From Hate… To Love!!

Episode-15

Kal Pranav ne Ishani ke samne apni baat rakhi thi, par isse pehle ki Ishani Pranav se kuch keh pati, uske papa Ishani ke samne aa gaye the. Unhe pata chal gaya tha ki Ishani ne singing competition me participate kia hai aur ab wo Ishani ka college aana band karna chahte hain. Wo Ishani ko lekar ghar chale gaye hain. Pranav bhi unke piche Ishani ke ghar gaya hai.

Ishani ke papa aur Ishani ghar me aate hain. Ishani ghar me aane ke baad apne papa se request kar rahi hai. Wahan Ishani ki sauteli maa aur unka beta bhi hain.

Ishani: Papa please! Main college jana chahti hu. Main aage se ye sab nahi karungi. I promise.

Ishani’s dad: Main tumhe ab college nahi bhejunga, ye baat dhyan se sun lo aur samjh lo.

Ishani: Papa please! I promise, aap jaisa kahenge main waisa hi karungi.

Ishani ro rahi hai aur request kar rahi hai. Ye sab uski sauteli maa aur bhai dekh rahe hain aur khush ho rahe hain.

Ishani’s dad: (shant hoke) Ishani beta! Chup ho pehle.

Ishani apne papa ko hairani se dekhti hai, kyunki Ishani ko unhone beta pehli baar kaha hai.

Ishani’s dad: Dekho beta! Mujhe ye acha nahi laga ki tumne mujhse jhuth bola. Main jo bhi kuch kehta hu tumhare bhale ke lie hi kehta hu.

Itne me Pranav bhi wahan phoch jata hai. Wo bina kisi se puche sidha ghar me ghus aata hai. Ishani Pranav ko dekh kar hairan ho jati hai. Wo khush bhi hai aur dukhi bhi. Khush islie kyunki ek Pranav hi hai jisne use ab tak samjha hai aur dukhi islie ki pata nahi uske papa Pranav se kya kahenge.

Ishani’s dad: (surprised) Tum! Tum yahan kya kar rahe ho?

Pranav: I am sorry uncle, par jab main college me tha tab aap bol rahe the ki aap Ishani ko college nahi jane denge, main isilie yahan aaya hu. Uncle ye aapka family matter hai, par ye meri friend ke career ka bhi sawal hai.

Ishani’s dad: Tumhe Ishani ki itni chinta kyun hai?

Ishani ke papa ek nazar Ishani ko dekhte hain fir Pranav ko dekhne lagte hain.

Pranav: Uncle wo meri dost hai islie.

Ishani’s dad: Bas isilie?

Pranav: (kuch seconds Ishani ko dekhne ke baad) Yes uncle isilie.

Ishani’s dad: Strange! Maine aisi dosti pehle kabhi nahi dekhi.

Ishani aur Pranav ek dusre ko dekhte hain aur chup rehte hain. Ishani ke papa bhi dono ko baar baar notice kar rahe hain.

Ishani’s dad: Well Pranav! Main tumhari dost ka college jana band nahi kar raha. Ye mujhe bhi pata hai, ki college iske lie bhot zaruri hai.

Ishani’s step mom: Ye aap kya kar rahe hain? Ye fir college jake yahi sab karegi.

Ishani ke papa Ishani ki sauteli maa ko chup rehne ka ishara karte hain aur bolte hain, “Tum pehle apne bete ko sambhalo, jab bhi iske college gaya hu, har baar iski complaints ki list aayi hai mere samne. Wahin Ishani hai, jo itne ache se apni padhayi puri kar rahi hai, jab bhi main iske teachers aur mentors se jake milta hu, mujhe proud feel hota hai ki Ishani meri beti hai. Ise seekhna chahiye Ishani se. Aur aaj ke baad main tumhare muh se Ishani ki koi bhi shikayat na sun lu.”

Ishani ki mom chup ho jati hai. Pranav aur Ishani bhi surprised hain ki Ishani ke papa ko hua kya hai.

Ishani’s dad: Ishani! Tum college zarur ja sakti ho par tum singing nahi karogi. Ye main tumhari bhalayi ke lie hi bol raha hu.

Ishani isse pehle kuch bole Pranav beech me bol padta hai, “Par kyun uncle? Aapko Ishani ki singing se itni problem kyun hai?”

Ishani ke papa fir notice karte hain ki Pranav Ishani me kuch jyada hi interest le raha hai. Wo muskurate hain aur kehte hain, “Mujhe singing se islie problem hai kyunki mere papa bhi singer the. Unhone apne is faltu shaunk ki wajah se hamari puri family ko dukhi rakha. Singing ka koi kaam unhe mila nahi aur dusra koi kaam unhone kia nahi. Hamari padhayi tak chhut gayi thi. Fir maine sare ghar ki zimmedari sambhali aur ye business khada kia. Ye sab to tum janti ho Ishani.”

Ishani: (sir hilate hue) Hmm.

Ishani’s dad: Fir bhi zid kyun karti ho? Mujhe laga tha pehle tum bacchi thi samjhdar nahi thi islie ye zid ki hogi, par tum ab bhi in sab chizon ke piche padi ho, isse mujhe sach me bhot dukh hua.

Ishani: Par kya main ise sirf ek shaunk ki tarah bhi nahi kar sakti?

Ishani’s dad: Kya matlab hai tumhara?

Ishani: Matlab aap jo chahte hain main wo sab karungi, aur sath me singing bhi bas apne mann ke lie. And I promise main apni padhayi par iska impact kabhi nahi padne dungi.

Pranav aur Ishani dono unhe dekh rahe hain. Ishani ke papa kuch nahi bolte.

Pranav: Uncle! Bas ek baar aap Ishani ka gana suniye to. Aapko sach me bhot acha lagega. Wo bhot acha gaati hai.

Ishani’s dad: (smiling) Ishani! Ye tumhara dost bhot acha hai. Ise apna advocate bana lo. Tumhare sare cases ye hi lad lia karega.

Pranav chup ho jata hai.

Ishani’s dad: Thik hai. Main Ishani ke competiton me aaunga, ye dekhne ki wo kaisa gaati hai.

Ishani: (zor se) Sach! (khud ko sambhalte hue normal awaz me) Sach me papa? Aap aaenge?

Ishani’s dad: Han!

Ishani: Aur aapko meri singing se koi problem nahi hai?

Ishani’s dad: Nahi! Par agar wo bas tum ek hobby ki tarah karo to, use profession banane ka socha to acha nahi hoga.

Ishani: Aap jaisa bol rahe hain, main waisa hi karungi.

Pranav bhi ye sab sunkar bhot khush hai.

Ishani: Thank you papa.

Ishani ke papa smile kar rahe hain.

Ishani’s dad: (Pranav se) Ab to thik hai? Ishani ab college bhi ja rahi hai aur singing bhi kar rahi hai, aur main bhi aa raha hu uski singing sunne. Aur kuch farmaish hai tumhari?

Pranav: (smiling) No uncle!

Ishani’s dad: Good! To ab tum jana chahoge? Ya dinner yahin karoge?

Pranav: (embarrassed) No! No! Uncle! Main ja raha hu. Bye Ishani!

Ishani: Bye!

Ishani’s dad: Ishani!

Ishani: Ji papa!

Ishani’s dad: Arey tumhara dost itni dur se tumhare lie aaya tha tumhari pairvi karne. Use bahar tak chhod ke aao.

Ishani: Okay papa!

Pranav Ishani ke papa ko greet karta hai aur Ishani ke sath ghar ke bahar nikal jata hai. Dono chal rahe hain aur chup hain.

Pranav: (bike ke paas phoch kar) To main chalta hu.

Ishani: Thanks!

Pranav: Na! Tumhe pata hona chahiye, dushmani me no sorry no thank you.

Ishani: (smiles) Hum dushman hain?

Pranav: Han! Tumhe to yahi lagta hai shayad.

Ishani: Pranav!

Pranav Ishani ke hothon par ungali rakh deta hai.

Pranav: Kuch bolne ki zarurat nahi hai Ishani. Jo bhi kuch hua usme meri galati thi. I am the one who is guilty. To tumhara gussa hona to banta hai na.

Pranav Ishani ke face par aa rahe baalon ko side me karta hai.

Pranav: Par kya tum mujhe maaf karogi Ishani? I promise main aisi galati fir kabhi nahi karunga.

Ishani: Tumhe ye bolne ki zarurat nahi hai.

Pranav: Kyun?

Ishani: (muskurate hue) Kyunki dushmani me no sorry no thank you.

Pranav bhi smile karta hai.

Pranav: To kya karna hai fir?

Ishani: Suna nahi papa ne kya bola? Competition me bas ek week bacha hai, practice karni hai aur perform karna hai.

Pranav: Mere sath practice karogi?

Ishani: (smiling) Nahi!

Pranav: (surprised) To kiske sath?

Ishani: Apne us dushman ke sath, jo dushman hoke bhi meri dil ki baat samajh jata hai.

Pranav: Okay! To kal college me tumhe wo dushman hi milega.

Ishani: (smiling) Okay!

Pranav: Okay! Lekin mujhe ek baat samajh nahi aayi ki tumhare papa ek sath transform kaise ho gaye?

Ishani: Ye to mujhe bhi samajh nahi aaya. Pata nahi kya hua hai.

Pranav: Koi nahi. Tumhare lie to acha hi hai.

Ishani: Hmm. But I am curious to know ki aisa kya hua hoga.

Pranav: Okay! Pata chal hi jaega. And please, ab tumhare papa tumse ache se behave kar rahe hain to apne purane grudges ki wajah se unse dur mat rehna. Ache se raho unke sath and enjoy his company.

Ishani: Okay!

Pranav: Main chalta hu ab.

Ishani: Okay! Bye!

Pranav: Bye!

Pranav apne ghar chala jata hai aur Ishani ghar ke andar aa jati hai. Finally ek sath sab thik hota hua dikh raha hai. Lekin ye hua kaise? Ishani ke papa me ye changes kaise aa gaye? Ye sab janne ke lie kal ka episode padhna na bhule. Tab tak, aage and stay connected.

Next and last episode of this story will be published tomorrow, at the same time. If you liked this story, then please like and share…

Stay blessed all..

Feel the love ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: