Love Struck!

Episode-6

Pichla episode yaad hai na? Jisme Abhimanyu ki gaadi patari pe aate aate atak gayi thi. Hua tha ye ki baate hone lagi thi dono ki, ki tabhi Abhimanyu ne Aakansha se puch lia ki kya wo use Facebook pe friend request bhej sakta hai. Aur fir kya tha? Bas hamari heroine, jo gussa jyada karti hain unhe gussa aa gaya. Aur fir pure raste baat nahi ki Abhimanyu se. Abhimanyu bechara muh latkaye dekhta raha Aakansha ko pure raste. Par bas ek kaam acha hua, ki jate jate han kar gayi wo request bhejne ke lie. Par ye han, normal thi ya gusse me karke gayi thi, ye Abhimanyu samajh nahi paya. Aur ab confused hai ki kya kare. Par I think, use chance le lena chahiye. Ek request hi to hai, itni bhi badi baat kya hai, jo itna soch raha hai. Par Abhimanyu aur meri soch milti to baat hi kya thi. Dekhte hain ki aage wo kya karta hai.

Sham ho chuki hai. Abhimanyu ghar aa gaya hai. Mom ne coffee di hai use aur wo sofe pe beth ke TV dekh raha hai. Tabhi Aashish bhi aata hai.

Aashish: Aur bro! Kya haal hai? Sab badhiya chal raha hai?

Abhimanyu: Han. Thik hi hai.
Aashish: Shakal se to nahi lag raha. Aur ye kya chala ke betha hai news views, tujhe romantic songs sunne chahiye.

Abhimanyu: (ghurte hue) Ab agar koi ladki pasand aa gayi to pure din romantic songs sununga kya?

Aashish: Kya problem hai sunne me? They are nice.

Abhimanyu: (mom ki taraf dekhke) Maa aap ise kahan se utha ke laye the? Kabhi sensible baate nahi karta ye.

Abhimanyu’s mom: Ise kachre ke dabbe se aur tujhe mandir ke bahar se.

Aashish: Haha! (movie ka dialogue bolte hue, overacting karte hue) Maa means dono hi aapke khoon nahi hain? Ye kya bata dia aaj maa tumne?

Abhimanyu: Dekho zara ise. Kahin se nahi lagta ki ye college me padhta hai.

Aashish: College me pdhne se acting ka kya connection hai?

Abhimanyu: (hath jodte hue) Tu chup kar bhai.

Abhimanyu’s mom: Tujhe kya hua hai aaj? Tera mood kyun off hai?

Aashish: Dekha maa ko bhi laga.

Abhimanyu stares at Aashish. Aashish puts a finger on his mouth.

Abhimanyu’s mom: Arey kya hua? Bolega?

Abhimanyu: Maa wo.. Aakansha hai na.

Aashish: Dekha maa, maine bola tha.

Abhimanyu fir se ghurta hai.

Aashish: (puts finger on mouth again) Bol bol.

Abhimanyu’s mom: Tu chup kar thodi der Aashish. Bol tu. (Abhimanyu ko ishara karte hue)

Abhimanyu: Actually maa.. main ye soch raha tha. Actually, wo mujhe Facebook pe mili ti.

Abhimanyu’s mom: Hmm fir.

Abhimanyu: To main soch raha tha ki use friend request bheju ya nahi?

Mom kuch bolti, itne me Aashish zor zor se hasne laga.

Aashish: Hahahaha! Bro ab tu bata, tu kahan se aaya hai? Friend request me itna soch raha hai. Maa 10 saal baad shadi karega ye.

Jis chaku se Abhimanyu ki mom sabzi kaat rahi thi, Abhimanyu wo chaku leta hai aur Aashish ko dikhata hai.

Abhimanyu: Dekh, agar ab tu chup nahi betha na to ye tere pet me jaega.

Itne me maa Abhimanyu se chaku le leti hai.

Abhimanyu’s mom: Tum dono baad me ladna. Aur ye sahi to bol raha hai. Request bhej de, accept karni hogi to kar legi, nahi karni hogi to nahi karegi.

Abhimanyu: Par maaa.. kahin main jaldi to nahi kar raha na. Kahin wo ye na samjhe ki main jyada hi..

Itne me Aashish fir bolta hai.

Aashish: Desperate hai.

Maa Aashish ko ghurti hai ab. Aashish fir se muh band kar leta hai.

Abhimanyu’s mom: Dekh, teri baat ho rahi hai na usse roz. To bhej de request, use jab sahi lagega wo tab accept kar legi. Aur jab bhi accept ki, tujhe ye samajh aa jaega ki ab wo tujhse dosti aage badhana chahti hai. Samajh gaya?

Abhimanyu: Hmmm.

Abhimanyu’s mom: (Aashish se) Aur tu use pareshan karna band kar.

Aashish: Kahan kar raha hu pareshan? Sab mujhe hi bolte hain.

Chalo mom se baat karke hi, par Abhimanyu ko samajh aa gaya ki use kya karna chahiye. So, wo phone leta hai, Aakansha ki profile kholta hai aur request send kar deta hai. Aur sochta hai, “Ab tum jo bhi socho, request to bhej di maine.”

Is sab ke kareeb ek ghante baad Abhimanyu ke dad ghar pe aate hain. Unke ghar me enter karte hi, Abhimanyu ke phone me ek notification aati hai. Jise dekh ke wo bhot jyada khush ho jata hai. Aur sofe pe khada ho jata hai.

Abhimanyu: (chillate hue) Maa. Friend request accepted.

Aashish bhi ye sunke sofe pe chad jata hai. Dono bhai gale lag jate hain, aur sofe pe hi koodne lagte hain. Maa bhi ye sab dekh khush ho rahi hai. Abhimanyu ke dad kuch samajh nahi pate ki ye ho kya raha hai, bas sochte hain ki ye kis pagalkhane me aa gaya main. Aur ye kya? Sofa toot gaya.

Abhimanyu’s dad: (gusse me chillate hue) Nalayakon ye kya kia tumne?

Abhimanyu aur Aashish dono ek sath bolte hain, “Sorry papa.”

Abhimanyu’s dad: Ye kar kya rahe the tum sofe pe? Itne bade ho gaye ho par bachpana nahi gaya hai abhi tak.

Tabhi Abhimanyu ki mom sari baat batati hain.

Abhimanyu’s dad: Iski love story mujhe bankrupt kara ke chhodegi. Kal bulana carpenter ko, dekhega wo aake ki ye repair ho sakta hai ya nahi. Aur han ab khushi hi mat manate rehna, baat cheet shuru kar de usse. Hume teri shadi jaldi karni hai.

Aur ye kehke dad bhi muskura dete hain.

“Friend request accepted.” Hahaha! Bechare Abhimanyu ke papa, abhi request accept hone pe ghar ka sofa toot gaya. Pata nahi jab tak shadi hogi tab tak kya kya repair hone jaega ghar se. Par jo bhi ho, Abhimanyu ke ghar se support bada acha mil raha hai use. Aise parents to kismat se hi milte hain.

Ye sab to thik hai, par ab tak ye nahi dekha hai ki Aakansha ke ghar ke kya haal hain. Chaliye aaj us taraf bhi nazar maar li jaye.

Aakansha is time apne room me hai aur ye sirf uska room hi nahi uski didi ka room bhi hai. Dono behen, room share karti hain. Office se aane ke baad dono room me hi bethi hui hain, Aasha apne office ka kaam kar rahi hai, aur Aakansha leti hui hai. Tabhi use yaad aata hai ki aaj subah kya hua tha, aur wo uthke phone leti hai aur dekhti hai. Jo soch ke phone hath me lia tha, wo hi hai. Request aayi hui hai Abhimanyu ki, jise dekh ke wo muskurati hai. Phone me dekhke muskurata dekh, Aasha use tokti hai, “Kya hua? Kyun smile kar rahi hai phone ko dekh ke?”

Aakansha: Kuch nahi. Bas aise hi.

Aasha: Hmmm. Bas aise hi.

Aakansha: Kuch nahi bas ek joke aaya hai.

Aasha: Okay!

Aakansha Abhimanyu ki request accept kar leti hai, ye to aapko pehle hi pata chal gaya tha. Ab wo Abhimanyu ki profile check kar rahi hai. Sab kuch dekh rahi hai, uski profile pics, uske shares, uske likes, use kya pasand hai aur kya nahi. Aur dekhti hai ki Abhimanyu ne ab tak use jo bhi bataya hai wo sach hai. Dekhti rehti hai aur smile karti rehti hai. Aur sath me ye bhi soch rahi hai, ki maine didi se jhooth kyun bola, bata deti sach. Use ye samajh nahi aa raha hai. Par mujhe to sab samajh aa gaya hai. Wo jis connection ki baat Abhimanyu ne kahi thi, wo connection ab jud raha hai, fark bas itna hai ki Abhimanyu ko pata hai aur Aakansha ko abhi ye sab realise nahi hua hai. Waise main ye sab bata rahi hu aapko, itne me Aakansha ki didi ne Aakansha se kuch keh dia, dekhte hain kya?

Aasha: Waise Chutki. Ab kya scene hai uska?

Aakansha: Kiska?

Aasha: Wahi. Abhimanyu, ab bhi pareshan kar rahi hai tu use?

Aakansha: (smiles) Nahi. Ab to nahi kar rahi. Even meri baat bhi hui usse.

Aasha: Acha.

Aakansha: Han. Wo sorry bol raha tha.

Aasha: Hmm. Usse kehna, ja maaf kia.

Aakansha: Hehe! Bol dungi.

Aasha: Roz milta hai wo?

Aakansha: Han. Mostly mil hi jata hai.

Aasha: Waise ek baat bolu tujhe?

Aakansha: Han bolo na.

Aasha: Waise main khud hi mana karne ka soch rahi thi use, acha hua usne hi mana kar dia. Wo mana nahi karta to main hi kar deti.

Aakansha: (shocked hoke) Kyun? Kya kharabi hai usme? (fir khud ko sambhalte hue, normal tone me) I mean, kya kharabi hai?

Aasha: Arey wo kuch jyada hi emotional lag raha tha mujhe. Mujhe aise ladke nahi pasand.

Aakansha: (fir se shock me) Par kyun?

Aasha: Arey main nahi jhel sakti ye over melodrama. Tujhe to pata hai, ki kaisi life chahiye mujhe. Mujhe job karni hai, kaam karna hai, apni life banani hai, foreign jana hai.

Aakansha: Acha to, wo to usse shadi karke bhi hota. Uske parents ne kisi bhi chiz ke lie mana nahi kia tha.

Aasha: Han par maine usse pucha tha, ki foreign jane ke kitne chances hain? Aur agar mujhe chance mila to mere sath chaloge?

Aakansha: To kya bola usne?

Aasha: Bola ki main apne parents ko chhod ke nahi ja sakta. Agar gaya to unke sath jaunga nahi to nahi. I mean apne parents se emotionally connected hai. Aur mujhe aisa ladka chahiye jo thoda free rahe in sab chizon se.

Aakansha: Fir to acha hi hua, usne mana kar dia. Aur ye sab mujhe ab bata rahi ho, pehle nahi bata sakti thi jab main use pareshan kar rahi thi?

Aasha: Arey bola to tha ki use pareshan mat kar.

Aakansha: Hmm. Thik hai.

Yahan pe dono beheno ki baat to khatam ho jati hai, par Aakansha ke mann me aata hai, “Maine galat hi use itna pareshan kia. Wo sahi bol raha tha ki connection feel nahi hua. Aur main faltu me uspe gussa ho rahi thi. Mujhe use sorry bolna chahiye. Par main karu pehle message? Ya use karne du?”

Aakansha yahi sab soch rahi hai ki uski mom ki awaz aa jati hai, wo dono beheno ko dinner ke lie bula rahi hain. Aakansha aur Aasha dono mom ke bulane pe chale jate hain.

Hmmm. To dhire dhire hi sahi, par taar jud rahe hain. Aakansha ko bhi lagta hai ki use Abhimanyu se baat karni chahiye aur Abhimanyu ko bhi lagta hai ki use Aakansha se baat karni chahiye. Par kon pehle message karega ye dekhna hoga. Uske lie aap bhi hum se apne taar jode rakhiye and stay connected with us.

If you liked our episode then please, comment, like and share..

Stay blessed.

Feel the love ❤

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Powered by WordPress.com.

Up ↑

Isha Yoga Meditators Commune

Intensify Your Sadhana With Sadhguru Jaggi Vasudev

Little Fears

Tales of humour, whimsy and courgettes

The Unknown Life

All about life

%d bloggers like this: