SOCHA NA THA (E-3)

Episode-3

Recap: Ab tak aapne dekha tha ki Anuj Delhi aata hai aur use usi din Shivani mil jati hai. Anuj ko pareshan dekh kar Shivani use apne flat par le jati hai, jahan uski do friends bhi rehti hain, jinka naam hai Kirti aur Simran. Raat me Shivani Anuj ko apne room me sone ke lie bol deti hai. Simran aur Kirti use apne landlord Mishra Uncle ke ghar rehne ke lie puchti hain jiske lie Anuj han kar deta hai. Agle din Kirti aur Simran Mishra Uncle ke ghar par jake baat kar aati hain, par isi chakkar me Kirti se ek galati ho jati hai. Wo galti se Anuj ko Shivani ka fiancé bata deti hai, aur usi ki wajah se Mishra Uncle bhi ghar dene ke lie maan jate hain, aur wo Uncle ko ye baat clear kie bina hi wahan se aa jati hain. Jab ye baat Shivani ko pata chalti hai to wo dono ko bhot sunati hai, jiski wajah se Simran Shivani se naraz hokar chali jati hai. Anuj Shivani ko bolta hai, ki abhi ke lie is natak ko aise hi chalne dete hain, main tab tak koi dusra flat dekh lunga. Shivani Anuj ki ye baat maan leti hai. Ab aage…
Kirti aur Shivani dono jake Simran ko manti hain aur Simran ka gussa thanda ho jata hai. Thodi der baad charon Mishra uncle ke ghar par jate hain, jo ki unke flat ke just samne hai. Door khulta hai aur aunty samne khadi hain. Sab unhe greet karte hain aur andar aa jate hain. Wahan Mishra uncle baithe hue hain.

Mishra Uncle: Baitho bacchon.

Wo charon baith jate hain.

Mishra Uncle: To tum ho Anuj.

Anuj: Ji Uncle!

Mishra Uncle: Kya karte ho?

Anuj: Ji! Main ek IT company me kaam karta hu.

Mishra Uncle: Shadi kab fix hui?

Anuj is question ko sunke Shivani ki taraf dekhta hai.

Mishra Uncle: Bolo!

Anuj: Ji! Teen months ho gaye.

Mishra Uncle: To teen months se kahan reh rahe the?

Anuj: Sir! Main Mangalore me tha apni family ke sath. Company ne abhi mujhe yahan shift kia hai to ab main yahan aa gaya hu.

Mishra Uncle: Company ne shift kia hai ya tum khud aaye ho?

Anuj: Nahi sir! Company ne hi shift kia hai.

Mishra Uncle: Thik hai. Maine suna hai tumne pehla flat book kara ke chhod dia tha. Aisa kyun kia?

Anuj: Sir! Wo unhone mujhe keys nahi di thi flat ki.

Itne me Mishra Aunty sabke lie kuch thanda lati hain.

Mishra Aunty: Arey! Bas bhi karo. Kitne sawal puchoge? Shakal se nahi lag raha ladka shareef hai?

Mishra Uncle: Aaj kal kisi ka koi bharosa nahi hota hai, Binni ji.

Mishra Aunty: (Anuj se) Ye lo beta tum thanda piyo.

Anuj: Thank you Aunty!

Mishra Aunty: Dekho beta! Mere sath thodi help karani padegi tumhe. Bolo karaoge?

Anuj: Ji kaisi help?

Mishra Aunty: Yahi, ki jaise Uncle nahi hue to tumse maine kuch kaam ke lie kaha to karna padega.

Anuj: Ji bilkul!

Mishra Uncle: Waise Love Marriage hai?

Anuj aur Shivani ek sath bolte hain, “No!”

Mishra Aunty: Agar hai bhi to hume koi problem nahi hai, ab to parents ki manzoori hai.

Anuj: Nahi Aunty! Arrange marriage hai.

Mishra Uncle: Good! Shivani se main yahi expect karta hu. Shivani beta!

Shivani: Ji Uncle!

Mishra Uncle: Main ise isilie paying guest rakh raha hu kyunki ye tumhara fiancé hai, kyunki mujhe tum par pura bharosa hai. Tum iski guarantee leti ho?

Shivani: Ji Uncle! Aapko koi bhi shikayat nahi milegi.

Mishra Uncle: Good! Tum room dekh lo apna. Aur kuch extra space ki need ho to bol sakte ho.

Anuj: Ji Uncle!

Wo charon Anuj ka room dekhne jate hain. Room fully furnished hai. Anuj room dekhke khush ho jata hai.

Anuj: Wow! Room to kafi acha hai.

Shivani: Hmmm! Lekin what if unhe hamare baare me pata chala to?

Anuj: Don’t worry! Usse pehle hi main koi dusri jagah dekh lunga.

Simran: Han! Don’t worry yaar.

Shivani: Tum log bol rahe ho to okay!

Wo log room dekh ke bahar aate hain.

Mishra Aunty: Room kaisa laga?

Anuj: Room bhot acha hai Aunty.

Mishra Uncle: To saman le aao aur shift kar lo. Aur han khana bahar se mangane ki zarurat nahi hai, ghar ka khana milega yahan par tumhe.

Anuj: Thanks a lot Uncle.

Mishra Uncle: It’s okay! Jao ab saman le aao.

Anuj: Ji!

Wo log wahan se jate hain aur Anuj ka saman le aate hain. Anuj sare saman ko room me rakh deta hai. Simran aur Kirti wahan uska saman rakh ke chali jati hain. Shivani ab bhi uske sath uske room me hai.

Shivani: Kya main koi help karu?

Anuj: Itni help pehle hi kar chuki ho aur kitni help karogi?

Shivani muskurati hai aur bolti hai, “To main fir jau?”

Anuj use rokna chahta hai, par use samajh nahi aa raha ki kaise roke?

Anuj: Ummhh… Koi kaam hai kya?

Shivani: Nahi!

Anuj: To fir…

Shivani wahin baith jati hai.

Shivani: Chalo main help karwa deti hu aapki.

Anuj: (smiles) Sach batau to mera abhi bilkul mann nahi hai room set karne ka.

Shivani: To kya mann hai?

Anuj: Shehar dekhne ka mann hai.

Shivani: Pura shehar to nahi dekh sakte ek sath, par kuch jagah zarur dekh sakte hain.

Anuj: Par akele jane ka bhi mann nahi hai.

Shivani: Akele kyun jaenge? Sab hain na, Simran, Kirti aur main. Sab chalte hain.

Anuj: Kya sirf hum dono chal sakte hain? Mujhe unse thoda darr lagta hai.

Shivani: (haste hue) Okay! To hum dono chalte hain.

Anuj: (smiles) Okay!

Shivani aur Anuj dono ab Delhi dekhne ke lie nikal jate hain. Shivani pehle Anuj ko wo sab jagah dikha deti hai, jahan Anuj ko kaam pad sakta hai. Fir wo dono alag alag jagah ghumte hain, wo Chandni Chowck jate hain, parathe wali gali jake parathe khate hain, Lal Qila dekhte hain lekin bahar se hi, Old fort bhi jate hain, aur uske baad Delhi ke mahshoor Connaught Place jate hain. Wahan jake wo ek café me baithte hain. Tabhi Anuj ke paas ek call aati hai. Ye uski Mommy ka call hai. Wo call receive karta hai.

Anuj: Hello!

Anuj’s mom: Hello! Tu to bhul hi gaya hai lagta hai wahan jake. Phone hi nahi aaya hai tera.

Anuj: Arey mom! Aisa nahi hai. Main aapse thodi der me baat karunga. Main abhi bahar hu, aaram se baat karni hai mujhe aapse.

Anuj’s mom: Han! Ab kyun yaad aaegi tujhe meri?

Anuj: Aisa nahi hai Mom.

Wo wahan se khada hoke side me jake baat karta hai.

Anuj: Mom! Main abhi bahar hu.

Anuj’s Mom: To?

Anuj: Shivani ke sath.

Anuj’s Mom: Shivani? Wo wahan kaise? Arey han! Wo to Delhi me hi rehti thi. Tu kaise mila usse?

Anuj: Sab bataunga, par abhi aap phone rakho. Wo wait kar rahi hai.

Anuj’s Mom: Acha thik hai. Khayal rakhna. Bye!

Anuj: Bye!

Anuj phone rakh deta hai.

Shivani: It’s okay! Baat kar lete.

Anuj: Ghar jake kar lunga. Waise main tumse kuch keh sakta hu?

Shivani: Han! Kahiye.

Anuj: Kya tum mujhe aap bolna band kar sakti ho?

Shivani: (haste hue) Okay!

Anuj: Thanks!

Shivani smile karti hai aur Anuj use dekh raha hai. Thodi der wahan relax karke dono ab wapas jane ke lie metro me jate hain. Anuj aur Shivani dono hi metro me khade hue hain. Anuj Shivani ko dekh raha hai, par jaise hi Shivani ki nazar us par padti hai wo kahin aur dekhne lagta hai. Dono ke beech baat nahi ho rahi, dono chup hain. Tabhi Anuj Shivani se kuch kehta hai.

Anuj: Shivani!

Shivani: Han!

Anuj: Mujhe kuch kehna tha tumse.

Shivani: Han bolo!

Anuj: Wo us din, jab hum mile the.

Shivani: Kis din?

Anuj: Mangalore me.

Shivani: Hmm to fir?

Anuj: To I want to say sorry!

Shivani: Kislie?

Anuj: Tumhe shadi ke lie mana karne ke lie.

Shivani: It’s okay! Aapko meri kuch chize samajh nahi aayi hongi to aapne mana kar dia hoga.

Anuj: Nahi! Aisa nahi hai.

Shivani: Matlab?

Anuj: Matlab…. Wo maine nahi mere ghar walon ne mana kia tha.

Shivani: Ghar walon ne kyun mana kia tha?

Anuj: Unki do wajah thi, ek to ye ki tum Delhi me ho aur main Mangalore me.

Shivani: Aur dusri wajah?

Anuj: Dusri wajah ye thi ki you earn more than me.

Shivani Anuj ko dekhti hai. Anuj already Shivani ko dekh raha hai.

Shivani: Koi baat nahi, unhe jo thik laga hoga unhone kia.

Anuj: Lekin mujhe nahi pata ki unhone thik kia ya nahi.

Shivani: Koi baat nahi. Aapke parents hain, aapka acha sochke hi kia hoga.

Anuj: It’s not like that.

Shivani: Then?

Anuj: Mujhe us time samajh nahi aaya ki main kaise unse bolu ki…

Anuj bolte bolte chup ho jata hai.

Shivani: Ki…

Anuj: (hichkichate hue) Ki… mujhe tum… mera matlab hai ki mujhe koi problem nahi thi… tumse… you know….

Shivani samajh jati hai wo kya kehna chahta hai.

Shivani: It’s okay! Jo ho gaya so ho gaya. Ab to us sab ko kafi time ho gaya hai. To mujhe kisi bhi chiz se koi problem nahi hai.

Anuj: Hmmm! Lekin mujhe hai.

Shivani: Kya?

Anuj: Mujhe apne parents se bol dena chahiye tha, pata nahi main kyun nahi bol paya?

Shivani: To ab bol dena, jo bhi ladki aapko pasand aaye.

Anuj: Han! Ab to main bol hi dunga ki aap log galat ho, hum dono ke beech aisi koi problem nahi hoti, jaisa aap log bol rahe the.

Shivani Anuj ko surprised hoke dekhti hai.

Anuj: Sorry! I mean aage jo bhi ladki pasand hogi uske lie bol dunga. Par main ek chiz puchna chahta hu.

Shivani: Kya?

Anuj: Tumhe to mujhse koi problem nahi thi?

Ab Shivani ko mazak sujhta hai.

Shivani: (Jaan ke bolte hue) Han! Thi to.

Anuj: (upset) Kya problem thi?

Shivani: Wo jo aapne bola tha na, ki aapko thriller, suspense aur horror movies pasand hain. Usse mujhe problem thi.

Anuj: It’s okay! Main dekhni chhod deta wo to, agar tum kehti to.

Shivani: (haste hue) Hehe! Lekin ab kya fayda, jo hona tha wo ho gaya.

Anuj: (Shivani ko dekhte hue) To ab kuch nahi ho sakta?

Shivani: (Anuj ko dekhte hue) Kya matlab?

Anuj: (Shivani ko dekhte hue hi) Matlab, agar main ye movies dekhna chhod du to?

Shivani: (Anuj ko dekhte hue) To kya?

Anuj: (Shivani ko dekhte hue) To tumhari taraf se to koi problem nahi hogi na?

Shivani aur Anuj ek dusre ko dekh rahe hain. Shivani kuch seconds baad jawab deti hai, “Mujhe aapse koi problem nahi thi.”

Anuj: (dhire se bolte hue) Koi bhi nahi?

Shivani: (Dhire se bolte hue) Nahi! Aur ye mujhe bhi nahi pata kyun?

Anuj: To agar main, I mean mere ghar wale mana nahi karte to aapki taraf se is shadi ke lie han thi?

Shivani: (Anuj ki aankhon me dekhte hue) Han!

Anuj bhi Shivani ki aankhon me dekh raha hai. Kuch seconds baad metro rukti hai aur Anuj ko ek jhatka lagta hai, jisse dono ko realise hota hai ki wo kahan khade hain aur wo ek dusre se nazare hatate hain.

Shivani: (phone me dekhte hue) Aur ladkiyan to dekhi hongi aapne.

Anuj: (Shivani ko dekhte hue) Han!

Shivani: Koi pasand aayi?

Anuj: (Shivani ko hi dekhte hue) Nahi!

Shivani: Koi baat nahi aa jaegi next time.

Anuj: (Shivani ko dekhte hue) Ab nahi aaegi pata hai mujhe.

Shivani: Kyun?

Ye bolke Shivani Anuj ki taraf dekhti hai aur notice karti hai ki wo use hi dekh raha hai. Is baar Anuj apni nazare usse hatata nahi hai, aise hi dekhta rehta hai. Islie Shivani ko hi apni nazare jhukani padti hain.

Anuj apne mann me soch raha hai, “Ab kaise kahu tumse ki tum pasand aayi thi, par us time main samajh nahi paya aur ab samjha hu to ye samajh nahi aa raha ki tumse kaise kahu?”

Thodi der baad, dono apni building me phochte hain. Shivani apne flat me jati hai aur Anuj uske samne wale flat, Mishra Uncle ke ghar me. Shivani ghar me aati hai, Kirti aur Simran wahi baithi hui hain.

Kirti: Kaisi rahi date?

Shivani: It was not a date Kirti.

Simran: Han! Aur bas in dono ko Uncle ke samne acting karni hai. Waise bhi Shivani in sab me kahan padne wali hai. Tune dekha nahi kya? Ab tak ek bhi boyfriend nahi hai iska.

Shivani: Han! Sahi kaha tune. Par aisa nahi hai ki mujhe boyfriend banane se allergy hai, par uske lie pehle mujhe koi pasand aana chahiye.

Simran: (haste hue) Waise isse teri arrange aur love dono marriage ho sakti hai, ye samne wala dono ke lie suitable hai aur tujhe pasand bhi aa gaya tha.

Shivani: (smiles) I don’t know Simran. God knows kya hone wala hai.

Simran: Tujhe pata hai? Maine usko tujhe dekhte hue dekha hai. Aur wo jis tarah se dekh raha tha na, koi bhi bata sakta hai ki he likes you.

Kirti: Han! Simran sahi bol rahi hai. Maine bhi notice kia tha aur isilie hum raat me chale gaye the tum dono ko akela chhod ke.

Shivani: Dekha to maine bhi hai. Aur ye to maine first day hi notice kar lia tha, lekin kya hua? Mana kar dia na shadi ke lie, islie ab main is dekhne wali condition ko consider hi nahi karne wali. Waise wo bol raha tha ki usne nahi uske ghar walo ne mana kia tha.

Kirti: Ek minute! Ab ye ghar wale kahan se aa gaye?

Shivani: Uske ghar walon ko meri job location aur salary se problem thi islie uske ghar walon ne mana kar dia tha.

Kirti: Are you mad Shivani?

Shivani: Kyun?

Kirti: Wo tujhe sidha sidha bol raha hai ki use tu pasand hai aur tu bol rahi hai ki bas friends banke rahenge.

Shivani: Ho sakta hai wo jaan ke aisa bol raha ho, maine uski help ki hai islie.

Simran: Waise mostly main Kirti ki baaton ko ignore karti hu, lekin aaj wo sahi bol rahi hai. Usne tujhe direct hint dia hai that he likes you.

Shivani: I don’t know. Agar aisa hai, to dhire dhire pata chal hi jaega.

Kirti: I think wo thoda shy hai.

Simran: Mujhe bhi yahi lagta hai.

Shivani: Tum dono dhyan se sun lo, uske samne aisi koi baate mat karna kabhi. Aur main fresh hone ja rahi hu.

Shivani unse ye sari baatein karke apne room me chali jati hai. Anuj ghar jakar sabse pehle apni Mommy ko call karta hai aur unhe landlord se bole hue jhuth ke alawa sab bata deta hai.

Anuj’s Mom: Usne itna sab kia tere lie?

Anuj: Han Mom! Aur aap log keh rahe the ki wo ladki achi nahi hai mere lie. Aapne use mana kar ke galati ki.

Anuj’s Mom: Koi baat nahi. Tujhe pata hai, wo tujhe ab kyun mili hai? Taki ab tu use ache se jane aur use shadi ke lie mana sake.

Anuj: Mujhe nahi lagta ki wo ab shadi ke lie manegi.

Anuj’s Mom: Manegi! Zarur manegi. Tujhe pata hai teri kundali me bhi likha hai ki tu love marriage karega.

Anuj: Mom! Aap bhi na. Ye sab kuch nahi hota.

Anuj’s Mom: Hota hai! Aur ab to mera vishwas aur bhi badh gaya hai us par.

Anuj: Mom! Hum bas doston ki tarah reh rahe hain. Aisa kuch main usse kabhi nahi kehne wala. Wo mujhe shadi ke lie pasand thi, iska matlab ye thodi hai ki main uske piche hi lag jaunga. Wo bhi kya sochegi mere bare me.

Anuj’ Mom: Abhi aisa karna bhi mat. Time de thoda, dosti badha usse. Dhire dhire jo bhi hona hoga khud hi ho jaega. Par main to ab pure vishwas se keh sakti hu ki bahu to wahi banegi meri.

Anuj: (Haste hue) Hahaha! Aap apne khayali pulav pakana band karo please.

Anuj’s Mom: Acha! Thik hai. Abhi main kuch nahi bol rahi. Jab aisa hoga tab hi bolungi. Aur ab mujhe teri chinta bhi nahi hai. Wo hai na! Tera pura khayal rakhegi.

Anuj: Wo bas dost hai Mom!

Anuj’s Mom: Acha! Par tu koshish to karna, ho sakta hai wo maan jaye.

Anuj: Aapko to pata hai na Mom. Mujhe ye sab karna nahi aata.

Anuj’s Mom: Koi ladki pehle pasand nahi aayi thi na, ab aa gayi hai, sab seekh jaega, chinta mat kar.

Anuj: Thik hai Mom! Aap bol rahi ho to seekh hi jaunga. Abhi main rakhta hu.

Anuj’s Mom: Thik hai. Bye!

Anuj: Bye!

Anuj aur Shivani dono hi ek dusre ko pasand karte hain, lekin bolna koi nahi chahta. Ek dusre ke behaviour se dono ko lagta bhi hai ki wo ek dusre ko pasand karte hain, lekin baat wahin aake atak jati hai ki kon bole? Kya ye dono ek dusre ko kabhi kuch bol bhi paenge ya nahi? Ye dekhne ke lie hum aapse milte hain next episode me. Tab tak… Enjoy your life and wait for the next episode, which will be published on saturday.

Take care guys….
&
Feel the love…<3

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: