SOCHA NA THA (E-1)

Episode-1

Ye kahani shuru hoti hai, jab hamari kahani ke hero ek ladki se milne jate hain, usse apni shadi ki baat karne. Aur hamare hero ka naam hai, Anuj.

Anuj, matlab chota bhai. Ye Mangalore ke rehne wale hain, aur wahin ek IT company me kaam karte hain. Isi company me wo ek thik thak si post par kaam karte hain. Inki family me, inke mom dad, aur bade bhaiya bhabhi hain. Pita ji job se retire ho chuke hain aur inke bhaiya, jinka naam hai Vishal, wo ek bank me manager ki post par lage hue hain. Inki bhabhi bhi ek college me lecturer hain. Aur inki Maa ghar sambhalti hain. Kul mila kar inki family ek happy family hai. Bade bhai ki shadi ho chuki hai to ab sare ghar wale shadi ke lie inke piche pade the, jinki baat maan kar ye yahan ladki se milne aaye hain. Aur usse baat karne ki shuruaat ki hai. Shuruaat me to ye shadi ke lie mana kar rahe the, kyunki inhe abhi shadi nahi karni, apne career par focus karna hai, lekin jab ladki ki tasveer dekhi to usse milne se mana nahi kar paye. Fir ghar walon ne bhi kaha ki bas ladki se mil lo pasand aa gayi to engagement kar denge, shadi tum apni marzi se jab chahe kar lena. To bas, ladki ki photo dekh kar aur ghar walon ki baat maan kar humare hero aa gaye yahan ladki se milne.

Ladki, jinka naam hai Shivani. Ye Delhi me, ek bank me assistant manager ki post par kaam karti hain, par inki family Mangalore me hi rehti hai. Life me inhone yahan tak aane ke lie kafi mehnat ki hai, aur ab ye apni life se khush hain. Inki family me inke Papa Mommy aur ek choti behen hai, jo abhi college me padh rahi hai. Delhi me ye ek flat me apni do flatmates ke sath rehti hai aur abhi kuch din ke lie apne ghar par aayi hui hain, jahan inke mom dad ne inhe ek ladke se milwane ka plan kia hai. Ye life ko khul ke jeene me vishwas rakhti hain, par sath me ye bhi janti hain ki kya chiz sahi aur kya chiz galat hai.

Anuj jo kafi ambitious hai, wahin Shivani jitna hai utne me khush rehne wali hai. Shivani ko choti choti chizon me khushi mil jati hai, aur Anuj badi badi khushiyon me bhi khushi nahi dhund pata. Anuj ka pyar se dur dur tak koi vasta nahi hai, wo samjhta hai ki pyar sirf kitabon ki baatein hain, wahin Shivani ko pyar se bhot pyar hai.

Dono ki personality, ek dusre se bhot alag hai. To dekhte hain ki inki baat kaise aage badhti hai.

Anuj: I don’t know is time pe kya baat karte hain, kaise baat karte hain. Agar kuch ajeeb lage to please don’t mind.

Shivani: (Smiles) Yeah! Okay!

Anuj: Umm… Waise to aapko kuch chize pata hi hongi mere baare me. But, I should tell more about myself.

Shivani answer me smile karti hai.

Anuj: Maine B.Tech. ki thi Computer Science stream me and I am a team lead in my company. Aap meri family se to mili hi hain. Yahi log hain bas meri life me aur meri job aur mera career mere lie bhot important hai. Aap kuch bataiye apne baare me.

Shivani: Maine B.Com. kia tha then M.B.A., then I started studying for bank. Now, I am working in a bank.

Anuj: To aage kuch karna hai ya you are satisfied with this only?

Shivani: At this point of time, I am satisfied. In future, may be kuch aur karu.

Anuj: At this point of time mujhe abhi bhot kuch karna hai, apne lie, apni family ke lie. Main abhi us level tak nahi phocha hu jahan main khud ko satisfied keh saku.

Shivani: I know, what you want to say. But if, we say yes, for this marriage, to I will also be there to help you. So, may be you will be able to do feel contented.

Anuj: If you don’t mind, may I know your salary?

Shivani use apni salary bata deti hai. Ye salary Anuj ki salary se jyada hai. Anuj soch me pad jata hai.

Shivani ko Anuj ki salary ke bare me pehle se hi pata hai, lekin jaise ki maine pehle bhi bataya ki wo itni ambitious nahi hai, islie use is baat se koi problem nahi thi.

Anuj: Meri salary aapse kam hai. So, kya aap ab bhi mujhse, I mean…

Shivani: Mere lie ye factor kabhi bhi beech me nahi aaega ki aap kitna kamaate hain.

Anuj: (smiling) Really? Sorry! This is difficult to digest for me.

Shivani: Why?

Anuj: Kyunki ye hi expected hota hai ki boy should earn more.

Shivani: (smiles) Mujhe is baat me aap dusron se alag maan sakte hain.

Anuj Shivani ki taraf dekhta hai aur bolta hai, “Aap waise bhi dusron se alag hain.”

Shivani bhi ab Anuj ko dekhti hai aur smile karti hai.

Anuj: (sambhal ke) I mean… In sab baaton me… aap sab se alag hain.

Shivani: (apne baalon ko side me karte hue) Thanks!

Anuj: (smiling) Okay! Iske alawa aapki kya hobbies hain?

Shivani: Mujhe padhna pasand hai.

Anuj: Nice! Kya? Motivational? Thriller? Spiritual? Suspense?

Shivani: Romantic!

Ye sunte hi Anuj ke gale me jaise kharash ho jati hai.

Anuj: Ahem! Romantic! Aapko love stories pasand hain?

Shivani: Yeah!

Anuj: (smiling) Okay! Maine aaj tak love stories padhi nahi hain, even main aisi movies bhi avoid karta hu.

Shivani: (smiles) Okay! To aapko love stories nahi pasand?

Anuj: (smiles) Sorry! But no.

Shivani: Don’t be! Isme aapki koi galati nahi hai ki aapki pasand different hai. To aapko kis tarah ki movies pasand hain fir?

Anuj: I like thriller, suspense and horror.

Shivani smile kart hai.

Anuj: Aur mujhe lagta hai ye aapko pasand nahi hoga.

Shivani: Yeah!

Dono muskurate hain aur ek dusre ko dekhte hain. Dono ek dusre ke kafi alag hain par ek ajeeb si vibes hain dono ke beech jo dono se hi kuch keh rahi hain. Dono hi use feel kar pa rahe hain aur sath me ye bhi soch rahe hain ki aur kya baate karein kyunki dono ko ek dusre ke sath acha lag raha hai.

Anuj: Okay! Can I ask you a little personal question?

Shivani: Boliye.

Anuj: Any Past?

Shivani: No.

Anuj: Not mine also. (smiles) So, you like arrange marriage?

Shivani: Nahi aisa nahi hai. Both marriages are equally good, I think.

Anuj: Okay! But I think arrange marriages are little weird. I mean, aap first meeting me dost bhi nahi bana sakte to life-partner kaise choose kar sakte hain. How can you know anyone in just few minutes and decide you want to live with that person for the whole life?

Shivani: To aap aise… I mean is tarah arrange marriage ke lie kyun aaye hain fir?

Anuj: (in hesitation) Yeah! Wo bas main aur aap…. I mean hum…. agar milte rahe…. I mean agar sab thik raha to… to ek dusre ko jaan bhi lenge, to…. wo problem bhi solve ho jaegi… if you don’t mind….

Shivani: Yeah! (smiles)

Anuj fir se Shivani ko dekhne lagta hai, Shivani bhi Anuj ko ek nazar dekhti hai aur fir uspar se nazare hata leti hai.

Anuj: To…

Shivani: To…

Anuj: To… Aap kya sochti hain iske baare me?

Shivani: Main… Abhi nahi bata sakti…

Anuj: No! No! I am not talking about marriage. I am talking about jaan pehchan.

Shivani: Ohh! But I live in Delhi, not here.

Anuj: Ohh! Yeah! I forgot.

Anuj apne mann me sochta hai, “Anuj! Idiots ki tarah behave karna band kar.”

Anuj: To fir hum chalte hain.

Shivani: Yeah!

Dono wahan se uth kar wahan jate hain jahan baki sab baithe hue hain. Dono apne apne parents ke paas jakar baith jate hain. Thodi der aur baatein karne ke baad dono families ek dusre se vida leti hain. Jate waqt bhi Anuj Shivani ko dekh raha hai. Jaise hi Shivani Anuj ki taraf dekhti hai, Anuj use dekh kar smile karta hai aur ishare me use “Bye!” bolta hai. Shivani bhi smile karti hai aur “Bye!” ka ishara kar deti hai.

Raste me bhi Anuj Shivani ke baare me hi soch raha hai. Wo uski smile aur uski baat karne ke tareeke se bhot impress ho chuka hai, aur Anuj ki salary kam hone par bhi use is shadi se koi problem na hone wali baat to uske dil ko chhu gayi hai. Wo log ghar phochte hain.

Anuj’s dad: Anuj! Kaisi lagi tumhe ladki?

Anuj: (smiling) Papa! You know uski salary mujhse jyada hai.

Anuj’s mom: Han! Aur wo rehti bhi Delhi me hai, kaise manage hoga?

Anuj’s dad: Aur salary jyada hai, to aage jake problem ho sakti hai.

Anuj: Kaisi problem Papa?

Anuj’s dad: Beta! Ego clashes ho jate hain.

Anuj: Par use meri salary se koi problem nahi hai.

Anuj’s dad: Abhi nahi hai. Abhi to sab hi acha bolte hain, baad me kya situation ho kuch pata nahi.

Anuj: Aap logon ko wo pasand nahi aayi kya?

Vishal (Anuj’s elder brother): Tujhe pasand aa gayi kya?

Anuj: (chhupate hue) Nahi! Bas main discuss kar raha hu bhaiya.

Vishal: Papa! Waise ladki to sahi hai. Ghar wale bhi ache hain. Sirf is baat pe rishta mana kar dena thik rahega kya?

Anuj: Han! Main bhi yahi bolne wala tha.

Bhavna (Anuj’s sister-in-law): Lagta hai Anuj ko Shivani pasand aa gayi hai.

Anuj: Nahi bhabhi! Wo bas main soch raha tha ki waise wo thik hai, to bas isi lie.

Anuj’s dad: Han! Ladki hume bhi thik lagi aur family bhi, par mujhe nahi lagta ki jyada kamane wali ladki ghar me lani chahiye. Anuj! Tum batao, agar tumhe wo pasand hai to fir hum kuch nahi kahenge. Aur fir tumhe to abhi shadi bhi nahi karni thi, to aur ladkiyan dekh lenge, isse bhi achi ladkiyan mil jaengi. Ye to pehli ladki hi dekhi hai.

Anuj: (upset) Okay!

Anuj’s mom: Tujhe wo pasand hai?

Anuj: Nahi! Aisa kuch nahi hai ki wo mujhe pasand hai. Han! Bas achi ladki hai. Par agar aap logon ko ye badi problem lagti hai to aap log jyada samjhdar hain.

Anuj’s mom: Han! Aur ladkiyon ki kami thodi na hai mere bete ke lie. Bhot si ladkiyan mil jaengi.

Anuj: (smiles) Hmmm!

Anuj ke Papa unke ghar par phone karke rishte ke lie mana kar dete hain. Ye baat jab Shivani ko pata chalti hai to wo bhi thodi upset hoti hai.

Shivani’s dad: Tujhe wo ladka pasand tha na.

Shivani: Papa! I don’t know, waise to sab kuch alag hi tha humare beech, shayad yahi sochke usne mana kar dia hoga.

Shivani’s mom: Main to ab bhi bol rahi hu, Delhi me rehti hai, wahan koi ladka pasand kyun nahi kar leti? Teri dono pagal saheliyon ke boyfriends hain aur tera nahi hai.

Shivani: Maa! Koi pasand bhi to aana chahiye na. Aap bhi na jane kaisi baate karti ho. Aur please, ab mujhe koi ladka nahi dekhna hai. Ab next time dhundna.

Toshi (Shivani’s sister): Han! Abhi iska dil toota hua hai, pehle judne do, jab tak ye dobara aaegi iska dil jud jaega. Hahaha!

Shivani’s mom: Chup kar! Pareshan na kar meri bacchi ko. Ho sakta hai ki hume ab iske lie dhundne ki zarurat hi na pade wahin koi mil jaye ise.

Shivani apni mom ke gale lag jati hai aur uski mom uske sir par hath pherti hain.

Raat ko Anuj apne room me hai aur apne phone me Shivani ki photo dekh raha hai aur bolta hai, “I am sorry! Par shayad tum meri life me nahi ho, isilie to main Papa se bol nahi paya ki tum mujhe pasand ho. But, you will be my first crush. Isse pehle tak to mujhe pata hi nahi tha ki kisi ladki se milke aisa bhi feel ho sakta hai. I just want ki main tumse dobara mil pau.”

Shivani bhi apne room me baith ke us meeting ke baare me soch rahi hai jo Anuj ke sath hui thi. Wo jis tarah use dekh raha tha usse use laga nahi tha ki wo use mana kar dega, fir usne shadi ke lie mana kyun kia? Bas yahi sawal uske dimag me ghum raha hai.

Anuj ne kaha tha ki use abhi shadi nahi karni, bas wo un logon ke lie ladki se milne ja raha hai. Bas yahin par fas gaya wo, bata nahi paya ki use Shivani pasand aa gayi hai. Lekin Anuj ko ek baar to apne Papa se bolna chahiye tha ki use Shivani pasand hai. Par kehte hain na, jab tak life me twists and turns na ho, life ka maza nahi aata. To ye bhi shayad isilie hai.

Anuj ke paas Shivani ki photo to thi, par iske alawa aur koi chiz nahi thi, jisse wo use contact kar pata. To bas wo apne mann ko samjha ke baith gaya ki shayad uski kismat me yahi tha aur fir se apne kaam aur apne career par dhyan dene laga. Shivani bhi kuch din apne mom dad ke paas ruk kar wapas Delhi chali gayi apni job par.

Anuj ke ghar walon ne aur kayi rishte dekhe, lekin Anuj ko koi bhi ladki pasand nahi aayi. Kisi me wo height kam hai bol ke mana kar deta tha to kisi me height jyada hai. Hamesha koi na koi silly reasons de ke rishte ke lie mana kar deta tha. Anuj ke is behaviour se uske ghar wale bhi soch me pad gaye ki ise hua kya hai? Aur ek din jab Anuj office se wapas aaya to uski mom usse baat karne lagi.

Anuj’s mom: Anuj!

Anuj: Han mom!

Anuj’s mom: Sabzi kaisi bani hai?

Anuj: Sahi hai.

Anuj’s mom: Ek baat puchu to sach-sach bataega?

Anuj: (khate hue) Boliye na.

Anuj’s mom: Tujhe wo ladki pasand hai kya?

Anuj: Mom! Mujhe abhi kisi rishte ki baat nahi karni hai please.

Anuj’s mom: Main kisi rishte ki baat nahi kar rahi, jo puch rahi hu wo dhyan se sun.

Anuj: (frustrated) Mujhe kisi bhi chiz ke baare me baat nahi karni hai. Aur ladki ke baare me to bilkul nahi.

Anuj’s mom: Aur Shivani ke baare me bhi nahi?

Anuj: (surprised) Shivani? (khane ki plate me dekhte hue) Uske baare me aapko kya baat karni hai?

Anuj’s mom: Tujhe wo pasand thi na.

Anuj: (fir se chhupate hue) Nahi! Aisa to kuch nahi hai.

Hmmm! Fir se chupa raha hai. Na jane is ladke ka kya hoga? Par shukar hai ki iski mom samajhdar hain.

Anuj’s mom: Jhuth mat bol. Bata, tujhe wo pasand hai na.

Anuj: Nahi! Aisa kuch nahi hai.

Anuj’s mom: Fir se jhuth. Abhi tak tu baat bhi nahi karna chahta tha kisi ladki ke baare me aur ab uska naam sunte hi baat karne laga.

Anuj: (mom ko ignore karte hue) Mom! Aap mujhe khana khane do please.

Anuj’s mom: Nahi! Bata mujhe. Pasand hai na wo tujhe?

Anuj: Pasand hai bhi to ab to kuch nahi so sakta.

Anuj’s mom: Pagal ladke! To pehle kyun nahi bataya ye sab?

Anuj: Mujhe khud nahi pata tha tab ki wo mujhe pasand hai. Aapko to pata hai main kabhi bhi in sab me interested nahi tha. Par ab kuch nahi ho sakta.

Anuj’s mom: Ho sakta hai. Hum unse fir se baat kar sakte hain.

Anuj: Nahi! Koi zarurat nahi hai. Humne hi mana kia aur ab hum hi unke paas jaye. No! No!

Anuj’s mom: Ek baar try karne me kya jata hai?

Anuj: Mom! Aapko ho na ho par mujhe aapki respect ki chinta hai.

Anuj’s mom: Arey! Isme respect ki baat kahan se aa gayi? Tu bhi na jane kya kya sochta hai. Itna mat socha kar.

Anuj: Wo mere lie nahi bani thi, that’s it.

Anuj’s mom: To tu pareshan kyun rehta hai fir?

Anuj: Mujhe kuch din ye ladki dekhne ke chakkar se dur rehna hai please.

Anuj’s mom: Acha! Thik hai.

Anuj: Aur important baat jo mujhe aapko batani hai wo ye hai ki mujhe shift karna padega yahan se, kyunki company mujhe Delhi bhej rahi hai.

Anuj’s mom: Kya? Par kyun?

Anuj: Company walon ki marzi. Maine bhot request ki par nahi mane. Ab jana to padega, par main dusri job dhund raha hu, aur jaldi hi job switch karke yahan wapas aa jaunga.

Anuj’s mom: Ye company wale bhi na, aaj kal jeene nahi dete. Kab jana hai?

Anuj: Next month tak.

Anuj’s mom: Thik hai.

Aur wo din bhi aata hai jab Anuj ko Delhi jana hai. Sab log use airport chhodne aate hain. Anuj ki mom uske lie kafi pareshan hain kyunki Anuj is tarah kabhi apne shehar se bahar nahi gaya hai. To wo baar baar use kuch na kuch instructions de rahi hain. Anuj unki har baat pe han me sir hila deta hai. Jab Anuj ke check in ka time hota hai to sabko “Bye!” bolke wo check in ke lie chala jata hai.

Raat ke 10 baje Anuj ki flight Delhi land karti hai. Anuj airport se bahar nikalta hai aur ghar par Delhi phochne ke baare me bata deta hai. Wo ab ek cab karta hai aur use wahan ka address batata hai jahan usne rent par rehne ke lie flat book kia hua hai. Jaise ki dekhi ka trend hai, us flat me uske alawa do aur log pehle se rehte hain. Aur Delhi ke cab walon ko to aap jante hi hain, aisa nahi hai ki shareef nahi hote, par kabhi kabhi aise log bhi mil jate hain jo naye insan ki madad karne ki jagah uske fayda uthane ki koshish karte hain. Anuj ko bhi aisa hi cab wala mil gaya tha aur jo rasta aadhe ghante ka tha, wo usne 2 ghante ka bana dia tha. Anuj use GPS ke through directions bata raha tha par wo use shortcut ka jhansa deke puri Dilli ghuma raha tha. Aur is tarah se Anuj apni destination par phocha raat ke 12 baje. Sochiye zara uski kya haalat hogi? Wo cab wale ko koste hue ab apni building me jane ke lie andar gaya to dekha ki building ki lift bhi kaam nahi kar rahi hai. Anuj pehle hi gusse me tha ab aur gussa uske dimag me chadh gaya tha. Wo jaise taise apna sara saaman leke dhire dhire 8th floor tak aaya aur apne flat ke samne phocha, to usne dekha ki flat par to lock laga hua hai. Ab to jwalamukhi bas phatne hi wala tha. Anuj ne turant landlord ko phone kia.

Anuj: Hello! Sachdev ji!

Sachdev ji apne ghar par aaram se so rahe the, jab Anuj ne unhe phone kia to wo neend me the.

Sachdev: Han ji! Kon?

Anuj: Dekhiye Sachdev ji! I am sorry main aapko itni late phone kar raha hu, par yahan flat par lock laga hua hai. Aap please pata kijiye ki aapke baki tenants kahan par hain. Wo jahan bhi hain jaldi aaye kyunki main bhot thaka hua hu.

Sachdev: Ohho! Aap aa gaye kya? Mujhe pehle bataya hota.

Anuj: Maine aapko bataya tha Sachdev ji.

Sachdev: Ohh! To mere mind se hi skip ho gaya hoga. Sorry! Main abhi pata karta hu.

Anuj: Please! Jaldi bataiye.

5 min baad, Sachdev ji ka phone aata hai. Anuj phone uthata hai.

Anuj: Boliye! Kab tak aa rahe hain wo?

Sachdev: Wo aisa hai sir, ki wo log to nahi aa sakte abhi, kyunki wo log ghumne gaye hue hai city se bahar.

Ab Anuj ka gussa control se bahar ho raha hai.

Anuj: (gusse me) To main kya karu fir? Maine aapko advance dia hai, mujhe meri keys aap de dijiye bas.

Sachdev: Sir! Wo log bahar hain, main kahan se dilwau aapko keys?

Anuj: Aapke paas duplicate keys hongi na. Wo le aaiye yahan.

Sachdev: Sir! Time dekhiye zara. It’s 12:15. Main abhi to nahi aa sakta aapko keys dene. Aur agar aaya bhi to ek hour to aapko wait hi karna padega. To meri maniye, aap aaj raat kisi hotel me ruk jaiye. Subah aake main aapko keys de dunga.

Anuj: Aapne logon ko pagal samjha hai kya? Maine aapko bataya tha ki main aa raha hu, tab bhi aapne kuch nahi kia. Ye tarika hai aapka?

Sachdev: Sir! I am sorry. Par abhi main aapki koi help nahi kar paunga.

Anuj ka gussa badhta ja raha hai.

Anuj: Aapko ab meri koi help karne ki zarurat nahi hai. Aap please kal tak mere advance ke die hue paise mere account me transfer kara dijiye. I am not going to stay in this flat anymore.

Ye kehke Anuj phone kaat deta hai. Is waqt wo frustration aur gusse se bhara hua hai. Use ghar ki yaad aa rahi hai aur samajh nahi aa raha ki ab wo kya kare. Thodi der wo aise hi gusse me wahan khada rehta hai. Use ab bhukh bhi lag rahi hai, lekin raat ke 12:30 baj chuke hain, aur use is nayi jagah ke baare me kuch bhi pata nahi hai. Wo thodi himmat juta kar apna saman uthata hai aur niche aa jata hai. Wo gusse aur frustration me building se bahar nikalta hai. Wo itna pareshan ho chuka hai ki uski frustration ab udasi me badal rahi hai. Use na to kisi hotel ke baare me pata hai aur na hi uske phone me battery hai ki wo kisi hotel ko search kar sake. Wo badbadate hue chal raha hai, “Wow! Delhi me pehla din aisa hai to aage kya kya hoga. Shit man! Why I came here? I want to go home.” Wo chal raha hai ki tabhi uske samne ek auto aake rukta hai. Wo auto wale se kisi paas ke hotel me jane ke lie puchta hai. Wo itna frustrated hai ki auto me se nikali us ladki ko bhi nahi dekhta. Par wo ladki use pehchan leti hai.

“Is it you, Anuj?”

Ab Anuj ko ye awaz yaad aati hai, jo usne pehle bhi kahin suni hui hai. Wo piche mud ke dekhta hai. Samne wahi khadi hai. “Shivani!”

Shivani! Jiski wajah se Anuj baki sab ladkiyon ko reject kar raha tha aur jisse wo ek baar fir milna chahta tha. Wo aaj uske samne khadi hai. Ye sach me koi magic hi hai shayad, jo is tarah se Shivani use mil gayi. Ab aage dono ke beech kya baate hoti hain wo bhi dekhenge par next episode me. Aaj ke lie hum aapse vida lete hain. Fir milenge next episode ke sath. Tab tak… Shubh Ratri… Shubh Ratri… Shubh Ratri… Do take care of yourself and your family and keep feeling the love… ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: