SOCHA NA THA (E-4)

Episode-4

Recap: Abhi tak aapne dekha tha ki Anuj aur Shivani Mishra Uncle ke flat par jate hain. Mishra Uncle unse kuch questions puchte hain jinke wo answers dete hain. Shivani ki wajah se wo Anuj ko unke ghar me rehne ke lie han bol dete hain.

Iske baad Shivani aur Anuj Delhi ghumne jate hain, wapas aate me Anuj Shivani se bolta hai ki Shivani se shadi ke lie mana usne nahi uske ghar walon ne kia tha. Shivani ye baat ghar par aake apni flatmates ko batati hai. Wo Shivani ko kehti hain ki Anuj use hint de raha hai ki wo Shivani ko pasand karta hai, par Shivani in sab chizon me ab nahi padna chahti. Anuj bhi ghar jake apni Mom ko call karke batata hai ki kis tarah Shivani ne uski help ki, jisse uski Mom Shivani se bhot impress ho jati hain. Ab aage…

Anuj ab Mishra Uncle ke flat me rehne laga hai aur apni job bhi join kar chuka hai. Sham ko aksar jab bhi Anuj office se aata hai to Shivani aur uski friends use coffee pine aur thodi chit-chat karne ke lie apne flat par bula leti hain. Isi tarah 2 weeks nikal jate hain. Aur ab aata hai weekend jab sabki chutti hai. Aaj sab Mishra Uncle ke ghar par aaye hue hain. Mishra Aunty ne Anuj ki wajah se Shivani, Simran aur Kirti ko bhi dinner par invite kia hai. Simran aur Shivani Mishra Aunty ke sath kitchen me help karwa rahi hain. Anuj, Mishra Uncle aur Kirti living room me TV dekh rahe hain.

Mishra Aunty: Shivani! Good choice.

Shivani: Kis chiz ke lie, Aunty?

Mishra Aunty: Main Anuj ki baat kar rahi hu. Acha ladka hai. Kayi baar office se late bhi aata hai, lekin uske baad bhi agar main koi kaam kehti hu, to mana nahi karta.

Shivani: (muskurate hue) Hmmm!

Simran Shivani ko dekh ke smile karti hai. Shivani use chup rehne ka ishara karti hai.

Mishra Aunty: Sach me arrange marriage hai?

Shivani: (muskurate hue) Ji! Pichle baar jab ghar gayi thi, tab Maa aur Papa ne milwaya tha.

Mishra Aunty: Sach bol rahi ho na? Dekho tum bata sakti ho, hume koi problem nahi hai ab. Anuj acha ladka hai, aur agar tumhare ghar walon ko bhi uske lie manana pade to hum tumhara sath de sakte hain.

Shivani: Nahi! Aunty iski koi need nahi hai.

Mishra Aunty: Waise wo tumhe pasand to bhot karta hai. Jab bhi usse tumhare baare me koi bhi baat karo, uske chehre par alag hi chamak hoti hai.

Shivani muskurati hai.

Simran: Main bhi ise yahi kehti hu Aunty, par ye manti nahi hai.

Mishra Aunty: Han! Sach batau to mujhe to dekh ke lagta hi nahi hai ki tum dono ki arrange marriage hai.

Shivani: Aunty! Sach me. Hum us meeting se pehle ek dusre ko jante bhi nahi the. Aur ab bhi hum ek dusre ko thik se nahi jante.

Mishra Aunty: To jano ek dusre ko, yahi to time hai. Ab to Anuj bhi tumhare itne paas hai, tum dono kafi time sath me reh sakte ho, par maine dekha hai ki tum dono bhot kam time ek dusre ke sath bitate ho.

Shivani: Aunty! Mujhe nahi samajh aata ki main usse baat kya karu.

Mishra Aunty: (Shivani se) Jab tak sath me nahi rahoge tab tak aise hi sochte rahoge dono.

Simran: Wow Aunty! Aap aisi baate karengi maine socha nahi tha. Jitna humne socha tha aap to usse bhi jyada cool hain.

Mishra Aunty: (haste hue) Cool kaise nahi honge? Aakhir humne bhi to pyar kia hai.

Shivani: Matlab Aunty?

Mishra Aunty: Matlab… tumhare Uncle aur meri love marriage hui thi.

Simran: Wow! Sach me?

Mishra Aunty: Han! Yakeen nahi hota to Uncle se puch lena.

Simran: Wo to bhot strict hain, unse kon puchega?

Mishra Aunty: Haha! Arey bas wo dikhate hain. Waise unka dil bhot naram hai.

Simran aur Shivani dono muskurate hain. Ab teeno living room me dinner le kar jate hain. Sab log dinner ke lie baithte hain. Aunty Shivani aur Anuj ko ek dusre ke paas baithati hain. Jise dekh ke Simran aur Kirti muskurati hain.

Simran: Uncle! Bura na mane to aapse ek baat puchu?

Mishra Uncle: Pucho!

Simran: Aapki love marriage hui thi?

Mishra Uncle Aunty ki taraf dekhte hain. Aunty Uncle ko dekhke smile karti hain.

Mishra Uncle: To aapki Aunty ne bataya hai ye aapko?

Simran: Yes Uncle!

Mishra Uncle: Han! Love marriage hui thi.

Kirti: Wow! Us time me love marriage. Great!

Mishra Uncle: Kyun bhai? Us time me kya logon ke paas dil nahi hua karta tha? Balki aaj ke logon se jyada jazbaat the logon ke andar, us zamane me. Aaj kal to logon ne pyar ka majak bana ke rakh dia hai. Har dusre din, mohabbat karne wale badal jate hain.

Mishra Aunty: Ohhoo! Ab is tarah ki baat mat kijiye. Achi baate kijiye, ye dekhiye ki aise kayi log hain jo aaj bhi sacchi mohabbat karte hain. Jaise humare Shivani aur Anuj.

Ye sunke Anuj khate khate khansne lagta hai. Shivani use pani deti hai.

Anuj: (smiles) Thanks!

Mishra Uncle: Arey! Inki kahan love marriage hai, ye to arrange marriage wale hain na.

Mishra Aunty: Han! To kya arrange marriage wale pyar nahi karte?

Mishra Uncle: (Anuj se) Kyun barkhurdaar?

Anuj: Ji Uncle!

Mishra Uncle: Pyar karte ho Shivani se?

Anuj Shivani ko dekhta hai aur Shivani sir jhukaye baithi rehti hai. Fir Shivani Aunty ko dekhti hai, jo uske samne hi baithi hui hain. Aunty Shivani ko dekh ke smile kar rahi hai. Shivani bhi smile karti hai aur sochti hai ki pata nahi Anuj kya answer dega. Itne me Mishra Uncle fir se puchte hain, “Arey bhai! Bolo.”

Anuj: Ji! (after a short pause) Ji Uncle karta hu.

Mishra Uncle: Ye kya tareeka hua apne pyar ka izhaar karne ka? Adab se bolo, josh se bolo. Dekho jaise main bol raha hu ki main Binni ji se bhot mohabbat karta hu.

Anuj: (fake smile ke sath) Ji!

Mishra Uncle: Bolo!

Anuj: (Uncle ko dekhte hue) Main Shivani se bhot pyar karta hu.

Mishra Uncle: Mujhe nahi use dekhke bolo.

Anuj: (Shivani ko dekhte hue) Shivani! Main tumse…. Main tumse…..

Mishra Uncle: Kabhi boli nahi hai kya apne dil ki baat tumne?

Anuj: Nahi Uncle.

Mishra Uncle: Hmmm! Arrange hi hai.

Mishra Aunty: (muskurate hue) Kabhi sath me rahenge tab to baat kar paenge ek dusre se. Maine to aaj tak dekha nahi hai, in dono ko kahin bahar aate jate hue, 20 din ho gaye hain.

Shivani: Aunty! Gaye the na, wo first weekend par.

Mishra Uncle: Hmmm! Acha hai! Acha hai! Kam se kam koi to tareeke se rehta hai, nahi to har dusre din aaj kal ladke ladkiyan ghumte firte nazar aate hain.

Mishra Aunty: (Uncle se) Aap chup kijiye. (Shivani se) Beta dinner ke baad tum iske paas ruk jana, thodi help kar dena iski, ye tumse bolega nahi, par maine dekha hai iska room, abhi tak thik se set nahi kia hai isne.

Shivani: Okay Aunty!

Sab log apna khana khatam karte hain.

Simran: (dhire se) Tum raho apne hone wale pati ke paas hum chalte hain.

Shivani Simran ko ghur ke dekhti hai. Simran smile karti hai. Kirti aur Simran dono chali jati hain.

Mishra Aunty: Simran! Beta, agar kabhi lage ki tumhe Anuj se baat karni hai ya yahan aana hai to sochna mat, aa jana.

Shivani: Okay Aunty!

Mishra Aunty: Ab jao dono, kal weekend hai, araam se kaam karo.

Anuj: Aunty! It’s okay! Main kar lunga khud. Shivani bewajah pareshan hogi.

Mishra Aunty: Dekho beta! Shadi se pehle dono ki achhai aur burayi dono dikh jani chahiye. Abhi to tum chupa loge par shadi ke baad kya karoge? Jao Shivani ko leke.

Anuj: (na chahte hue) Okay Aunty!

Anuj aur Shivani uske room ke bahar khade hain.

Anuj: (hichkichate hue) Shivani! Wo kya hai na… Room thoda messy hai… islie main chah nahi raha tha. I am sorry!

Shivani: (smiles) Room kholo bhi ab.

Anuj room kholta hai. Aur jaisa Anuj ne kaha tha, usse bhi kahin jyada messy room hai. Pure bed par kahin bhi baithne ki jagah nahi hai, ek bhi cheez abhi tak cup board me nahi rakhi hai, Anuj ke paas jo bhi bags aur suitcases hain, wo sare khule hue hain. Kuch kapde table par rakhe hue hain to kuch cupboard me aise hi daale hue hain. Shivani ye sab dekh ke hairan reh jati hai.

Anuj: Maine bola tha, room messy hai.

Shivani: Ise messy nahi kuch aur hi kahenge.

Anuj: Main tumhe bahar wale door se nikal deta hu, tum apne flat me chali jao.

Anuj ka room flat ke sabse bahar wale hisse me hai, jisme do doors hain, ek flat ke andar aur dusra flat ke bahar. Uncle Aunty ko baar baar disturb na ho islie jyadatar Anuj flat ke bahar wale door ka use karna hi pasand karta hai, isse Uncle Aunty disturb bhi nahi hote aur Anuj ki privacy bhi bani rehti hai.

Shivani: Nahi! Main chali gayi to ye sab sahi kon karwaega?

Anuj: Wo kya hai na, pehli baar ghar se bahar aaya hu, so I have no idea ki kaise karu. Isse pehle to Mom sab kar dia karti thi.

Shivani: (smiles) It’s okay! Hum dono milkar kar lenge.

Anuj: No! Seriously. Tum chali jao.

Shivani: Okay! Thodi se help karke chali jaungi.

Anuj: Thik hai.

Dono room thik karne lagte hain. Anuj Shivani ko cheeze deta rehta hai, jinhe Shivani arrange karke rakhti rehti hai aur thodi hi der me room set ho jata hai. Ab dono bed par baith jate hain.

Anuj: Thanks Shivani! Tum jo ye sab mere lie kar rahi ho, it means a lot.

Shivani: Hum dost hain na.

Anuj: Yeah!

Shivani: Aapko bhot uncomfortable lagta hoga na Uncle Aunty ke samne is tarah se act karna.

Anuj: Nahi! Aisa kuch nahi lagta, han bas ye lagta hai ki wo dono bhot ache hain. So, unse jhooth bolna acha nahi hai.

Shivani: Hmmm!

Anuj: Acha hota agar ye sach hota to.

Shivani Anuj ko surprisingly dekhti hai. Anuj bhi Shivani ko dekhta hai.

Shivani: You mean, ye acha hota kyunki hume Uncle Aunty se is tarah jhooth nahi bolna padta. Hai na?

Anuj: Nahi! Ye mere lie bhi acha hota. Itni achi dost ki jagah, main itni achi fiancé bol pata tumhe.

Shivani chup rehti hai.

Anuj: Shivani! Agar hum dono is tarah milte pehli baar to?

Shivani: Kis tarah?

Anuj: I mean, main yahan paying guest hota, tum samne wale flat me reh rahi hoti aur humari dosti ho jati. Uske baad…

Shivani: Uske baad?

Anuj: Agar main is dosti ko aur aage le jana chahta to tum maan jati?

Shivani: Iska answer main kaise de sakti hu?

Anuj: Suppose karke.

Shivani: I can’t suppose.

Anuj: To aise hi bata do, dost hum ab bhi hain, bas fark itna hai ki hum pehle se ek dusre ko jante hain, for the obvious reasons.

Shivani: Aap kya kehna chahte hain, mujhe samajh nahi aa raha.

Anuj: Yahi ki agar humare parents ne humari shadi ki baat na chalayi hoti aur hum aise hi kisi aur wajah se ek dusre ko jante aur tab main is friendship ko aage le jana chahta to tum kya kehti?

Shivani: Isse fark kya padta hai? Dosti to ab bhi hai na.

Anuj: Fark hai. Tab mere parents ko tumhe approve karna hi hota kyunki tum meri pasand hoti.

Shivani: To ye to ab bhi ho sakta hai. Suppose aapko main pasand hu, to aap ab bhi apne parents se ye bol sakte hain, that you like me.

Anuj: And will you agree on that?

Shivani: Agar main bhi aapko pasand karti hongi, to obviously I will be with you na.

Anuj: Okay!

Shivani: Aap jo janna chahte the, aapko uska answer mil gaya?

Anuj: Han! Lekin ek complaint hai.

Shivani: Kya?

Anuj: Why you call me ‘aap’?

Shivani: Ohh! It just happens, unconsciously bol deti hu. I will try to change it.

Anuj: Okay!

Shivani: To main chalti hu.

Anuj: Okay!

Shivani Anuj ke room se hi flat ke bahar nikal jati hai.

Anuj: (smiles) Okay! Then Good night!

Shivani: (smiles) Good night!

Anuj aur Shivani dono apne flats me chale jate hain. Shivani Anuj ke muh se ye sab sunne ke baad bhot hi khush hai, use lag raha hai ki Anuj use pasand karta hai, isilie wo is tarah se baar baar use aise sawal puchta hai, lekin wo is baar koi galati nahi karna chahti, kyunki pichli baar jab usne Anuj ke han ki hope rakhi thi par use na sunne ko mila tha, to use bhot bura laga tha. Wo flat me jati hai aur apne room me jake so jati hai.

Anuj waise well-educated, smart aur confident hai, lekin pata nahi kyun Shivani ke samne aate hi wo use confidently kyun nahi bol pata ki wo use pasand karta hai. Uske samne pata nahi wo kyun baate gol-gol ghuma ke aur indirectly kehta hai. Wahin Shivani confidently use sab bol deti hai. Shayad ye islie hai ki wo bachpan se ladkiyon se dur raha hai, ya ye islie hai ki wo Shivani ko pasand karta hai, aur jab hum kisi ko pasand karne lagte hain to ek ajeeb si shyness humare andar aa jati hai, jab hum us insan ke samne hote hain. Shayad ye wahi shyness hai. Par dekhte hain ki Anuj ki ye shyness kab tak jati hai. Hum aapse milenge iske next episode ke sath, jo jald hi publish hoga, tab tak… Sayonara Doston… and Keep feeling the love… ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: