From Hate… To Love!!

Episode-4

Pichle episode me hume ye pata chala tha ki Pranav aur Ishani ab ek dusre se dur reh rahe hain. Par jab Pranav ke dost Ishani ke baare me kuch chize bolte hain to Pranav soch me pad jata hai. Wo tab pehli baar Ishani ko dhyan se dekhta hai, ki wo kaisi lag rahi hai. Use dekhke ek choti si smile Pranav ke face par aa jati hai, par tabhi uske class ke professor use tok dete hain aur Pranav unki awaz sunke khada ho jata hai. Dekhte hain ki wo lecturer Pranav se kya bol rahe hain.

Lecturer: Pranav! Bhot din baad aaye ho tum aaj class me, kahan rehte ho tum pure time.

Pranav: Sir! Main practical sessions me jyada present rehta hu.

Lecturer: Theory nahi padhoge to pass kaise hoge.

Pranav: Sir! Jis hisab se aap theory padhate hain usse mujhe class me neend aati hai, islie main nahi aata class me.

Sab log hasne lagte hain aur hooting karte hain. Lecturer ko gussa aa jata hai. Ishani Pranav ko ye sab karte dekhti hai to Sandhya se kehti hai, “Ise bas dusron ki insult karna aata hai. Pata nahi kitna ego bhara hai isme.”

Lecturer: (chillate hue) Quiet all of you. (Pranav se) To tumhe mere padhane se neend aati hai, islie nahi aate. Fir to tum self-study se hi pass hote hoge.

Pranav: Han Sir! Jaise main pehle bhi bol chuka hu, ki mujhe theory me interest nahi hai, islie main uspe jyada dhayan nahi deta. Jab hum yahan se nikal jaenge to hamare marks koi nahi dekhega, hamare skills dekhe jaenge, aur mera focus mere skills improve karne par hai.

Lecturer: Thik hai, tumhe itna trust hai apni skills par to mere kuch chote questions ka answer dedo. Chinta mat karo aise questions puchunga jinka answer har 12th pass baccha bhi janta hoga.

Pranav: No worries sir, aap koi bhi question puch sakte hain.

Lecturer questions puchne shuru karta hai. Pranav har question ka answer lecturer ke question khatam hote hi de deta hai. Sab log Pranav ko is tarah se answers dete hue dekhke hairan reh jate hain. Ab lecturer ek aakhiri question puchte hain.

Lecturer: Suppose ek aadmi, kisi 20 floor ki building se gira, aur wo ek high voltage wire par jake latak gaya. Jaan to uski dono suraton me hi jani hai, par kya chiz use jyada tadpaegi? High voltage wire se latakna ya zameen par girkar marna?

Lecturer ke is question sari class soch me pad gayi hai, kyunki ek high voltage wire par latakne se bhi dardnaak maut hogi aur 20 floor se girne par bhi dardnaak maut hogi. To ise compare kaise kia ja sakta hai? Sab soch me pade hain, aur Ishani bhi ab Pranav ko dekh rahi hai ki is question ka answer Pranav kya dega? Lekin Pranav to muskura raha hai.

Lecturer: Bolo Pranav, ab kya bolna hai tumhe apni knowledge ke baare me?

Pranav: Sir! Iska answer bhot hi simple hai. Wo aadmi agar zameen par girne ki jagah ek high voltage wire par jakar latak gaya hai, to iska matlab Bhagwan uspar meherbaan hai, use kuch nahi hoga. Wo bach jaega.

Ishani Pranav ka ye answer sunke smile karne lagti hai. Sandhya Ishani se kehti hai, “Ye kya bol raha hai? Galat answer diya hai isne.”

Ishani: Nahi. Sahi hai.

Sandhya Ishani ko hairani se dekhti hai, mano ye janna chah rahi ho ki ye answer sahi kaise hai?

Lecturer: Reason batana chahoge?

Pranav: Sir! Reason bas itna hai, ki current high voltage to low voltage flow karta hai, aur jab wo aadmi ek hi voltage ke wire par gira hai, to na voltage change hogi aur na current flow hoga. To wo bach jaega, use kuch nahi hoga.

Lecturer Pranav ke answer ko sunke, smile karne lagte hain.

Lecturer: Good. Very good. Pranav tumne sare questions ke answer bilkul sahi diye hain, par class attend karna bhi utna hi important hai, jitna baki chizon me dhyan dena. Main aage se tumhe meri har class me dekhna chahunga.

Pranav: Okay! Sir.

Lecturer: Ab tum baith sakte ho.

Pranav: Thank you sir.

Pranav baith jata hai. Ishani use dekh rahi hai, tabhi Pranav Ishani ki taraf dekhta hai aur Ishani suddenly notebook me dekhne lagti hai, Pranav ye dehke smile karta hai. Class khatam hoti hai. Ishani Sandhya ke sath class se bahar chali jati hai. Pranav bhi Ishani ke piche ja raha hai, kyunki use Karan ke baare me Ishani se baat karni hai, par use lecturer rok kar baat karne lagte hain.

Thodi der baad Pranav class se bahar nikalta hai aur canteen me jata hai. Wahan Ishani, Sandhya ke sath baithi hui hai aur baat kar rahi hai. Pranav un dono ke paas jata hai.

Pranav: Hi!

Ishani Pranav ko surprise ke sath dekhti hai aur apna kaam karne lagti hai. Sandhya reply karti hai.

Sandhya: Hi Pranav! Tum yahan? Koi kaam hai?

Pranav: Han! Mujhe thodi help chahiye thi, Ishani se.

Ishani use dobara hairani se dekhti hai, fir apni notebook nikal kar usme dekhne lagti hai aur bolti hai, “Kya help?”

Pranav: Kya main baith sakta hu?

Ishani: Han!

Pranav unke paas baith jata hai.

Pranav: Actually, ye Diwakar sir to mere piche pad gaye hain. Bol rahe hain roz class me aao nahi to ek project bana kar do. Ye unki shart hai.

Ishani: To isme hum kya kar sakte hain?

Pranav: Usne bola hai ki tum kisi project par kaam kar rahi ho, and he wants ki main usme tumhare sath kaam karu.

Ishani: Par wo mera project hai, aur unhone mujhe bola hai banane ke lie.

Pranav: Ab mujhe bhi bol rahe hain. Agar mujhpe trust na ho to, unse jake baat kar sakti ho.

Ishani: To isme main help kya karu? Ye to sir ke orders hain, main tumhe mana nahi kar sakti.

Pranav: Han! Mana nahi kar sakti but I know ki tum mere sath us project me kaam nahi karna chahti aur main bhi nahi chahta tumhare sath kisi bhi chiz me kaam karu. Islie bas tum unse ye bol dena ki main tumhare sath kaam kar raha hu, main tumhe disturb nahi karunga. Isse tumhara kaam bhi ho jaega aur wo lecturer mujhe pareshan bhi nahi karega.

Ishani: Par tum aise sir ke subject ko totally ignore nahi kar sakte.

Pranav: Main ignore nahi kar raha, bas mujhe uski classes attend karna pasand nahi hai. Mujhe sach me neend aati hai uski class me.

Sandhya: Han, neend to mujhe bhi aati hai, par attendance ki wajah se class attend karni padti hai. Waise Pranav tumhe kabhi attendance ki tension nahi hui?

Pranav: Nahi, itne marks to aa hi jate hain ki pass ho jau.

Ishani: Sirf pass hone se tumhe aage jobs nahi milne wali.

Pranav: Aur sirf class me baithe rehne se bhi jobs nahi milne wali. Khud ko explore karna bhi zaruri hai.

Ishani: Mujhe khud ko jitna explore karna hai main kar rahi hu.

Pranav: Han wo to dikhta hi hai, bas classroom aur ghar ye hi exploration areas hain tumhare.

Ishani: Tumhe isse kya?

Sandhya: Oho! Tum dono ko bas ladna aata hai kya?

Dono Sandhya ki baat sunte hain aur Pranav aage bolta hai.

Pranav: Tumhe jo karna hai wo karo, mujhe koi fark nahi padta, bas unse ye bol dena ki main tumhare sath is project me kaam kar raha hu. Bas mera naam lena hai tumhe, main tumhe tumhare project me disturb nahi karunga.

Sandhya: Pranav ye tum pyar se bhi bol sakte the.

Pranav: Isse pyar se baat to tab karu jab ye mujhse sidhe muh baat kare. Har time kaatne ko daudti hai.

Ishani: Main kaatne ko daudti hu?

Pranav: Han.

Ishani: Tumhe meri help chahiye aur tum mujhe ye sab bol rahe ho.

Pranav: Help ke lie main sach bolna band nahi kar sakta.

Ishani Pranav ko ghur rahi hai.

Pranav: (Sandhya se) Isse keh dena ki apne favourite sir se bol de ki main iske sath project me kaam kar raha hu.

Ishani ab bhi Pranav ko ghur rahi hai.

Pranav: Aur han chashmish ek chiz aur agar project me kisi help ki zarurat ho to mujhe bol sakti ho. Mujhe Project me bhi kaam karne se koi problem nahi hai, bas tumhe disturb nahi karna chahta, but if you need any help to bata sakti ho.

Ishani: Tumne mujhe chashmish bola? How dare you?

Pranav: Chashmish ke sath aur bhi bhot kuch bola, wo sab nahi suna tumne. Aur chashmish ko chashmish nahi bolenge to aur kya bolenge? Hai na Sandhya.

Ishani: Tumhe main dekh lungi.

Pranav: Tab se dekh hi to rahi ho. (smile karta hai) Okay! Bye. Main chalta hu.

Pranav wahan se uthke chala jata hai. Canteen ke gate pe aake piche mudke dekhta hai, Ishani ko dekhkar muskurata hai aur sochta hai, “Sahi bol raha tha, Rahul. Ladkon se panga to yehi le sakti hai. Har time kaatne ko daudti hai.” Fir canteen se bahar nikal jata hai.

Ishani Sandhya se baat karti hai.

Ishani: Tujhe kya lagta hai, bol du sir ko ki ye mere sath project me hai?

Sandhya: Han! Bol de, isne kaha to hai ki ye tujhe disturb nahi karega.

Ishani: Okay!

Ishani Diwakar sir ko jake bata deti hai ki Pranav ab uske sath project par kaam karega. Sir bhi ye sunkar khush ho jate hain. Ishani Sandhya ke through Pranav ko yahi message bhej deti hai. Pranav bhi Ishani ke is gesture se khush hota hai.

Next day Pranav college me Ishani ko dhund raha hai, kyunki wo use thanks bolna chahta hai. Use Ishani library me dikhti hai, par uske sath Karan bhi baitha hua hai. Pranav ko Karan ko wahan Ishani ke sath baithe dekh kar gussa aata hai. Wo wahan jata hai.

Pranav: Karan! Tu yahan kya kar raha hai?

Ishani aur Karan dono Pranav ko dekhte hain. Ishani kuch bolti nahi aur book me dekhti rehti hai.

Karan: Arey Pranav! Hi! Ye question to mujhe tujhse karna chaiye.

Pranav: Bolega. Yahan kya kar raha hai?

Karan: Kuch nahi bas ek topic samajhne aaya tha Ishani se.

Pranav: Samajh lia?

Karan: Nahi abhi to bas start hua hai.

Pranav: Baad me samjhna, abhi mujhe kuch kaam hai Ishani se.

Ishani: Main abhi use, kuch samjha rahi hu, tum jao yahan se.

Pranav: Ishani! Project se related baat karni hai islie aaya tha.

Ishani: Wo project mujhe pura karna hai, aur abhi mujhe uske baare me koi baat nahi karni hai. Abhi main Karan ko kuch samjha rahi hu, tum baad me aana.

Karan Pranav ko dekhke cunning wali smile deta hai. Is time Pranav ko gussa aa raha hai, par wo bina kuch kahe wahan se chala jata hai.

Thodi der baad, Ishani aur Karan library se bahar nikalte hain. Pranav Ishani aur Karan ko aate hue dekhta hai aur Karan ke paas aata hai.

Pranav: Tujhe maine mana kia tha na, ki usse dur rehna.

Karan: Yaar, kya hua? It’s okay! Try to karne de kam se kam.

Pranav: Tujhe samajh nahi aata kya? Wo aisi time pass wali ladki nahi hai.

Karan: Lagta hai tu kuch jyada hi janta hai uske baare me. Ab thoda chance mujhe bhi de use janne ka.

Pranav: Agar tune use kuch bhi nuksaan phochaya to acha nahi hoga.

Karan: Nuksaan! Main kya karne wala hu uske sath aisa?

Pranav Karan ko ghur raha hai.

Karan: (with cunning smile) Aur agar karna bhi hoga to abhi to time hai, pehle wo pat to jaye.

Ye keh ke Karan wahan se chala jata hai. Pranav ko Karan ki ye baat sunke aur gussa aa jata hai. Ishani is time park me baithi hui hai, Pranav uske paas jata hai.

Pranav: Ishani!

Ishani Pranav ko dekhti hai.

Pranav: Tum Karan se dur raho.

Ishani: Tumhare dost ne mujhse thodi baat kya kar li, tum itne jealous ho gaye?

Pranav: I am not jealous you stupid. (thoda sochke, aur shant hoke) Please usse dur raho bas.

Ishani: Kyun?

Pranav: Kyunki main bol raha hu.

Ishani: Kyun bol rahe ho?

Pranav: (Kuch sochke) Thik hai, it’s your life, jo karna hai karo. Main bas tumhe thank you bolne aaya tha. Tumne Diwakar sir ko bol dia jo maine kaha tha. Thanks for that.

Ishani: It’s okay! Aur kuch kehna hai?

Pranav: Nahi.

Ishani: Okay! Tum ja sakte ho fir.

Pranav: Yeah! I am going.

Pranav wahan se chala jata hai.

Is story me, dono kabhi ek sath thik nahi ho sakte hain shayad. Shuru me Pranav ke samajh nahi aa raha tha ki wo galat kar raha hai, aur ab Ishani ko samajh nahi aa raha ki wo galat gussa kar rahi hai. Is waqt Pranav genuinely Ishani ki chinta kar raha hai, par Ishani samajh nahi pa rahi. Pata nahi ye dono ek dusre ko sahi samajhna kab shuru karenge. Ye sab to aage hi pata chalega, aur use pata karne ke lie padhte rahiye ye story and please stay connected to us.

Next episode of this story will be published, tommorow at the same time. If you liked this story, then please comment, like and share…
To be updated, please like and follow our page “Talking Hearts.”

Stay blessed.

Feel the Love ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: