From Hate… To Love!!

Episode-6

Pichle episode me Ishani ne Pranav ko apne sath project me kaam karne se mana kar dia tha, islie ab Pranav Ishani ko sabak sikhane ke lie Karan ki help kar raha hai use patane me. Ye Pranav dobara ek galati karne ja raha hai, par abhi wo gusse me hai, ho sakta hai uska gussa khatam ho jaye to use apni galati ka ehsaas ho, jaise hamesha hota hai. Aaiye dekhte hain, aage apne plan ko successful banane ke lie Pranav Karan se aur kya karwata hai?

Pranav apne ghar par hai aur Karan se baat kar raha hai.

Pranav: Arey! Itna excited mat ho ab. Slowly sari chize karna jo bhi maine tujhe sikhaya hai, nahi to us Ishani ko shaq bhi ho sakta hai. Wo bhot tez hai.

Karan: Okay! Main ye dhyan rakhunga.

Pranav ke papa ye sab baatein sun lete hain aur Pranav ke phone rakhne ke baad use bolte hain.

Pranav’s dad: Pranav! Ye sab kya chal raha hai? Ab kya karne wale ho tum Ishani ke against?

Pranav: Papa! Main kuch nahi kar raha, bas wo jo karti hai use uska return kar raha hu.

Pranav’s dad: Dekho Pranav, main pehle bhi tumhare college jake principal aur us ladki se baat kar chuka hu. Tumhe pata hona chahiye ki is college me rehna tumhare lie kitna zaruri hai. Kitni mehnat se tumhare lie maine paise jode hain, agar tum yahi sab karte rahe to college se nikal denge wo tumhe.

Pranav: Aur kar bhi kya sakte hain wo. Fail to mujhe waise bhi hona hi hai, to Ishani ko sabak sikhake rusticate hi ho jata hu, kya fark padta hai.

Pranav’s dad: Kya matlab hai tumhara?

Pranav: Matlab ye hai papa ki ek lecturer ne mujhe Ishani ke sath project karne ke lie bola tha, par Ishani mujhe usme sath kaam nahi karne de rahi hai. Aur agar maine uske sath kaam nahi kia to wo lecturer mujhe fail kar dega.

Pranav’s dad: Iska sirf yehi solution hai kya? Koi aur bhi tarika hoga is chiz ko solve karne ka. Tum Ishani se dobara jake baat karo, mujhe lagta hai wo tumhari baat samjhegi.

Pranav: Mujhe usse ab koi baat nahi karni hai. Use sidhi tarah se kabhi samajh nahi aata.

Pranav’s dad: Pranav tum aise nahi ho, abhi gusse me ho islie ye sab karne ke lie soch rahe ho. Apna gussa pehle shant kar lo, kahin aisa na ho tumhe pachhtana pade.

Pranav: Nahi papa. Is baar maine soch lia hai.

Pranav’s dad: Thik hai, agar tum meri kamayi aise hi bekar karna chahte ho to tumhari marzi.

Ye bolke Pranav ke papa wahan se chale jate hain. Wo pareshan hain, kyunki mehnat kar kar ke paise jode hain unhone Pranav ke lie, agar Pranav ko college se nikal dia to unke paas na to itne paise hain aur na hi itni source hai ki wo Pranav ka admission kisi dusre college me kara de. Lekin Pranav ko ye samajh nahi aa raha hai, islie uske papa dobara college jane ka decide karte hain aur Ishani se milne ka sochte hain.

Next day Pranav ke papa Ishani se milte hain. Dono college canteen me baithe hain.

Pranav’s dad: Beta! Please Pranav ko ek chance do apne sath kaam karne ka. Usne bhot mehnat ki hai yahan tak aane ke lie aur maine bhi bhot mehnat ki hai use yahan tak phochane me.

Ishani: Uncle aapko ye sab bolne ki koi zarurat hi nahi thi. Main Pranav ko kaise mana kar sakti hu apne sath kaam karne ke lie, ye to Diwakar sir ke orders hain. Aap is baare me chinta mat kijiye.

Pranav’s dad: Lekin Pranav to bata raha tha ki tumne use mana kar dia hai.

Ishani: Wo to maine aise hi bol dia tha gusse me. Uncle! Actually us din Pranav ki wajah se pehli baar mujhe class se nikal dia tha, to thoda gusse me thi.

Pranav’s dad: Hmmm. Samajh sakta hu, thoda irritating hai wo. Par kya karu jabse uski maa gayi hai, mujhe kabhi time nahi mila uske lie, islie aisa ho gaya hai.

Ishani: (surprised) Pranav ki mom nahi hain?

Pranav’s dad: Han! 5 saal ka tha jab wo chali gayi, bas tab se hum dono hi ek dusre ko sambhal rahe hain.

Ishani: Okay!

Pranav’s dad: Beta tum dekh lena, thoda ziddi hai wo, chize ajeeb karta hai, par dil ka bura nahi hai. Abhi gusse me hai, ab agar tum bologi ki main aaya tha yahan to aur jyada gussa ho jaega. To tum apne hisab se use convince kar lena.

Ishani: Aap tension mat lijiye. Main aapka naam nahi lungi aur try karungi ki wo convince ho jaye.

Pranav’s dad: Beta kaam to uska hai, par convince tumhe karna pad raha hai use. Par please beta, itna kar dena, ye uske career ka sawal hai.

Ishani: Don’t worry uncle.

Pranav’s dad: Thik hai to main chalta hu.

Ishani: Okay! Uncle Namaste.

Pranav ke papa wahan se chale jate hain. Unke jane ke baad Ishani soch me pad jati hai. Wo wahin canteen me baithi hai, tabhi Karan, Rahul aur Pranav canteen me aate hain. Ishani Pranav ko dekhti hai aur uske paas jati hai. Ishani ko piche aate dekh Karan ko lagta hai ki wo uske paas aa rahi hai. Wo Pranav aur Rahul ko aage bhej deta hai aur khud wahin ruk jata hai.

Karan: Hi Ishani!

Ishani: Hi!

Karan: Tum mujhe answer dene aayi ho?

Ishani: Karan, is baare me hum baad me baat karenge. Abhi mujhe Pranav se baat karni hai.

Karan ko wahin chhod ke Ishani Pranav ke paas jati hai.

Ishani: Pranav!

Pranav: Han.

Ishani: Tumse baat kar sakti hu?

Pranav wahan se uthke Ishani ke paas aata hai.

Pranav: Han bolo. Kya kehna hai?

Ishani: Wo us din tumne jo kaha tha, ki tumhe mere sath kaam karna padega.

Pranav: Rehne do tumhara ehsaan nahi chahiye.

Ye kehke Pranav jane lagta hai.

Ishani: Pranav! Ek minute puri baat sun lo.

Pranav: Bolo.

Ishani: Unhone mujhe bhi yahi bola hai, to mere paas koi option nahi hai, tumhare sath kaam karna hi padega.

Pranav: Par main interested nahi hu ab.

Ishani: Pranav! Ye dono ke career ka sawaal hai.

Pranav: Abhi tak jab mere career ki baat thi tab tumhe koi fark nahi pad raha tha, ab jaise hi khud ke career ki baat aayi to aa gayi ho mere paas.

Ishani: Yeah! Ye samajh lo ki hum dono hi ek dusre par ehsaan kar rahe hain, ye project sath me karke.

Pranav uske papa ki kahi hui baat sochta hai, “Kitni mehnat se tumhare lie maine paise jode hain, agar tum yahi sab karte rahe to college se nikal denge wo tumhe.”

Unki ye baat yaad aate hi Pranav bhi han bol deta hai.

Pranav: Thik hai.

Ishani: Okay! To fir jab bhi tum free ho to mujhe bata dena.

Pranav: Thik hai. Main tumhe text kar dunga.

Ishani: Okay!

Ishani wahan se chali jati hai. Pranav kuch sochte hue wapas apne friends ke paas aa jata hai.

Karan: Kya hua? Kya bol rahi thi wo?

Pranav: Project ke baare me baat kar rahi thi kuch.

Karan: Tu bas project banata rehna uske sath, aur main ladki ko hi leke nikal jaunga.

Pranav smile karta hai uski baat par, lekin soch raha hai kuch.

Rahul: To aage ka plan kya hai?

Pranav: Aage ka plan kya? Agar wo han karegi tabhi to aage plan work karega.

Karan: Pranav! Wo to han nahi karegi kabhi, kuch aur sochna padega.

Pranav: Usse uska contact number maang ke baat karne ki koshish kar, aur apni bakwas mat karna usse. Tameez se baat karna. Wo teri faltu baaton se impress hone wali nahi hai.

Karan: Tujhe itna kaise pata hai uske baare me?

Pranav: Kyunki agar aisi loafer wali baaton se wo pat sakti to kab ki kisi ladke se pat chuki hoti.

Rahul: Baat to Pranav ki bilkul sahi hai.

Karan: Tu sikhaega na apne bhai ko, kaise baat karni hai?

Pranav: Han! Par pehle number to maang.

Karan: Number maangne ki kya zarurat hai, tere paas hai to.

Pranav: Nahi! Main number nahi dunga, usse jake maang agar use patana hai to.

Karan: Thik hai.

Pranav: Aur yaad rakh dhang se baat karna.

Karan: Han han. Thik hai.

Pranav ab wahan se us singing competition ke auditions me jata hai, jiska use intezaar tha. Wahan students ka kafi rush hai islie wo wait kar raha hai apne chance ka, tabhi Ishani ka text uske phone me aata hai, “Where are u?”

Pranav Ishani ko reply karta hai, “Singing competition ke auditions me hu, thodi der lagegi.”

Ishani use reply karti hai, “Singing competition? Yahan college me ho raha hai?”

Pranav use message karta hai, “Tum class ke alawa kahin dekhti nahi ho kya? Itne dinon se posters lage hue hain.”

Ishani reply karti hai, “Okay! Main bhi aati hu wahan.”

Pranav use jawab me likhta hai, “Okay!”

Ishani wahan aa jati hai, jahan auditions chal rahe hain. Use Pranav dikhta hai aur wo uske paas jati hai.

Ishani: Hi!

Pranav: Thodi der wait karna padega.

Ishani: It’s okay! I can wait.

After a few minutes.

Ishani: Tumhe singing ka shaunk hai?

Pranav: Nahi! Aise hi aaya tha time waste karne.

Ishani: Sidhe sidhe answer nahi kar sakte kya?

Pranav: Tumhe sidhe sidhe sunne ki aadat nahi hai.

Ishani: Ab bologe?

Pranav: Han! Shaunk hai, par kabhi chance nahi mila to… is baar chance hai, islie try kar raha hu.

Ishani: Okay! Ye auditions kab tak hain?

Pranav: Do din aur hain. Kyun? Tumhe bhi part lena hai?

Ishani: (hesitation me) Nahi! Bas aise hi puch rahi thi.

Pranav: (Ishani ko dekhte hue) Okay!

Auditions chal rahe hain aur Ishani dekh rahi hai, Pranav uske face par ek alag sa glow dekhta hai, ek alag si khushi jo Pranav ne isse pehle kabhi nahi dekhi hai.

Pranav: Tumhe sach me part nahi lena?

Ishani na ka ishara karti hai. Pranav ab bhi use dekh raha hai.

Pranav: Ishani! Tum yahin ruko main abhi aaya.

Ishani: Okay!

Kuch minute baad Pranav aata hai.

Pranav: (use audition form dete hue) Ye lo. Try kar sakti ho ek baar. Agar mann hai to bhar do form.

Ishani: (sir niche karke) Nahi! Mera concentration padhayi par hona chahiye.

Pranav: (use dekhte hue) Ye concentration badhata hai, kam nahi karta. Abhi do din aur auditions hain, bhar lena form.

Ishani: Main itna acha gaati nahi hu.

Pranav: Main bhi nahi gata.

Itne me Pranav ka naam announce hota hai. Pranav stage par jane lagta hai.

Ishani: (smiling) All the best Pranav.

Pranav: (smiling) Thanks.

Pranav stage par jata hai aur gana shuru karta hai. Ishani ko uski awaz kafi achi lagti hai. Baki sab log bhi uski singing ko kafi pasand karte hain. Uska song khatam hota hai aur wo stage se niche utar ke Ishani ke paas aata hai. Ab dono project banane ke lie lab ki taraf ja rahe hain.

Ishani: Wow! Mujhe nahi pata tha ki tum itna acha gaate bhi ho. Nahi to ab tak ye hi lagta tha ki bas ladayi karna ache se aata hai tumhe.

Pranav: (laughing) Acha.

Ishani: Han! Result kab tak aaega iska?

Pranav: Jab sare auditions ho jaenge tab last day announce karenge.

Ishani: Okay!

Pranav: So, kya socha? Ye form bharna hai?

Ishani: I don’t know.

Pranav: Ummm… acha tumhe singing karna pasand hai?

Ishani: Han. Jab akeli hoti hu tab gunguna leti hu.

Pranav: Kabhi kisi ko sunaya nahi?

Ishani: Nahi!

Pranav: Kyun?

Ishani: Ghar par sab busy rehte hain.

Pranav: Tumhare ghar me uncle hi to busy rehte honge, aunty kahan busy rehti hain?

Ishani: Meri mom nahi hain.

Pranav chalte chalte ruk jata hai.

Pranav: Mom nahi hain matlab?

Ishani: Mere birth ke time pe, kuch complications thi.

Pranav: To doctors aunty ko nahi bacha paaye?

Ishani chup rehti hai. Dono aage chalte hain.

Pranav: To bas papa hain?

Ishani: Nahi. Papa ne dusri shadi kar li thi, to mom bhi hain aur unka ek beta hai.

Pranav: (Ishani ke mood ko light karne ke lie bolta hai) To unhe to sunaya hi hoga tumne apna song.

Ishani: Wo bas mere papa ki wife hain.

Pranav chup ho jata hai. Thoda chalne ke baad fir puchta hai, “Aur dad? Unhone nahi suna kabhi tumhe gaate hue?”

Ishani: Unhe ye sab chize bekar lagti hain, wo bas hamesha yahi chahte hain ki padhayi pe focus kia jaye. Islie unhe bhi nahi sunaya kabhi.

Pranav: Mujhe sunaogi?

Ishani Pranav ko dekhti hai par chup rehti hai. Dono ab lab me phoch gaye hain. Ishani Pranav ko project dikhati hai. Pranav ka dhyan project me nahi hai. Wo Ishani ko dekh raha hai aur Ishani se dobara puchta hai, “Ishani! Mujhe sunaogi?”

Ishani dobara use dekhti hai aur fir se project ke baare me bolne lagti hai. Pranav fir use rok deta hai aur bolta hai, “Ishani! Tumne meri baat ka jawab nahi dia.”

Ishani: Mujhe nahi karna participate.

Pranav: Thik hai, mat karo participate. Par mujhe tumhe gaate hue sunna hai.

Ishani: Kyun?

Pranav: Kyunki mujhe pata hai kaisa lagta hai, jab koi sunne wala nahi hota. Islie main sunna chahta hu.

Ishani chup rehti hai.

Pranav: Bas ek line hi suna do.

Ishani chup hai. Pranav fir se bolta hai, “Nahi sunana?”

Ishani: Thik hai. Tumhe sunne ka mann hai to sunati hu.

Ishani apni aankhe band karti hai, aur ek purane gane ki line Pranav ke samne gaati hai. “Tere bina zindagi se koi, shikwa to nahi, shikwa nahi, shikwa nahi, shikwa nahi… Tere bina zindagi bhi lekin, zindagi to nahi, zindagi nahi, zindagi nahi, zindagi nahi…”

Ye ek line gaane ke baad Ishani apni aankhe kholti hai, to dekhti hai ki Pranav use dekh raha hai.

Pranav: Wow! Your singing is so intense.

Ishani smile karti hai.

Pranav: Tumhe ye form bhar dena chahiye.

Ishani: Form bharke koi fayda nahi hai, mujhe apni padhayi par dhyan dena hai.

Pranav: Han! Padhayi ke sath tum ye bhi kar sakti ho.

Ishani: Nahi. Ye sab bekar ki chize hain, inse bas time waste hota hai aur main apna dhyan kahin bhi divert nahi karna chahti. Ab hum project par dhyan dete hain, kafi time waste ho gaya hai.

Pranav: Okay!

Ishani ne ab tak jo project me kia hai, wo sab Pranav ko batane lagti hai. Pranav Ishani ki baate sun raha hai, par pehli baar use aisa feel ho raha hai jaise Ishani kisi chiz se pareshan hai. Use pehli baar Ishani ke baare me itna kuch pata chala aur wo sab Pranav se kafi milta julta tha. Wo shayad Ishani ke baare me aur bhi chize janna chahta hai, par unki ladayi ki wajah se kuch keh nahi pa raha aur ab wo bhi project me dhyan laga raha hai.

To ye thi wo chize jo dono ki life me hain aur dono ki life me iska effect hua hai. Kitni aehmiyat hoti hai ek aurat ki ye is story se jaan sakte hain. Aehmiyat aadmi ki bhi hoti hai life me, lekin agar aadmi na ho to ek baar ko aurat kisi tarah kaam chala sakti hai. Lekin agar aurat na ho to aadmi ke bacchon par kya fark padta hai, wo is story me dekh sakte hain. Pranav ke papa ne shadi nahi ki, lekin use wo time nahi de paye. Ishani ke papa ne shadi to ki par use wo maa ka pyar nahi mil paya jo use apni maa se milta. Sach me ek maa ka na hona wahi log explain kar sakte hain jinke paas wo hoti nahi hain. Uski care, uska pyar sab bhot khaas hota hai. Wo log bhot lucky hain, jinke paas ye sab hai. Uski value kijiye, unke sath enjoy kijiye aur unka dhyan rakhiye.

Rahi baat story ki to kya lagta hai aapko? Kya ye project dono ko sath me laega, ya ye singing, ya unki life ki wo chize jo unhe affect karti hain? Ye janna hai to aage ki story padhni padegi aur uske lie humse jude to rehna hi padega. So, please people stay connected with us.

Next episode of the story will be uploaded soon. Please do read the story and do comment, like and share..

Happy International Women’s Day!

Stay Blessed, &

Feel the Love ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: