The Imperfect Marriage!

Episode-1

“Cheeku! Cheeku! Kahan hai beta? Arey jaldi thalle aa, haldi ki rasam ka time nikal raha hai.”
“Aaya mommy!”

Ji Han! Hamari story ke hero ka naam hai ‘Cheeku.’ Waise ye uske ghar wale use pyar se bulate hain. Nai tan bada changa naam hai sadde hero da. ‘Ridayjeet!’ ‘Ridayjeet Singh Maan’ ye naam hai hero da. Ye story hai Punjab ki. Sab log Punjab se belong karte hain. Chaliye aapko Ridayjeet ki family ke baare me batate hain. Ridayjeet apne parents ke sath rehta hai, uske papa ka ek business hai jisme ab Ridayjeet bhi help karta hai.

Ridayjeet ki ek choti behen hai, jiska naam hai ‘Riddhi.’ Jitna Ridayjeet sidha, saccha aur bhola hai, utni hi Riddhi shararati aur shaitan hai. Aap soch rahe hain ki main hero ki behen ke baare me kyun bata rahi hu aapko? Kyunki yahi hai jiski wajah se hero ki shadi ho rahi hai. Han ji! Bilkul love marriage hi hai.

Hua yun ki Riddhi ki school aur fir college me uske sath padhti thi uski do saheliyan jo bachpan se unke ghar aati jati thi. Dono behene, wo bhi judwa. Judwa means twins, wo bhi identical twins. Ek da naam Jaspreet, te dujji da naam Manpreet. Dono ko pyar se ‘Jassi’ aur ‘Mann’ kehte hain sab. Par Jassi khud ko hamesha se ‘Jazz’ bulwana chahti hai. Jab ghar me aana jana tha, to pata nahi kab Ridayjeet ko Jaspreet se pyar ho gaya. Jaspreet aur Manpreet ko shakal se to koi nahi jaan sakta tha, par dono me bahut bada fark ye hai ki Jaspreet jitni chulbuli thi, Manpreet utni hi shant. Jab bhi dono Ridayjeet ke ghar pe aaya karti thi, tab Mann to Riddhi ke sath busy rehti thi, par Jassi frank thi. Kabhi kabhi majak me Ridayjeet se flirt bhi kar lia karti thi. To bas shayad isilie Ridayjeet ko Jaspreet pasand aa gayi. Ab asli reason kya tha use pasand karne ka wo to Ridayjeet ko hi pata hoga. Lekin kabhi Ridayjeet ne Jassi ko apne dil ki baat nahi batayi. Jab uska college pura ho gaya aur wo apne papa ke business me thik se jam gaya, tab usne Jassi ko apne dil ki baat batayi. Us din Jaspreet, Manpreet aur Riddhi ke college ke final year ke, exams khatam hue the, jab Ridayjeet ne Jassi se ye sab kaha. Jaspreet ne kuch waqt maanga is baare me sochne ke lie aur fir usne bhi ‘Han’ keh dia. Jab unhe is tarah sath me ghumte firte teen mahine ho gaye, tab ek din Ridayjeet ke ghar par unke baare me pata chal gaya. Sab ko rishta pasand hi tha, kyunki ladki dekhi bhali thi. To sabne un dono ki shadi karne ka faisla le lia. Par Ridayjeet Jassi ko shadi ke lie force nahi karna chahta tha, islie jab tak usne apne mann se shadi ke lie han nahi kia tab tak Ridayjeet ne bhi shadi ke lie han nahi bola. Par Ridayjeet ko shadi ke lie Jaspreet ko manana bhot pada. Pehle to wo bilkul maan hi nahi rahi thi, fir pata nahi Ridayjeet ne kaise use manaya. Aaj Ridayjeet ki haldi hai jiske lie uski mommy use bula rahi thi. Waise Ridayjeet ki family bahut badi hai. Uske ghar me uske maa baap, uski behen, uske chacha chachi aur unka ek beta aur beti bhi hain. Shadi ke time par aur bhi bahut se mehman aaye hue hain. Sabhi milkar Ridayjeet ko haldi se nehla dete hain.

Ab baat kare Jaspreet ke ghar ki to unke ghar me, uske mommy papa, uski judwa behen Manpreet hain. Wahan bhi haldi ki rasam puri ho chuki hai. Raat ko mehndi ki rasam hai. Usse pehle Ridayjeet aur Jaspreet dono phone par baate kar rahe hain.

Ridayjeet: Suno na, tum mujhe apni mehndi ki pic bhejna.

Jaspreet: Kyun? Tumhe itni kya jaldi hai meri mehndi dekhne ki?

Ridayjeet: Usme main apna naam dhundunga.

Jaspreet: Ye sab shadi ke baad karna.

Ridayjeet: Shadi ke baad usme time waste nahi karna mujhe.

Jaspreet: Tum bas dusron ke samne hi shareef bante ho. Waise dekho to kinne shaitan ho.

Ridayjeet: Tuhadde layi shaitan nahi howanga to aur kis de layi howanga?

Jaspreet: Kisi ke lie bhi ho. Mujhe koi fark nahi padta.

Ridayjeet: Padta hai, bas tum show nahi karti.

Jaspreet: Acha ae sab chhaddo na Ridu. Ye batao hum honeymoon par kitthe ja rahe hain?

Jassi Ridayjeet ko pyar se Ridu bulati hai.

Ridayjeet: Ye to surprise hai tuhadde layi.

Jaspreet: Oh please Ridu baby! Batao na.

Jaspreet ke ye bolte hi piche se zor se hasne ki awaz aati hai. Room ke door par Manpreet khadi hai aur usne Jaspreet ko Ridayjeet ko ‘Ridu baby’ kehte hue sun lia hai.

Jaspreet: Mann tu yahan kya kar rahi hai?

Manpreet: Biji ne bheja hai. Tujhe mehndi ke lie ready hona hai.

Jaspreet: Ho javangi. Par tu has kyun rahi hai?

Manpreet: (haste hue) Kuch nahi Ridu baby! Hahaha!

Jaspreet: (phone par Ridayjeet se) Ridayjeet main tumse baad me baat karti hu.

Ridayjeet usse kuch keh raha hota hai par wo ignore karke phone kaat deti hai aur Manpreet ke piche bhagti hai.

Jaspreet: Ruk tu Mann ki bacchi. Ek to hamari baate sun rahi hai, upar se has bhi rahi hai.

Manpreet: (room me bed ke charon taraf bhagte hue) To door band karke baat kia kar na, shadi ka ghar hai, koi bhi aa ja sakta hai. Ridu baby! Hahaha!

Jaspreet thak kar bed par let jati hai. Manpreet bhi uske paas aake let jati hai.

Manpreet: Waise kya naam hai na jiju ka. Ridayjeet! Aur nick name bhi to kya rakha hai, Cheeku! Hahaha!

Jaspreet: Has mat. Tu naam change kar lena apne husband ka.

Manpreet: (smile karte hue) Jaise tune kia hai? Ridu baby!

Jaspreet: Wo main use pyar se bulati hu.

Manpreet: Wahan jake kya bulaegi? (haste hue) Cheeku?

Jaspreet: Han yaar! Pata nahi kaise kaise naam rakhe hain unke ghar walon ne. Ridayjeet ka Cheeku aur Riddhi ka Meeku.

Manpreet: Waise kitna acha hai na tere lie. Us ghar me ja rahi hai, jahan teri best friend teri nanad hogi, aur tera husband wo hai jise tu pyar karti hai, aur kya chahiye life me.

Jaspreet: Life me aur bhi bhot chize hoti hain karne ke lie. Sirf shadi karke ghar pe baithna, ye main nahi kar sakti.

Manpreet: To ab tak ki kyun nahi ki job? Kar sakti thi tu college ke baad.

Jaspreet: Wo sab nahi Mann. Mujhe kuch aur karna hai, kuch alag, kuch bada. Tere jaise nahi, tu to yahan bhangra aur gidda karke khush ho jati hai.

Manpreet: Hmmm. Mere lie to meri academy best hai. Mujhe usi me acha lagta hai. Log meri videos dekh ke, janne lage hain mujhe. Aur pehle to tu bhi aaya karti thi. Yaad hai wo gidda? Jo maine tujhe sikhaya tha. Sabne kitni tareef ki thi hamari. Par pata nahi fir kya hua tujhe. Tu kya kar rahi hai kuch nahi pata.

Jaspreet: Bata du? Tu kisi ko bataegi to nahi?

Manpreet: Lae! Aaj tak kuch bataya hai kya jo aaj bata dungi?

Jaspreet: Han! Han! Thik hai. To sun. Maine na modelling me jana hai.

Manpreet: Modelling!

Jaspreet: Han!

Manpreet: Par Jassi teri shadi ho rahi hai na.

Jaspreet: Han! To kya hua? Shadi ke baad main modelling karungi. Maine Ridayjeet se baat kar li hai. Waise bhi wo log hamari shadi ke baad Mumbai shift ho rahe hain. Mere lie aur bhi easy hoga wahan jake ye sab karna.

Manpreet: (shaq karte hue) Tu shadi isilie to nahi kar rahi?

Jaspreet: (nazare churate hue) Tu bhi. Kuch bhi bolti hai.

Manpreet: Dekh tu bhot siyappe kar chuki hai, pehle bhi. Ab sach bata kya socha hai tune? Aur ye sab jiju ko pata hai ya nahi? Aur unke ghar wale wo bhi to manne chahiye.

Jaspreet: Oho Mann! Maine kar li hai baat Ridu se. Wo mere sath hai. Use koi problem nahi hai mere modelling career se.

Manpreet: Pakka na!

Jaspreet: Han meri maa.

Manpreet: (smiles) Okay! Then I am with you. Waise bhi biji aur bauji ne to kuch kehna hi nahi hai. Wo to teri har gal nu han hi karde hain. Par ye baat sach hai kya? Wo log Mumbai shift ho rahe hain?

Jaspreet: Han! Par wo sab nahi, bas main aur Ridu. Uske papa ne business expand karne ka socha hai. Mumbai me unhe ek partnership ka offer mila hai, jahan Ridu jake sambhalega aur main modelling karungi.

Manpreet: Acha hai. Par pehle sabko mana lena.

Jaspreet: Mainu ki karna hai sab nu mana ke, mere paas to Ridu hai hi.

Manpreet: Okay! Jaisi marzi ho karna. Chal ab jaldi se ready hoke niche aa ja.

Jaspreet: Okay!

Manpreet wahan se chali jati hai. Jaspreet fir Ridayjeet ko phone karti hai.

Jaspreet: Wo Mann aa gayi thi.

Ridayjeet: Han! Samajh gaya tha main.

Jaspreet: Maine use meri modelling ke baare me bata diya.

Ridayjeet: Kuch boli wo?

Jaspreet: Ki bolegi? Maine bata diya us nu ki tussi mere sath ho.

Ridayjeet: Wo tan han hi.

Jaspreet: Okay! Ab mainu jaan do. Mehndi layi jana hai.

Ridayjeet: Par mainu ek baat karni hai, important hai.

Jaspreet: Abhi nahi. Abhi mujhe jana hai late ho raha hai.

Ridayjeet: Lekin…

Jaspreet: Oho! Hun sari gallan shadi de baad karna.

Ridayjeet: Thik hai, tussi jao. Par mehndi ke baad baat karna.

Jaspreet: (smiling) Yeah! Okay bye!

Ridayjeet: Okay! Love you! Bye!

Jaspreet: Bye!

Ridayjeet: Suno!

Par Jaspreet pehle hi phone rakh deti hai. Ridayjeet bhi phone rakh deta hai. Pata nahi Ridayjeet Jaspreet ko kya batana chahta tha, jo wo nahi bata paya.
Jaspreet ready hoke sabke paas jati hai. Uski mehndi ki rasam puri hoti hai. Sab bhot khush hain. Sari rasame achi tarah se puri ho rahi hain. Shadi ka din bhi aa gaya hai. Baraat aa chuki hai, sab log baraat ka swagat kar rahe hain. Jaspreet ki biji (mom) Ridayjeet ki aarti utar rahi hain. Aap ko bata de ki Punjabi shadiyan din me hua karti hain. Kyunki usme Guru Granth Sahib ji ke phere lie jate hain. Baarat ko andar bula ke sab log unhe baithate hain. Jaspreet ke bauji (papa) Jaspreet ki biji aur Manpreet se Jaspreet ko lane ke lie kehte hain. Lekin jab wo uske room me phochte hain, tab wo dekhti hain ki Jaspreet room me nahi hai. Jaspreet ki biji pareshan ho jati hain. Wo wahin baith ke rone lagti hain.

Manpreet: Biji aap chinta na karo. Yahin kahin hogi wo, abhi aati hogi. Main use call karti hu.

Manpreet Jaspreet ko call kar rahi hai, lekin Jaspreet phone nahi utha rahi. Manpreet sab jagah Jaspreet ko dhundti hai par wo nahi milti. Wo jab wapas usi room me aati hai, to uski biji ke hath me ek letter hai. Manpreet apni biji ke paas jati hai, unse wo letter leti hai aur padhti hai.

Bauji!

I am sorry. Mujhe aise shadi ke beech me se jana pad raha hai. Lekin main kya karu, mujhe modelling karni hai. Maine shadi ke lie bhi isilie han kia tha, kyunki Ridayjeet ko meri modelling se koi problem nahi thi. Par mujhe ek offer mila hai, aur main kisi bhi keemat par use chhodna nahi chahti. Jaise hi ye project pura ho jaega, main wapas aa jaungi. Aap log tab tak Ridayjeet aur uske ke ghar walon ko samjha dena. Mujhe ye sab karna pad raha hai, kyunki main life me kuch karna chahti hu. Mujhe pata hai, hamesha ki tarah aap log mujhe samjhoge.

Jaspreet…

Manpreet ye padhke apne mann me bolti hai, “Maine bola tha Jassi, koi siyappe na karna. Par tu nahi maani.”

Jaspreet’s Mother: (rote hue) Apne bauji nu bula.

Manpreet bauji ko phone karke room me aane ke lie bolti hai aur unhe wo letter de deti hai. Wo bhi pareshan hoke bed pe baith jate hain.

Jaspreet’s Father: Sab hamari galati hai Mann ki maa. Humne hi is nu badi chhut deyi si. Ajj dekh lo ki ho riha hai.

Jaspreet’s Mother: Ye sab baad me sochna, hun dasso ki karna hai?

Jaspreet’s Father: Ki dassan? Bulao Ridayjeet ke ghar walo ko.

Jaspreet ke bauji Ridayjeet ke parents ko bulate hain aur unhe sab bata dete hain. Wo letter bhi padha dete hain.

Ridayjeet’s Father: Ye to Jaspreet ne acha nahi kia bhaisahab. Aisa kujh si tan shadi se pehle bata deti. Hum uski shadi zabardasti to nahi kar rahe si, jo is tarah bhaj gayi shadi chhad ke. Ridayjeet ke upar kya beetegi ye bhi nahi socha usne. Chalo assi tan fir vi samajh javange, par itne mehman aaye hue hain, unka ki karna hai?

Jaspreet’s Father: Aap jaisa bologe waisa kar lenge hum to. Ab hum bol hi ki sakde han?

Ridayjeet’s father: Ye to badi uljhan ho gayi hai bhaisahab.

Manpreet: Bauji! Aap bura na maan to main ek baat kahu.

Manpreet’s father: Ab mujhe kisi ki koi gal ni sunni. Tum dono hamesha se apni manmaani karti aa rahi ho, aur aaj ye natija hai is sab da.

Manpreet chup ho jati hai.

Ridayjeet’s father: Bhaisahab aap Mann pe gussa kyun nikal rahe ho? Galati to Jassi ne ki hai.

Manpreet’s father: Bhaisahab galati to meri hai, jo maine in donan nu inni chhut di si. Sare rishtedaaran ne kinni baar boleya si mainu, ki kudiyan ko inni chhut mat do, bigad jawangi. Par maine mudeya te kudiya de vich kabhi bhi koi fark ni kia, dono di parvarish aise ki jaise dono mere bete ho. Ye sab karan de ajj ye natije hain. (Manpreet se) Bahar ja room se. Hum bade logan nu gal karan de. Te khabardaar ye baat kisi nu vi kahi to.

Manpreet room ke bahar chali jati hai. Wo soch rahi hai ki pata nahi andar kya baate chal rahi hain. Ek baar use jake Ridayjeet se baat kar leni chahiye. Wo Ridayjeet ke paas jati hai. Wo apne friends ke sath baitha hua hai.

Manpreet: Jiju! Ek minute, kuch baat karni hai aapse.

Ridayjeet: Han bol na Mann, ki gal hai?

Manpreet: Wo actually Jassi…..

Ridayjeet: Han Jassi kya?

Tabhi Manpreet ke phone pe call aata hai uske bauji ka.

Ridayjeet: Tum pehle bauji ka call attend kar lo fir baat karna mujhse.

Manpreet call receive karti hai. Uske bauji use room me bula rahe hain. Manpreet room me chali jati hai.

Manpreet: Ji Bauji! Aapne bulaya?

Manpreet’s father: Han! Hume tujhse kuch baat karni hai.

Manpreet: Ji kahiye.

Manpreet’s father: Is situation se nikalne ka ek hi rasta hai hun.

Manpreet: Ki rasta bauji?

Manpreet’s father: Tujhe Ridayjeet se shadi karni hogi.

Manpreet: (shocked) Kya? Nahi Bauji! Main aise kaise kar sakti hu. Aap to jante hain, Jassi aur jiju ki shadi honi hai. Usne likha to hai wo aa jaegi kaam khatam karke.

Manpreet’s father: To hum sab uske hisab se chalenge ki? Jab wo chavegi aa ke shadi kar legi. Jab wo chavegi shadi chhad ke chali jaegi.

Ridayjeet’s father: Beta ji! Ki pata? Aave na aave. Aur agar yehi gal si te hume bata bhi to sakdi si. Kisi nu nahi bataya. Ridayjeet nu bhi nahi.

Manpreet: Lekin uncle! Jiju bhi to usse shadi karna chahte hain. Aise kaise main shadi kar lu? Nahi… Nahi nahi… (room se bahar jate hue) Main nahi kar sakti ye sab.

Ridayjeet’s mother: Beta ji! Hamare khandaan baare’ch (ke baar me) socho kujh. Ki bolenge sab, love marriage me bhi kudi (ladki) bhaj (bhag) gayi. Beta tussi time lae lo, soch lo aaram naal (aaram se).

Manpreet: Aap logon ko pehle jiju se baat karni chahiye. Wo kya chahte hain, aapko pehle ye sochna chahiye. Log to bolte rahenge.

Manpreet’s father: Tujhe ye shadi karni hai ya nahi bas itna das. Faltu gallan (baatein) sunne ka mann nahi hai mera.

Manpreet: (apni biji se) Biji aap samjhao na bauji nu (bauji ko).

Manpreet’s mother: Vekho ji! (Dekho ji!) Aap Jaspreet ke jaane ka gussa Manpreet pe nikal rahe ho. Aisa na karo.

Manpreet’s father: Ki karaan main? Tu hi bata de. Wo to karke chali gayi jo karna si. Ab ye bhi nahi manegi meri baat to iski marzi hai.

Manpreet: Bauji! Aap aisa kyun bol rahe hain? Maine aapki baat kabhi nahi taali.

Manpreet’s father: To ajj wo kamm (kaam) vi (bhi) kar lae.

Manpreet: Aap ko Jiju ko ye sab batana chahiye. Fir wo jo bhi decision lenge wo sahi hoga. Is tarah mehmano ki chinta karke jaldi me decision lena thik nahi hai.

Ridayjeet’s father: Beta use nahi batana humne is baare me kuch bhi.

Manpreet: (hairani se) Kyun?

Ridayjeet’s father: Batane di ki lod hai jab tum dono ek jaisi dikhti han?

Manpreet: Ye sahi nahi hai uncle! Abhi pata chale na chale, baad me to pata chalega hi.

Manpreet’s father: Tu bas itna bata tujhe ye shadi karni hai ya nahi? Wo unka beta hai, unhe jaise samjhana hoga samjha lenge use.

Manpreet chup ho jati hai aur khadi rehti hai.

Manpreet’s father: (Manpreet ki biji se) Isse kaho jo karna hai jaldi bataye, nahi to jaye yahan se.

Manpreet’s mother: Mujhe kuch baat karni hai Manpreet se, uske baad wo bata degi jo bhi uska faisla hoga.

Manpreet’s father: Thik hai.

Manpreet ki biji Manpreet ko leke dusre room me chali jati hain.

Manpreet: (biji ke gale lag ke) Ye sab kya ho raha hai biji. Bauji ko kya hua hai? Wo mujhe force kyun kar rahe hain aise?

Manpreet’s mother: Tune kabhi unhe gussa karte hue dekha hai kya?

Manpreet: (na me sir hilate hue) Nahi. Isilie mujhe bhot darr lag raha hai.

Manpreet’s mother: Unhone aaj tak tum dono ko wo karne dia jo tum chahti thi. Aur aaj Jaspreet ne jo kaam kia hai, usse unhe bhot thens phochi hai. Sab logon ne bola tha unhe, ki ladkiyan nu inni chhut mat do. Par unhone kisi ki bhi nahi suni, kyunki tumhe khush dekhna chahte si wo. Aaj unhe pehli baar lag raha hai ki unhone galati ki. Naraz hain wo. Pehli baar apne baare me soch rahe hain, ki jin logon se aaj tak ladte aaye si tum dono ke lie, wo aaj unki parvarish pe sawal uthaenge. Agar sab ko pata chala to ab tak jo sir ucha rehnda si unka apni betiyon ki wajah se wo jhuk jaega beta. Kisi ko bataye bina shadi ho gayi to shadi ke baad to sab nu apne ghar ‘ch jana hi hai. Kisi ko Jassi ke baare me kuch pata nahi chalega.

Manpreet: Par wo jiju ko kyun nahi bata rahe? Kam se kam jisse shadi honi hai, use to pata ho ki main kon hu?

Manpreet’s mother: Agar Ridayjeet nu pata chala to wo shadi nahi karega. Ye uske parents ka kehna hai. Hun tu dekh, tujhe apne bauji ke baare me sochna hai ya Ridayjeet ke baare me.

Manpreet: Aur mera kya biji?

Manpreet’s mother: Rijayjeet acha ladka hai, uska parivaar bhi acha hai, teri best friend hai wahan. Wahan tujhe koi pareshani nahi hogi.

Manpreet: Mere husband nu pata vi nai hoga ki wo main hu ya Jaspreet hai aur mujhe koi pareshani nahi hogi?

Manpreet’s mother: Faisla tere hath me hai puttar, jo vi chahe kar. Soch le thodi der.

Ye keh ke Manpreet ki biji wahan se chali jati hain. Manpreet khud ko majboor feel kar rahi hai is moment me. Use samajh nahi aa raha ki wo kya kare. Uski biji bhi thik keh rahi hain, ki agar sabko pata chala to uske bauji ke upar sab log sawal uthaenge. Par ye sab karegi to uski khud ki life bhi hai jo kharab ho jaegi. Mana ki wahan sab sahi hai, sab log ache hain, uski best friend hai. Par jiske lie, wo wahan jaegi use hi nahi pata hoga ki ye Manpreet hai. Thodi der baad, Manpreet us room me aati hai, jahan sab baithe hue hain.

Manpreet: Main shadi ke lie tyaar hu.

Manpreet’s mother: Thik se soch lia hai na tune.

Manpreet biji ki taraf dekhti hai, par kuch nahi bolti.

Manpreet’s father: Ise jaldi se dulhan ke jode me tyaar karo. Hum wait kar rahe hain.

Ye kehke wahan se sab chale jate hain. Manpreet aur uski biji room me rehte hain.

Manpreet’s mother: Ja beta! Ye lehnga pehen le jake.

Manpreet apni biji ko dekhti hai aur rote hue unke gale lag jati hai.

Manpreet’s mother: (rote hue) Ro mat puttar, sab changa hoga. Chup ho ja.

Manpreet shadi ke lie to maan gayi, par kya shadi ke waqt Ridayjeet ko Manpreet ki asliyat ka pata nahi chalega? Ye janne ke lie next episode me milte hain aapse. Kal phir milenge isi waqt. Tab tak ke lie shubh ratri, shabba khair, sayonara!

2 thoughts on “The Imperfect Marriage!

Add yours

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: