The Imperfect Marriage!

Episode-15

Recap: Pichle episode me aapne dekha tha ki Manpreet akele Punjab wapas aa gayi hai aur Ridayjeet Jassi ko dhundne gaya hai. Manpreet wapas aake Riddhi ki sab bata deti hai. Riddhi use tasalli deti hai. Par Manpreet ko jaise lag raha hai ki ab sab khatam ho chuka hai. Wo do din tak Ridayjeet ka intezaar karti hai, kyunki intezaar karne ke alawa ab wo kuch aur kar bhi nahi sakti. Ridayjeet jab wapas aata hai to Manpreet ke ghar walon ko bhi apne ghar par bula leta hai. Wo wahan par sab ko baitha ke unse sawal karta hai ki unhone uske sath aisa kyun kia? Last me wo apna decision sab ko suna deta hai. Jisme wo ye kehta hai ki wo is shadi ko nahi manta. Ridayjeet aur Manpreet ke papa Ridayjeet ko samjhane ki koshish kar rahe hain. Lekin ab Manpreet se Ridayjeet ka ye roop dekh ke wahan ruka nahi jata aur wo wahan se apni academy chali jati hai. Wahan jake wo ye decide karti hai ki ab wo sirf academy par hi dhyan degi. Ab aage…

Ridayjeet ko wo log samjhane ki koshish kar rahe hain. Ridayjeet un logon ki baat sunna nahi chahta.

Manpreet’s dad: Ridayjeet puttar! Hum sab ne bhot koshish ki si, Jassi nu contact karne ki, par usne phone nahi uthaya.

Manpreet’s mom: Jo bhi kuch hua usme Manpreet ki galati nahi hai, humne uspar dabav dala si. Us time hum sab ko bas ye lag raha tha ki gharan di badnaami hone se bach jaye. Usne to bhot mana kia tha ye sab karne ke lie. Wo bilkul bhi nahi chahti thi ye shadi karna. Fir jaise taise mani bhi to baar-baar yehi bol rahi si ki kam se kam hum tumhe to bata de ki tumhari shadi Jassi se nahi Mann se ho rahi hai.

Ridayjeet: Aap logon ko uski baat maan leni chahiye thi. Kabhi-kabhi bacche bhi sahi hote hain.

Ridayjeet’s dad: Cheeku! Galati inme se kisi ki nai hai. Galati hamari hai, kyunki Mann de naal tera viaah karane ka idea humara hi si. Hum bas apni naak bachana chahande si, is layi kujh nai socheya.

Ab Riddhi bhi room me aa jati hai.

Ridayjeet’s mom: Beta! Wo to shadi ke baad bhi hum sab se yahi bol rahi thi ki tainu sab sach bata de, ab to rishtedaar bhi chale gaye hain, par humne hi nahi suni.

Manpreet’s mom: Cheeku puttar! Dekho beta hum hath jodte hain. Sadi beti ke baare ‘ch socho. Usdi koi galati nai hai. Wo hum logon ki wajah se chup rahi si.

Riddhi: Ye sach hai veer ji. Mann ne shadi ke baad mujhe bhi ye sab bata dia tha aur wo chahti thi ki ye sab main aap nu bata du, kyunki uski khud ki himmat nai si sach batane ki. Lekin maine vi us nu yahi bol ditta ki sab sahi chal raha hai, ise kharab na kar.

Ridayjeet: To tujhe bhi pata si. Aur kisi ne nahi bataya. Itna bada dhokha kia hai mere sath, aur ab chahte hain ki main ye dhokha accept kar lu.

Ridayjeet’s dad: Dekh puttar! Humari khatir na kar, par Mann ki isme koi galati nai hai. Uski khatir is shadi nu maan lae.

Riddhi: Veer ji! Please! Maan jao. Tussi tan hun jaan hi gaye hoge ki Mann kitni achi hai. Us de layi maan jao veer ji.

Ridayjeet’s mom: Maan ja puttar.

Manpreet ki biji ro rahi hain aur hath jode Ridayjeet ke samne khadi hain. Sab use baar-baar insist karte hain. Use samjhane ki koshish kar rahe hain ki wo Mann ko apna le.

Ridayjeet: Mainu sochne ke lie waqt chahiye.

Ridayjeet’s dad: Beta! Tu waqt lae le, par Mann saddi bahu hai ye hum mante hain. Is layi jo bhi faisla le soch samajh kar lena.

Ridayjeet bina kuch bole ghar se bahar chala jata hai. Ridayjeet ke mommy papa Mann ke biji bauji ko ye yakeen dila ke ghar wapas bhej dete hain ki wo Riday ko mana lenge aur Mann wahin rahegi Riday ki biwi ban ke. Wo log wahan se apne ghar wapas aa jate hain.

Manpreet academy me hai. Manpreet ne ye soch to lia ki wo ab academy par hi dhyan degi. Lekin pure din wo bas Riday ke baare me hi soch rahi hai. Wo wahan kabhi bacchon ko dance sikha rahi hai, kabhi koi kaam sambhal rahi hai, to kabhi apne dance ki video bana rahi hai. Wo khud ko busy rakhne ki koshish kar rahi hai, lekin ek pal bhi khali hote hi wo Riday ke bare me sochne lagti hai. Kayi baar to jis song par dance kar rahi hai wo song sun kar wo Riday ko yaad karne lagti hai. Jab usse raha nahi jata to wo washroom me jati hai. Uske dimag me shadi se lekar unke honeymoon tak ki sari yaadein baar-baar aa rahi hain. Wo har us chiz ko yaad kar rahi hai jo Riday ne use kahi thi. Wo yaad karti hai wo baat jab usne Riday se kaha tha, “Agar kabhi koi aisi gal hui jis pe aapnu lage ki aap mujhe trust nahi kar sakte tan karoge trust?”
Aur tab Riday ne use kaha tha, “I will trust you. Hamesha kia hai aur karta rahunga.”

Par aaj sab bekar hai. Wo trust wo pyar sab khatam ho chuka hai. Manpreet ye sab yaad karke ro rahi hai. Thodi der baad wo muh dhoke bahar aati hai jisse kisi ko pata na chale ki wo ro rahi thi.

Uske washroom se bahar aane ke baad biji ka call aata hai. Manpreet phone receive karti hai, “Hello!”

Manpreet’s mom: Han puttar! Maine is layi phone kia si ki Ridayjeet maan gaya hai.

Manpreet: Te hun mainu wahin rehna hai, ye batane ke lie phone kia hai?

Manpreet’s mom: Dekh puttar sab sahi ho javega. Tu chinta na kar. Kuch time lagega.

Manpreet: Pata nahi biji. Wo Mumbai gaye si Jassi nu dhundne. Aap ko lagta hai sab thik ho jaega?

Manpreet’s Mom: Na to Jassi wapas aane wali hai aur na Jassi Ridayjeet ki biwi hai. To tu pareshan na ho beta. Sab sahi hoga.

Manpreet ki biji ye sab bol to rahi hain, par andar se wo bhi ghabrayi hui hain ki pata nahi Ridayjeet kya faisla lega.

Manpreet: Main wahan nahi reh sakti biji. Main kaise rahungi unke samne?

Manpreet’s mom: To kujh din ke lie ghar aaja. Jab thoda time ho jave tab chali jana.

Manpreet: Thik hai biji. Main sham ko apna saman lae ke ghar aa jawangi.

Manpreet’s mom: Apna dhyan rakh puttar. Aur ghabra na, hum hai tere naal.

Manpreet: Okay biji! Bye!

Apni biji se baat karke Manpreet ki aankhon me fir aansu aa jate hain. Par wo kisi tarah khud ko sambhalti hai.

Ab sham ho chuki hai aur wo academy ke bahar nikalti hai. Use yaad aata hai kaise har roz Ridayjeet is time uska wait karte hue car leke khada rehta tha. Fir wo dono ek sath time spend karte the aur ghar par jate the. Fir ghar jakar bhi Riday uska picha nahi chhodta tha. Room me uske sath uske piche laga rehta tha. Wo sab use yaad aa raha hai aur muskurahat ke sath aankhon me aansu bhi aa rahe hain. Manpreet sham ko Ridayjeet ke ghar nahi jati. Uska wahan jane ka mann nahi karta. Wo sidhe apne ghar chali jati hai. Wahan use jaise hi biji dikhti hain, wo bhag ke unke paas jati hai aur gale lag jati hai. Wo bhot roti hai. Manpreet ke bauji wahin khade dono ko dekh rahe hain. Wo Manpreet ke paas aate hain aur bolte hain, “Mainu maaf kar de puttar.”

Manpreet bauji ke gale lag jati hai aur rote hue bolti hai, “Aisa na kaho bauji. I am sorry! Main itne dino se aapse ache se baat bhi nai kar rahi thi.”

Manpreet aur bauji dono ro rahe hain. Fir bauji Mann ki aankhon se aansu ponchte hain.

Manpreet’s dad: Ro mat puttar. Abhi hum hain tere sath. Tu chinta na kar puttar.

Manpreet: Maine nai jana hai ab wahan.

Manpreet’s dad: Thik hai. Tera jab Mann ho tab jana. Tu yahin reh apne ghar vich.

Manpreet fir se bauji ke gale lag jati hai. Biji aur bauji dono Mann ko chup karate hain. Wo biji ki god me sir rakh ke let jati hai. Biji use thapki deke sula deti hain. Manpreet ke sone ke baad, uske biji aur bauji baat karte hain.

Manpreet’s dad: Hum ne thik nai kita apni Mann ke sath. Kya halat ho gayi hai iski.

Manpreet’s mom: Galt sab Jassi ne kia hai hamesha se, aur bhugat ye rahi hai. Haye Rabba! Ab to bas kar de, meri bacchi khush reheve yahi tan chahande hain hum.

Ab Manpreet ke biji bauji ko apni galati ka ehsaas ho raha hai. Kash ye sab wo pehle samajh pate aur shadi ke time hi Ridayjeet ko sab sach bata dete.

Ridayjeet ghar par apne room me baitha hua hai. Aisa nahi hai ki use kuch yaad nahi aa raha. Wo bhi wahan room me ghumte hue purani sari chize yaad kar raha hai. Kis tarah wo Mann ke sath us room me raha karta tha. Room ka har kona use Mann ki yaad dila raha hai. Par sath hi use ye baat bechain kar rahi hai, ki jise ab tak wo Jassi samajh raha tha, wo Mann hai. Wo balcony me jata hai to use apne aur Mann ke sath bitaye hue wo sare pal yaad aate hain, jab wo Mann ko apni bahon me leke wahan khada ho jaya karta tha. Wo mirror ko dekhta hai to use yaad aata hai ki kis tarah Mann roz subah wahan ready hua karti thi. Wo bed ko dekhta hai, to yaad karta hai ki kis tarah wo Mann ke paas use cuddle karke soya karta tha. Ridayjeet ki aankhon me aansu hain, wo khud se bolta hai, “Wo sare pal jo maine Jassi samajh kar uske sath bitaye the, wo Mann ke sath the. Mann ne mere sath itna bada dhokha kyun kia? Kya use kabhi nahi laga ki wo kya kar rahi hai meri feelings ke sath? Kaise kar lia usne ye sab? Aur bahar sab bol rahe hain ki Mann ki koi galati nai hai. Kaise galati nai hai? Usne mere sath har lamha jiya hai Jassi ban kar. Humare sare secrets, sari baatein sab jaan li. Mujhe laga ki wo sab main Jassi se bol raha hu. Uski himmat bhi kaise hui mere kareeb aane ki? Aur wo diary… Usne Jassi ki diary bhi padh dali, khud ko sahi saabit karne ke lie. Koi aisa kaise kar sakta hai. Mujhse jhutha pyar jataya, jhutha ‘I love you!’ bhi bola. Sab kuch jhuth tha. Mujhe khud se nafrat ho rahi hai ki main kaise uski baaton me aa gaya? Har baar ye to socha ki ye change ho gayi hai, par ye nai socha ki ye itni change kyun hai? Aur wo meri biwi hai.”

Gusse me Ridayjeet room ki kuch cheeze utha ke fenk deta hai aur fir bolta hai, “Aur mujhe uske sath rehna hai.” Wo fir saman fenkta hai aur fir bolta hai, “Kyun kia Mann aisa tumne? Meri puri life kharab kar di. Jassi tum kahan ho yaar? Please wapas aa jao na. Please Jassi! Come back Jassi!”

Wo bolte hue rota hai aur room me baith jata hai.

Dinner time pe Ridayjeet sabke sath baitha hua hai aur uske papa usse puchte hain, “Cheeku! Kuch socha apne faisle ke baare me?”

Ridayjeet: Mera dil tan nai hai, par aap log manne wale nai hain. Islayi reh legi wo yahan.

Ridayjeet’s mom: Lekin wo apne ghar chali gayi hai. Us nu lene jana padega.

Ridayjeet: Han! To aap log jake le aana. Nai tan jab khud uska dil karega aa jaegi.

Ridayjeet’s dad: Puttar tu….

Ridayjeet: (baat kaatate hue) Mainu na bolo us nu lane vaste. Main nai jawanga.

Ridayjeet’s mom: Thik hai puttar, tu na jayin.

Dinner karke Ridayjeet fir apne room me chala jata hai.

Kuch din beet gaye hain. Na Mann Ridayjeet ke ghar wapas aati hai aur na Ridayjeet use lene jata hai. Mann aur Riday dono hi ab kaam me busy rehne ki koshish me lage hue hain, taaki ek dusre ki yaad se dur reh sake. Mann academy me apna pura time dene lagi hai. Wo academy se ab late aati hai. Ridayjeet bhi ab apne papa ke sath unke business me pura dhyan de raha hai. Wo bhi ab extra kaam karta hai jisse busy rahe aur ghar walon se dur bhi.

Par ek din, Ridayjeet ka apne kaam me bhi mann nahi lag raha. Wo shop se bahar nikal kar thodi der aise se ghum raha hai. Tabhi wo kuch bacchon ko dance karte hue dekhta hai, jo uski shop ke piche rehte hain. Use Mann ki aur uski academy ki yaad aati hai. Kayi din ho gaye hain use academy gaye hue. Wo yaad karta hai ki kis tarah Mann bacchon ko dance sikhaya karti thi. Wo sochta hai, ki wo Jassi nahi Mann hi thi aur isilie wo roz academy jaya karti thi. Aur usse jhuth bola tha ki Mann ke wapas aane tak academy sambhalegi. Ridayjeet dhire se bolta hai aur muskurata hai, “Jhuthi kahin ki!”

Ridayjeet un bacchon ke paas jata hai aur unse puchta hai ki unhe dance karna pasand hai ya nahi?

Wo bacche han karte hain. Use yaad aata hai ki ek baar use Mann ne kaha tha ki unke yahan bacchon ko free dance sikhaya jata hai. Wo unke parents se permission lane ke lie kehta hai aur unka apni shop par wait kar raha hai. Sham hone ko aayi hai, uski shop par abhi tak koi nahi aaya. Wo sochta hai ki shayad ab koi nahi aaega, tabhi do bacche apne parents ke sath uski shop par aate hain.

Ek bacche ke papa Riday se baat karte hain, “Sat Sri Akal Bhai Ji!”

Ridayjeet: Sat Sri Akal!

Father: Sade bacche bol rahe si ki aap unhan da kisi academy ‘ch dakhala (admission) karwa sakde ho.

Ridayjeet: Ji bhai ji! Agar aap tyar ho tan main pata de denda hu.

Ridyajeet academy ka naam batata hai.

Father: Bhai ji! Ae academy tan bhot vaddi ae. Is vich sadde baccheyan da dakhala kive hoga?

Ridayjeet: Yahan free me bhi admission karte hain logan de. Aap jao tan sahi ik vaari.

Father: Na ji bhai ji! Assi nai ja sakde.

Ridayjeet: Acha! Ik kamm karna wahan jake meri gal kara dena call utte.

Father: Aap hamare naal chal sakde hain ki? Tan jyada asar paduga.

Ridayjeet: (kuch sochne ke baad) Thik hai main chalda han.

Ridayjeet apne papa ko thodi der bahar jane ka inform karke, unke sath jata hai. Thodi der me wo log academy phoch jate hain.
Ridayjeet car se utarta hai aur un logon ko bhi utarta hai. Use andar jate hue hesitation ho rahi hai. Wo reception pe jata hai aur bolta hai, “Hi! Mujhe in bacchon ka admission karana hai is academy me.”

Receptionist: Sorry sir! Par is time to ho nahi paega. Sham ho chuki hai, sare procedure khatam karne me time lagega.

Ridayjeet: Aap yahan nayi aayi hain kya?

Receptionist: Yes sir! Kuch days pehle hi join kia hai.

Ridayjeet: Isilie aapko pata nahi hai ki yahan chahe kisi aur ka admission ho ya na ho, in ka admission ho sakta hai. Aur abhi kareeb ek ghanta hai academy band hone me.

Receptionist: Yes sir! Maine mana nahi kia, par Manpreet mam busy hain aur wahi ye sab karti hain. Islie main abhi aapki koi help nahi kar paungi.

Itne me academy ki ek choreographer wahan aati hai, wo Ridayjeet ko dekh kar pehchan jati hai aur bolti hai, “Arey! Sir, aap yahan.”

Ridayjeet: Han! Wo mujhe in bacchon ka admission karana tha.

Choreographer: To aap yahan kya baat kar rahe hain, directly Manpreet se miliye na.

Ridayjeet: Mujhe laga procedures follow karne thik rahenge.

Choreographer: (receptionist se) Ye Mann mam ke husband hain.

Receptionist: Oh! I am so sorry sir.

Ridayjeet: It’s okay!

Choreographer: Aap log mere sath chaliye.

Ridayjeet aur uske sath baki sab andar chale jate hain. Ridayjeet ko ab andar jate hue ajeeb lag raha hai. Use lag raha hai ki wo wahan jakar sahi kar bhi raha hai ya nahi.

Ridayjeet: Receptionist bol rahi thi wo busy hai, koi important kaam hai to hum baad me aa jaenge.

Choreographer: No! No! Its okay! Wo bas video shoot chal rahi thi, islie bol rahi thi receptionist.

Wo Ridayjeet ko wahan le jati hai jahan Mann dance kar rahi hai aur video record ho rahi hai. Dance ka ek part hi shoot hua hai. Next part shoot karne ke lie Manpreet dance karne gayi hai, ki tabhi choreographer Mann ko awaz lagati hai. Manpreet choreographer ko dekhti hai aur uske sath khade Ridayjeet ko dekhti hai aur wo sab bhul jati hai. Kya recording? Kya dance? Kya song? Aur kya log? Use ab kuch dikhayi nahi de raha. Mann Ridayjeet ki taraf badh rahi hai.

Manpreet: (Riday ke paas phonchne ke baad) Aap…. Aethe?

Ridayjeet: (hesitating) Han! Wo…

Jitne me Riday bolta utne me choreographer bol deti hai, “Ye in do bacchon ka admission karana chahte hain. Islie aaye hain.”

Manpreet ne bachpan me kisi se suna tha ki hichki aaye aur hum kisi ka naam le. Aur pehli baar me kisi ka naam lene par agar hichki band ho jaye to maan lo ki use wahi yaad kar raha tha. Aaj Manpreet ko hichkiyan aa rahi thi aur jaise hi usne Ridayjeet ka naam lia, hichki aani band ho gayi. Aur ye baat to hai hi ki Ridayjeet sach me aaj use yaad kar raha tha, bacchon ke zariye hi sahi, par uske mann me Mann aayi zarur thi. Mann bhi aaj Riday ko subah se yaad kar rahi thi. Jab se uski hichki band hui thi tab se. Use kahin na kahin aaj lag raha tha ki shayad Riday usse mile. Isilie wo ye video bhi bana rahi thi. Han! Ridayjeet ko yaad karte hue hi wo ye video bana rahi thi.

Manpreet muskurate hue Ridayjeet ko dekh rahi hai. Tabhi Ridayjeet use tokta hai, “Mann!”

Manpreet: (hosh me aate hue) Hmm!

Ridayjeet: (use yaad dilate hue) Inka admission..

Manpreet: Han! Main karti hu.

Mann un bacchon ko apne sath le jati hai. Ridayjeet wahin khada hua hai aur dekh raha hai ki Manpreet kar kya rahi thi. Wo bani hui adhuri video ko dekhta hai. Mann usme dance kar rahi hai aur hamesha ki tarah khoobsurat lag rahi hai. Ridayjeet wahan video shoot karne wale se bolta hai, “Kya ye video mujhe mil sakti hai?”

Wo Ridayjeet ko jawab deta hai, “Kyun nahi sir? Aapko nahi milegi to kise milegi?”

Wo Ridayjeet ko wo video jitni bhi shoot hui thi, utni video de deta hai.

Ridayjeet: Aur han! Mam ko mat batana ki maine video lia hai.

Wo jawab deta hai, “Okay! Sir.”

Ridayjeet wo video dekhta hai.

Video yahan dekhe…..

Kareeb aadhe ghante baad Mann un bacchon ke sath wapas aati hai.

Manpreet: (Ridayjeet se) Inka admission ho gaya hai, bas inki passport size pics chahiye.

Ridayjeet: Main le aaunga kal.

Manpreet: Okay!

Itne me video shoot karne wala bhi aa jata hai. Wo bolta hai, “Mam ab to late ho gaya hai.”

Manpreet: Koi baat nahi. Jitna ho gaya utna kafi hai. Baki kal dekh lenge.

Wo use ye kehke jane ke lie bol deti hai. Wo bacche aur unke parents bhi Ridayjeet ko thanks bolke chale jate hain. Ab Ridayjeet aur Manpreet wahan akele khade hain. Dono ke beech ajeeb sa silence hai. Par Manpreet khush hai ki Ridayjeet aise hi sahi ek baar academy aaya to. Wo ab bhi Riday ko usi pyar se dekh rahi hai.

Ridayjeet: I am sorry! Maine tumhara kaam beech me kharab kar dia.

Manpreet: No! No! It’s okay! Waise bhi ye aaj pura nahi ho pata.

Manpreet wait kar rahi hai ki Riday kuch aur bole. Par Riday chup hai aur Mann se nazarein bhi nahi mila raha. Manpreet samajh jati hai ki Riday ab bhi waisa hi hai, wo use maaf nahi kar paya hai.

Manpreet: To main chalti hu fir.

Manpreet wahan se jane lagti hai.

Ridayjeet: Ghar ja rahi ho?

Manpreet: Han!

Ridayjeet: Main chhod du?

Manpreet: (kuch sochke) Nahi! Aapko be wajah pareshan nahi karna chahti. Waise hi kafi kar chuki hu.

Ridayjeet: Main chhod dunga.

Manpreet: Mujhe 15 minute lagenge.

Ridayjeet: I will wait.

Ridayjeet academy ke bahar chala jata hai aur Manpreet ka wait kar raha hai.

Kya Manpreet aur Ridayjeet aise hi chup rahenge ya unke beech kuch baat hogi? Ye janne ke lie hum milenge next episode me. Tab tak… Shubh ratri, shabba khair, sayonara… Keep enjoying your life… & keep feeling the love…<3

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: