From Hate… To Love!!

Episode-14

Kal ke episode me jo bhi hua, wo sab shocking tha, Ishani ke lie bhi aur Pranav ke lie bhi. Ishani Pranav se baat bhi nahi karna chahti. Pranav bhi samajh nahi pa raha ki wo kya kare. Wo lab me baitha hua ro raha hai.

Ishani lab se bahar nikal kar ghar jane ke lie nikal rahi hai. Sandhya use jate hue dekh leti hai. Wo Ishani ko awaz lagati hai, “Ishani!”

Ishani awaz ki taraf mud kar dekhti hai. Sandhya Ishani ke paas aakar bolti hai, “Kahan ja rahi hai?”

Ishani: Ghar.

Sandhya: Sab thik hai? Mujhe tu upset lag rahi hai.

Ishani: Han sab thik hai.

Sandhya: Tu ruk main bhi tere sath chal rahi hu.

Ishani: Nahi Sandhya!

Sandhya: Tu chup kar.

Sandhya apna saman lekar aati hai aur Ishani ke sath college se bahar nikal jati hai. Wo Akshay ko ek text kar deti hai, Pranav ko dhundne ke lie aur use baat karne ke lie, kyunki use tabhi se kuch thik nahi lag raha tha jab se dono principal office se bahar nikale the. Sandhya Ishani ke sath chali jati hai aur Akshay college me Pranav ko dhund raha hai.

Sandhya aur Ishani ab auto me hain.

Sandhya: Ishani! Bata kya hua hai?

Ishani: Kuch nahi.

Sandhya: Dekh kuch to hua hai. Tum dono jab se principal office se bahar aaye ho, main tab se note kar rahi hu. Par maine us time islie kuch nahi bola ki pehle tum dono sort out kar lo. Ab bata kya hua hai?

Ishani: Jo bhi tha, ab kuch nahi hai.

Sandhya: Tu mujhe bataegi?

Ishani: Pranav Karan ki help kar raha tha, mujhe impress karne ke lie.

Sandhya: (in shock) What?

Ishani: Wo Karan ki starting se help kar raha tha. Tujhe yaad hai na jab hum uske ghar gaye the, jab wo bimar tha.

Sandhya: Han!

Ishani: Wo tab bhi islie college nahi aaya tha kyunki use Karan ne aisa karne ke lie bola tha, kyunki project aur singing ki wajah se main hamesha uske sath rehti thi aur Karan ko koi chance nahi mil raha tha mujhse baat karne ka.

Sandhya: Pranav ne aisa kyun kia?

Ishani: Usne bas apne dost ka sath dia. Mujhe to ye bhi lagta hai ki usne mujhse fake friendship ki thi, sirf Karan ki help karne ke lie.

Sandhya: Aisa to nahi hai.

Ishani: Tujhe kaise pata?

Sandhya: Ye tujhe bhi pata hai Ishani, jo bhi tha usme kuch bhi fake nahi tha.

Ishani chup ho jati hai.

Sandhya: Tujhe pata hai na Ishani wo pehle kiske sath rehta tha? Usne tujhse friendship karne ke baad unse milna tak chhod dia tha.

Ishani: Lekin usne Karan ki help ke lie kuch days pehle hi college se chutti li thi. Use kaise justify karegi tu?

Sandhya: Tujhe uski baat sunni chahiye thi. Wo sakta hai koi reason ho uska.

Ishani: Mujhe ab kuch nahi sunna.

Sandhya: Okay! Thik hai. Abhi tu gusse me hai. Islie main tujhse koi baat nahi karti.

Sandhya ab chup hai aur Akshay ko message karti hai, “Pranav mila?”

Akshay ka reply aata hai, “Nahi! Sari classes dekh li.”

Sandhya message karti hai, “Pure college me dekh. Wo akela baitha hoga zarur, jahan koi na ho.”

Akshay reply karta hai, “Okay! Par kuch serious hua hai kya?”

Sandhya message karti hai, “Han! Tu dhund use aur bata fir.”

Akshay reply karta hai, “Okay!”

Sandhya aur Ishani, Ishani ke ghar phoch jati hain. Ishani sidha apne room me jati hai. Sandhya uske piche uske room me aati hai. Tabhi Akshay ka message Sandhya ke paas aata hai, “Pranav mil gaya hai. Lab me ta aur bhot ro raha ta.”

Sandhya Ishani ko Akshay ka message padhati hai. Ishani padhti hai aur bolti hai, “To main kya karu?”

Sandhya: Ishani samajh. Pranav ne galat kia, par Karan ne uski is galati ka fayda uthaya hai, tum dono ki ladayi karwana chahta tha wo.

Ishani kuch nahi bolti.

Sandhya: Tujhe pata hai na ki wo tujhe pehle pasand nahi karta tha. Islie kia hoga usne wo sab. Lekin ab uske mann me teri lie true feelings hain. Tujhe samajh aa raha hai?

Ishani ab bhi kuch nahi bolti. Sandhya Akshay ko phone karti hai.

Akshay: Hello!

Sandhya: Han Akshay! Wo thik hai ab?

Akshay: Han thik hai. Par hua kya hai? Wo kuch nahi bata raha.

Sandhya wo sab batati hai jo Karan ne kia tha principal office me.

Akshay: Oh God! Karan to mastermind nikla.

Sandhya: Tu Pranav ko sambhal. Main Ishani ko dekhti hu. Dono bhot upset hain. Ab hume hi dono ke beech ye misunderstandings khatam karni hain.

Akshay: Yeah! Okay!

Akshay phone rakh deta hai aur Pranav ke paas jata hai.

Akshay: Pranav! Mere bhai sab thik ho jaega. Tu tension mat le, hum hain tere sath.

Pranav Akshay ko hug kar leta hai aur aansu fir se uski aankho me aa jate hain.

Pranav: (rote hue) Main aisa kuch karna nahi chahta tha Akshay. Mujhe nahi pata tha ki ye sab aise ho jaega.

Akshay: Koi baat nahi bhai. Kabhi kabhi ho jata hai, log situation ka fayda utha lete hain. Tu tension mat le, Ishani maan jaegi. Chal ab ghar chal, wahan jake thoda rest kar le.

Akshay Pranav ko uske ghar le jata hai. Pranav ke papa door kholte hain. Pranav unhe dekhte hi unke gale lag jata hai.

Pranav’s dad: Arey! Pranav! Kya hua?

Akshay: Uncle thoda pareshan hai, aap sambhaliye, main chalta hu.

Pranav’s dad: Han thik hai.

Akshay Pranav ko ghar chhod kar chala jata hai. Pranav ke papa Pranav se puchte hain. Pehle to Pranav kuch nahi batata par unke force karne par unhe jo bhi hua tha, wo sab bata deta hai.

Pranav’s dad: Main tujhe isilie mana karta tha. Par ab jo bhi ho gaya so ho gaya. Ab muh latkana chhod. Ishani ek samjhdar ladki hai, wo samajh jaegi. Lekin ab tu ek chiz samajh le ki agar kuch aur bhi hai aisa jo tune Ishani ko nahi bataya hai wo sab use khud bata dena. Chahe use kitna bhi bura lage par bata dena. Kisi aur ke through pata chalta hai, to vishwas par chot lagti hai aur abhi yahi hua hai uske sath. Usne kabhi socha bhi nahi hoga ki tu uske sath ye sab karega.

Pranav: (upset) Mujhe nahi pata wo manegi bhi ya nahi.

Pranav’s dad: Manegi. Bas tu apni koshish karte rehna, chhodna mat. Ab galti tune ki hai, to ye sab to jhelna hoga tujhe. Par haar mat manna.

Pranav: Okay!

Pranav ko uske papa shant kara dete hain. Sandhya bhi Ishani ko chize samjha rahi hai, thodi der baad wo bhi Ishani ke ghar se wapas aa jati hai. Us raat Pranav aur Ishani un palon ko yaad kar rahe hain jo unhone sath me bitaye the. Pranav Ishani ki wo beach wali pics dekh raha hai aur yaad kar raha hai ki wo kis tarah uske sath bacchii ban gayi thi. Ishani bhi us moment ko yaad karti hai jab Pranav ne use zindagi bhar sath rehne ke lie bola tha. Sochte sochte wo bolti hai, “Ye sab kyun kia Pranav? Sab kuch perfect lagne laga tha mujhe apni life me.”

Agla din hota hai. Ishani aur Pranav dono college aate hain. Ishani class attend karti hai, sabhi friends lunch time me canteen me baithe hain. Wahan Ishani aur Pranav bhi hain. Pranav sirf Ishani ko dekh raha hai aur Ishani ne ab tak Pranav par ek nazar tak nahi dali hai.

Akshay: Ishani! Ab to singing ki tyari karni chahiye tum dono ko.

Ishani: (smiles) Nahi mujhe singing nahi karni.

Akshay: Kyun?

Ishani: (smiling) Bas ab mann nahi hai.

Akshay: Wo to thik hai, par tum dono sath me gane wale the na. Tumne nahi gaya to Pranav ab dusra partner kahan se laega?

Ishani: Wo meri headache nahi hai.

Neha: Par isse Pranav ko aage badhne me problem hogi na.

Pranav chup hai. Wo Ishani ki ye baat sunke upset hai, kyunki usne socha tha ki singing ki practice karte time wo Ishani se baat karne ki koshish karega.

Sandhya: Ishani! Jo chiz start ki hai, use khatam kar. Uske baad jo chahe karna, tujhe koi kuch nahi bolega.

Ishani: Mujhe nahi karni singing.

Sandhya: Par isme Pranav ka bhi nuksaan hai, uske sath gana gane ke lie han tune hi bola tha. Ab jo bhi circumstances ho, aise piche hatna achi baat nahi hai.

Pranav: It’s okay Sandhya! Koi baat nahi.

Ishani: Thik hai. Tum shayad sahi keh rahi ho Sandhya, kaise bhi circumstances ho hume piche nahi hatna chahiye apne promises se. Islie main Pranav ke sath gaungi. Par mujhe koi practice nahi karni hai, jis din competition hoga us din hi bas gane chali jaungi.

Sandhya: Okay!

Sab wahan se uthke classes ke lie chale jate hain.

Kuch din beet gaye hain. Pranav baar baar Ishani ke paas jake usse baat karne ki koshish karta hai, par wo kisi na kisi tarah Pranav ko ignore karke wahan se chali jati hai. Ishani ke friends bhi use manane ki puri koshish kar rahe hain. Use Pranav ke jhuth ne bhot hurt kia hai, islie wo kisi ki bhi baat nahi sunna chahti. Pranav hi hai jo use samjha sakta hai aur use ye mehsoos kara sakta hai ki uski feelings Ishani ke lie real thi aur abhi bhi hain. Lekin Pranav Ishani ke shant hone ka wait kar raha hai, jisse wo calmly uski baate sun sake aur samajh sake.

Ab singing competition ko ek week bacha hai. Pranav sham ke waqt Ishani ko class ke bahar dekhta hai. Wo akele ek bench par baithi hai aur kuch soch rahi hai. Pranav uske paas jata hai.

Pranav: Ishani!

Ishani sir uthakar Pranav ko dekhti hai. Ye pehli baar hai jab Ishani Pranav ki awaz sunke wahan se uth kar nahi gayi.

Pranav: Main tumhe yahan pareshan karne nahi aaya hu. Bas ek baat kehni thi.

Ishani: Bolo.

Pranav: Tumhe agar singing competition me participate nahi karna to mat karo. Meri wajah se khud ko pareshan karne ki zarurat nahi.

Ishani: Tumhari wajah se main kuch nahi kar rahi. Ye main apne lie kar rahi hu. Maine aaj tak shuru ki hui koi bhi chiz adhuri nahi chhodi hai, to ye bhi nahi chhodungi.

Pranav: Aur hamari dosti? Wo bhi to tumne shuru ki thi na, use kyun beech me chhod rahi ho?

Ishani kuch nahi kehti. Pranav usi bench par Ishani se kuch duri bana kar baith jata hai. Wo bol raha hai, par Ishani ko nahi dekh raha, samne dekh raha hai.

Pranav: I know Ishani maine galati ki hai, mujhe tumhe sab sach bata dena chahiye tha. Lekin mujhe sach me nahi pata tha ki wo is tarah se ye sab mere against use karega.

Ishani chup hai, wo kuch bol nahi rahi, par pehli baar Pranav ko lag raha hai ki wo Pranav ki baat sunna chahti hai.

Pranav: Tumhe mere papa ache lagte hain na Ishani. Unhe bhi ye sab pata chala, aur unhone mujhe bhot daanta. Fir unhone hi mujhse kaha ki mujhe khud se tumhe sach batana chahiye tha. Aur main tumhe wahi batana chahta hu, please tum sun lo ek baar.

Ishani chup hai, ab bhi kuch bol nahi rahi.

Pranav: Maine shuru me Karan ko tumhe pareshan karne ke lie mana kia tha Ishani. Tumhe yaad hai, wo tumse notes maangta tha, tumse chize samjhne aata tha. Wo tab se yahi koshish kar raha tha. Par main use hamesha mana karta tha ki tumse dur rahe. Maine tumhe bhi warn kia tha ek baar, ki Karan se dur raho, tab tumne mujhe kaha tha ki main dekh nahi sakta apne doston ko tumse baat karte hue. Tab main jealous nahi tha, bas tumhari chinta thi, ki Karan tumhe pareshan na kare. Hum ladte zarur rahe hain shuru se hi, par kahin na kahin mujhe pata tha ki tum kaisi ho aur isilie main nahi chahta tha ki koi tumhe pareshan kare. (smile karte hue) Shayad shuru se hi apna haq samjhta tha tum pe.

Ishani wo sab chize yaad karti hai jo Pranav use bata raha hai.

Pranav aage bolta hai, “Par fir tumne mujhe apne project me sath kaam karne se mana kar dia. Baat mere career tak aa gayi thi islie gusse main maine Karan se bola ki main teri help karunga. Aur kuch silly se ideas die, ki usse phone number lena ya usse ache se baat karna. Aur wo kuch genuine tarike hi the kisi ko impress karne ke, maine use tumse kabhi bhi badtameezi karne ke lie nahi uksaya. Jab wo phone number lene use din lab me aaya aur maine dekha ki tum number dena nahi chahti, to wo main hi tha jisne use mana kia tha ki use jab number dena hoga de degi, tu use force mat kar. But tumne use number de dia tha. Ek chiz aur ki thi maine, jo usne nahi batayi par main batana chahta hu. Maine use tumhe message karne ke lie bola tha. Usne tumhe message kia par tumne reply nahi kia, par tum mere har message ka reply kar rahi thi, us time mujhe realise hua ki tum usme interested nahi ho. Aur uske baad maine use koi tips nahi die tumhe impress karne ke lie.”

Ishani ke mind me sari purani baate ghum rahi hain jo bhi kuch Pranav use bata raha hai.

Pranav: Jab mujhe pata chala tum singing karna chahti ho, tab maine Karan ko nahi bataya tha us bare me, lekin jab use pata chala, to usne zid ki, ki wo tumhare sath auditions me jana chahta hai. Maine use rokne ki koshish ki thi, par wo nahi mana, aur dost hone ki wajah se maine uski baat maan li. Par Ishani! Jab tumne mujhe phone kia to main aa gaya kyunki main khud wahan aana chahta tha.

Pranav ab Ishani ki taraf dekhta hai, wo dekhna chah raha hai ki Ishani pe uski baton ka asar ho raha hai ya nahi. Wo aage bolta hai, “Aur wo din jab main college nahi aaya tha, us din bhi main wo sab karna nahi chahta tha, par usne fir apni dosti ka vasta dia aur maine uski baat maan li. Maine uski baat maan to li thi, par subah se bas main tumhare bare me hi soch raha tha, ki tum thik to hogi, Karan tumhe pareshan to nahi kar raha hoga. Aur maine ye bhi decide kia tha ki ye bas last chance hai jo main Karan ko de raha hu, uske baad main koi chance nahi dunga aur na uski koi baat manunga. Jab tum us din mere ghar par aayi thi, tab main kitna khush hua tha tumhe dekh ke, main tumhe bata nahi sakta. Meri sari chinta jo main subah se kar raha tha, wo ek second me gayab ho gayi thi. Fir tumne apne mann ki sabse gehri baat mujhe batayi. Uske baad maine decide kar lia ki Karan ko ab main tumhe pareshan karne nahi dunga. Us din mujhe sach me laga ki tum mujhpe kitna bharosa karti ho, aur mujhe tumhare trust ko break nahi karna chahiye. Mujhe nahi pata tha ki agar main ye sab tumhe nahi bataunga to ye aise tumhare samne aaega. Aur Ishani main bata bhi deta shayad, kyunki maine kabhi socha hi nahi tha ki main tumse kuch chupau. Lekin mujhe wo chance nahi mila tha jab main ye sab tumhe bata pata, usse pehle hi tumhe ye sab baate galat tarah se pata chal gayi. Main sach bol raha hu Ishani, meri dosti jhuthi nahi thi, maine tumhare lie jo bhi kia wo sab mann se tha aur main aaj bhi waisa hi hu, tumhare sath puri life spend karna chahta hu. Please maan jao Ishani.”

Ishani ab bhi kuch nahi bolti.

Pranav: Ishani! Please kuch bolo.

Ishani Pranav ko dekhti hai.

Pranav: Please Ishani!

Ishani: Kya kahu? Kya sunna chahte ho tum mujhse?

Pranav: Ishani!

Pranav kuch keh pata isse pehle hi ek aur awaz dono ke kaano me padti hai. Dono us awaz ki taraf dekhte hain. Ishani ke papa samne khade hain aur wo gusse me hain. Pranav aur Ishani dono hi nahi samajh pa rahe ki hua kya hai. Dono unhe dekh kar bench se khade ho jate hain.

Ishani’s dad: Ishani! Tumhari itni himmat, mana karne ke baad bhi tumne singing competition me participate kia.

Ishani apne papa ki ye baat sunke seham jati hai. Ishani ke papa ko uske singing competition ke bare me unke lecturers se pata chala hai, kyunki wo hamesha college me aake Ishani ki progress report lecturers se lete rehte hain.

Ishani: Nahi papa wo…

Ishani’s dad: (beech me hi tokte hue) Nahi papa wo kya?

Ishani: Main bas Pranav ki help kar rahi thi, usne singing me part lia hai.

Ishani’s dad: Pranav ke sath tumne bhi participate kia hai, main sab dekh chukka hu.

Ishani sir niche jhuka leti hai.

Ishani’s dad: Tumhari itni himmat badh gayi hai ki tum ab jhuth bhi bolne lagi ho. Chupa rahi thi mujhse. Tumhe aise samajh nahi aaega, ab tumhara college jana band karna hi hoga. Sujata (Ishani’s step mom_ sahi kehti thi, ki tum hamesha apni manmaani karti ho, main hi uski baton par dhyan nahi deta tha.

Ishani ke papa Ishani ka hath pakad lete hain.

Pranav: Uncle please! Ye sab aap mat kijiye. Ishani bhot acha gaati hai. Agar wo padhayi ke sath thodi singing karna chahti hai to problem kya hai?

Ishani dekh rahi hai ki Pranav kis tarah uske lie uske dad se baat kar raha hai.

Ishani’s dad: Tumhe isme beech me padne ki zarurat nahi hai.

Pranav: Par uncle aap Ishani ki padhayi rukwa ke uska career kharab kar rahe hain. She is a bright student.

Ishani’s dad: I know she is a bright student aur isilie maine ise engineering karne ke lie bheja tha, par yahan bhi iske singing ka bhoot nahi utra. Jab ise hi nahi karni padhayi to ghar par baithe, yahi sahi hai iske lie.

Ishani ke papa use pakad kar apne sath le ja rahe hain.

Ishani: (chalte hue) Papa main nahi karungi singing, aap please meri padhayi mat chhudwaiye.

Ishani ke papa nahi sun rahe wo use college se bahar le jate hain aur car me baitha dete hain. Pranav ye sab dekh kar Akshay ke paas jata hai aur usse bike ki chabi lekar Ishani ke ghar ki taraf nikal jata hai.

Ek chiz suljhi nahi aur dusri musibat pehle aa gayi. Ishani ki maafi to Pranav ko tabhi milegi jab wo college aaegi. Agar Ishani ke papa ne uska college jana band karwa dia to Ishani aur Pranav kaise mil paenge, kaise unki story aage badhegi? Isilie gaya hai Pranav Ishani ke ghar, shayad kuch chize bigade ya sab sudhar jaye, par ye sab dekhne ke lie hum log kal milte hain. Tab tak stay connected with us and enjoy the life.

Next episode of this story will be published tomorrow, at the same time. We hope you are enjoying to read this story, if yes, then please hit like and share…
And keep giving your support to us.

Stay blessed guys and feel the love. ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: