Love Struck!

Episode-14

Kal ki mulakaat ka to jawab nahi tha. Hamare hero heroine ek dusre ke sath rehna chahte the, ek dusre ke sath time spend karna chahte the, par uff ye kaam. Jana pada unhe. Ab Aakansha ko Abhimanyu ke ghar walon se milne jana hai. To dekhte hain Aakansha ki Abhimanyu ke ghar walon se mulakaat kaisi rehti hai?

Weekend aa chuka hai, Sunday ka din hai. Abhimanyu ke ghar par sab bhot excited hain. Abhimanyu ready hoke Aakansha ko lene chala gaya hai. Ghar par baki sab tyariyon me lage hue hain. Tyariyan bhi aisi jaise Abhimanyu Aakansha ko sidhe shadi karke hi la raha ho. Sach me hamare parents ke pyar ko hum samajh hi nahi sakte. Kabhi unhe jis chiz ke lie pyar se maan jana chahiye uske lie gussa karte hain, aur kabhi jis chiz par gussa karna chahiye us chiz ko bhot aaram se maan jate hain. Log kehte hain girls unpredictable hain, mujhe to parents bhi aise hi lagte hain. Aur is ghar ki to baat hi alag hai, parents to parents, hone wala devar bhi aise khush hai jaise uski khud ki shadi ho rahi ho. Chaliye dekhte hain ghar me kya chal raha hai.

Abhimanyu ki mom ne alag alag tarah ki dishes bana rakhi hain apni hone wali bahu ke lie, uske papa ne to ghar ka pura naksha hi change kar dia hai . Subah se ghar ki safayi me lage the, jo ab jake puri hui hai. Aur Aashish, nahi, wo koi kaam nahi kar raha, wo khud ko tyar kar le yahi uske lie ek bhot bada kaam hai. Subah se na jane kitni dresses try kar kar ke maa papa ko dikha chuka hai, par ab bhi satisfied nahi hai. Usse pareshan hoke mom hi bolti hain.

Abhimanyu’s mom: Arey! Aashish wo dono aane hi wale honge. Bhabhi se milne ke lie itni dresses change kar raha hai, khud ki girlfriend ko milaega to pata nahi kya karega. Jaldi kar.

Aashish: Arey maa! Main acha dikhna chahta hu. Bhai ki tarah boring nahi.

Abhimanyu’s mom: Apni girlfriend ke lie karna, ab ja aur jaldi aa.

Aashish jata hai aur finally ek dress pehen ke aa jata hai.

Abhimanyu aur Aakansha raste me hain. Aaj Abhimanyu Aakansha ko car me la raha hai. Aakansha nervous feel kar rahi hai.

Abhimanyu: Aakanshaa! Don’t worry betaa, sab thik hoga.

Aakansha: Haan, par ab ye nervousness shayad tab hi jaegi jab main sab se mil lungi.

Abhimanyu holds her hand and says, “Bas aa hi gaya ghar, be ready.”

Aakansha: Okay!

Abhimanyu Ghar ke aage car rok deta hai. Dono car se utarte hain aur ghar ke andar aa rahe hain. Aashish unhe aate hue dekh leta hai aur andar jake shor macha deta hai.

Aashish: Bhabhi aa gayi! Bhabhi aa gayi!

Abhimanyu’s dad: Arey! Pagal ladke, ye sab mat bol. Abhi Aakansha ko Abhimanyu aise hi milane laya hai.

Aashish: Oh han! Sorry sorry.

Par Aakansha aur Abhimanyu Aashish ki awaz sun lete hain.

Abhimanyu: (smiling) Lo! Ho gaya shuru. Maine bola tha na, wo bhot excited hai.

Aakansha: (happy and nervous) Mujhe samajh nahi aa raha main kaise react karungi.

Abhimanyu: Normally, aur kaise.

Aakansha: Ye friend wala normally hai ya girlfriend wala?

Abhimanyu: Ohooo Kanshu! Take a deep breath, sab sahi hoga.

Aakansha: Okay!

Abhimanyu aur Aakansha ghar ke andar aate hain. Abhimanyu ke parents aur Aashish Aakansha se milte hain. Aakansha Abhimanyu ke mom dad ko Namaste karti hai aur unke pair chhuti hai. Dono Aakansha ko aashirwad dete hain.

Aashish: Hi!

Aakansha: Hi!

Abhimanyu’s mom: Chalo baithke baate karte hain.

Sab log baith jate hain. Abhimanyu Aakansha ke paas hi baitha hai, Abhimanyu ke mom dad un dono ke samne baithe hain aur Aashish mom dad ke side me. Abhimanyu ke parents Aakansha ko dhyan se dekh rahe hain. Wo Aakansha ki pics kafi baar dekh chuke hain, par reality me unhone Aakansha ko pehli baar dekha hai. Waise ek baar pehle bhi wo Aakansha ko dekh chuke hain, par us time Aakansha par focus nahi tha. Abhimanyu ishare se mom se puchta hai, “Kaisi hai?” Abhimanyu ki mom smile kar deti hain. Abhimanyu ke papa baat shuru karte hain.

Abhimanyu’s dad: To beta aap doctor hain.

Aakansha: (smile ke sath) Ji uncle.

Abhimanyu’s Dad: Par jahan tak mujhe yaad hai, aapke papa engineer hain aur behen bhi usi field me hai lagbhag, aapne ye profession kyun choose kia?

Aakansha: Uncle! Mujhe bachpan se hi is field me interest tha, fir papa ne bhi support kia, to aa gayi is field me.

Abhimanyu’s dad: Good good. Waise hamare Aashish ko ab tak nahi pata hai ki kya karna hai? Seekho kuch.

Aashish: Yaar papa aap meri class kyun laga rahe ho, wo bhi Bhabhi.. (sambhalte hue) I mean Aakansha ke samne.

Abhimanyu’s mom: Waise maine suna hai, tumhari cooking ke bare me. Abhimanyu bata raha tha, kafi achi dishes bana leti ho tum.

Aakansha Abhimanyu ko dekhti hai, is expression ke sath ki maine kab dishes banayi tumhare lie aur Abhimanyu muskura raha hai Aakansha ki is confusion ko dekh ke.

Aakansha: (smile karte hue) Wo aunty, mujhe jyada kuch nahi aata. Thoda bhot hi bas, kyunki padhayi ki wajah se kabhi mauka nahi mila jyada kitchen me jane ka.

Aashish: Kya maa aap bhi. Ye bhi koi baat karne ka topic hai. Waise bhi aap to ho hi khana banane ke lie to Aakansha ko banane ki kya zarurat hai?

Aashish ko realise hota hai ki usne fir kuch galat bol dia.

Aashish: Sorry! I mean jahan bhi Aakansha shadi karegi, wahan par jo bhi hoga, wo use sikha hi dega. Hai na bro.

Abhimanyu: (Aashish ko ghurte hue) Han bro.

Abhimanyu’s mom: (Aashish se) Use sikhane ki zarurat nahi hai. Aakansha ko aata hai sab karna. (Aakansha se) Ek din abhimanyu leke aaya tha, tumhare hath ki bani sabzi, bhot hi tasty thi.

Aakansha smile karti hai aur Abhimanyu ko dekhti hai. Kyunki Aakansha ne tab mana kia tha ki ye sabzi kisi aur ko mat khilana bas tumhare lie hi hai, lekin hamare hero ne mom ko sabzi khila di thi. Abhimanyu nazare churata hai.

Abhimanyu ki mom ab uthkar kitchen me chali gayi hain. Unke piche Abhimanyu ke papa aur Aashish bhi chale jate hain. Aakansha Abhimanyu ab akele hain.

Aakansha: Abhi! Tumhe mana kia tha na ki sabzi kisi aur ko mat khilana, to kyun khilayi?

Abhimanyu: Han. Par mom ko to pasand aayi na.

Aakansha: Han. Par maine specially tumhare lie wo banani seekhi thi, kyunki tumhe wo sabzi pasand hai.

Abhimanyu hasta hai.

Aakansha: Has rahe ho, badtameez. Ab tumhari mom mujhse expect karengi ki ise sab banana aata hoga. (making sad face) Par mujhe cooking nahi aati hai.

Abhimanyu: (smile karte hue) Don’t worry sweetheart main shadi se pehle bata dunga maa ko ki tumhe kuch banana nahi aata hai. Hehehe!

Aakansha: (making angry face) Tum has lo bas. And what is this sweetheart?

Abhimanyu: Sweetheart means Jaanu.

Aakansha: I am not your jaanu.

Abhimanyu: (Smiling) Hmmm. Jab gussa khatam ho jaega, tab ho jaogi.

Wahan Abhimanyu ki mom kitchen me nashte ka saman lene gayi hain, unke piche dad aur Aashish bhi aa jate hain.

Abhimanyu’s dad: Kaisi lagi Aakansha?

Abhimanyu’s mom: Hamare Abhimanyu ki choice buri kaise ho sakti hai. Sundar ke sath dimag wali bhi hai. Aashish ki tarah nahi, jiske lie mana kia hai wahi baar baar bole ja raha hai.

Aashish: Arey! Sorry na yaar. Main thoda jyada excited hu.

Abhimanyu’s dad: Ab mat bolna kuch bhi aisa.

Aashish: Thik hai.

Teeno nashte ka saman leke wapas jate hain Aakansha aur Abhimanyu ke paas.

Aakansha: Arey! Aunty! Ye sab kya hai? Main bas aapse milne aayi hu.

Abhimanyu’s mom: Han. Ye sab islie hai ki ab tum aati raho yahan par aur Abhimanyu ke sath nahi, akele bhi.

Aakansha: Ji! Bilkul.

Abhimanyu’s mom: Tumhe pata hai teen ladkon ke beech me rehna kitna mushkil hai. Agar beti hoti to uski saheliyan aati rehti milne.

Abhimanyu’s dad: Han beta. Shopping ke lie to tum hi leke jana ab ise, mera picha chhutega.

Aakansha smile karti hai.

Abhimanyu’s mom: Dekh rahi ho, bas ye to picha chhudane ka hi sochte hain hamesha.

Aakansha ko Abhimanyu ke mom dad ki ye cute nok jhok apne mom dad ki yaad dila rahi hai. Wo khush hai ki jaisi family me wo reh rahi hai, waisi hi family hai Abhimanyu ki bhi. Jahan parents bacchon ke dost banke rehte hain, unse apni pareshaniyan apne dukh share karte hain. In sab se milke Aakansha ka mann kar raha hai ki wo ab apne ghar pe bhi sabko bata de. Par use abhi to thoda sabr karna hi padega.

To sab log baate kar rahe hain, Aashish ki bewakoofiyan chalu hain. Thodi der baad, Abhimanyu ki mom kehti hain.

Abhimanyu’s mom: Abhimanyu! Jao Aakansha ko ghar dikha do.

Abhimanyu: Okay! Maa.

Abhimanyu aur Aakansha dono ghar dekhne chale jate hain. Chalte hue dono baat kar rahe hain.

Abhimanyu: To kaisi lagi meri family?

Aakansha: Tumhare jaisi hi.

Abhimanyu: Means buri lagi?

Aakansha: Tum mujhe bure lagte ho kya?

Abhimanyu: Nahi lagta?

Aakansha: Nahiii… bure kyun lagoge jab main tumhe shadi ke lie han bol chuki hu.

Abhimanyu: (making a sad face) Par wo to bolti nahi jo mujhe sunna hai.

Aakansha smile karti hai aur bolti hai, “Mujhe tumhare ghar wale pyare lage. They are sweet.”

Abhimanyu: Aur main?

Aakansha: Tum tumhare ghar walon ke jaise hi ho.

Abhimanyu: Means pyara?

Aakansha: (smiling) Han.

Abhimanyu: Pata hai pyara kon hota hai?

Aakansha: Hmm. Jisse pyar karte hain.

Abhimanyu: To tum karti ho na?

Aakansha: Kya?

Abhimanyu: (apne room ka door kholte hue) Tum nahi bologi pata hai mujhe.

Aakansha smile karti hai.

Abhimanyu: Ye dekhiye madam. Ye hai mera room, jo aapka ho jaega shadi ke baad.

Aakansha room dekhti hai, room ache se maintained aur decorated hai.

Aakansha: Tumne aaj ke lie hi ye room aisa kia hai, ya ye room aise hi rehta hai?

Abhimanyu: Han, waise to thoda messy rehta hai. Par main kar leta hu thik.

Aakansha: Okay! Ab chale niche sab hamara wait kar rahe honge.

Abhimanyu: (Aakansha ka hath pakadte hue) Unhone hume time dia hai, kuch der sath me rehne ka.

Aakansha: Par unhe to kuch pata nahi hai na.

Abhimanyu: (Aakansha ko apni taraf kheenchte hue) Han. Pata nahi hai, par mere mann me kya hai ye to unhe pata hi hai. To wo nahi aaenge.

Aakansha: Aur aa gaye to?

Abhimanyu: (Aakansha ki waist ko pakadte hue) To hum unhe bata denge, ki maine tumhe abhi propose kia hai, aur tumne han bol dia hai.

Aakansha: (smiling) Tum bhot chalu ho.

Abhimanyu: (smiling) Wo to hu. Par abhi tum chup raho thodi der, mujhe meri Kanshu ke paas rehne do.

Aakansha: (smiling) Abhiiii!

Abhimanyu Aakansha ke honthon par ungali rakh deta hai, aur bolta hai, “Shhhh!”

Aakansha ab chup hai, Abhimanyu use dekh raha hai. Aakansha ko leke wo mirror ke paas jata hai, Aakansha ko mirror ke samne khada karke khud Aakansha ke piche khada ho gaya hai.

Abhimanyu: Kaise lag rahe hain hum dono Kanshu?

Aakansha smile karti hai aur thoda sharmati bhi hai.

Abhimanyu: Jab shadi ho jaegi na to hum dono yahin isi mirror ke samne tyar hua karenge roz, aur dono sath me jaya karenge, tab na main Aashish se bike le lunga apni, aur tumhe baitha kar le jaya karunga.

Aakansha: Nahi. Usse bike mat lena. Ab use usi ke paas rehne do. Tum koi aur bike le lena. Ya agar usse bike leni hai to pehle use koi nayi bike lake dena.

Abhimanyu: Arey! Tum to mere paise lagwane pe tuli ho.

Aakansha: Han to. Wo tumhara bhai hai. Use bike lake dena pehle, uske baad lena usse bike.

Abhimanyu: Thik hai, le aaunga bike uske lie. Aisa lag raha hai wo mera nahi tumhara bhai hai.

Aakansha: Bhai nahi to kya? Devar to hai.

Abhimanyu: Hehe! Acha madam. Aur main kon hu aapka?

Aakansha: Tum to Abhimanyu ho na.

Abhimanyu: Shaitan ladki!

Abhimanyu Aakansha ko piche se hi hug kar leta hai. Dono ek dusre ko mirror me dekh rahe hain. Abhimanyu puts his chin on Aakansha’s shoulder. Then he puts her hairs aside and kisses on her cheek. Aakansha smiles, look downwards for a few seconds. Abhimanyu kisses on her ear. Aakansha closes her eyes. Abhimanyu whispers in her ear, “Will you be my wife Kanshu?” Aakansha nods her head in “Yes” and smiles. Aakansha turns towards Abhimanyu and pushes him back.

Abhimanyu: Ouchh!

Aakansha: (smile karte hue) Ab chale?

Abhimanyu: Chalna hai?

Aakansha: Sab wait kar rahe honge na.

Abhimanyu: Hmmmm.. chalo. Itna acha chance jane de rahi ho tum.

Aakansha Abhimanyu ko ghurti hai, Abhimanyu dhire se hasta hai. Dono niche jate hain wahan sab Aakansha se baate karte hain, fir sab lunch karte hain, aur thodi der baad Aakansha sabse vida leti hai.

Abhimanyu’s mom: Aakansha beta aati rehna.

Aakansha: Ji aunty.

Abhimanyu’s dad: Kisi din main aaunga tumhare hospital.

Aakansha: Zarur uncle.

Aashish: Aap jab permanently yahan jaogi na, tab hum bhai ko milke pareshan kia karenge.

Sab Aashish ko ghurte hain. Aashish sorry bolne hi wala hai ki Aakansha bolti hai.

Aakansha: (smile karte hue) Okay! Aashish. Jab main permanently yahan aa jaungi, tab hum dono milke Abhimanyu ko pareshan kia karenge. Aur kabhi Abhimanyu tumhe pareshan kare to mujhe bata sakte ho.

Dono hath milate hain.

Aashish: Yes, deal done Bhabhi!

Aakansha dhire se hasti hai. Abhimanyu Aashish ko chanta dikhata hai. Aashish Abhimanyu ko daant dikhata hai.

Abhimanyu’s mom: To kab aa rahi ho permanently yahan par?

Aakansha Abhimanyu ko dekhti hai, aur Abhimanyu mom ko dekhta hai, ki wo kya bol rahi hain.

Abhimanyu’s mom: Beta! Isne tumse kuch kaha hai ya nahi pata nahi, par hume tum pasand ho aur hum wait kar rahe hain tumhare yahan bahu banke aane ka.

Aakansha: (blushes) Ji..

Abhimanyu ki mom Aakansha ko hug kar leti hain. Abhimanyu piche khada hua smile kar raha hai. Abhimanyu ki mom Aakansha ke maathe par kiss karti hain, Aakansha mom aur dad ke pair chhuti hai aur sabko “Bye!” bolkar Abhimanyu ke sath chali jati hai.

Abhimanyu ke ghar walon ko aakansha ke ghar aane ka intezaar ab besabri se hai, kyunki Abhimanyu ko to Aakansha pasand thi par ab usse milke Abhimanyu ke ghar wale bhi Aakansha ko pasand karne lage hain. Lekin abhi Aakansha ke ghar par kisi ko Abhimanyu ke bare me nahi pata hai. Isilie Abhimanyu ki taraf se sab okay hone ke baad bhi dono ki gaadi station par aane me thoda time aur laga sakti hai. Par aap kahin mat jaiyega, hum se jude rahiyega. Kyunki kahani me abhi aur bhi chize baki hain. So, stay connected with us.

Next episode of this story will be published tomorrow, at the same time. If you are enjoying our story then please, comment, like and share..
And please like and follow our page, “Talking Hearts.”

Stay blessed.

Feel the Love ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: