SOCHA NA THA (E-5)

Episode-5

Recap: Ab tak aapne dekha ki Anuj ko Delhi aaye hue 20 din ho chuke hain. Wo apni company aur ghar me dhire dhire adjust ho raha hai. Weekend par Shivani, Simran aur Kirti ko Mishra Aunty dinner par invite karti hain aur wo chahti hain ki Anuj aur Shivani ek sath time spend kia kare. Wo Shivani ko Anuj ke room me uski help karne ke lie bhejti hain. Anuj aur Shivani milkar room set kar lete hain. Anuj Shivani se indirectly puchne ki koshish karta hai ki agar wo Shivani se dosti se aage relation rakhna chahe to Shivani kya karegi? Shivani bhi use isi tarah jawab deti hai. Ab aage….

Agla din hota hai aur Shivani ke flat ki doorbell bajti hai. Shivani door kholti hai, aur samne Anuj khada hai. Shivani use dekh ke surprised hoti hai.

Shivani: Hi! Andar aao.

Anuj andar aa jata hai.

Anuj: Wo mujhe Kirti ne phone karke bulaya tha.

Shivani: Kirti ne? Kyun?

Anuj: I don’t know.

Itne me Kirti aur Simran room se bahar aate hain.

Kirti: Yeah! Aaj main breakfast bana rahi thi to socha Anuj ko bhi khila du.

Shivani: Okay! To aaj hume Maggi milne wali hai?

Kirti: Yeah!

Anuj: (smiles) Okay!

Kirti: Waise aapko cooking aati hai?

Anuj: Han! Thodi bhot.

Kirti: Wow Yaar! Great! Mujhe to bilkul kuch nahi aata. Ye hi dono karti hain sare kitchen ke kaam.

Anuj: Han! Wo bhabhi ke aane se pehle jab Mom bimar pad jati thi to hum log hi khana banaya karte the, islie I know cooking.

Shivani: Ye to hona hi chahiye. Aaj kal boys ko cooking aani hi chahiye. Ab jaise girls corporate sector me kaam karne lagi hain, jo bas pehle boys hi karte the, so now boys should also enter in household activities.

Simran: Han! Aur kya. Rishabh ko to maine pehle se bola hua hai, beta sara kaam seekh lena shadi se pehle.

Shivani: (Anuj se) Rishabh Simran ka boyfriend hai.

Kirti: Han! Aur mere wale ka naam Tushar hai.

Anuj: (Dono ki baaton par) Okay!

Kirti: Waise mere Tushar ko to sara khana banana aata hai. Mujhe koi tension nahi hai.

Anuj Kirti ki baat sunke dhire se hasta hai.

Simran: Aur wo bimar ho gaya to?

Kirti: To simple. Bahar se order kar lenge na.

Shivani: Tu use bahar ka khana khilaogi us time par?

Kirti: Oho! Tum logon se manga lungi khana, bas! Aur tum nahi hogi to tumhare husbands ko to aata hi hoga na cook karna. Rishabh to seekh hi lega aur Anuj ka bhi hume pata chal gaya hai. Kyun Anuj?

Shivani Kirti ko ghur ke dekhti hai. Kirti ko bhi realise hota hai ki usne kuch galat bol dia hai.

Kirti: Sorry! Sorry! Wo kya hai na Anuj, humne tum dono ko Mishra Uncle ke samne as a couple introduce kia hai na, islie mere muh se ye sab nikal gaya.

Anuj: It’s okay!

Kirti: Lekin ye ho bhi sakta hai ki tum dono ka koi scene ban jaye. Aise hi to hota hai movies me, act karte karte sach me pyar ho jata hai.

Shivani ko Anuj ki kahi wo raat wali baat yaad aati hai. Wo Anuj ki taraf dekhti hai, Anuj pehle se hi use dekh raha hai. Shivani use is tarah dekhte hue dekhke apni nazare hata leti hai.

Shivani: (Kirti ko ghurte hue) Tu chup karegi? Kuch bhi bole ja rahi hai.

Kirti: Arey! Main to bas bol rahi hu ki aisa ho sakta hai.

Shivani: Wo sab movies me hota hai bas, real life me nahi.

Anuj ke mann me is waqt yahi chal raha hai, “Agar ye real me bhi ho gaya to I don’t mind.”

Kirti: Han! But how cool it will be ki Anuj aur tu ek sath ho jao. Fir hum aur humare boyfriends mil kar parties kia karenge.

Shivani Simran ko ishara karti hai Kirti ko chup karane ke lie. Simran ab tak sari baaton ka maza le rahi thi aur has rahi thi.

Simran: (Kirti ko chup karane ke lie) Pehle tu cooking seekh le, uske baad hi party hogi.

Kirti: Oho! Seekh lungi. (Anuj se) Anuj! Tum sikhaoge mujhe cooking?

Anuj: Han! Kyun nahi.

Shivani: Hum bhi sikha sakte hain waise.

Kirti: Don’t get jealous, Shivani!

Anuj ko Kirti ki baaton par hasi aa rahi hai, par wo apni hasi control kar raha hai. Sab breakfast karte hain aur thodi der isi tarah baatein karte hain, fir Anuj wahan se jane ke lie khada hota hai, aur Shivani use bahar tak chhodne aati hai.

Shivani: I am sorry! Wo maine bataya na Kirti aur Simran dono hi thodi pagal hain.

Anuj: (haste hue) Haha! It’s okay! Ab main samajh gaya hu dono ko. Simran fir bhi thodi thik hai, lekin Kirti to…

Anuj ki is baat par dono haste hain. Anuj Shivani ko haste hue dekhta hai, use wo aise bhot khoobsurat lag rahi hai. Wo muskurata hai.

Anuj: Waise…. Aisa ho sakta hai kya?

Shivani ko samajh aa jata hai ki wo kya kehna chahta hai, aur wo mann hi mann smile karne lagti hai, lekin Anuj ko kuch show nahi karti.

Shivani: Kaisa?

Anuj: Jaisa Kirti keh rahi thi.

Shivani: I don’t know. Ho bhi sakta hai aur nahi bhi.

Anuj: Kiski possibility aapko jyada lagti hai?

Shivani: (Anuj ki taraf dekh ke smile karti hai) Hehe! I don’t know. Ye to aap hi bata sakte hain.

Anuj: (lambi saans leke) Ohkay! To 40-60 ka ratio rakhe ya 30-70 ka?

Shivani: Isme 40 aur 30 kis chiz ke lie hain aur 60 aur 70 kis chiz ke lie?

Anuj: 40 and 30 for your no aur 60 and 70 are for your yes.

Shivani: (haste hue) Okay! But I think its 50-50.

Anuj: (smiles) Okay! Thanks for your 50% confirmation. Next 50, I will manage to get it soon.

Shivani bas muskurati hai.

Anuj: (Shivani ko dekhte hue) Bye!

Shivani: (smiling) Bye!

Wo samne apne room ka door kholta hai aur room me chala jata hai, Shivani ab tak wahin khadi hai aur use dekh rahi hai. Wo palat kar Shivani ko dekhta hai aur usi tarah se “Bye!” ka ishara karta hai jaise pehli mulakaat me kia tha. Shivani muskurati hai aur “Bye!” kar deti hai. Dono apne apne doors band kar lete hain. Anuj aur Shivani dono ke faces par ek ajeeb si smile hai. Anuj khush hai ki usne apne dil ki baat Shivani ko isi tarah sahi par keh di. Aur Shivani islie khush hai ki Anuj ne is tarah usse ye baat kahi hai. Dono ka Sunday to ab acha guzarna hi hai. Dono hi is nayi feeling se khush hain, kyunki dono ko hi is tarah ka ehsaas pehli baar ho raha hai. Aur ye sab tab hai jab dono ne hi clearly ek dusre se kuch kaha nahi hai.

Waise sach kahu to ye janke anjaan banne wali feeling hoti hi ajab si hai. Ek taraf mann me uske baare me sochke gudgudi hoti hai to dusri taraf ye bhi lagta rehta hai ki kahin usne mana kar dia to? Ek taraf uski har baat uska har ishara aisa lagta hai ki wo hint de raha hai, ki arey main hi hu wo jo tumhare liye bana hu aur dusri taraf uski choti si na se bhi aisa lagta hai jaise hum kahin galat to nahi soch rahe. Sach me, ajab hi hota hai ye pyar. Jisne kia samjho doob hi gaya wo fir.

Agle din jab Shivani jaagti hai to uske mobile me Anuj ka ek message hota hai. Wo use kholti hai, usme ‘Good morning!’ likha hai. Shivani us message ko padh kar smile karti hai aur use reply karti hai, ‘Good morning! Have a nice day!’ Jaise hi wo reply karti hai, ek aur message Shivani ki notifications me dikhayi dene lagta hai. Wo use khol ke dekhti hai.

Anuj ne Shivani ke message ka reply kia hai, “Thanks!”

Shivani reply karti hai, “Your welcome.”

Shivani aur Anuj ready ho rahe hain lekin unki ek dusre se chatting abhi bhi chal rahi hai. Aaj to ye sab alag sa hi hai, na jane kaise Anuj aur Shivani aaj is tarah baat kar rahe hain. Shayad Anuj ne ab soch hi liya hai ki wo Shivani se ab thik se baat karne ki koshish karega. Wo dono office phoch chuke hain aur apna apna kaam bhi kar rahe hain, lekin unke messages band nahi ho rahe. Anuj Shivani ko message karta hai aur kaam karne lag jata hai, fir Shivani Anuj ko reply karti hai aur kaam karne lag jati hai. Jab dono thode busy hote hain to ek dusre ko wait karne ke lie bol dete hain. Is tarah dono ek dusre ke baare me kafi kuch jaan rahe hain. Dono ne chat karte hue ab ek game khelna shuru kar dia hai. Anuj ek word bolta hai, aur usse related Shivani ko jo word thik lagta hai wo Anuj ko reply kar deti hai. Jaise…

Anuj: Sketching.

Shivani: Reading.

Anuj fir se message karta hai.

Anuj: Thums up!

Shivani: Dew!

Anuj: Horror…

Shivani: Romantic….

Anuj: Mom.

Shivani: Maa.

Anuj: Shahrukh

Shivani: Salman

Anuj: Katrina.

Shivani: Alia.

Anuj: Chole bhature.

Shivani: Pav bhaji.

Aur na jane kya kya! Wo isi tarah chatting karte hain aur ek dusre se kafi kuch jaan lete hain. Kehne ko ek ek shabd hain, lekin baatein bhot kuch jaan gaye hain, wo bhi ek hi din me. Dono hi ye sab enjoy kar rahe hain. Aur kaam! Kaam ki to jaise koi sudh hi nahi hai. Kehte hain na pyar sabko nikamma bana deta hai, ye usi ka jeeta jagta udahran yani example hai.

Sham hoti hai aur ab bhi dono isi tarah lage hue hain aur Anuj Shivani ko message karta hai.

Anuj: Leaving office in 15 mins.

Shivani: Me too.

Anuj: I am coming there.

Shivani: Ok.

Dono ke offices me jyada duri nahi hai islie Anuj Shivani ke office ke bahar aake khada ho jata hai. Shivani wahan aati hai.

Shivani: Hi!

Anuj: Hi! Late nahi ho gaya tumhe?

Shivani: Hmm! Hume thoda jyada der rukna padta hai. Sab wrap up karke aana hota hai.

Anuj: Okay! To chale?

Shivani: Yeah!

Dono sath me ghar ke lie nikalte hain. Dono auto me baithe hain.

Anuj: To kaisa raha din?

Shivani: Acha tha. Tumhara?

Anuj: It was great!

Aur jitni baate chatting par ho rahi thi, ek dusre ke samne aate hi sab band ho gayi. Ye badi ajeeb baat hai dono ke beech, jab samne hote hain to kuch bol nahi pate aur jab chat kar rahe the, to aise baate kar rahe the jaise ek dusre ko kitne dino se jante ho. Dono hi pure raste chup rehte hain jyada baat nahi karte aur society aane par apne apne flats me phoch jate hain. Lekin flat me phochte hi Anuj fir se Shivani ko message kar deta hai.

Anuj: You know?

Shivani Anuj ka message dekhti hai aur muskurati hai.

Shivani: What?

Anuj: You were looking beautiful.

Shivani: Thanks!

Anuj: Ek baat kahu…

Shivani: Han! Bolo na.

Anuj: Tumhare samne aate hi mujhe samajh nahi aata ki main kya bolu.

Shivani Anuj ka ye message padhke hasti hai aur reply karti hai.

Shivani: Okay!

Anuj: Mere mann me bhot kuch hota hai kehne ko, par pata nahi kyun bol nahi pata.

Shivani: Aisa kya hota hai bolne ke lie?

Anuj: Jaise ki… U are so pretty!

Shivani: (muskurate hue) Ye to bol chuke ho.

Anuj: Jaise ki… Jab hawa se tumhare baal udte hain to tum aur pretty lagne lagti ho.

Shivani ye message padh ke blush karne lagti hai. Use samajh nahi aata ki wo is message ka kya reply kare, to bas “Okay!” send kar deti hai.

Shivani: Okay!

Anuj: Tum pata nahi mujhe kya samajh rahi hogi. Ki main kis tarah ka ladka hu. Pata nahi kya kya bol raha hu tumhe.

Shivani: Nahi! Aisa nahi hai.

Anuj: Thanks! But seriously, isse pehle kisi ladki ko is tarah kabhi notice nahi kia maine.

Shivani: (smiling and blushing) To mujhe kyun kar rahe ho?

Anuj: Iska answer mujhe pata hota to tumhe kab ka de chuka hota.

Shivani: To tumhe kuch nahi pata?

Anuj: Shayad pata hai.

Shivani: Then?

Anuj: Himmat nahi hai.

Shivani uska ye reply padh ke hasti hai aur use reply karti hai.

Shivani: Ok. Himmat aane ke baad baat karenge. Abhi main jau?

Anuj: Kahan jana hai?

Shivani: For tea. Simran aur Kirti bula rahe hain.

Anuj: May I come?

Shivani: Yeah! Why not.

Anuj: Main khud hi invite kar raha hu apneaap ko.

Shivani: You are a frnd na.

Anuj: Yeah! Okay!

Shivani: Okay! Come then.

Anuj: Coming!

Anuj ab Shivani ke flat par chai pine ja raha hai. Waise chai wo apne flat par bhi pi sakta hai, lekin wahan chai ke sath Shivani bhi hai, jisse wo bol bhale hi na paye, par use dekh to sakta hi hai na. Chaliye dekhenge, ki ab Anuj ke wahan chai par jane se un dono ke beech me kuch naya hota hai ya wahi sab rehta hai. Lekin uske lie, thoda sa intezaar aur main aaungi jaldi hi aapke samne iska naya episode leke. Tab tak….. Enjoy the Sunday and summers… Kaise? Arey! Nani ke jaiye, chhuttiyan enjoy kijiye… aur pyar ke ehsaas ko apne andar zinda rakhiye….

Enjoy your life…
&
Keep feeling the love! ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: