SOCHA NA THA (E-9)

Recap: Pichle episode me aapne dekha tha ki Anuj Shivani ke ghar jata hai. Anuj ko achanak apne ghar dekh kar Shivani aur uski mom surprised ho jate hain.

Anuj wahan Shivani ki baat Simran se krane aata hai kyunki Shivani hath me mehndi lagne ki wajah se Simran ka phone nahi receive kar pati. Anuj Shivani ki baat Simran se karwata hai aur ye sab Shivani aur uski behen bhi dekhti hain. Ab aage….

Call ke baad Anuj Shivani se kehta hai, “Okay Shivani! Ab main chalta hu.”

Shivani ki Mom Anuj ko wahan baithne ke lie kehti hain.

Shivani’s Mom: Anuj! Thanks for helping Shivani.

Anuj: Aunty! Shivani ne meri jitni help ki hai uske samne ye kuch bhi nahi hai.

Shivani’s Mom: Baitho! Kya loge? Main kuch khane ke lie leke aati hu.

Anuj: No Aunty! It’s okay! Fir kabhi. Aur waise bhi aapke hathon me bhi mehndi lagi hui hai.

Shivani’s Mom: Thik hai. Next time pakka.

Anuj: Yes Aunty! Abhi main chalta hu.

Shivani’s Mom: Okay beta! Shivani jao Anuj ko bahar tak chhod do.

Shivani: Yes Maa!

Shivani Anuj dono bahar jate hain.

Anuj: Ufff!

Shivani: (smiling) Kya hua?

Anuj: Yaar pata hai mujhe tumhare ghar aane me kitna darr lag raha tha. Us din Aunty Uncle se milke to mujhe laga tha ki wo mujhe tumhare ghar me ghusne bhi nahi denge.

Shivani: (haste hue) Nahi! Wo us din bas majak kar rahe the.

Anuj: Aisa majak? Baap re! Aunty Uncle se to bach ke rehna padega.

Shivani: (smiling) Uski zarurat nahi padegi.

Anuj: (hesitating) Shivaniiii! Main soch raha tha ki….

Shivani: Kya soch rahe the?

Anuj: Yahi kiii… Hum kisi din yahan… Mangalore me ghumne chale?

Shivani: Aur ye tum kyun soch rahe the?

Anuj: Aise hi… Hum sath me Delhi ghume hain, thoda Mangalore bhi ghum sakte hain.

Shivani: Hannn! Ghum to sakte hain. Par Maa-Papa se baat karni hogi.

Anuj: (worried) Wo mana karenge kya?

Shivani: Nahi! Mana nahi karenge. Par unhe pata to hona chahiye ki main kahan hu, kiske sath hu, aur jiske sath hu wo ladka mere lie safe bhi hai ya nahi?

Anuj: To tumhe main unsafe lagta hu?

Shivani: Nahi! Mujhe to nahi lagte. Par… Maa Papa ko lage to?

Anuj: Maa Papa ko laga to nahi jaogi?

Shivani: Nahi! Fir to jana mushkil hai.

Anuj: (upset) Okay!

Shivani muskurati hai.

Shivani: Main phone par bata dungi ki tumhe kab aana hai.

Anuj: (smiles) Okay!

Anuj Shivani ko nazar bhar dekhta hai aur Shivani bhi use dekh kar muskura rahi hai.

Anuj: Thik hai to main fir chalta hu. Bata dena tum, jab bhi free ho. I will come to pick you up.

Shivani: Yeah! Sure.

Anuj: Bye!

Shivani: Bye!

Anuj wahan se chala jata hai. Shivani ghar ke andar aa jati hai.

Shivani’s Mom: To kab ja rahe ho tum dono?

Shivani: (hairani se) Kahan?

Tani: Arey Mangalore ghumne.

Shivani: (surprised and shocked) Tum dono kya humari baate sun rahe the?

Shivani ki Mom aur Tani (Shivani’s sister) dono haste hain. Shivani Tani ko marne ke lie daudti hai. Tani Shivani se bachte hue bolti hai, “Mom ka idea tha… Mom ka idea tha…”

Shivani: Maa! Aap bhi…

Shivani’s Mom: Ab apni beti ki love story ka track to rakhna hi padega na jab wo khud kuch nahi bata rahi hai to.

Shivani: Koi love story nahi hai.

Shivani’s Mom: To uske sath ghumne kyun ja rahi hai fir?

Shivani: Dost hai wo bas. Uske sath ghumne nahi ja sakti kya main?

Tani: Tumhe sach me lagta hai kya? Uski shakal dekh ke pata chalta hai.

Shivani: Oh please! Ab tu bhi Kirti aur Simran ki tarah shuru mat ho. Ab tak ek bhi baar usne aisa kuch nahi kaha aur na kia hai jisse mujhe ye lage ki use mujh me interest hai, aur tum log pata nahi kya kya bolte rehte ho.

Shivani’s Mom: Shareef ladke aise hi hote hain.

Ye keh ke Shivani ki Mom kitchen me chali jati hain.

Tani: Par mujhe lagta hai wo jald hi tumse apne dil ki baat kahega. Aur agar usne nahi kaha to tum bhi to bol sakti ho.

Shivani: Maine kuch nahi socha. Bas mujhe uske sath rehna pasand hai, chahe wo dost ki tarah hi kyun na ho. Aur main aisa kuch keh kar ye dosti nahi khona chahti.

Tani: Aise to tum dono hi pehle aap-pehle aap ke chakkar me baithe rahoge.

Shivani: Agar wo ek hint bhi de de to main samajh jaungi. Par usse pehle main kuch nahi kehna chahti.

Tani: Oh God! Ab aap hi help karo in dono ki.

Diwali ka din aata hai. Shivani aur Anuj dono ki families is festival ko celebrate karti hain. Rangoli banate hain, ghar sajate hain, raat me poojan karke diye jalate hain. Is sab ke baad Shivani Anuj ko call karti hai. Anuj call receive karta hai.

Anuj: Hello!

Shivani: (chehekte hue) Happy Diwali!

Anuj Shivani ki is awaz ko sun kar khush hote hue Shivani ko usi andaz me jawab deta hai.

Anuj: Happy Diwali to you too Shivani!

Shivani: Meri taraf se sab ko wish karna ghar par.

Anuj: Aur tum bhi meri taraf se apne ghar par sabko wish karna.

Shivani: Yeah! Okay!

Itne me Anuj ki Mom Anuj ke paas aati hain aur bolti hain ki Shivani hai to phone unhe de.

Anuj: Shivani! Mom ko baat karni hai tumse.

Shivani: Aunty ko? Okay!

Shivani thodi sehem jati hai. Anuj phone uski Mom ko de deta hai.

Anuj’s Mom: Hello!

Shivani: Hello! Namaste Aunty! Happy Diwali!

Anuj’s Mom: Same to you beta. Kaisi ho tum?

Shivani: Aunty! Main achi hu. Aap bataiye.

Anuj’s Mom: Main kab se baat karna chah rahi thi tumse. Par Anuj kabhi phone hi nahi deta tha tumhe. Ab ghar pe aaya hai to chheen lia maine isse phone.

Shivani Anuj ki Mom ki is baat par muskurati hai.

Anuj’s Mom: Beta! Mujhe tumhe thank you bolna tha. Tumne Anuj ki itni help ki wahan. Main bhot ghabra rahi thi, iske lie. Par jab pata chala ki tum ho to mera darr chala gaya. Aise hi dono sath me rehna beta.

Shivani: Ji Aunty!

Anuj’s Mom: Aur main Anuj ko bhi bolti hu ki dhyan rakha kare tumhara. Dono sath me ache se raho hamesha main to yahi chahti hu.

Shivani Anuj ki Mom ki baate sunke smile karti hai. Use lag raha hai ki Anuj ki Mom usse kisi aur dhang se baat kar rahi hain. Aise jaise wo Anuj ki dost nahi Anuj se shadi karne wali ho. Wo yahi sab soch rahi thi ki Anuj apni Mom se phone le leta hai.

Anuj: Hello!

Shivani: Yeah!

Anuj: Sorry! Wo Mom kabhi kabhi jyada bol deti hain.

Shivani: It’s okay!

Anuj: So! Kab mil rahe hain hum?

Shivani: Kabhi bhi.

Anuj: Day after tomorrow?

Shivani: Okay!

Anuj: To main tumhare ghar aaun tumhe lene ke lie?

Shivani: Yeah! But abhi enjoy your Diwali with your family.

Anuj: Okay!

Anuj aur Shivani phone rakh dete hain aur apni families ke sath Diwali celebrate karte hain. Us raat Shivani Anuj ki Mom se hui baat ke bare me sochti hai. Wo soch rahi hai, “Kya jis hint ka ab tak mujhe wait tha ye wahi hint hai? Kya mujhe ab aage badh kar apne dil ki baat Anuj se keh deni chahiye? Par ek baar pehle bhi maine is rishte ke lie han kaha tha aur Anuj ne mana kar diya tha, is baar fir agar aisa hua to? I think mujhe thoda wait karna chahiye.”

Yahi sochte hue Shivani so jati hai. Aur wo din bhi aata hai jab Anuj Shivani ko leke Mangalore ghumne jata hai. Dono bike par ghumte hain aur last me beech par aake time spend karte hain. Sham ka waqt hai. Suraj dhire dhire samandar me doob raha hai aur samandar uske rang ko apne andar samet raha hai. Anuj aur Shivani dono baithe hue us sunset ko dekh rahe hain. Anuj chahta hai ki use apne dil ki baat bata de par alfaaz uske muh se nikal nahi rahe hain. Aur kuch der baad Shivani Anuj se kehti hai, “Anuj! I think ab hume chalna chahiye. Kafi der ho gayi hai.”

Anuj apne hi khayalon me khoya hua hai, Shivani jo bol rahi hai use wo kuch sunayi nahi de raha. Shivani jab ye dekhti hai to samundar ka pani apne hath me leke Anuj ke chehre par fenkti hain, jisse Anuj ek sath hosh me aata hai.

Anuj: (shocked and surprised) Shivani! What was that?

Shivani: Tab se bole ja rahi hu tum sun hi nahi rahe to kya karti.

Anuj: To mujh par pani dalogi?

Shivani: Han!

Anuj: Ruko tumhe batata hu abhi.

Shivani wahan se uth kar bhagne lagti hai. Anuj uske piche bhagta hai aur Shivani ko pakad leta hai. Wo use apni bahon me le leta hai aur use pakad ke ghuma deta hai. Anuj use kheench ke sea ke andar le ja raha hai. Lehre bhi unki taraf badh rahi hain. Dono kafi aage tak pahunch jate hain. Lehron ka bahav itna tez hota hai ki dono khud ko sambhal nahi pate aur lehron ke bahav se gir jate hain. Dono bheeg jate hain.

Shivani: Ye kya kia? Mujhe pura bhiga diya.

Anuj: Tumne bhi mere upar pani dala tha.

Shivani: Ab main ghar aise jaungi kya?

Anuj: Tumhari galati hai. You started first.

Shivani: You started first ke bacche. Abhi batati hu.

Shivani Anuj ke paas jakar use gudgudi karne lagti hai, jisse wo fir ret me gir jata hai. Shivani ab Anuj ke upar aa chuki hai aur Anuj ko gudgudi kar rahi hai. Ek baar fir samandar ki lehron me dono bheeg jate hain. Ab to dono puri tarah bheeg chuke hain. Suraj bhi pani me doob chuka hai. Anuj khada hota hai aur Shivani ko kheench kar apni baahon me pakad leta hai.

Anuj: Ye tumne bhot acha kia, ab pure bheeg chuke hain. Ab tum bhot aaram se ghar ja paogi.

Shivani: (khud ko chhudate hue) Leave me!

Anuj: (Shivani ko apni bahon me aur kaste hue) Bilkul nahi!

Shivani khud ko chhudane ki koshish kar rahi hai aur Anuj use dekh raha hai. Wo use is tarah khud ko chhudane ki nakaam koshish karte dekh muskura raha hai. Shivani koshish kar rahi hai aur achanak wo Shivani ko chhod deta hai.

Par na jane kya hota hai Anuj ko ki wo fir Shivani ko apni bahon me le leta hai.

Shivani: Anuj!

Anuj: Hmmm.

Shivani: Leave me!

Anuj: Aur na chhodu to?

Shivani: What do you mean na chhodu to?

Anuj: I mean ki….

Shivani: Ki?

Anuj Shivani ke baalon ko uske kaan ke piche karta hai, wo Shivani ke chehre par dikhayi de rahi pani ki boonde apne hathon se pochta hai. Kuch pani ki boonde Shivani ke hothon par bhi hain. Wo Shivani ke hothon ko apne angoothe se chhuta hai aur wo boonde hata deta hai. Wo Shivani chehre ke kareeb jata hai aur kehta hai, “Tumhe pata hai Shivani, tumhe jab maine pehli baar dekha tha. Tab tum mujhe bhot khoobsurat lagi thi aur fir maine tumhe mana kar dia. Mujhe hamesha apne is decision par regret hota tha, tab tak jab tak main tumse dobara nahi mila tha.”

Shivani: Aur dobara milne ke baad regret khatam ho gaya?

Anuj: Han! Uske baad mujhe laga ki acha hi hua jo maine us time us rishte ke lie mana kar dia.

Shivani: (upset) Hmmm! Tumhe mujhse bhi achi ladki mil sakti hai ab.

Anuj: (smile) Nahi! Islie nahi buddhu.

Shivani: To kis lie? Dekho sidhe sidhe bolo, ye ghuma fira ke baat karna mujhe pasand nahi.

Anuj Shivani ke muh par apni ungali rakh deta hai.

Anuj: Kitna bolti ho?

Anuj Shivani ka hath pakadta hai aur kehta hai, “Main janta hu ki mujhe tumse better ladki nahi mil sakti, (kisses Shivani’s hand) islie.”

Anuj ne jis tarah se ye sab kaha tha, Shivani ko iske baad samajh nahi aa raha tha ki wo Anuj ko kya kahe aur isilie shayad wo Anuj se kuch keh bhi nahi payi, par uski aankhon ne uski khushi ka jawab Anuj ko de dia tha.

Shivani: Bhot late ho gaya hai.

Anuj: Ghar chale?

Shivani: Hmmm.

Anuj aur Shivani dono ghar ki taraf nikal padte hain. Shivani aaj tak yahi sochti thi ki shayad Anuj use bas ek dost ki tarah hi chahta hai, aaj Anuj ne ye sab keh kar uske dimag se wo sari baate nikal di. Aage kis tarah dono ek dusre ke ho pate hain, ye zarur dekhenge lekin next episode me. Tab tak… Shubhi Ratri… Shabba Khair… Sayonara…

Keep enjoying your life…
&
Keep feeling the love… ❤

5 thoughts on “SOCHA NA THA (E-9)

Add yours

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: