From Hate… To Love!!

Episode-11

Kal ke episode me Ishani aur Pranav ek dusre se kuch aisi baate share karte hain jo unhone ab tak kisi aur se nahi kahi thi. Dono hi ek dusre ke sath juda hua mehsoos karte hain. Dono ne jo sath me pal bitaye wo un dono ko aur kareeb le aaye hain, shayad itne kareeb ki wo samajh paye ki ye bond sirf dosti nahi shayad kuch aur bhi hai. Ishani ko Pranav uske ghar chhod deta hai. Par dono ke mann me

un palon ke baare me kya hai, ye shayad aaj pata chale.

Ishani ghar me aati hai, ghar me uski sauteli maa samne sofe par apni friends ke sath baithi hain.

Ishani’s Step Mom: Ishani! Aaj college se itni jaldi kaise aa gayi?

Ishani: Aaj last ki classes attend nahi ki thi.

Ishani’s Step Mom: Ye sab kya hai Ishani? Tumhare papa itna paisa kharch kar rahe hain tumhe padhane aur engineer banane ke lie aur tum zara bhi dhyan nahi deti ho apni padhayi par.

Ishani: Aap ye sab papa se bol sakti hain, main unse baat kar lungi.

Ishani’s Mom’s Friend: How rude. Ye aise hi baat karti hai kya tumse? Tum to iske ache ke lie hi bol rahi ho.

Ishani unki baaton ko ignore karke apne room me chali jati hai. Room ka door zor se marti hai. Ishani ki aankhon me aansu aa gaye hain par wo abhi aakhon me hi hain. Use Pranav ki yaad aati hai. Uske ghar pe uske sath bitaye hue palon ko yaad karke wo muskurane lagti hai. Use Pranav ki wo concern wali awaz yaad aati hai, “Tum us ghar me kaise rehti ho Ishani!”

Aur wo khud se bolti hai, “Aaj tak mujhse kisi ne aise pucha hi nahi Pranav. Nani ke jane ke baad mujhe laga tha ki ab main hamesha ke lie akeli ho gayi hu. Mujhe nahi pata tha ki mujhe itna pareshan karne wala, college me mera sabse bada dushman hi meri itni care karega. Tumhare sath reh ke main bhul jati hu ki main yahan se belong karti hu. Kash ye hamesha ke lie ho pata. (lambi saans lete hue) Hmmm. Lekin pata nahi ye sath bhi kab tak rahega.”

Ye keh ke Ishani apne cupboard se kapde leke change karne chali jati hai.

Us raat dono so nahi pa rahe. Dono ek dusre ke baare me soch rahe hain. Pranav Ishani ki un baaton ke baare me soch raha hai jo aaj usne Pranav ko batayi. Wo soch raha hai ki Ishani use kitna special samajhti hai jo usne apna itna deepest secret Pranav ke sath share kia. Fir Pranav wo hug yaad karta hai jo Ishani ne rote hue Pranav ko kia tha. Takiye ko pakad kar karwat leta hai aur fir sochta hai, “Lekin us time mujhe hua kya tha? Main kabhi itna emotional nahi hota, par uski baate sunke, uski aankho me aansu dekh ke, main khud kyun itna bura feel kar raha tha? Main use khud se dur jane kyun nahi dena chahta tha? Aur ab bhi bas usi ke baare me soche ja raha hu. Jab maine use hug kia, pata nahi use kaisa laga hoga. Par bura laga hota to shayad bol deti. Aur wo hug, main baar baar yaad kyun kar raha hu?”

Use yaad aa raha hai ki kaise Ishani ne use rote hue pakad lia tha. Uski shirt ko apne hatho me jakad lia tha. Ishani ke aasuon se uski shirt bheeg gayi thi itna ro rahi thi wo. Pranav ka mann kar raha hai ki Ishani se baat kare, wo use ek text karta hai, “Ishani!”

Ishani bhi soch rahi hai, ki kyun usne Pranav ko apna itna bada secret reveal kar dia. Aisa kya hua bas kuch dino me ki use Pranav par itna bharosa ho gaya. Use Pranav ke sath acha kyun lagta hai? Wo Pranav ke sath safe feel kyun karti hai? Fir wo sochti hai, ki kis tarah Pranav use chup karane ki koshish kar raha tha. Kis tarah wo Ishani ko sambhal raha tha jab wo ro rahi thi. Ishani feel kar pa rahi thi ki uske dukh me Pranav bhi dukhi hai. Tabhi Ishani ke paas Pranav ka message aata hai. Ishani dekhti hai aur smile uske chehre par aa jati hai. Wo reply karti hai, “Han Pranav.”

Pranav text karta hai, “Agar tum bura na maano to kya main tumhe call kar sakta hu?”

Ishani reply karti hai, “Okay!”

Pranav Ishani ko call karta hai. Ishani call receive karti hai.

Pranav: Hi!

Ishani: Hi! Tumhari tabyat thik hai ab?

Pranav: Han, wo to tabhi thik ho gayi thi.

Ishani: To kal college aaoge na?

Pranav: Han.

Dono chup rehte hain kuch seconds.

Pranav: Tum thik ho Ishani?

Ishani: Han, mujhe kya hona hai?

Pranav: Okay!

Ishani: Kuch kehna tha?

Pranav: Umh… aise to kuch nahi kehna.

Ishani: To fir phone kyun kia?

Pranav: Bas mann kar raha tha, tumse baat karne ka. (Mann me, “Tumhari awaz sunne ka.”)

Ishani: (smiles) Okay! To karo baat.

Pranav: Ghar par sab thik hain?

Ishani: Han.

Pranav: Kisi ne kuch kaha to nahi?

Ishani smile karti hai.

Pranav: Kya hua?

Ishani: Itni chinta mat karo.

Pranav: (embarrassed par baat sambhalte hue) Chinta nahi kar raha, bas just asking.

Ishani: Okay! Nahi kuch khaas nahi.

Pranav: Means kuch bola tha kisi ne?

Ishani: Han, roz hi hota hai kuch na kuch. Tum ye sab chhodo.

Pranav: Kya hota hai?

Ishani: Pranav!

Pranav: Bolo na Ishani, we can share. Iske baad tumhe mujhse jo puchna ho puch lena.

Ishani: Mom koi na koi baat papa se kehti hain, aur fir papa mujhe bolte hain. To ab aadat pad gayi hai. Mujhe pehle bura lagta tha, gussa bhi aata tha, ab kuch nahi hota.

Pranav: Waise agar tumhari mom unse kuch na kahe to tumhare papa tumse thik se baat karte hain?

Ishani: Han. Par aisa bhot kam hota hai.

Pranav: Hmm. Kyunki tumhari mom, unhe sab galat batati hain tumhare baare me.

Ishani: Ye sab to wo bachpan se kar rahi hain mere sath. Aur ab mera bhi mann nahi karta unse baat karne ka, jabse mujhe meri mom ke bare me sach pata chala.

Pranav: Tum wahan se nikal nahi sakti?

Ishani: Han. Nikal sakti hu. (mood ko light karne ke lie) Par shadi ke baad.

Pranav: (smiles) To inki marzi se shadi mat karna. Nahi to pata nahi kahan bhej denge tumhe.

Ishani: Acha?

Pranav: Waise kaisa ladka chahiye tumhe?

Ishani: Socha nahi.

Pranav: Kyun?

Ishani: Aise hi.

Pranav: Socha hoga bas tum batana nahi chahti.

Ishani: Arey baba nahi socha. Tumne socha hai kya ki tumhe kaisi ladki chahiye?

Pranav: (haste hue) Han! Socha bhi hai, aur ek din doston ko bataya bhi tha.

Ishani: Kya socha hai?

Pranav: Jo bhi tha, par wo log bol rahe the ki wo description hamare college ki ek ladki se milta hai.

Ishani: (excited) College ki ladki? Kon?

Pranav: Nahi, main nahi bata raha.

Ishani: Arey! Batao na.

Pranav: Tum gussa ho jaogi.

Ishani: Bolo na Pranav, promise gussa nahi hongi.

Pranav: Tum.

Ishani: Hmm. Aage bolo.

Pranav: Bol to dia, tum.

Ishani: (in surprise) Main?

Pranav: Han. It’s you Ishani.

Ishani: Dekho! Nahi batana hai to mat batao. Aise mazak mat karo.

Pranav: Main mazak nahi kar raha. Jab maine description dia tha, to un logon ne bola ki ye tumse match karta hai.

Ishani chup hai.

Pranav: I am sorry bura laga ho to.

Ishani: Nahi! Isme bura lagne ki kya baat hai. Ye to acha hai, jisse bhi tum shadi karoge wo mere jaisi hogi, to usse friendship karne me easy rahega.

Pranav Ishani ki ye baat sunke apna sir pillow me deke marta hai aur sochta hai, “Bewakoof!”

Pranav: Ab tum bataogi?

Ishani ke dimag me to bas Pranav hi ghum raha hai, par wo kuch bol nahi rahi.

Pranav: Bolo Ishani.

Ishani: Socha nahi. Jab kabhi sochungi tab bata dungi.

Pranav: (upset hoke) Okay!

Pranav is waqt soch raha tha ki jaise usne Ishani ka naam lia hai, Ishani bhi Pranav ka naam le leti. Par Ishani ne aisa nahi kia. Pata nahi uske dimag me aisa kya chal raha tha ki wo Pranav se ye sab bol nahi payi. Khair dono baat karte hain kuch aur der aur phone rakh dete hain.

Agle din Pranav college aata hai, aur Ishani ko dhundta hai. Ishani class me baithi hui hai. Pranav Ishani ke paas jata hai.

Pranav: (smiling) Hi!

Ishani: (smile karte hue) Hi!

Dono ek dusre ko muskurate hue dekh rahe hain.

Sandhya: Arey! Dono mujhe bhi dekh lo, main bhi hu yahan.

Sandhya ke bolte hi ek sath nazare hatate hue Pranav kehta hai.

Pranav: Yeah! Hi Sandhya.

Sandhya: To ab tum thik ho?

Pranav: Han, bilkul thik hu.

Pranav Ishani ko dekh raha hai Sandhya se baat karte hue bhi. Sandhya ye notice karti hai aur Ishani ke paas se uthke piche wali seat par baith jati hai.

Ishani: Kahan ja rahi hai?

Sandhya: Aaj Pranav ke sath baith. Mujhe Neha se kuch kaam hai.

Ishani: Okay!

Pranav Ishani ke paas aake baith jata hai. Pranav ko is waqt dil se awaz aa rahi hai, ki wo Ishani ka hath pakade. Wo khud ko bhot mushkil se hath pakadne se to rok raha hai, lekin Ishani ko dekhne se rok nahi pa raha. Ishani ka hath desk par hai, Pranav bhi jaan kar desk par apna hath, Ishani ke bilkul nazdeek rakh deta hai aur dhire dhire use Ishani ki ek ungali se touch karne ki koshish kar raha hai. Lekin Ishani ne hath hata lia. Pranav upset ho jata hai. Use khud pe gussa aa raha hai, kyunki use khud pe control karna mushkil hota ja raha hai. Wo apne dono hathon ko pakad ke baith jata hai aur mann me sochta hai ki ab inhe kholunga hi nahi. Lekin ab bhi ek problem hai, hathon ko to rok lia par nazaron ko kaise roke jo baar baar Ishani ke chehre pe jake atak jati hain aur muskurahat apneaap hothon pe aane lagti hai. Pranav soch raha hai ki koi use pagal na samjhe. Ye sab sochte hue jab usse raha nahi jata to wo uthata hai aur washroom me chala jata hai. Wahan jake wo face par pani dalta hai aur khud se baat karta hai, “Kya kar raha hai Pranav, Ishani se fir se thappad khana hai tujhe lagta hai. Uske sath baithne ka chance mila hai, chupchap tameez se baith ja nahi to acha nahi hoga.”

Wo khud ko shishe me dekhta hai, “Aur ye smile kyun hai? Itna kya muskura raha hai? Apna muh band rakh aur chupchap wahan jake baith ja.”

Pranav washroom se nikal ke class me aata hai to dekhta hai ki Karan wahan Ishani ki seat ke paas khada hai. Pranav jaldi se wahan jata hai aur seat par jake khada ho jata hai.

Karan: Pranav! Acha hua tu aa gaya. Main Ishani se yahi keh raha tha ki mujhe usse kuch baat karni hai, aur tu to mera dost hai, ja kahin aur baith ja jake.

Pranav: Karan! Ab bhot hua. Ishani ka picha chhod de.

Karan: Arey! Tu fir shuru ho gaya, mujhe baat to karne de.

Pranav: Aaj ke baad koi baat nahi karni hai, Ishani se.

Karan: Arey hatt na.

Karan seat par baithne ke lie aage badhta hai, Pranav Karan ko hath se rokta deta hai.

Ishani: (tension me) Pranav! Chhod do use.

Pranav Karan ko chhod deta hai. Itne me class me lecturer aa jate hain.

Karan: Ye thik nahi kia tune. Tu mujhe bahar milna.

Ye keh ke Karan chala jata hai. Pranav Karan ko tab tak ghurta hai jab tak wo seat par nahi baith jata.

Ishani: (dhire se) Tumhe kya zarurat hai, usse pange lene ki? Main use ignore kar to rahi hu.

Pranav: Kab tak ignore karogi? Wo nahi samjhne wala aise.

Ishani: Wo kya bolke gaya hai, suna na tumne.

Pranav: To main usse darta hu kya?

Ishani: Tumhe ladayi karni zaruri hai?

Pranav: Ye tum bol rahi ho? Jo khud pure time mujhse ladti rehti ho.

Ishani: Tumne uski baat suni nahi shayad, wo bolke gaya hai tumhe bahar milne ke lie. Maar peet nahi karni hai tumhe.

Pranav: Thik hai. Main khud se shuru nahi karunga, par usne kuch kia to main chup nahi baithne wala ab.

Ishani: Wo tumhara dost hai.

Pranav: Aise dost nahi chahiye mujhe. Aur ab chupchap class pe dhyan do nahi to ye hume fir se class se bahar nikal denge.

Ishani Pranav ko ghurti hai, Pranav smile karta hai. Dono chup hoke ab lecture attend kar rahe hain.

Lecture khatam hota hai aur Karan Pranav ko bahar milne ka ishara karke class se bahar chala jata hai. Pranav seat se uthta hai bahar jane ke lie par Ishani Pranav ka hath pakad leti hai.

Ishani: (hath pakad ke) Tum kahin nahi ja rahe ho.

Pranav: Par mujhe jana hai.

Ishani: Nahi main tumhara hath nahi chhodne wali. Chup chap yahin baitho.

Pranav: (smile karte hue) Hath ni chhodogi?

Ishani: Han!

Pranav: (smiling) Okay!

Pranav yehi to chahta tha, Ishani ka hath pakadna. Aur ye ho gaya, to wo kyun jaega Ishani se dur. Baki sab log class se bahar chale gaye hain, ab Ishani aur Pranav hain bas class me. Pranav Ishani ko dekh raha hai.

Ishani: (Pranav ko dekhte hue) Kya dekh rahe ho?

Pranav: Tumhe.

Ishani: Kyun?

Pranav: To kya karu? Tum bahar jane nahi de rahi to tumhara chehra hi dekh leta hu.

Ishani smile karti hai, Pranav bhi muskurata hai.

Pranav: Acha! Hum hath pakad ke bhi bahar ja sakte hain, tum chhodna mat hath.

Ishani: Nahi!

Pranav: Kyun?

Ishani: Bahar pata nahi sab kya samjhenge?

Pranav: To abhi kya sab sahi samajh rahe honge? Bas hum dono hain class me.

Ishani: To kya karu? Tumhe us Karan ke paas jane du?

Pranav: Nahi. Kahin mat jane do. Main yahin hu tumhare paas.

Pranav aur Ishani dono class me baithe hain. Pranav ko acha lag raha hai, Ishani ka is tarah uska hath pakadna par wo ye show nahi kar raha. Lekin dhire dhire ab control uske hath se chhut raha hai. Wo dono seat par baithe hain aur samne board ko dekh rahe hain. Pranav Ishani ki ungaliyon me apni ungaliyan phasa leta hai aur apne thumb se Ishani ke hath ko sehla raha hai. Ishani bhi ye notice kar rahi hai, wo Pranav ko ek nazar dekhti hai, Pranav bhi Ishani ko dekhta hai. Ishani Pranav se kuch nahi kehti aur samne dekhne lagti hai. Pranav ab Ishani ka hath desk par le aata hai. Ab Pranav ki sari ungaliyan Ishani ke hath ko sehla rahi hain. Ishani apne hath ki pakad dhili karti hai to Pranav Ishani ke hath ko apne hath me le leta hai aur uske hath ko dekh raha hai. Uski hatheli par apni ungali chala raha hai.

Pranav: (softly) Tumse ek baat puchu?

Ishani: (softly) Pucho.

Pranav: (mann badlte hue) Nahi! Jane do.

Ishani: Arey! Bolo na.

Pranav: Hum pehle thik se baat bhi nahi karte the, hamesha ladte rehte the. Par ab jabse hum ek dusre ko janne lage hain, tab se tum kya sochti ho mere baare me?

Ishani: (hesitating) Tum ache ho.

Pranav: Aur?

Ishani: Aur main tumhare baar me galat sochti thi, tum waise nahi ho.

Pranav: Ye sab nahi Ishani.

Ishani: To?

Pranav: Kya hamari dosti abhi wahin tak hi hai? Kyunki tum wahi sari chize repeat kar rahi ho jo tumne shuru me kahin thi.

Ishani: (Pranav ko dekhte hue) Bhot kuch badla hai. Tumhare sath rehna mujhe acha lagta hai. Tumse chize share karne me mujhe darr nahi lagta. Ye nahi lagta ki tum mujhe judge karoge kisi bhi baat pe. Main tumse kuch bhi keh sakti hu. (smile karte hue) Gussa bhi ho sakti hu, lad bhi sakti hu aur ghanton aise baith ke baate bhi kar sakti hu. Par bas ek chiz ka darr lagta hai.

Pranav: Kya?

Ishani: Yahi ki ye sab lifetime ke lie nahi hai.

Pranav: Kyun nahi hai?

Ishani: College ke baad jab humari jobs lag jaengi, tab humare paas ek dusre ke lie time nahi hoga, hum apni apni lifes me busy ho jaenge. Uske baad, tumhari life me bhi koi aa jaega aur meri life me bhi, to aur jyada busy ho jaenge.

Pranav: Aur main ye kahu ki mujhe tumhare sath aage bhi aise hi time spend karna hai, to kya kahogi?

Ishani: Ye kaise ho sakta hai? Sab chize batayi na maine tumhe.

Pranav: Ho sakta hai, agar tum chaho to.

Pranav smile karte hue Ishani ko dekh raha hai, Ishani bhi Pranav ko dekh rahi hai.

Pranav: Ab bahar chale? I promise main nahi ladunga usse, tumhe mera hath nahi pakadna padega.

Ishani: Okay!

Ishani aur Pranav dono classroom se bahar nikal jate hain.

Pranav ne apne mann ki baat Ishani se keh to di, par use wo baat samajh nahi aayi hai, ya wo sirf nasamjhne ka natak kar rahi hai, ye hume agle episode me hi pata chalega. Uske lie please wait till tomorrow and enjoy reading.

Next episode of this story will be published tomorrow. Keep reading and keep enjoying. If you like this episode then please comment, like and share… Till then,

Be blessed.

And feel the love ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: