From Hate… To Love!!

Episode-16

Kal humne dekha tha ki Ishani ke papa Ishani ki singing ko ek hobby ki tarah aage badhane ke lie maan gaye hain. Shukr hai, itna to maane. Ab agar Ishani ko aage singing karni hogi to wo dhire dhire shayad apne papa ko uske lie bhi mana le. Lekin baat abhi ye nahi hai, baat ye hai ki aisa kya hua ki wo ek sath badal gaye. Jo Ishani se baat tak nahi karte the, wo thik se baat karne lage. Ho sakta hai aaj ye hume pata chale.

Ishani Pranav ko chhod kar ghar me aati hai. Ishani ke papa use apne paas bulate hain.

Ishani’s dad: Ishani!

Ishani unke room me jati hai.

Ishani: Aapne bulaya papa?

Ishani’s dad: Han! Andar aao.

Ishani room ke andar jakar unke samne khadi ho jati hai.

Wo use chair par baithne ka ishara karte hain. Ishani chair par baith jati hai.

Ishani’s dad: Ab tum mujhe sach bataogi, jo bhi main puchunga.

Ishani unki ye baar sunke thoda seham gayi hai, ki pata nahi ab ye kya puchenge? Par wo bolti hai, “Okay papa! Puchiye.”

Ishani’s dad: Ye Pranav kon hai?

Ishani: (in hesitation) Matlab?

Ishani’s dad: Kon hai ye?

Ishani: Mera classmate aur friend.

Ishani’s dad: Iske papa kya karte hain?

Ishani: Uske papa ke baare me aapko kyun janna hai?

Ishani’s dad: (Ishani ko tokte hue) Ishaniii…

Ishani: Unka ek chhota sa business hai, sarees ka.

Ishani’s dad: Means sareeyan bechte hain?

Ishani: Han!

Ishani’s dad: Us competition me aaenge wo?

Ishani: Pata nahi.

Ishani’s dad: Pranav se kehna unhe bulaye.

Ishani: Kyun?

Ishani’s dad: Jitna bola hai, utna karo bas.

Ishani: Okay!

Ishani mann me sochti hai, “Pata nahi ab kya karne wale hain ye.”

Ishani’s dad: Kya soch rahi ho?

Ishani: (darte hue) Kuch nahi.

Ishani’s dad: (aaram se) Bolo jo bhi bolna hai, main kuch nahi kahunga.

Ishani: (darte hue hi) Main puchna chahti thi ki… Aaj aap… Aaj aap alag lag rahe hain.

Ishani’s dad: Matlab?

Ishani: (himmat juta ke) Matlab isse pehle aapne kabhi mujhe beta nahi bola tha.

Ishani’s dad: Hmmm. Main soch hi raha tha, tumhare dimag me ye sab chal raha hoga.

Ishani: (darte hue) Bataenge?

Ishani’s dad: Tumhari wajah se.

Ishani: (in surprise) Meri wajah se?

Ishani’s dad: Tumne ye change aaj hi notice kia hai, kyunki maine itni badi baat maan li. Par main to bhot pehle se hi change ho chuka hu.

Ishani: Kya matlab?

Ishani’s dad: Ab tumhe daanta hai kya maine tumhari maa ki shikayat karne pe?

Ishani: Nahi! Ye sab bhot kam ho gaya tha. Aur us din bhi jab aap Pranav se ache se baat kar rahe the, tabhi main soch rahi thi ki aapko kya hua hai?

Ishani’s dad: (smile karte hue) Means tumhare papa ne kabhi bhi tumse aur tumhare doston se thik se baat nahi ki.

Ishani: (darte hue) Nahi! Nahi! Mera wo matlab nahi tha.

Ishani’s dad: Nahi! Tumhara yahi matlab tha, aur main janta hu ye sach hai.

Ishani unhe dekh rahi hai, wo unka ek alag side dekh pa rahi hai, ek pyar bhara side.

Ishani’s dad: Ishani! Maine bhot si galatiyan ki hain life me. Pehle tumhari maa ko uske mann ki nahi karne di, fir jab tum hone wali thi tab tumhari maa se ladayiyan ki, tumhare hone ke baad maine dusri shadi ki kyunki mujhe lagta tha ki ek ladki kuch nahi kar sakti apni life me. Mera naam to mera beta hi roshan karega. Lekin dhire dhire mujhe samajh aane laga ki aisa kuch bhi nahi hai. Ye sab bacchon ko bachpan me di hui education aur manners hoti hain jo bacchon ko kabil banati hain. Tum apne bachpan me jyadatar apni nani ke paas rahi, unhone tumhe jo sikhaya tum wo sikhi aur yahan Rohit (Ishani’s step brother) ki maa ne use jo sikhaya usne wo seekha. Aaj main jab bhi tumhare college jata hu, to tumhare lecturers se leke principal tak tumhari tareef karte hain, jabki maine tumhe forcefully engineering me dala tha. Wahin Rohit apne mann ke course aur apne mann ke college me gaya tha, lekin aaye din main uske college se uski shikayate hi sunta tha. Tabhi se mujhe lagne laga ki maine tumhare sath thik nahi kia. Lekin tumhari maa ne tumhari shikayate kar kar ke mere mann me tumhari galat image bana rakhi thi, jo dhire dhire mujhe samajh aaya. Wo Rohit ki har galat baat chupa leti thi, aur tumhari har baat ko galat tarah se mujhe batati thi. Aaj wo itna bigad gaya hai, ki uske college walon ne use college se nikal dia hai.

Ishani: (surprised) Kya?

Ishani’s dad: Han! Aur maine usse pucha ki kya kroge ab, tumhe college se nikal dia hai. To usne kaha ki dad mujhe college jake karna kya hai, aap hain to, main aapka business hi join kar lunga.

Ishani: Ohh!

Ishani’s dad: He has no regrets. (kuch seconds baad) Aur ek tum ho. Tumhe tumhari mann ki padhayi karne ko nahi mili, lekin fir bhi tum chahti ho ki tumhe main college jane du, tumhari padhayi puri karne du. Aur mere lie apni hobby ko bhi chhod sakti ho. Yahi fark hai tum me aur usme.

Ishani: Main puri koshish karungi papa ki main jo bhi kar rahi hu usme acha kar pau.

Ishani’s dad: (smiling) Acha to tum karogi hi, tumhare sath Pranav jo hai.

Ishani bhi muskurati hai.

Ishani’s dad: I like that boy, bhot alag hai. Usme kuch baat hai, wo life me bhot aage jaega.

Ishani khush hai ki uske papa ko Pranav pasand hai. Uski aage ki tension to khatam ho gayi hai. Par Ishani ke mann me ek sawal aata hai.

Ishani: Lekin papa aap Pranav ke papa ke lie kyun puch rahe the?

Ishani’s dad: Arey bhai! Acha ladka hai to main uske papa se milna chahta hu. Kon aata hai apne dost ki itni help karne. Tumhe koi problem hai kya?

Ishani: Nahi! Main bas aise hi puch rahi thi.

Ishani’s dad: Aur han ab se tumhari mom tumse kuch kahe to mujhe aake batana.

Ishani: (smiling) Okay!

Ishani’s dad: Ab chale, dinner ka time ho raha hai.

Ishani: Ji!

Dono dinner karne ke lie chale jate hain.

Socha nahi tha chize is tarah se Ishani ke favour me ho jaengi. Isilie kehte hain shayad, sabr ka phal meetha hota hai. Ye Ishani ke sabr ki wajah se hi tha ki itni worst conditions hote hue bhi uske papa use samajh paye aur ab wo uske sath hain. Use kisi chiz ki chinta karne ki zarurat ab nahi hai. Ab bas use us singing competition ka intezaar hai jo hona hai, kyunki wo usme ga ke apne papa ko apni singing se impress karna chahti hai.

Next day Ishani college aati hai, to Pranav use gate par hi mil jata hai.

Pranav: Hi Ishani!

Ishani: Hi!

Pranav: Kya baat hai aaj bhot khush lag rahi ho?

Ishani: Han! Khushi ki to baat hi hai.

Pranav: Kyun? Aisa kya ho gaya? Kya tumhare papa hamari shadi ke lie bhi maan gaye?

Ishani Pranav ko ghur ke dekhti hai aur bolti hai, “Kuch bhi.”

Pranav hasta hai aur bolta hai, “Okay! To tum hi bata do, baat kya hai?”

Ishani: Nahi mujhe nahi batana. Ye meri personal baat hai.

Pranav: Acha ab tumhari baate personal ho gayi hain?

Ishani: Han! Main dushmano se baate share nahi karti.

Pranav: To dost bana lo fir aur bata do.

Ishani: Jaise us Karan ko bol rahe the na mujhe impress karne ke lie, waise hi impress karke bana lo mujhe apna friend.

Pranav: This is not fair Ishani! Batao na.

Ishani aur Pranav ab class me aa gaye hain. Wahan pehle se hi Sandhya, Neha aur Akshay baithe hain. Wo dono ko ek sath aata hua aur ache se baat karta hua dekh hairan hain.

Sandhya: Ye chamatkaar kab hua? Kal tak to ye baat nahi kar rahe the.

Akshay: (haste hue) Kal fir bike leke gaya tha ye meri. Lagta hai fir beach ghumaya hai isne.

Neha: Aane de puchte hain.

Itne me Ishani aur Pranav bhi unke paas aa jate hain.

Ishani Sandhya ke paas jake baith jati hai. Sandhya wahan se uthke jane lagti hai.

Ishani: Kahan ja rahi hai?

Sandhya: Tum dono ka patch up ho gaya na, to ab Pranav baithega yahan.

Ishani: Kisne kaha ye? Koi patch up nahi hua hai.

Pranav: Arey yaar Ishani! Bas karo ab.

Ishani: (Pranav se) Nahi!

Neha: Ye ho kya raha hai koi mujhe bataega?

Akshay: Mujhe bhi.

Sandhya: Mujhe bhi.

Pranav: Btao Ishani.

Ishani: Main tab tak nahi manne wali jab tak ye mujhe impress nahi karta. Bhot ideas de raha tha Karan ko ab dum hai to khud mana ke dikhaye mujhe.

Sandhya: Ishani! Give me hi five!

Ishani aur Sandhya taali marti hain.

Pranav: Yaar this is not fair. Ye to maan ke bhi nahi manegi, aise kab tak manata rahunga main ise?

Neha: (Pranav se) Galati ki hai na, to ab punishment bhi jhelo. (Ishani se) By the way, cool punishment Ishani.

Ishani: (smiling) Thanks Neha!

Pranav: Acha to mujhe Ishani ki seat par baithne do.

Ishani: Nahi! Dur se impress karo, jaise Karan se bol rahe the.

Akshay: (haste hue) Tu to gaya bhai.

Pranav: (Akshay se) Koi chiz hai jisse main apna sir phod saku?

Ishani: Class ki walls hain, kahin bhi jake phodo.

Akshay: (zor se haste hue) Tu sach me gaya, ye ab tujhe nachaegi.

Pranav: (Akshay ke kandhe pe sir rakh ke) Kahan phas gaya.

Class shuru ho jati hai. Class ke baad sab log canteen me jate hain, par Ishani sab se aage chalne ke lie bolke alag chali gayi hai. Pranav ye dekhta hai aur uske piche aata hai. Ishani college ke us hisse me ja rahi hai, jahan bhot kam log aate jate hain. Pranav wahan phoch gaya hai.

Pranav: (piche se awaz lagate hue) Ishani!

Ishani: Tum yahan kya kar rahi ho?

Pranav: Tmhe yahan aate dekha to socha ki puchta hu ki yahan kya kar rahi ho.

Ishani: Yahan kam log aate jate hain, to socha yahan practice karu, na kisi aur ko disturb hoga na mujhe.

Pranav: Hmmm. Kya main bhi yahan practice kar sakta hu?

Ishani: Han! Kyun nahi.

Pranav: Okay!

Dono wahan practice kar rahe hain, kabhi dono individually gate hain to kabhi sath me gaane wale songs ki practice kar rahe hain. Pranav ko Ishani ke sath is tarah gana acha lag raha hai. Jab wo Ishani ko apne sath gate hue dekh raha hai to use aisa lag raha hai jaise wo pura ho gaya ho. Usne Ishani ke sath project bhi banaya hai, lekin gana gane se use aisa lag raha hai jaise dono ke soul ek dusre se baatein kar rahe ho. Aur gate hue jo smile wo Ishani ke chehre par dekhta hai, wo use aur kisi chiz me nahi dikhti. Wo Ishani ko aise hi sunte rehna chahta hai. Dono kafi der practice karte hain.

Pranav: Aaj ke lie itna kafi hai shayad.

Ishani: Hmmm. Baki tum apne ghar par karna aur main apne ghar par.

Pranav: Han! Ab to uncle bhi maan gaye hain, tum ghar par aaram se practice kar sakti ho.

Ishani: Hmm. To chale.

Pranav: Thodi der yahin ruke?

Ishani: Kyun?

Pranav: Mujhe tumhare sath rehna hai islie.

Ishani: Main dushman ke sath nahi rehti.

Pranav: Acha! Practice karte me main dost ban gaya tha tumhara?

Ishani: Nahi! Lekin tumhe yaad nahi, dushman hoke bhi tumne hi mujhe singing ke lie bola tha.

Pranav: Par uske baad dosti bhi to ho gayi thi.

Ishani: Lekin ab dosti karne ke lie tumhe Karan ke jaise manana padega mujhe.

Ishani wahan se jane lagti hai. Pranav uska hath pakad ke use apne paas kheench leta hai.

Ishani: Pranav! Kya kar rahe ho? Chhodo.

Pranav: Nahi! Pehle ye sab band karo jo kar rahi ho.

Ishani: Nahi!

Pranav: Tumhe maza aa raha hai mujhe pareshan karne me?

Ishani: (smiling) Han! Ab chhodo mujhe koi aa jaega.

Pranav: Itni der se koi nahi aaya to ab kya aaega. (smiling) Waise achi jagah hai, yahan kuch bhi kar sakte hain.

Ishani: (ghurte hue) Shut up!

Pranav: Tum maan rahi ho ya nahi?

Ishani: Nahi!

Pranav: To main chhodne wala bhi nahi.

Pranav Ishani ko apne aur nazdeek le aata hai aur phoonk maarke uske chehre par aaye hue baalon ko side me kar raha hai. Ishani Pranav ko dekh rahi hai, Pranav bhi Ishani ko dekh raha hai aur smile kar raha hai.

Pranav: Tumhe itne paas se kabhi nahi dekha. Tum bhot khoobsurat lag rahi ho.

Ishani smile karti hai.

Ishani: Don’t flirt with me.

Pranav: Ye flirt nahi hai, pyar hai.

Pranav Ishani ko wall ke against khada kar deta hai, apne dono hatho ke beech Ishani ko phasa kar use dekh raha hai.

Ishani: Ab bas karo, jane do.

Pranav smile kar raha hai aur ‘na’ ka ishara karta hai. Ishani bhi smile karti hai. Aur achanak Pranav ke pair par apni heels zor se marti hai. Pranav apna pair pakad ke koodne lagta hai aur Ishani wahan se haste hue bhag jati hai.

Ishani Pranav se ab naraz to nahi hai, par abhi sahi se maani bhi nahi hai. Wo Ab Pranav ko sata rahi hai. Dekhte hain ki Pranav aur Ishani ki ye khatti meethi nok jhok kab tak chalti hai. Sath me abhi ye bhi janna hai ki Ishani ke papa uski singing ke lie mante hain ya wo abhi bhi apni sharton par hi usse kaam karwana chahte hain. Ye sab batane ke lie hum aapse kal milenge. Tab tak story enjoy kijiye aur new year celebrate kijiye.

Next episode of this story will be published, tomorrow. If you liked this episode, please click like and share….
Stay blessed guys & feel the love. ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: