Dil se Dil tak…

Ek choti si kahani… Pasand aaye to bataiyega zarur…. 🙂

Apne boy friend se ek badi ladayi ke baad, wo soch rahi thi…

“Ek rishte me itni ladayiyan honi chahiye kya? Har dusre din wahi sab jhelna.

Shayad wo ye nahi hai jise maine pyar kiya tha. Shayad ye wo hai hi nahi jise mere lie bhagwan ne banaya hai. Shayad mujhse chunne me galati ho gayi hai. Par agar ye nahi to kaun hai fir?

Agar ye nahi to aur kaun hoga? Aur agar main isse dur chali gayi, kisi aur ko choose kia aur usne isse bhi jyada ladayiyan ki to? Wo mujhe isse bhi jyada akela chhod ke gaya to? Wo mujhe isse bhi jyada samajh na paya to?

Nahi… Nahi… Kisi ache ko pane ke chakkar me kahin wo bhi na kho du jo mere paas hai. Nahi! Main usse dur nahi ja sakti. Shayad yahi bana hai mere liye. Agar nahi bana hota to mujhe koi na koi ishara to mil hi jata ab tak. Aur ladayiyan to har couple me hoti hi hain. Main sach me jyada soch rahi hu.”

Wo gusse me thi, par uska boyfriend use manane nahi aaya. Usne apna gussa khud hi shant kar liya.

Kuch din baad uske boyfriend ne use propose kia, for marriage. Kisi filmy style me nahi. Ek phone call pe, kyunki us ladke ke ghar wale jald se jald uski shadi karana chahte the. Wo abhi shadi karna nahi chahti thi. Par apne khwabon ko nazar’andaaz karte hue usne apne pyar ko upar rakha aur shadi ke lie han kar diya.

Par ab bhi unke rishte me koi sudhar nahi aaya tha. Unki shadi tai hone ke baad unki ladayiyan aur badhti gayi, ab wo khud ko pehle se jyada akela mehsoos karne lagi. Ladke ke paas na to uske lie waqt tha aur na hi use uski koi baat samajh aati thi. Dhire dhire ladki ne bhi usse baat karna kam kar dia, unki ladayiyan bhi band ho gayi. Ladki ne ab apni isi zindagi se samjhauta kar lia tha, halaki wo khush nahi thi.

Lekin fir kisi ne uski zindagi me kadam rakha. Wo uska ek naya dost tha. Wo jahan masters kar rahi thi wahan naya aaya tha. Wo janta nahi tha ki uski shadi hone wali hai. Wo us dost se waise hi baat karti thi jaise apne baki doston se kiya karti thi. Par usme farak tha to itna ki wo us ladki ki har baat ko dhyan se sunta tha, uski har pareshani me khud bhi pareshan ho jata tha. Ladki uski feelings ko samajh gayi thi aur us ladke se door rehna shuru kar diya tha.

Wo dost, wo us ladki ke is behaviour ko samajh nahi pa raha tha. Wo jab bhi usse baat karne ki koshish karta, wo koi na koi bahana bana ke wahan se chali jati.

Par ek din us dost ne usse puch hi lia, ki wo use is tarah ignore kyun kar rahi hai. Ab wo bhi kya kehti, usne is baat se saaf inkaar kar diya aur boli, “Aisa kuch nahi hai, wo bas kaam ki wajah se aaj kal baat nahi ho pa rahi.”

Wo ladka bhi chalak tha bola, “Thik hai jo bhi kaam ho bata ke jaya karo, main help kara dunga.”

Ab wo kaise ignore karti use. To bas ab baate bhi hone lagi aur mulakaate bhi. Jab wo ghar pe jati to uske messages bhi aaya karte the, aur jinko wo ab ignore nahi kar sakti thi. Wo dono sab kuch share karne lage. Apni happiness, apni sadness, apne family aur friends ke kisse, apni hobbies, crushes, etc… etc… Par ab tak usne us dost ko apne boyfriend ke bare me nahi bataya tha. Na to kabhi usne pucha aur na hi kabhi usne bataya. Kyunki shadi fix hone ke baad bhi, wo uski life me kahin bhi exist nahi karta tha. Use ab samajh aane laga tha ki usne shadi ke lie han karke kitni badi galati ki thi. Bs 2 months bache the unki shadi ko, aur ab kuch nahi ho sakta tha. Wo kabhi kabhi regret karti thi aur kabhi bhagwan se ladti bhi thi ki kya aap us dost ko kuch din pehle nahi bhej sakte the uski life me. Lekin ab kuch bhi nahi kia ja sakta tha. Wo bas us dosti ko aise hi rakhna chahti thi.

Lekin wo dost, wo ab sirf dost nahi rehna chahta tha. Wo dono ek din canteen me baithe hue baat kar rahe the ki usne bol dia, “Listen! Kya hum is friendship se aage nahi badh sakte?”

Wo samajh gayi thi ki wo kya kehna chahta hai, par usne kaha, “What do you mean by this?”

Ispar us ladke ne jawab dia, “I mean, hum din bhar sath me rehte hain, sath me na ho messages ya phone ke through contact me rehte hain. Iska kya matlab hai?”

Ispar ladki ne kaha, “Iska matlab, hum bhot ache dost hain.”

Par ladka is jawab se khush nahi tha aur wo bhi janti thi ki aisa kyun hai, par wo bas ye sab ignore karna chahti thi, islie usne ye topic divert karne ki koshish ki. Lekin wo shayad aaj wo sab kehna chahta tha, jo uske dil me tha. Islie wo bola, “I really like you.”

Is par wo boli, “I know, even I like you. Tabhi to hum friends hain na.”

Wo fir frustrated hoke bola, “Wo wala like nahi stupid ladki.”

Jab usne dekha ki baat aage ja rahi hai to usne apne dost ko rokne ke lie kaha, “Koi dusra like nahi ho sakta humare beech, kyunki meri shadi hai kuch dino me.”

Jab usne ye sab suna to wo shocked tha. Iske aage wo kuch nahi bola. Aur un dono ne is baare me aage kabhi baat nahi ki.

Shadi nazdeek thi par wo dono ab bhi waise hi baate kia karte the. Us din bhi wo baat kar rahe the ki us ladke ne puch hi lia, “Tum phone pe baat mujhse karti ho, tum chat mujhse karti ho, tum padhayi ke time mere sath rehti ho, to wo kahan hai jisse tumhari shadi hone wali hai?”

Ispar us ladki ne jawab dia, “Tum pehle nahi aaye na, isilie. Pehle aate to main shadi ke lie han nahi karti.”

Wo ladka bola, “Sach bol rahi ho?”

To ladki ne haste hue jawab dia, “Nahi! Majak kar rahi hu. Par ek chiz sach hai, ki jitne ache se mujhe tum jante ho, utne ache se mujhe koi nahi janta. Kabhi kabhi main sach me sochti hu ki itne kam time me kaise tum meri har chiz ko jaan gaye. Ki main kab gussa hoti hu, kab hasti hu, kab roti hu, kab smile karti hu. Tumhe nahi pata ki tumse baat karke mujhe kitna acha lagta hai. Tum please kisi bhi wajah se ye friendship mat todna. Promise me.”

Is par us ladke ne kaha, “Promise tabhi karunga, jab tum apne aansu ponch logi.”

Ladki ki aankhon me sach me aansu the jo ladke ne pehchan lie the. Us ladke ki is baat par wo rote rote muskurane lagi, apne aansu ponch lie aur boli, “Main kahan ro rahi hu, main nahi ro rahi. Aur tum khud ko sambhalo, rone ki zarurat nahi hai, samjhe.”

Ladka bhi apne aansu ponchte hue bola, “Jaise tum nahi ro rahi, main bhi nahi ro raha. And I promise, I will be your friend till my last breath.”

Ladki ne jawab dia, “Thank you!”

Ispar ladka bola, “Kuch aur bhi kehna tha tumse.”

Ladki boli, “Kaho!”

Ladke ne ek lambi saans li aur bola, “Jyada kuch nahi bas… I love you!”

Phone pe kuch seconds ki khamoshi ke baad ladki ne jawab me kaha, “I love you too…”

Dono ki aankhon me fir se aansu aa gaye.

Aaj us ladki ki shadi ho chuki hai, uska husband waisa hi hai, apne me busy rehne wala aur use time na dene wala. Aur wo dost… Wo aaj bhi uska dost hai, jaisa ki usne vada kia tha.

Kuch kahani aisi bhi hoti hain… Adhuri hokar bhi puri….. Ab ye sacchi kahani hai ya jhuthi ye aap khud decide kare…..

Aur please is pyar ke ehsaas ko apne andar hamesha zinda rakhe. Kyunki kabhi na kabhi, kahin na kahin hume wo pyar zarur milega, chahe wo dosti me hi mile.

Thats why… Feel the feeling of love… ❤

2 thoughts on “Dil se Dil tak…

Add yours

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: