Han! To kya hua? I promise, I will be a good boy.

Shivani muskurati hai.

Shivani: Wo sab to thik hai, par jab rooms hain to…

Anuj: Please…

Shivani: Tum bhi na…

Anuj: Maan gayi?

Shivani: Okay! Main jake change kar leti hu, fir tum kar lena.

Anuj: (smiling) Okay!

Shivani apne kapde lekar bathroom me jati hai aur change karke aa jati hai. Anuj Shivani ko dekhta hai, fir khud bhi change karne chala jata hai. Bed ke right side par Shivani let gayi hai. Anuj aake bed ke left side let jata hai. Bed par ek hi blanket hai, jo dono odh lete hain.

Shivani: Good night Anuj!

Anuj: Tumhe neend aa rahi hai?

Shivani: Nahi! Par sone ki koshish karenge to aa hi jaegi na.

Anuj: Na!

Shivani: To kya karna hai?

Anuj: Baate?

Shivani: Main bhot thaki hui hu.

Anuj: Okay! To apni aankhen band karo.

Shivani: Kyun?

Anuj: Karo na.

Shivani: Okay!

Shivani apni aankhe band kar leti hai. Anuj uske maathe par dhire dhire thapki dene lagta hai. Shivani muskurati hai aur aankhe kholti hai.

Shivani: Aise kab tak karte rahoge tum?

Anuj: Jab tak tum so nahi jati.

Shivani: Aur tumhe nahi sona?

Anuj: Main!

Shivani: Han! Tum.

Anuj: Main so jaunga, jab tum so jaogi.

Shivani Anuj ki side karwat le leti hai aur muskurate hue use dekh rahi hai. Anuj apne hath se uski aankhe band karta hai aur use thapki de raha hai. Shivani apni aankhe band rakhti hai aur thodi der me so jati hai. Anuj use is tarah muskurate hue sota dekh ke khush hai. Ek time tha jab use lagta tha ki abhi use shadi nahi karni chahiye, par ab use Shivani ke sath har pal bitana acha lagta hai. Aaj kal har kisi ki soch yahi hoti hai. Sab yahi sochte hain ki shadi karne ka matlab hai ki unki zindagi ruk jaegi, lekin jab koi aisa unki zindagi me aata hai, ye tab hi samajh aata hai ki unki zindagi ruki nahi aage badh gayi hai.

Din nikalta hai aur Shivani ki neend khulti hai. Wo Anuj ke apne side me lete hue dekhti hai. Use wo ek chote bacche ki tarah masoom lag raha hai. Wo bed se uthati hai par Anuj Shivani ka hath pakad leta hai.

Shivani: Kya?

Anuj: Don’t go.

Shivani: Why?

Anuj: Because… I want to be here with you.

Anuj Shivani ko kheench kar uski god me apna sir rakh leta hai.

Shivani: Tumhe aaj office nahi jana?

Anuj: Nahi! Aaj ka din, I will spend with you.

Shivani smile karti hai.

Shivani: Jab aaj chutti thi to yahan kyun aaye? Ek din aur apne ghar walon ke sath spend karte.

Anuj: Wo islie ki mujhe mera answer nahi mila hai aur Kirti aur Simran ke samne baat main kar nahi pata kabhi, aur wo tumhara picha kabhi chhodti nahi hain.

Shivani: Konsa answer?

Anuj bed par baith jata hai.

Anuj: I know it’s a weird timing, but I can’t help it. You know… Jab maine tumhe shadi ke lie mana kia tha to main tumhare baare me bas kuch hi chize janta tha. Bas utni hi jitni humne baate ki thi. And you were always beautiful. Jab maine tumhe pehli baar dekha tha to meri nazare hat nahi rahi thi tum se.

Shivani: Anuj!

Anuj: Shhhh! Shut up! Just listen… Par main shadi ke lie han nahi bol paya, coz that time, main shadi karna nahi chahta tha, sirf ghar walo ki khushi ke lie ladki dekhne ke lie han kia tha. Par jab tumhe dekha aur tumse baat ki to shayad usi pal se tumse pyar ho gaya tha. Tumhari baate mere har question ko fulfil kar rahi thi. Tum mujhe mere lie perfect lag rahi thi, in all aspects. Mere ghar walon ne baad me bhi ladkiyan dekhi par main un sab me tumhe hi dhund raha tha. Aur fir tum mujhe mili, Delhi me, jab main bhot pareshan tha. You know! Main hamesha shadi se dur bhagta tha. Aur mujhe mere Papa kehte the ki tu bhag le, par ek din aisi ladki teri life me aaegi, jab tu usse bhag nahi paega. Tab main unki in baaton ko hasi me taal deta tha. Par aaj unki baat mujhe achi tarah samajh aa gayi hai. Wo ladki mujhe pehli baar me hi pasand aa gayi thi, par use bolne ki himmat main aaj tak nahi kar paya. To…

Shivani: To??

Anuj: To please answer karo na.

Shivani: Tumne mujhse kuch pucha hai?

Anuj: Shivanniii!

Shivani: (smiling) Yes Anuj!

Anuj: Answer me na.

Shivani: Kis chiz ka answer?

Anuj: Okay!

Anuj ab Shivani ke dono hath apne hathon me le leta hai. Shivani bed par baithi hui hai. Anuj ulte pair karke Shivani ke samne baith jata hai aur Shivani ki aankho me dekhta hai. Shivani bhi Anuj ki aankhon me dekhti hai.

Anuj: Shivani!

Shivani: Hmmm!

Anuj: Will you…

Shivani: Hmmm…

Anuj: Will you…

Shivani: Aage?

Anuj: Will you marry me?

Shivani: Why?

Shivani apne hath Anuj ke hatho se chhuda leti hai.

Anuj: Why means?

Shivani: Why means kyun?

Shivani bed se uth kar balcony ka darwaza kholti hai aur balcony me jakar khadi ho jati hai. Anuj Shivani ke peeche balcony me jata hai.

Anuj: Shivani! Tum mujhse shadi nahi karna chahti?

Shivani: Maine abhi koi answer nahi dia hai, par main tumse puch rahi hu ki why you want to marry me?

Anuj: Shadi kyun karte hain?

Shivani: I am asking you why you want to marry me?

Anuj: Yaar! Tum test mat lo mera ab. Bolo na.

Shivani: No! Tell me.

Anuj: Main tumse shadi karna chahta hu kyunki main puri life tumhare sath rehna chahta hu.

Shivani: Kyun?

Anuj: Shivani! Stop this kyun-kyun.

Shivani: Why you want to be with me?

Anuj: Kyunki mujhe tumhare sath rehna acha lagta hai.

Shivani: (smiling) Why?

Anuj pareshan hai ki ye Shivani ko kya hua hai. Shivani muskura rahi hai aur Anuj ko dekh rahi hai. Shivani aankhon ke ishare se answer dene ke lie kehti hai.

Anuj: Because I love you!

Shivani smile karti hai.

Shivani: Stupid! Ye teen words bolne me itna time laga diya. I love you too!

Shivani Anuj ke paas jakar uske gale lag jati hai. Anuj bhi use apni bahon me bhar leta hai aur muskurane lagta hai.

Anuj: So now! Will you marry me?

Shivani: Yes! I will marry you.

Anuj Shivani ko apni bahon me utha leta hai aur ghumne lagta hai. Wo Shivani ko neeche utarta hai aur Shivani ke maathe par kiss karta hai. Anuj fir Shivani ko apni bahon me le leta hai.

Shivani: Ye sab Mangalore me hi nahi bol sakte the? Ab fir se hume ghar jana padega.

Anuj: Jo story jahan shuru hui thi, propose bhi wahin karna acha tha na.

Shivani: Oooo! Isilie tum yahan ho?

Anuj: Hmmmm!

Shivani: (smiles) Clever!

Anuj: You too!

Shivani: Ab ghar pe kab batana hai?

Anuj: Abhi!

Shivani: Abhi!

Anuj: Han! Tum apne ghar phone karo aur main apne ghar phone karta hu.

Dono apne apne ghar phone karte hain. Dono ke parents to waise hi is rishte se khush the. Dono ke ghar wale bhi maan jaate hain. Ab dono ko hi wapas Mangalore jana hai, apne roke ke lie. Isilie kehte hain, jo log ek dusre ke lie bane hote hain, wo kisi na kisi tarah mil hi jate hain. Jaise ye dono mil gaye. Bas isilie santusht rahiye, khush rahiye aur life ko enjoy kijiye. And don’t forget keep feeling the Love… ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: