A Letter On Friendship Day!

Hii!

Main janti hu ki ye maine tumse pehle kabhi nahi kaha. Par aaj main tumse ye kehna chahti hu ki maine hamesha se tumhare baare me choti choti chize notice ki hain.

Jab tum pehli baar school aaye the to maine hi tumhe apni notebook di thi, jisse tumne apna kaam pura kia tha. Tumhare paas ek orange colour ka bag tha, jo tum bade pyar se apne kandhe par taang kar laya karte the. Tumhe shayad yaad nahi par maine hamesha notice kia tha ki school ke baad tum kahan jate the. Ek din chhutti ke baad main school se wapas aa rahi thi aur maine tumhe tumhare purane school se ek ladke se raste me ruk kar baat karte hue dekha tha. Dekhne me to tum awara the hi us din mujhe yakeen bhi ho gaya tha ki tum awara ho, kyunki us time par jo baccha school se sidha ghar nahi jata tha wo awara hi hua karta tha. Isilie maine kabhi tumse baat karne ki koshish bhi nahi ki. Par tumhari chize pata nahi kyun meri nigaahon me aa hi jati thi.

Ek saal beeta aur dosti nahi hui. Hum ek dusre se dur hi rahe. Aur fir aaya computer ka project, jisme humari teacher ne condition ye rakhi ki do boys aur ek girl mil kar ek project banaenge. Us time par ladka ladki ek sath kaam kare ye opportunity nahi punishment hota tha, aur teachers ye aksar kiya karte the kyunki is tarah bacche discipline me rehte the. “Class me baat mat karo, nahi to teacher ladki/ladke ke sath baitha denge.” Ye us time par ladke/ladkiyon ka sabse bada darr hua karta tha. Hume bhi us time par teacher ne ye isilie kaha tha ki bacche discipline me kaam karenge, par ek choice di thi unhone, apna group hum khud decide kar sakte hain. Main to soch me padi hui thi ki pata nahi kis group me jaungi. Par usi din tumne mujhe apne group me kaam karne ka offer kia. Tum, tumhara ek dost aur main. Us time par computer jyada nahi pata tha mujhe, aur tumhe sab kuch aata tha. Humne project me sath kaam kia aur mujhe mehsoos hua ki tum utne bhi bure nahi ho jitna main tumhe samajhti thi. Project me kuch samajh aaya ya nahi ye to pata nahi, par is project ki wajah se humari dosti zarur ho gayi.

Time ke sath dhire dhire ye dosti kab itni gehri ho gayi pata hi nahi chala. Ki school khatam ho gaya aur college bhi, tumhari shadi ho gayi aur meri bhi. Par hum aaj bhi dost hain. Best friends… Aur ye jagah kisi aur ko di na to acha nahi hoga. Apni wife ko bhi nahi… Samjhe na.

Tumhe pata hai mujhe tumhari sabse achi baat kya lagti hai? Yahi ki tumne kabhi exams me cheating nahi ki, aur tum aaj bhi aise hi ho, kisi ke sath cheat nahi karna chahte. Koi tumhe rishwat lene ke lie kahe to tum saaf mana kar dete ho. Aaj kal aise log bhot kam milte hain.

Par aisa nahi hai ki tum sirf ache ho, tumhari bhot sari galat aadatein bhi hain, jinhe tumhe bilkul ignore nahi karna chahiye. I know ab tum ye soch rahe hoge ki main aaj ye sab tumse kyun bol rahi hu? Bas socha ki aaj kal ke logon ki tarah is din par kuch khaas kiya jaye apne dost ke lie. Islie… “Happy Friendship Day!”

Friendship band to nahi hai mere paas tumhare lie, par ek dost hamesha khada hai tumhare sath tumhare lie. To aaj ke lie itna lecture kafi hai. Bas apni wife ko time dena shuru kar do ye meri taraf se tumhari life ke lie important tip hai…

Tumhari Best Friend….
Aur tumhari wife… ☺️